Read Koonzime Luc 6 Bible Online

Luc 6 - Koonzime bible

Luc 6

¹Ɨ́ gúú móhó sábat, Yésʉs, bé le ompʉ́n bé, bé á be ó lɨ́ ecɨɨ témé bipemé méde. Ompʉ́n bé nzě nyɛl ébúʼo mítú mí mpíha ɨ́ bipemé byaá, goblɔɔ, mwâʼlɔɔ mpúmó, nzě gɔ́na le ede.

²Nó bʉ́ʉ́ óFarizyɛ̂n, bé á nze dî e bé ó: «Bɨ̌n bé lɨ́ esâ sá dí ajala le esyɛ́ɛ ɨ́ móhó sábat ɨ́ yé?»

³Yésʉs ntɔ̂ʼ yala e bé ó: «Bɨ̌n bé á bé así láǎ mpʉ̌ David á sâ ɨ́ jɔʼ nzâ á mɛ̂r bé e sɔ́má yé yɨ́ ɛ́?

⁴Nzê bɨ̌n bé agʉ́a ó, bé á si nî mpáh Nzyɛ̌m ɛ̌? David bánǎ nʉa bíblêr byé á nɛŋɔɔ lɨ́ edwě Nzyɛ̌m kûm bí, de yʉ́ʉ́. Píe tɨ̂, nye nzě pɛ̂ʼ bʉ̂r ó sɔ́má yé, bɨ́bɛ̂h nzě de. Tó kœb ó, mʉr ngwár ɨ́ sɔ́má yaá, nye á bé ajala le ede bíblêr byaá, njɨ opara mé Nzyɛ̌m bé omér.»

⁵Yésʉs ntɔ̂ʼ lɛ́ɛ e bé ó: «Mwân mé Mʉr ó dí njwɨ́ɨ sábat.»

⁶Ɨ́ gúú móhó sábat, Yésʉs ntɔ̂ʼ nî ɨ́ nyʉ́ʉ́ mpáh minjɨʼla, nzě lɛ̂ʼle bʉ̂r tɨ̂. Yé á be ó e nyʉ́ʉ́ mʉ̂r á be e mbó éjʉ́m wé ɨ́ swâm swâm nyá.

⁷Nó olɛ̂ʼla o métié, bé l'oFarizyɛ̂n, bé á be ó lɨ́ etirwǒ Yésʉs, lɨ́ edwɛ̂ʼ nkʉ̂ nye ótiʼ mʉ̂r waá ɨ́ móhó sábat. Nyé ósâ nó wá, bé opur nyê.

⁸Tó kœb ó, Yésʉs á be ó lɨ́ ekʉ́ gʉ́a bíjwɨʼ byɔ́ɔ́ bíbyɛ̂h. Nye e mʉrʉ̂m á be e mbô ɨ́ swâm swâm nyá ó: «Gbɔlwaa sí. Tyɛ́bɨ́ɨ́ tîtyěl témé bʉr bâ.» Nye ntɔ̂ʼ gbɔlwa sí, tyɛ̂b tîtyěl.

⁹Yésʉs nzě lɛ́ɛ e bé ó: «Me lɨ́ edî bɨ́n ó: le embɨa, le ebébe, etié gá lɨ́ná, lé kamle ó, mʉr sâʼ yé ɨ́ móhó sábat? Le etiʼ mʉ̂r, le ejʉ̂ mʉ̂r: lé kamle yé?»

¹⁰Nye kʉ́ nzě bɨʼ bɨ́bɛ̂h mejwôʼlʉ. Nye e mbêl ó: «Syɛ́mɨ́ɨ́ mbó gô. Mbêl ntɔ̂ʼ sâ nó, mbó mû nye mbɨ̂mbɨá.»

¹¹Bʉ́ʉ́ bʉ̂r o b'á bee nó bá, bê kʉ́ nzě jóʼo mébúʼ. Bé ntɔ̂ʼ lwibla lɨ́ esáǎ mbi ébébe bé dí e nkul esâ Yésʉs wɨ́.

¹²Jɔʼ yaá, Yésʉs ntɔ̂ʼ bére lɨ́ ecwɨ̂ʼ kʉ́, lɨ́ etó jɨʼla e Nzyɛ̌m. Nye á si lɛŋ pum ntinɨ̂ gʉ̂, njɨ lɨ́ ejɨʼla.

¹³Nó ɨ́ jɔ̌ʼ mɛ́n wé á lɔ́ma yɨ́, nye ntɔ̂ʼ jébe ómpʉ́n bé, ntɔ̂ʼ twâr bʉ́ʉ́. Bím nyé á twâr yɨ́, bʉr kám le obá. Nye ntɔ̂ʼ jɨ̂jebe bé ó, bʉr o mílʉ́mlʉ́ bé.

¹⁴Nye á twâr ó, Simon, mʉr nyé á jwɨr “Pétrus” nyá, bé e mɨ́ɔɔ́ wé, André, ndu e Jacques, Yʉánɛs, Philippe, Barthélemy,

¹⁵Matthieu, Thomas, Jacques, mwân mé Alfê, Simon, mʉr á jébɔɔ ó, “kɔmlʉ sí” nyá,

¹⁶bé e Yʉ́da, mwân mé Jacques, le Yʉ́das Iskariôt, mʉr á bɛ́ma nye nyá.

¹⁷Jɔ̌ʼ Yésʉs, bé le ompʉ́n bé, bé á sulo lɨ́ ecwɨ̂ʼ, pyálɔɔ̌ gúmó dí ɨ́ bɛɛ́ɛ yɨ́, bê nzě bɔma le ompʉ́n ɨ́ buo buo. Yé á be ntémé ó le entumo e bʉ̂r. Bâʼ á duho ó ɨ́ Yerʉ́zalɛm ndu e mekwár mé sí Yʉ́da. Bʉ́ʉ́ duho bínkana bibá byé á be lɨ́ ebʉ́m é mâŋ bí, Tîr e Sidɔ̂n.

¹⁸Bé á nze ó, bé jôʼlaa milɛ́ʼlá mé Yésʉs, le enzě sáa ntémé ó, nye pɛ́ʼɛɛ mekpaa mɔ́ɔ́. Nye á si tiʼ bʉr o mímbɨ́a mísísǐm, myé á nzɨnzamra bá.

¹⁹Mʉr nyɨnyɛ̂h ɨ́ sɔ́má bʉ̂r baá á be lɨ́ esáa édǐ kúna e né ɨ́ lɔ̌b nkûl á duduho ɨ́ nye, nyé á be e né ɨ́ nyʉ̂l nyɨ́. Nye á si tiʼ bɨ́bɛ̂h.

²⁰Nó nyé á nze dwɛ̂ʼ nko ómpʉ́n bé, bé á be yɨ́, nzě lɛ́ɛ e bé ó: «Metyɛʼ me mpóm, mé díʼee e bɨ̌n, baántéʼenteʼe o bʉ̂r. Mpóʼo mé Nzyɛ̌m á tyélɔɔ ó, lɨ́ esú é bʉ̂r o dí mpʉ bɨ́n bá.

²¹Metyɛʼ me mpóm, mé díʼee e bɨ̌n, bʉr o dí ejóʼo ménza ɨ́ báánâʼ bá, ebě, bɨ̌n bé óde, díle. Metyɛʼ me mpóm, mé díʼee e bɨ̌n, bʉr o dí ejɨ ɨ́ báánâʼ bá, ebě, medwé mɨ́n, mé ókǎ sûʼla ó bisʉhʉʉ.

²²«Bɨ̌n bé e metyɛʼ me mpóm ɨ́ jɔʼ bʉ̂r nwím bɨ́n yɨ́, le ɨ́ jɔʼ bé pɨ́m bɨ́n, pya bɨ́n, le eláa bɨ́n ɨ́ sɔ́má ósyɛ̂l bé ébébe ebe bɨ́n dí ebúʼla Mwân mé Mʉr yɨ́.

²³Sohaa gá ɨ́ dʉ́o laá. Lyáháá gá ɨ́ lɔ̌b bísʉhʉʉ, ebě, myɛ́na mɨ́n, mé ɨ́ buo. Mé ó komá ɨ́ jʉ́o kʉ́. Bimpám bi bʉ̂r o dí ebene bɨ́n bá, byé á bɨbe ó lɨ́ esâ bísyɛ́ɛla bimpwár byaá, lɨ́ etíble ógwíha o mílɔ̌b mé Nzyɛ̌m.

²⁴Nkoó, nye ó e bɨ̌n, okúmá ó bʉ̂r, ebě, bɨ̌n bɨ́ boó bi nkûl ɨ́ miléme lɨ́ okúm le ogbaa wɨ́n.

²⁵Nkoó, nye ó e bɨ̌n, bʉr o mû sí díle bá, ebě, bɨ̌n bé ódi ɨ́ nza. Nkoó, nye ó e bɨ̌n, bʉr o dí ejo ɨ́ báánâʼ bá, ebě, bɨ̌n bé ójɨ médwê mpʉ míkúho. Bɨ̌n bé ótíme.

²⁶Nkoó, nye ó e bɨ̌n ɨ́ jɔʼ bʉ̂r dí ebuú sêʼle bɨ́n yɨ́, ebě, bimpám byɔ́ɔ́, byé á sɨ̂seʼle ogwíha o mílɔ̌b o bíbɛr ó nó.»

²⁷«Ɨ́ páʼ wɨ́n, bʉr o dí ejóʼo mé bá, mě lɛ́ɛ́ bɨ́n ó: kpɛlɨɨ gá ontɨ̂m le obɨn bɨ́n. Cwɨ́áá gá e bʉr o dí enwim bɨ́n bá.

²⁸Sʉʼoo gá bʉr metyɛʼ me mpóm ɨ́ jɔʼ bé dí esyɛm bɨ́n yɨ́. Bʉ̂r sá bɨ́n ebébe nɛ́ɛ: jɨʼlaa gá lɨ́ esú lɔ́ɔ́!

²⁹Mʉ̂r ŋmɛ́h gó bɛ̂h ɨ́ lɨ̂ʼ émúʼ nɛ́ɛ: bírɨ́ɨ́ nyé ó, nye ŋmɛ́hɛɛ go ntémé lʉ́ʉ́. Mʉ̂r dɛ́ʼ gó kʉ̂r nó, bírɨ́ɨ́ nyê, nye nʉ́aa ndu e dur.

³⁰Mʉr nyɨnyɛ̂h jáʼ gó sɔ̂ʼ nyá, bɨ̌n e dwé nyé yǎ. Ató dû bísá bʉ̂r, bé á dɛn bí.

³¹Mpʉ bɨ́n dí egwɨ̂m ó, bʉr sâʼ bɨ̌n yɨ́, sáʼ gá ntémé bé nó.

³²«Yé bé bɨ̌n kpɛl ó, njɨ baá kpɛ́l bɨ́n bá nó, bɨ̌n bé lɨ́ enkɛ́ɛ ményʉ̂l ó, bʉr sêʼlaa bɨ̌n ɨ́ yé ɛ́? Damá jóʼo ósyɛ̂l o mísyóm, bé lɨ́ ekpɛl ntémé baá o dí ekpɛl bé bá.

³³Yé bé bɨ̌n cwɨ́á njɨ e bʉr o dí ecwɨ́a e bɨ̌n bá nó, ayɨ́ nkɛ́ɛ gá menyʉ̂l ó, bʉr sêʼlaa bɨ̌n. Damá jóʼo osyɛ̂l o mísyóm, bé lɨ́ esâ ntémé nó.

³⁴Yé bé bɨ̌n kʉl bímɔnɨ́, dwě njɨ bʉr o ngá báʼǎ kʉl bɨ́n byaá byɔ́ɔ́ bá nó, ayɨ́ nkɛ́ɛ gá menyʉ̂l ó, bʉr sêʼlaa bɨ̌n. Osyɛ̂l o mísyóm, bé lɨ́ ekʉl bʉ́ʉ́ ósyɛ̂l o mísyóm mɔnɨ́ ó, bé nkʉ̂ báʼǎ nʉa bímɔnɨ́ byɔ́ɔ́ byaá píe tɨ̂.

³⁵Sâ gwár, ɨ́ wɨ́n pâʼ, kpɛlɨɨ gá ontɨ̂m le obɨn bɨ́n. Sáʼ gá bé embɨa. Kʉlɨɨ gá bʉr mɔnɨ́, akǎ bûʼla ó, bé óbwóolo bɨ́n yǎ. Bɨ̌n bé ókʉ́ bi myɛ́na tɨ̂! Nó ó bɨ́n óbe bwán mé Nzyɛ̌m dí Lʉ́ bísá bíbyɛ̂h nyá yɨ́, ebě, nye lɨ́ ecwɨ́a e bʉr o dí adwe nyé nzyǒo bá ti e bʉr ó jélé.

³⁶Jɨ́ʼɨ́ɨ́ gá bʉr nkoó mpʉ Sɔ́ŋ wɨ́n dí ejɨ̂ʼ bɨ́n yɨ́!»

³⁷«Ayɨ́ dwe gá bʉr mebě, ebě, Nzyɛ̌m ámû jaá dwe bɨ́n mebě tɨ̂. Ayɨ́ dwe gá bʉr mpono. Nzyɛ̌m nkʉ̂ be, adwe bɨ́n mpono. Pɛʼɛɛ gá bʉr bibaa bí ébébe bɨ́n á niʼe bé bí, Nzyɛ̌m nkʉ̂ pɛʼ bɨ́n byaá nyé á niʼe bɨ̌n bí.

³⁸Dwéʼ gá bʉr bisâ, bɨ̌n ntémé bé ódweŋɔɔ byê. Nzyɛ̌m ójwɨʼ bɨ́n byǎ e kǎr dí ɨ́ bwǎʼ mo yɨ́. Nye ókaale bɨ́n byǎ ó, le esʉ, le edine, le esʉ, le edine, gúú pâʼ tɨ̂ʼ swɨɨ sí. Bím bɨ́n dí ekaale bʉ́ʉ́ bʉ̂r yɨ́, bím yaá ntémé ó nyé ngá kaale bɨ́n yɨ́.»

³⁹Yésʉs á si baʼa lwib e bé ɨ́ nzɨ̌ bikɨkɛna. Nye ó: «Ántím, nyé abe e nkul etɨ́e nyʉ́ʉ́ ántím ɨ́ nzɨ̌. Nyé sá nó wá, bɨ́bɛ̂h obá, bé ólʉ́ŋa ɨ́ bɨ́.

⁴⁰Mpʉ́n antaa lɛ̂ʼla wé ɨ́ dúu. Sâ gwár, nyé sí jɨ̂ʼ, ɨ́ jɨ̂ʼ, jɨ̂ʼ, yé mû nye ɨ́ lʉ̂ ɨ́ sɨ́lɨ́lɨ́ nó, mpʉ́n waá ósûʼlǎ dǐ mpʉ mʉ̂r á pa lɛ̂ʼle nye nyá.

⁴¹«Go lɨ́ ebee mâ sâ dí mɨ́ɔɔ́ gǒ ɨ́ dîh nyá, gua yɨ́ɛ apǎ jʉ̂ʼrǎ mbʉ́ŋʉʉ̌ ntinɨ̂ gó dí enkɛ́ɛ ɨ́ díh lô ɨ́ yé?

⁴²Wáǎ mbi gó dí e nkul elɛ́ɛ e mɨ́ɔɔ́ gǒ ó: “Paá nze! Mɨ́ɔɔ́ wǎm, me pɛ́ʼɛɛ go mâ sɔ̂ʼ dí go ɨ́ dîh nyá,” gua yɨ́ɛ apǎ pɛ̌ʼ mbʉ́ŋʉʉ dí go ɨ́ dîh wɨ́ ɛ́? Baányâ-mikóo bâ, tááráá épɛ̌ʼ mbʉ́ŋʉʉ dí ɨ́ díh lô wɨ́! Jɔʼ yaá ó gó ngá bee ɨ́ sʉ́lʉ́lʉ́, pɛ̌ʼ mpǔm dí mɨ́ɔɔ́ gǒ ɨ́ díh yɨ́.»

⁴³«Mbɨambɨa lɨ́, yé abe e nkul egúmo bíbol bi mpúmó. Bǒl lɨ́ agúmǒ mbɨambɨa mpumó.

⁴⁴Mʉ̌r dwidweʼě lɨ́ yɨ́yɛ̂h ó ɨ́ wé mbi mpúmó. Bé abe lɨ́ emwâʼ mpúmó sá lɨ́ esyɛh. Bé abe lɨ́ emwâʼ sɔɔ́ ɨ́ bikpâʼ míkǒl.

⁴⁵Lémé mʉ̂r, wé ó ekʉ̌m, gúmó mʉ̂r tɨ̂ʼ dí ekomo bísá byé yɨ́. Mbɨambɨa mʉr pípyél tɨ̂ʼ ó bisá bí émbɨa. Bɨ́bla mʉ̂r jaá pyél tɨ̂ʼ ó, njɨ byaá bí ébébe. Mbǐ lwǐb mʉ̂r dí elwib mílɔ̌b wɨ́, wé ó dí elɛ̂ʼlě sá dí nye ɨ́ buo buo ɨ́ lémé wé yɨ́.»

⁴⁶«Bɨ̌n bé lɨ́ ejébe mé “Dâ, Dâ”, bɨ̌n yɨ́ɛ akpɛl esâ mpʉ mé dí elɛ́ɛ bɨ́n ɨ́ yé?

⁴⁷Me ólɛ̂ʼle bɨ́n dweʼle mʉ̂r dí enze kwá nyǎm, jóʼo mékǎn mâm, ntɔ̂ʼ dû mé nyá.

⁴⁸Nyě nwɨɨlá ó e mʉr á sumo mbɛ̌r wé nyá. Nye á bɨ̂r bipǎb bi tɨ̂ʼ ó, nyé osí pǎ pû sí, dímle óbɨ́ʼ, kumo lɨ́ ekóʼ énɨ́nɨ́ɨ́. Nye ntɔ̂ʼ tyêl bípǎb lɨ́ ekóʼ laá. Jɔʼ mpɨ́ɨ á ka mamle yɨ́, mpɨɨ nyaá nzě mâʼla ɨ́ mbɛ̌r wé waá. Sâ gwár, wé á bé abîʼ ɨ́ mpɨɨ ɨ́ lɔ̌b mbɨambɨa nzumó nyé á sumo wé nyɨ́.

⁴⁹Mʉr dí ejóʼo mékǎn mâm, adû mé nyá, nyě nwɨɨlá ó e mʉr waá á sumo mbɛ̌r njɨ ɨ́ bibwǎh kʉ́ nyá. Nye á bé apû óbɨ́ʼ, nkʉ̂ tyêl bípǎb lɨ́ ekóʼ. Jɔʼ mpɨ́ɨ á mâʼla ɨ́ bíhaá bípǎb yɨ́, mbɛ̌r wé nɨ̌ ntɔ̂ʼ bîʼ wɨ́wɛ̂h.»