Read Koonzime Yʉánɛs 13 Bible Online

Yʉánɛs 13 - Koonzime bible

Yʉánɛs 13

¹Yé á be ó, nzɔɔ Páska mû kúno ebwalɔɔ. Yésʉs nyɨɛ á be ó sí boó gʉ́a ó, jɔʼ dí ó, nye káa duhǒ sí yɨ̂, bére kwá Sɔ́ŋ yɨ́, mû ó sí pyâl. Jɔʼ yɨ́yɛ̂h, nye á be ɨ́ buú kpɛl bʉ̂r bé, bé á di ɨ́ sí yɨ̂ʼ bá. Nye á kpɛl bé ó, abe le odumo.

²Yésʉs, bé le ompʉ́n bé, bé á be ó lɨ́ ede. Jɔʼ yaá, sɔ́ŋ meleme á be ó sí tyɛ̂b Yʉ́das, mwân mé Simon Iskariôt, ɨ́ léme, dwe nyé pɨʼ ó, nye bɛ́maa Yésʉs.

³Yésʉs mʉr tɨ̂ʼ á be lɨ́ egʉ́a ó, nye á duho ó kwá mé Nzyɛ̌m. Nye ntémé óbúla kwá mé Nzyɛ̌m. Nó ntémé, Nzyɛ̌m á be ɨ́ gbâ sá yɨ́yɛ̂h sí jwɨ́ɨ́ yé.

⁴Bé dína lɨ́ ede nɛ́ɛ: nye nzě mɔa sí, nzě pɛ̌ʼ kán kʉ́, nʉa sána kán, tyeele nyé ɨ́ kuó.

⁵Nzě nʉa médíbé, gbâ ɨ́ sʉ́á, nzě nyɛl éjwɨɨ ómpʉ́n mekʉ̌, le epîm mékʉ̌ mɔ́ɔ́ e kán nyé á be e wé ɨ́ kuó wɨ́.

⁶Nye nzě tó pyâl gúmó Simon Pétrus á be yɨ́. Simon Pétrus, nye e né ó: «Dâ ɛ̌, nzê go ó jálá le ejwɨɨ mé mekʉ̌ ɛ̌?»

⁷Yésʉs, nye e né ó: «Ɨ́ báánâ, go dína ó, apǎ gʉ́ǎ sá mé mû lɨ́ esâ bɨ́n yɨ̂. Sâ gwár, go ósûʼlǎ gʉ́a yê.»

⁸Pétrus, nye e né ó: «Heʼé, Dâ! Go ányamlě jwɨɨ mé mekʉ̌.» Yésʉs nzě yala e né ó: «Mé bé ajwɨɨ gó mekʉ̌ nó, go l'abi nkɔ̂b ɨ́ páʼ wâm.»

⁹Simon Pétrus, nye e né ó: «Dâ ɛ̌, yé bé nó wá, ayɨ́ jwɨɨ mé njɨ mekʉ̌ e mekʉ̌. Jwɨyɨɨ mé ntémé mebô ndu e lʉ̂.»

¹⁰Yésʉs, nye e né ó: «Mʉr mû sí boó jwɨa nyá, nyé akǎ jala le ebáʼǎ jwɨɔɔ, alaa ó njɨ mekʉ̌, ebě, nye ó nyʉ̂l nyɨnyɛ̂h njwɨá. Bɨ̌n bé ó minjwɨá. Sâ gwár, ntʉ bɨ́n bɨ́bɛ̂h dí minjwɨá.»

¹¹(Yésʉs á be ó lɨ́ eboó gʉ́a mʉ̂r óbɛ́ma nyé nyá. Sá tɨ̂ʼ ó nyé á lɛ́ɛ ó: “Sâ gwár, ntʉ bɨ́n bɨ́bɛ̂h dí minjwɨá” yɨ́.)

¹²Jɔ̌ʼ Yésʉs á sil ejwɨɨ bé mekʉ̌ yɨ́, nye ntɔ̂ʼ báʼǎ bwâr kán wé, báʼǎ di ɨ́ téble. Nye ó: «Nzê bɨ̌n bɨ́ gʉ́ǎ sá mê sá bɨ́n nɨ̌ ɛ̌?

¹³Bɨ̌n jɨ́jébé mé ó: “Lɛ̂ʼla”, nkʉ̂ ntɔ̂ʼ “Tî Yésʉs”. Bɨ̌n bé lɨ́ ekʉ́ gwá jébe, ebě, me ó dí kwahaá nye.

¹⁴Mɛ̂m, Lɛ̂ʼla ndu e Tî wɨ́n sí jwɨɨ bɨ́n mekʉ̌ nó, nó yé lɛ́ʼlé ó, bɨ̌n ntémé bé ɨ́ jala le ejwɨɨla mékʉ̌ páʼ nyɨ́n.

¹⁵Mě dwé bɨ́n ó, mveʼle, ó bɨ̌n ntémé nkʉ̂ sɨ̂sǎ mpʉ mê sá bɨ́n yɨ̂.

¹⁶Mě lɛ́ɛ́ bɨ́n lɨ́ otyeetye ó, abe e syɛ̂l ngwár dí elaa njwɨ́ɨ wé. Lʉ́mla áláá mʉ̂r lómó nyé nyá ɨ́ dúu.

¹⁷Ɨ́ báánâ, bɨ̌n bɨ́ gʉ́a bísɨ́ǎ byaá. Bɨ́n ósâ byé nó, bɨ̌n bé óbe ó mbɨ̂mbɨá.»

¹⁸«Mé alwib ɨ́ lɔ̌b wɨ́n, bɨ̌n óbɛ̂h, njɨ mʉr ngwár. Me lɨ́ egʉ́a baá mé á twâr bá. Twárá mé á twárɔɔ nyɨ́haá mʉ̂r wɨ́, wé á be ɨ́ jala, lɨ́ esú ó, péh Mékaná mé Nzyɛ̌m, yé díraa. Ebě, yê cɛmá ó: Mʉr dí ede méde mâm nyá, nyɨ́ dwira e me.

¹⁹Me lɨ́ eboó lɛ́ɛ bɨ́n nó, ɨ́ jɔ̌ʼ syɛ́ɛla yé yaá dína apǎ syɛ́ɛ yɨ́. Mě lɛ́ɛ́ nó ó, ebě, ɨ́ jɔʼ yé ókǎ syɛ́ɛ yɨ́, bɨ̌n bé óbûʼla ó, mɛm ó dí Me-ó-tɨ̂.

²⁰Mě lɛ́ɛ́ bɨ́n lɨ́ otyeetye ó, mʉr dí enʉa mʉ̂r mé dí elómo nyá, nyě nʉá ntémé ó me. Nó ntémé, mʉr dí enʉa mé nyá, nyě nʉá ó, mʉr á ntɨh me nyá.»

²¹Jɔʼ nyé á sil elwib mpʉ́nʉ̌ yɨ́, milɔ̌b myaá, myé ntɔ̂ʼ tɨ̂l nyé mekʉ̌ sí. Nye nzě boʼlo ó: «Mě lɛ́ɛ́ bɨ́n lɨ́ otyeetye ó, mʉr ngwár ɨ́ sɔ́má gá yɨ́ná óbɛ́ma mê.»

²²Ompʉ́n nzě táare édwɛ̂ʼla páʼ nyɔ́ɔ́, miléme ɨ́ mo ɨ́ nzamá, agʉ́a mʉ̂r nyé á lwib ɨ́ lɔ̌b wé nyá.

²³Nyʉ́ʉ́ mpʉ́n Yésʉs á bu kpɛl nyá, á be ó bǎʼ e Yésʉs, lʉ́ wé lɨ́ edyɛ̂ʼwo ɨ́ bɨr mé Yésʉs.

²⁴Simon Pétrus nzě kwâb nyé ó, nye díʼee Yésʉs díé é mʉ̂r nyé á lwib, dumo e né nyá.

²⁵Mpʉ́n waá nzě dwira, dyêʼ lʉ̂ ɨ́ bɨr mé Yésʉs, nzě dî e né ó: «Dâ ɛ̌, mʉr waá, nye nzé?»

²⁶Yésʉs nzě yala ó: «Me ótwǎr péh blêr ɨ́ sʉ́á méde. Mʉr mé ódwe nyá, mʉr waá ó tɨ̂ʼ nyá.» Yésʉs ntɔ̂ʼ nʉǎ péh blêr, twar méde, nzě dwě Yʉ́das, mwân mé Simon Iskariôt.

²⁷Lě Yʉ́das á nʉa blêr yaá, lě Sátan ntɔ̂ʼ á nî ɨ́ nye. Yésʉs, nye e né ó: «Sá gó dí egwɨ̂m ésâ yɨ́, kaá sâ yé kám e kám!»

²⁸(Bé á bé agʉ́ǎ sá nyé á lɛ́ɛ nye nó yɨ́.

²⁹Ɨ́ mpʉ yé dí ó Yʉ́das ó b'á be lɨ́ ebaʼle ékúró yɨ́, bʉr ɨ́ buo buo, bé á be lɨ́ ejwɨʼ ó, Yésʉs á lómo nye ó, nye tôʼ bwâm sá yé óbe bé e nyɔm ɨ́ nzɔɔ yɨ́, nkʉ̂ ntɔ̂ʼ ó, nye súʼaa baántéʼenteʼe o bʉ̂r.)

³⁰Lě Yʉ́das á kʉ nʉa blêr, le nyé á tô kʉ̌l. Yé á be ó ɨ́ pum.

³¹Jɔ̌ʼ Yʉ́das á bě sí tô kʉ̌l yɨ́, Yésʉs, nye e bé ó: «Ɨ́ báánâ, kûm Mwân mé Mʉr, nyɨ́ pan. Kûm mé Nzyɛ̌m, nyɨ́ pan ntémé ɨ́ nye.

³²Kûm mé Nzyɛ̌m bé lɨ́ epan ɨ́ Mwân mé Mʉr nó, lɛ́ɛ́, Nzyɛ̌m ntémé ógúmlo Mwân wé ɨ́ nye mʉr tɨ̂. Nó ntémé nyé múo nzě gúmlo nyé yɨ́.

³³Bwán bâm, me ka líʼ lɨ́ edi e bɨ̌n ó, mâ jɔʼ. Bɨ̌n bé ósáa mê. Nó, mě lɛ́ɛ́ bɨ́n báánâʼ ó, sá mé á nyɛɛ lɛ́ɛ le oYúden yɨ́. Yé ó: bɨ̌n bé abe e nkul etô nko mé múo tô yɨ̂.

³⁴Me mû ó lɨ́ etyêl bɨ́n edwán lé étié: kpɛlaa gá páʼ nyɨ́n mpʉ mé á kpɛl bɨ̌n yɨ́.

³⁵Bɨ́n sí kpɛla páʼ nyɨ́n nɛ́ɛ: bʉr bɨ́bɛ̂h, bé ogʉ́a tɨ̂ʼ ó, bɨ̌n bé ó ompʉ́n bâm.»

³⁶Simon Pétrus nzě dî e né ó: «Dâ ɛ̌, go ótô nkoó?» Yésʉs ntɔ̂ʼ yala e né ó: «Gó abe e nkul edû mé ɨ́ báánâʼ nko mé múo tô yɨ́. Go ósûʼlǎ dû mê.»

³⁷Pétrus, nye e né ó: «Dâ ɛ̌, mé abe e nkul edû gó báánâʼ ɨ́ yé ɛ́? Me ɨ́ cǎr ó, me dwêʼ twiʼ yâm lɨ́ esú lô.»

³⁸Yésʉs, nye e né ó: «Nzê yê tyeetye ó, go ɨ́ cǎr ó, go bírɨɨ twiʼ yô lɨ́ esú lâm ɛ̌? Me lɨ́ elɛ́ɛ gó lɨ́ otyeetye, njʉ́m kúo apǎ kwâʼ, go ókɛ́la nzɔ̂ʼ lɛ̂l ó, gó agʉ́a mê.»