Read Koonzime Yʉánɛs 11 Bible Online

Yʉánɛs 11 - Koonzime bible

Yʉánɛs 11

¹Nyʉ́ʉ́ mʉ̂r á be e díe ó Lazare, nyɨɛ lɨ́ edǐ Bétanî, kwár mé Maria, bé e mɨ́ɔɔ́ wé, Mááta. Nye á be ó lɨ́ ebíle.

²(Maria waá ó b'á suʼla ka lœm Tî Yésʉs múlo ɨ́ mekʉ̌, tin mé e mpuo nyé. Nó ó, ntʉ̂m wé, Lazare ó b'á be lɨ́ ebíle.)

³Bʉbá obá ónɨ̌ nzě lómo mʉ̂r ó, nye tôʼ lɛ́ɛ̌ Yésʉs ó: “Dâ ɛ̌, só gǒ, nye lɨ́ ebíle.”

⁴Jɔ̌ʼ Yésʉs á jóʼo mpáŋla nyaá yɨ́, nye ó: «Ekpaa mé Lazare, lé ákóʼó jʉ̂ nyê. Lé ósâ ó bʉr gúmlaa Nzyɛ̌m, bé e Mwân wé.»

⁵Yésʉs á be ó lɨ́ ekpɛ̌l Mááta, bé e mɨ́ɔɔ́ wé ndu e ntʉ̂m wɔ́ɔ́, Lazare.

⁶Jɔʼ nyé á be ɨ́ jóʼǒ lɔ́ɔ́ ékpaa laá yɨ́, nye nzě báʼǎ lɛŋ mélú mébá gúmó nyé á be yɨ́.

⁷Píe tɨ̂, nye le ompʉ́n bé ó: «Mɨná swíʼɨɨ gâ, tô sí Yʉ́da.»

⁸Ompʉ́n bé, bé e né ó: «Lɛ̂ʼla, yé ó, apǎ gúm bea, oYúden, bé á be ó lɨ́ egwɨ̂m élúmo gó mekóʼ. Nzê go lɨ́ egwɨ̂m ébáʼǎ tô gʉ̂ʼ ɛ̌?»

⁹Yésʉs, nye e bé ó: «Nzê móhó, wé abe e mewala kám e mebá ɛ́? Mʉ̂r tyé ɨ́ móhó nó, nyé abe e nkul ebɨm ébɔ̌ʼ, ebě, nye lɨ́ egwá beě njʉ̌l sí yɨ̂.

¹⁰Sâ gwár, mʉ̂r tô le entíma lɨ́ edúrʉ́ʉ́ nó, nye ótô le ebɨbɨm mébɔ̌ʼ, mpʉ nyé dí abe e njʉ̌l sí yɨ̂ʼ ɨ́ nye mʉr tɨ̂ʼ yɨ́.»

¹¹Jɔʼ nyé á sil elɛ́ɛ mekǎn maá yɨ́, nye e bé ó: «Só gá wɨ́ná Lazare, nye mû ó ɨ́ jô. Nó ó, mě tó ó, tó jɨm nyê.»

¹²Ompʉ́n, bé e né ó: «Dâ ɛ̌, yé bé nye mû ó ɨ́ jô nó, lɛ́ɛ́, nye ótiʼe.»

¹³Sâ gwár, Yésʉs á be lɨ́ egwɨ̂m élɛ́ɛ ó: “Lazare, nyɨ́ dwe.” Nó ó, ompʉ́n bɨ́ɛ, bé á jwɨʼ ó, yé á be ó jó mpâ nyé á jâ yɨ́.

¹⁴Yésʉs nzě kǎ pâʼla ékǎn lé laá. Nye e bé ó: «Lazare, nyɨ́ dwe.»

¹⁵Me lɨ́ ekʉ́ soho e bɨ̌n, ebě, mɨná bé á bé abe gá gʉ̂. Tɨ̂ʼ ó bɨ́n ngá dyɛ̂ʼwo e me yɨ́. Ncʉ̂ʼ gâ, mɨná tôʼ gá nko nyé dí yɨ́!

¹⁶Nó ó, Thomas bé á jɨjébe “Egbâh” nyá, á nze lɛ́ɛ e bʉ́ʉ́ ómpʉ́n ó: «Ncʉ̂ʼ gá ntémé, mɨná nzóo tô dwe gâ, mɨná gá le onɔ́ɔ́ bɨ́bɛ̂h.»

¹⁷Jɔ̌ʼ Yésʉs á ka pyâl yɨ́, nye á kœb ó, Lazare, nyé osí debe mélú ménâ.

¹⁸Bétanî, yé ɨ́ kúnwo e Yerʉ́zalɛm, bɛ̌m be ókíloméra olɛ̂l.

¹⁹OYúden ɨ́ buo buo, bé á bě sí nze, lɨ́ enzě beě Mááta, bé e Maria lɨ́ eswie e ntʉ̂m wɔ́ɔ́.

²⁰Jɔ̌ʼ Mááta á jóʼo lɔ́ɔ́ ó, Yésʉs, nye lɨ́ enze yɨ́, nye ntɔ̂ʼ tó bɔma e né, Maria nyɨɛ lîʼ mbɛ̌r.

²¹Mááta, nye e Yésʉs ó: «Dâ ɛ̌, yé bé go á be ó wâʼ nó, mpa ntʉ̂m wǎm á bé adwe.

²²Sâ gwár, me lɨ́ egʉ́a ó, damá jóʼo ɨ́ báánâ, Nzyɛ̌m ódwe gó sá yɨ́yɛ̂h gó ódî nyé yɨ́.»

²³Yésʉs, nye e né ó: «Ntʉ̂m gǒ ópah.»

²⁴Mááta, nye e né ó: «Me lɨ́ egʉ́a ó, nye ópah ɨ́ jɔʼ ódwe, bé ópah ɨ́ mesoo ɨ́ móhó ésúʼlá é sí yɨ̂ʼ yɨ́.»

²⁵Yésʉs, nye e né ó: «Me ó waá dí epɛh bʉ̂r, dwe bé twiʼ nyá. Mʉr dí edyɛ̂ʼwo e me nyá, óbáʼǎ tiʼe, damá be ó, nyɨ́ dwe.

²⁶Ntémé, waá nyɨnyɛ̂h dí etiʼe ɨ́ nzɨ̌ nyǎm le edyɛ̂ʼwo e me nyá, nye ákóʼó dwe. Nye ódi ó, njʉ̌m dǐ e njʉ̌m dǐ. Nzê go lɨ́ ebúʼla nó ɛ̌?»

²⁷Nye e né ó: «Dâ ɛ̌, me lɨ́ ekʉ́ gʉ́a nó. Mɨ́ bûʼla ó, go ó dí Mʉ̌r Nzyɛ̌m á lœm múló mé jwɨ́ɨ nyá. Go ntémé, go ó Mwân mé Nzyɛ̌m, mʉr á be ó, nye ónze ɨ́ sí yɨ̂ʼ nyá.»

²⁸Jɔʼ bé á sil elwib nó yɨ́, Mááta nzě tó jébě Maria. Nye e né mesǒ ó: «Lɛ̂ʼla, nyɨ́ pyâl! Nye lɨ́ ejébe gô.»

²⁹Jɔ̌ʼ Maria á jóʼo nó yɨ́, nye nzě mɔa sí ɨ́ bʉ̂b, nzě tô nkǒ Yésʉs á be yɨ́.

³⁰Yésʉs apǎ kumo lɨ́ odumo o kwár, nye dína gúmó Mááta á to bɔma e né yɨ́ nɛ́ɛ:

³¹oYúden nzě pyâl kwá mé Maria, lɨ́ enzě póblo nyé lɨ́ eswie e ntʉ̂m. Ɨ́ jɔʼ bé á bee Maria lɨ́ emɔa sí, tô kʉ̌l kám e kám yɨ́, bê nzě dû nyê, le ejwɨjwɨʼ ó, nyě tó ó, nko sóo, tó jɨ édwê gʉ̂.

³²Jɔ̌ʼ Maria á to pyâl nkǒ Yésʉs á be yɨ́, nye nzě tó bɨʼ mébóó sí ɨ́ mpǒm mé Yésʉs. Nye e né ó: «Dâ ɛ̌, yé bé go á be ó wâʼ nó, mpa ntʉ̂m wǎm á bé adwe.»

³³Jɔ̌ʼ Yésʉs á dwɛ̂ʼ, bee nyé lɨ́ ejɨ, bé le oYúden bé á dû nye bá yɨ́, nye kʉ́ nzě jóʼǒ túú ɨ́ léme. Bisɨ́ǎ byaá, byé ntɔ̂ʼ tɨ̂l nyé mekʉ̌ sí.

³⁴Yésʉs nzě dî ó: «Bɨ̌n bé á dɨl múú wé nkoó?» Bé e né ó: «Dâ ɛ̌, ntaá nzě bee.»

³⁵Yésʉs ntɔ̂ʼ jɨ édwê.

³⁶OYúden, bé ó: «Óóó! Beyɨɨ gá, nye á si bu kpɛl nye!»

³⁷Bʉ́ʉ́ bʉ̂r ó sɔ́má yɔ́ɔ́, bé ó: «Nyɨɛ, mʉr á bɛ́ɛ ántím mîh nyá, nzê nye á bé agwá kǎ sâ ó, Lazare sá adwe ɛ̌?»

³⁸Lɔ̌b waá kʉ́ nzě báʼǎ tɨ̂l Yésʉs mekʉ̌ sí. Nye nzě tô nko sóo. Soo nyaá á be ó báh ékóʼ. Bé á dible num sóo ó e lʉ́ʉ́ ékóʼ.

³⁹Yésʉs, nye e bé ó: «Pɛʼɛɛ gá ekóʼ.» Mááta, kɛ́l mé ndwê, nye e né ó: «Dâ ɛ̌, nye mû ó lɨ́ ebuú numo. Nye mû ɨ́ soo ó, melú ménâ.»

⁴⁰Yésʉs, nye e né ó: «Nzê me bé alɛ́ɛ e go ó, gó ódyêʼ koo e me nó, go óbee kûm mé Nzyɛ̌m ɛ̌?»

⁴¹Bé ntɔ̂ʼ pɛʼ ékóʼ. Yésʉs nzě bɨ̂n mîh kʉ́. Nye ó: «Dâ ɛ̌, me lɨ́ edwe gó nzyǒo, ebě, gʉ́ jóʼo mê.

⁴²Me lɨ́ egʉ́a ó, go lɨ́ eboó jʉjóʼo mê. Nó ó, mě lɛ́ɛ́ gó nó ó, ɨ́ lɔ̌b bʉ̂r o dí ebɔma mé wâʼ ɨ́ nká bâ, ó bé gʉ́ŋaa ó, go ó b'á lómo me.»

⁴³Jɔʼ nyé á lwib nó yɨ́, nye nzě jébe e nkul: «Lazare, pyáláá kʉ̌l!»

⁴⁴Lazare ntɔ̂ʼ pyâl kʉ̌l, mebô e mekʉ̌ mikɛ́ʼá e mimyɔʼ mí dɨlá. (Mimyɔʼ myaá, myé á be ó misɛ́á e ndɔ́má kán ɨ́ pumopumo.) Mpǒm nyé, á be ó ndíblá e péh kán. Yésʉs, nye e bé ó: «Tiyɨɨ gá nye bisá bínɨ̌. Bírɨ́ɨ́ gá nye, nye tôʼ.»

⁴⁵Ɨ́ sɔ́má bʉ̂r o b'á nze bee Maria bá, bʉr ɨ́ buo buo, bé á si dyɛ̂ʼwo e Yésʉs ɨ́ jɔʼ bé á bee sá nyé á sâ yɨ́.

⁴⁶Sâ gwár, bʉ́ʉ́ bʉ̂r ɨ́ sɔ́má óYúden yaá, bê nzě tó bee óFarizyɛ̂n, nzě lɛ́ɔɔ bé syɛ́ɛla Yésʉs á sâ yɨ́.

⁴⁷OFarizyɛ̂n le ojwɨ́ɨ o mpáh Nzyɛ̌m bɨ́ɛ nzě gwɨ̂hla ɨ́ bʉ̌m nɨ́nɨ́ɨ́. Bé ó: «Mɨná bé ósâ gá nyá? Ebě, mʉ̌r nɨ̌, nyɨ́ buú sâ mésimá.

⁴⁸Mɨ́ná sí bîr gá nye nɛ́ɛ: bʉr bɨ́bɛ̂h, bé ódyɛ̂ʼwo e né. Jɔʼ yaá, bʉr ó Rôm, bé ónze, nzě bʉ́ŋɔɔ̌ mpáh Nzyɛ̌m gá nyɨ́ná, le elwímla dɔ̂m e sí gá yɨ́ná.»

⁴⁹Yé á be ó e nyʉ́ʉ́ mʉ̂r ɨ́ sɔ́má yaá, díé lé Kayɨáfa. Nye ó b'á be njwɨ́ɨ opara ɨ́ mbû waá. Nye ó: «Bɨ̌n bé agʉ́ǎ sɔ̂ʼ.

⁵⁰Nzê bɨ̌n bé abee ó, yé mbɨa ó, mʉr ngwár dwêʼ, jala e kúl bʉ̂r gá yɨ́ná ɛ̌? Nó ó kúl gá yɨ́ná ngá be, adîm yɨ́yɛ̂h yɨ́.»

⁵¹(Nye á bé alɛ́ɛ ékǎn laá ɨ́ lɔ̌b gwɨ́má yé nye mʉr tɨ̂. Nye á lɛ́ɛ lé ó, ebě, nye ó b'á be njwɨ́ɨ opara ɨ́ mbû waá. Nó yaá ó nyé á jala le egwîh ó, yé mbɨa ó, Yésʉs dwêʼ lɨ́ esú lé óYúden yɨ́.

⁵²Abě njɨ ɨ́ lɔ̌b óYúden bé omér. Nye ntémé á dwe ó, lɨ́ esú é bwán mé Nzyɛ̌m bɨ́bɛ̂h. Nye ónʉa bé ɨ́ bigúmó byɔ́ɔ́, syɛŋ bé sûm gwár, ó bé díʼee njɨ kûl gwár.)

⁵³Ɨ́ móhó waá ó bé á tíʼe ó, bé jʉ́ ó Yésʉs.

⁵⁴Nó yaá ó Yésʉs á gwâʼ edwáala témé oYúden ɨ́ kpɛŋlɛm yɨ́. Nye nzě laa, tô ɨ́ yʉ́ʉ́ sí swîh, dí ɨ́ kúnwo e lʉá yɨ́. Bé le ompʉ́n bé nzě tó di gʉ̂ʼ ɨ́ nkana bé jɨ́jébé “Efrayɨ̂m” yɨ́.

⁵⁵Nyʉ́ʉ́ nzɔ́ɔ oYúden á be ó, nye mû kúno ebwalɔɔ. Yé á be ó Páska. Bʉr ó sí yaá ɨ́ buo buo nzě gɔ́na le etô Yerʉ́zalɛm, tó pubɔɔ mísyóm myɔ́ɔ́.

⁵⁶Bé á be ó lɨ́ esáǎ Yésʉs ɨ́ mpáh Nzyɛ̌m le etô le edíila páʼ nyɔ́ɔ́ ó: «Bɨ̌n bɨɛ̌ pahlě sá yɨ̂ʼ nyá? Nzê nye ánze ɨ́ nzɔɔ ɛ̌?»

⁵⁷Ojwɨ́ɨ o mpáh Nzyɛ̌m le oFarizyɛ̂n, bé á boo tíʼe ó, mʉ̂r sí gʉ́ǎ gúmó Yésʉs á be yɨ́ nɛ́ɛ: nye gwíhɨɨ bê, ó bé nkʉ̂ tó mɛ̂r nyê.