Read Koonzime Luc 9 Bible Online

Luc 9 - Koonzime bible

Luc 9

¹Nó ó Yésʉs á nze jébe ompʉ́n bé kám le obá, nzě dwe bé nkul le jwɨ́ɨ ó, bé sôʼ meleme ɨ bʉr, le etiʼ mímbêl.

²Nye ntɔ̂ʼ lómo bé ó, bé tôʼ le etúnǒ Mbɨambɨa Lɔ́ɔ dí edumo e Mpóʼo mé Nzyɛ̌m wɨ́, le etiʼ mímbêl.

³Nye ó: «Bɨ̌n tó ɨ́ tyen yɨ̂ʼ ó, njɨ e súmu ɨ́ mbô, abe e mimbeʼ. Atô e myah, nkʉ̂ blêr, nkʉ̂ mɔnɨ́. Atô gá e mintɔra mi kʉ́ mímbá.

⁴Mbɛ̌r wɨ́wɛ̂h bɨ́n ngá nî wɨ́, diʼee gá tɨ̂, tó pyâl ɨ́ jɔʼ bɨ́n ngá mɔa, laa nyɨ́haá kwár yɨ́.

⁵Gúmó yɨ́yɛ̂h bʉ̂r ngá bene bɨ́n yɨ́, pɔʼá bɨ́n ngá pʉʼa tɨ̂ʼ ɨ́ nkana yaá wɨ́, bɨ̌n e kúró pím ngá nara bɨ́n ɨ́ mekʉ̌ nyɨ́. Syɛ́ɛla yaá, yé ónwâhle bé ó, bé mû ó ɨ́ mebyaʼ.»

⁶Nó ómpʉ́n, bé á nze ja nzɨ́, tóŋɔɔ mékwár e mekwár mɛ̂h, tô le elɛ́ɔɔ bʉ̂r Mbɨambɨa Lɔ́ɔ, le etiʼɔɔ mímbêl ɨ́ bigúmó bíbyɛ̂h.

⁷Ngóvina Erôd á be ɨ́ jóʼǒ lɔ́ɔ bísá bíbyɛ̂h byé á syɛ́ɛ bí. Nye á bé agʉ́ǎ twehle tɨ̂, ebě, bâʼ bʉ̂r, bé á lɨlɛ́ɛ ó: «Yʉánɛs Ndubʉr, nyɨ́ pah!»

⁸Bʉ́ʉ́, bé ó: «Heʼé, Elie ó dí sí báʼǎ nzě nɨ̌.» Bʉ́ʉ́ ntémé, bé ó: «Heʼé, yé ó nyʉ́ʉ́ ngwíha milɔ̌b swîh á be mélú mé épíhe nyá ô pǎh.»

⁹Erôd nyɨɛ á lɛ́ɛ ɨ́ wé pâʼ ó: «Mɨ́ kʉ́ gʉ́a ó, me á si kʉ tíʼe Yʉánɛs lʉ̂. Nó nyâʼ mʉ̂r dí esâ bísá mé dí ejóʼo bîʼ nyá, nye nzé?» Nye ntɔ̂ʼ sáa ébee nyê.

¹⁰Jɔʼ bʉ̂r o mílʉ́mlʉ́ mé Yésʉs, bé á búla yɨ́, bê nzě lɛ́ɛ nyé sá yɨ́yɛ̂h bé á sâ yɨ́. Nye nzě nʉa bê, tô e bé ɨ́ gúmó bé á to di bé omér yɨ́. Yé á be ó nko kwár bé jɨ́jébé ó, «Bétsɛ́da» yɨ́.

¹¹Sâ gwár, entumo e bʉ̂r, lé á be ɨ́ jʉ̂ʼra nó, lé ntɔ̂ʼ dû nyê. Nó nyé á nze soho bê, ntɔ̂ʼ túnǒ Mbɨambɨa Lɔ́ɔ dí edumo e Mpóʼo mé Nzyɛ̌m wɨ́, le etiʼ mímbêl mímyɛ̂h.

¹²Ɨ́ bíí kʉ̌ʼ, bʉr o mílʉ́mlʉ́ kám le obá nzě nze. Bé e Yésʉs ó: «Bwóóláá éntumo e bʉ̂r lɨ̂, lé swíʼɨɨ, tô ɨ́ mekwár ndu e bipɛr bi dí ɨ́ kúnwo e mɨná gá bí. Yʉ́ʉ́ jɔʼ, bé óbee bíjá ndu e mede. Bé abe e nkul ekǎ di wâ, ebě, mɨná gá bé wâʼ ó ɨ́ lʉá.»

¹³Yésʉs ntɔ̂ʼ yala e bé ó: «Bɨ̌n bʉr o tɨ̂, dwéʼ gá bé mede, bé dêʼ.» Bé e Yésʉs ó: «Bɨ̌h bé wâʼ ó, njɨ e biblêr bitɛ̂n le osú óbá. Nzê bɨ̌h tô bwâm méde lɨ́ esú é bʉ̂r bâʼ bɨ́bɛ̂h ɛ̌?»

¹⁴(Náǎ yé ó, bʉr, bé á be tɨ̂ʼ ó, bʉrʉ̂m e bʉrʉ̂m otɔ́ɔ́sin otɛ̂n.) Yésʉs ntɔ̂ʼ lɛ́ɛ le ompʉ́n bé ó: «Dilɨɨ gá bé sí, mentumo mentumo. Entumo egwár, lé díʼee bʉr mekám métɛ̂n e mpǔʼ.»

¹⁵Bé ntɔ̂ʼ sâ nó, bʉr nzě di sí, mentumo mentumo.

¹⁶Yésʉs ntɔ̂ʼ nʉa bíblêr bitɛ̂n le osú óbá, bɨ̂n mîh kʉ́, nzě dwě Nzyɛ̌m nzyǒo ɨ́ lɔ̌b méde maá, nzě pɛ̂ʼ mê, tímle ómpʉ́n bé, ó bé káa dwe bʉ̂r mǎ.

¹⁷Bʉr bɨ́bɛ̂h, bé á si de, díle. Mede mé á buʼo má, mé á si lóŋlo mekwám kám e mebá.

¹⁸Ɨ́ lʉ́ʉ́ dʉ́o, Yésʉs á be ó lɨ́ ejɨʼla e Nzyɛ̌m nye omér lɨ́ empah. Ompʉ́n bé, nzě pyâl. Nye ntɔ̂ʼ dî e bé ó: «Bʉr, bé lɛ́ɛ́ ó, me nzé?»

¹⁹Ompʉ́n, bé ntɔ̂ʼ yala ó: «Bâʼ, bé lɨ́ elɛ́ɛ ó, go ó Yʉánɛs Ndubʉr. Bʉ́ʉ́, bé ó, go ó Elie. Bʉ́ʉ́ ntémé, bé ó, go ó nyʉ́ʉ́ ngwíha milɔ̌b mé Nzyɛ̌m á boo dwe, ntɔ̂ʼ báʼǎ pah nyá.»

²⁰Nye ntɔ̂ʼ báʼǎ dî e bé ó: «Nó bɨ̌n bɨɛ̌ lɛ́ɛ́ ó, me nzé?» Pétrus ntɔ̂ʼ yala ó: «Go ó Mʉ̌r Nzyɛ̌m á lœm múló mé jwɨ́ɨ nyá.»

²¹Yésʉs ntɔ̂ʼ cɨ̂l bé le egbâ bé mpéné ó, bé l'anyamlě lɛ́ɛ mʉ̂r sâ yaá.

²²Nye nzě lɛ́ɛ e bé ó: «Yé jala ó, Mwân mé Mʉr, nye síaa e mitúú ɨ́ buo buo. Otɔ́má bʉ̂r, ojwɨ́ɨ o mpáh Nzyɛ̌m, le olɛ̂ʼla o métié, bé óbene nyê. Nye ntémé ójʉ́ŋɔɔ. Elú élɛ̂l píe tɨ̂, nyé opah ɨ́ soo.»

²³Nye ntɔ̂ʼ lɛ́ɛ e bɨ́bɛ̂h ó: «Mʉ̂r sí kpɛl édû mé nó, nye bénaa nye mʉr tɨ̂, nye e nkɛ́ɛ́ kolôs yé dʉ́ó lɨ́lɛ̂h. Nye e dú mê.

²⁴Ebě, mʉr kpɛ́l ékamle e twiʼ yé nyá, ódímle yê. Tó kœb ó, waá ngá dwě twiʼ yé lɨ́ esú lâm nyá, ótiʼe.

²⁵Wáǎ nyɔm mʉ̂r dí e nkul edira lɨ́ enʉǎ sí yɨ̂ʼ yɨ́yɛ̂h, kǎ sûʼlǎ tó dímlě twiʼ yé, nkʉ̂ jwɨ́a?

²⁶Mʉr nyɨnyɛ̂h jéʼé mê, jóʼo mílɛ́ʼlá myâm sôn nyá, Mwân mé Mʉr ójéʼe ntémé mʉr waá ɨ́ dʉ́ó nyé ngá nze ɨ́ mentyɛnwa mé, le maá me Sɔ́ŋ wé, le maá bééngeles mé Nzyɛ̌m yɨ́.

²⁷Mě lɛ́ɛ́ bɨ́n lɨ́ otyeetye ó, ɨ́ sɔ́má bʉ̂r o dí wâʼ báánâʼ bá, bʉ́ʉ́ bé ákóʼó dwe, apǎ bee Mpóʼo mé Nzyɛ̌m.»

²⁸Píě Yésʉs á bě sí lwib nó yɨ́, melû mwom nzě laa. Nye nzě nʉǎ Pétrus, bé e Yʉánɛs ndu e Jacques, ntɔ̂ʼ bére lɨ́ ecwɨ̂ʼ, lɨ́ etó jɨʼla e Nzyɛ̌m.

²⁹Jɔ̌ʼ Yésʉs á be, nye mû lɨ́ ejɨʼla yɨ́, mpǒm nyé ndu e mikán myé, byé ntɔ̂ʼ dwira. Bíbyɛ̂h mû kwahaá ɨ́ pumo pumo.

³⁰Kǎ saʼ nɛ́ɛ: bʉ́ʉ́ bʉ̂r obá nzě nyɨ̂n bǎʼ e né, bɨ́bɛ̂h lɨ́ elɛ́ɛla. Bɨ́ɛ, bé á be ó Moyɨ̂z, bé le Elie.

³¹Bé á nyɨ̂n ntémé ó e mentyɛnwa. Bé á be lɨ́ elɛ́ɛla ɨ́ mpʉ̌ Yésʉs ngá dwe ɨ́ Yerʉ́zalɛm yɨ́.

³²Pétrus, bé le osó bé, bé á nyɛɛ be ó ɨ́ jô ɨ́ súgúgú. Píe tɨ̂, bê nzě jɨma, nzě bee méntyɛnwa mé Yésʉs ndu e maá me bʉ̂r obá bé le onɔ́ɔ́, bé á be bá.

³³Jɔ̌ʼ Moyɨ̂z, bé le Elie, bé á be, bé mû lɨ́ edǐ duhǒ gúmó Yésʉs á be yɨ́, Pétrus ntɔ̂ʼ lɛ́ɛ e Yésʉs ó: «Lɛ̂ʼla, yé mbɨa ó, mɨná díʼee gá wâ. Mɨná súmaa gá mpálá, bisaʼ bilɛ̂l: le yô, le yaá mé Moyɨ̂z ndu e yaá mé Elie.» (Nyɨɛ l'agʉ́ǎ sá nyé á lɛ́ɛ yɨ́.)

³⁴Nye mû lɨ́ elwib nó nɛ́ɛ: dwiné nzě búblo bê. Ompʉ́n, bé ntɔ̂ʼ bil bʉ́á lɨ́ ebeě dwiné yaá lɨ́ ebúblo bê.

³⁵Bé kǎ jóʼo ó, lʉ́ʉ́ étyêl lɨ́ eduho ɨ́ dwiné tʉ́ŋlʉ̌ ó: «Nyâ, nye ó mwân wǎm mé mû sí pɛ̂h nyá. Jʉ́jóʼáá gá nye.»

³⁶Jɔʼ twíí nyaá á sil elwib yɨ́, bé á jaa ka bee ó, njɨ Yésʉs nye omér. Ompʉ́n bé ntɔ̂ʼ di ɨ́ jolaaa. Ɨ́ tíl mélû yaá, bé á bé alɛ́ɛ mʉ̂r sá bé á bee yɨ́.

³⁷Dʉ́ó lé á bɔma lɨ́, bê nzě sulo lɨ́ ecwɨ̂ʼ, entumo e bʉ̂r nzě bɔma e Yésʉs.

³⁸Ɨ́ bʉr baá, yé á be ó e nyʉ́ʉ́ mʉ́rʉ̂m. Nye nzě bʉ̂ tím. Nye e Yésʉs ó: «Lɛ̂ʼla, paá beě mpʉ mwân wǎm dí yɨ́. Nye ó etíʼé é mwân lâm.

³⁹Nyě e l'eleme e dí emɨmɛ̂r nyé lɨ́. Ɨ́ bijɔʼ byaá, nye lɨ́ ebʉ̂bʉ bítím. Lé sá nyé ó, mpʉ̌ sá lɛ́ɛ́, nye lɨ́ esílě bʉ̂ʼ. Lé sá ó, lulwaare nyé nyʉ̂l ɨ́ lárádá. Megûl, mé lɨ́ epîpyal nyé ɨ́ num ɨ́ ntomo ntomo. Lé lɨ́ ekʉ́ bî nyê. Lé ɨ́ kɔbla lɨ́ edwih!

⁴⁰Me á be ɨ́ jɨʼla le ompʉ́n bô ó, bé pɛ́ʼɛɛ nye lǎ, bɨ́bɛ̂h kâr, akoʼo.»

⁴¹Yésʉs ntɔ̂ʼ lɛ́ɛ ó: «Bɨ̌n onzyɛ́h ó bʉ̂r o dí abûʼla bâ! Me ókǎ báʼǎ di ɨ́ sɔ́má yɨ́n, tó pyâl ɨ́ yáǎ jɔʼ ɛ̌? Me ódûhwo bɨ́n, tó swîʼ yáǎ sûm ɛ̌? Ntáʼ e mwân gǒ wâ!»

⁴²Mpʉ mwân waá á ka pyâl bǎʼ e Yésʉs yɨ́, eleme ntɔ̂ʼ ntyeŋ mwân ɨ́ guʼ guʼ, nkɛŋ nyé sí. Yésʉs nzě nkáŋla e mbɨ́ǎ sísǐm waá, wé ntɔ̂ʼ duho. Yésʉs nzě tiʼ mwân, ntɔ̂ʼ tímle sɔ́ŋ nyǎ.

⁴³Ekɛ̂n, lé á si swɨɨ bɨ́bɛ̂h ɨ́ nyʉ̂l ɨ́ lɔ̌b mbeá bé á bee baánɨ̂nɨ̂n o bísyɛ́ɛla mé Nzyɛ̌m wɨ́. Bʉr bɨ́bɛ̂h, bé á be náǎ ó lɨ́ ekâm bísyɛ́ɛla bíbyɛ̂h Yésʉs á sâ bí. Yésʉs ntɔ̂ʼ lɛ́ɛ le ompʉ́n bé ó:

⁴⁴«Bɨ̌n bɨɛ, bɨ̌n e kʉ́ gwá mɛ̂r gá ekǎn mé mû lɨ́ elɛ́ɛ bɨ́n ɨ́ báánâʼ lɨ̂: yɨ́ lîʼ njɨ mâ jɔʼ tîtííǎ, ó Mwân mé Mʉr bɛ́mɔɔ kwá bʉr o ngá jʉ̂ nyé bá.»

⁴⁵Damá jóʼo nó, ompʉ́n bé, bé á bé agwá jóʼǒ sá nyé á lɛ́ɛ bé yɨ́. Ekǎn laá, lé á be bé ó, solá, ó bé ayɨ́ kpâhwǎ jóʼo lê. Bé á be lɨ́ ekpɛ́ɛ édî nyé tíá ɨ́ lɔ̌b waá.

⁴⁶Ompʉ́n bé, nzě táare édíila páʼ nyɔ́ɔ́ ó: “Wáa mʉ̂r dí ɨ́ buú bwaʼ ósʉ́sʉ́ ɨ́ sɔ́má gá yɨ́ná ɛ́?”

⁴⁷Yésʉs á si gʉ́a bijwɨʼ bé á jwɨʼ ɨ́ milémé myɔ́ɔ́ bí. Nye nzě nʉa mâ ntwǒm, tyêl nyé bǎʼ e né.

⁴⁸Nye nzě lɛ́ɛ e bé ó: «Mʉr nyɨnyɛ̂h ngá nʉǎ mbi mâ ntwǒm wɨ̂ʼ mbɨ̂mbɨá ɨ́ díé lâm nyá, nyɨ́ nʉa mé mʉr tɨ̂. Mʉr nʉ́á mé nyá, nyɨ́ nʉa ntémé mʉr á ntɨh me nyá. Ɨ́ sɔ́má yɨ́n, mʉr bɨ́n bɨɛ béé ó, nye ó dí ɨ́ buú twâʼwo nyá ó dí waá láá bɨ́n bɨ́bɛ̂h nyá.»

⁴⁹Nó ó Yʉánɛs á lɛ́ɛ ó: «Lɛ̂ʼla, bɨ̌h bé á si bee mʉr lɨ́ eso méleme ɨ́ bʉr e nzɨ̌ díé lô, bɨ̌h nzě kamle nyé lɨ́ ebáʼǎ sâ nó, ebě, mʉr waá, nyé abe mʉ̂r sɔ́má gá yɨ́ná.»

⁵⁰Yésʉs, nye e bé ó: «Abáʼǎ kamle gá nye, ebě, mʉr dí alwímla e bɨ̌n nyá, nye ó ɨ́ nkɔ̌m nyɨ́n.»

⁵¹Jɔʼ mélú Yésʉs á jala ó, nye pʉ́ʼaa ɨ́ sí yɨ̂ʼ má, mé á be, mé mû lɨ́ esîhle yɨ́, nye nzě tíʼe ɨ́ lémé wé ó, nyě tó ó Yerʉ́zalɛm.

⁵²Nye ntɔ̂ʼ tyen bʉ̂r o mílʉ́mlʉ́ bé dóló. Bê nzě tô, tó nî ɨ́ nyʉ́ʉ́ kwár ɨ́ sí Samarî ó, bé tôʼ komlo nyé já gʉ̂.

⁵³Tó kœb ó, bʉr o kwár nyaá, bé á bé akpɛl ébaʼle nyê, ebě, bé á bee ó, bé tó ó, Yerʉ́zalɛm.

⁵⁴Jɔʼ ómpʉ́n bé, Jacques, bé e Yʉánɛs, bé á bee nó yɨ́, bé ntɔ̂ʼ lɛ́ɛ ó: «Dâ ɛ̌, gó kpɛ̂l nó, bɨ̌h bé ójébě siʼe, yé dúhaa ɨ́ jʉ́o kʉ́, dîʼ bɨ́bɛ̂h.»

⁵⁵Yésʉs ntɔ̂ʼ dwira, nkáŋla e bê.

⁵⁶Bê nzě tô ɨ́ nyʉ́ʉ́ kwár swîh.

⁵⁷Mpʉ̌ Yésʉs, bé le ompʉ́n bé, bé á be, bé mû téme-nzɨ̌ yɨ́, nyʉ́ʉ́ mʉ̂r ntɔ̂ʼ lɛ́ɛ e Yésʉs ó: «Dâ ɛ̌, me ódû gó gúmó yɨ́yɛ̂h gó ótô yɨ́.»

⁵⁸Yésʉs ntɔ̂ʼ yala e né ó: «Ompɔ̌ʼ, bé ó e mekul. Binʉ̌n, byé e mɔʼ. Sâ gwár, Mwân mé Mʉr, nyé abe e gúmó nyé kɛ́lɨɨ lʉ̂.»

⁵⁹Nye ntɔ̂ʼ lɛ́ɛ e nyʉ́ʉ́ mʉ̂r ó: «Ntáʼ. Dúʼóó mê.» Mʉr waá, nye e Yésʉs ó: «Dâ ɛ̌, paá bîr mê. Me páa nyɛɛ́ tó dɨl sɔ́ŋ wǎm.»

⁶⁰Nó nyé á lɛ́ɛ e né ó: «Bírɨ́ɨ́ ódwe, bé dɨ́lɨɨ mimúú myɔ́ɔ́. Gua, tóʼ, tó túnǒ Mbɨambɨa Lɔ́ɔ Mpóʼo mé Nzyɛ̌m.»

⁶¹Nyʉ́ʉ́ mʉ̂r ntémé ntɔ̂ʼ lɛ́ɛ e né ó: «Dâ ɛ̌, me ntémé, me ódû gô. Sâ gwár, paá bîr mê, me páa nyɛɛ́ tó jána e mbɛ̌r bʉ̂r wâm.»

⁶²Yésʉs ntɔ̂ʼ lɛ́ɛ e né ó: «Mbi mʉ̂r dí etáare éséǎ syɛ́ɛ́, ntɔ̂ʼ kǎ bîr, dwɛ̂ʼ píhe nyá, nyé abá be e nyɔm ɨ́ Mpóʼo mé Nzyɛ̌m.»