Read Koonzime Yʉánɛs 14 Bible Online

Yʉánɛs 14 - Koonzime bible

Yʉánɛs 14

¹Yésʉs, nye e bé ó: «Bisɨ́ǎ bî, byé ayɨ́ tɨ̂l bɨ́n mekʉ̌ sí. Dyɛ́ʼwáá gá e Nzyɛ̌m. Dyɛ́ʼwáá gá ntémé e me.

²Mbɛ̌r mé Sɔ́ŋ wǎm, wé ɨ́ buo bídiá. Me páa tó komlo bɨ́n bidiá bɨ́n ngá tó di bí. Yé bé abe nó wá, mpa me bé alɛ́ɛ bɨ́n.

³Jɔʼ mé óbe, me mû sí tó komlo bɨ́n bidiá byaá yɨ́, me óbáʼǎ nzě nʉa bɨ́n, bɨ̌n bé otó dǐ gúmó mé ódi yɨ́.

⁴Bɨ̌n bé lɨ́ egʉ́a nzɨ́ dí etô nko mé dí etô yɨ́.»

⁵Thomas, nye e né ó: «Dâ ɛ̌, bɨ̌h bé agʉ́ǎ nko gó múo tô yɨ́. Á bɨ̌h bɨɛ̌ bé ódweʼe nzɨ́ nyaá nyá?»

⁶Yésʉs, nye e né ó: «Me ó dí nzɨ̌. Me ó otyeetye. Me ó etín é twiʼ. Mʉr, nyé abe e nkul etô nko Sɔ́ŋ wǎm dí yɨ́, cɨɨ ɨ́ nyʉ́ʉ́ nzɨ́ swîh, njɨ lɨ́ ecɨɨ ɨ́ nzɨ̌ nyǎm.

⁷Yé bé bɨ̌n bɨ́ gʉ́a mé nó, lɛ́ɛ́, bɨ̌n bɨ́ gʉ́a ntémé Sɔ́ŋ wǎm. Táare ɨ́ báánâ, bɨ̌n mû ó sí gʉ́a nyê, bee ntémé nye.»

⁸Philippe, nye e né ó: «Dâ ɛ̌, lɛ́ʼláá bɨ́h Sɔ́ŋ gǒ. Yé jálaa ɨ́ wɨ́h pâʼ.»

⁹Yésʉs nzě yala e né ó: «Á bea mɨ́ná bé á dwih di gâ! Nó ó, Philippe, go dína ó, apǎ gʉ́a mê? Mʉr mû sí bee mé nyá, nyɨ́ bee ntémé Sɔ́ŋ wǎm. Á gǒ kǎ lɛ́ɛ ó: “Lɛ́ʼláá bɨ́h Sɔ́ŋ gǒ” ɨ́ yé?

¹⁰Nó ó, gó abûʼla ó, me ó ɨ́ mpúhlá e Sɔ́ŋ wǎm, Sɔ́ŋ wǎm ɨ́ mpúhlá e me? Lwǐb mé dí elwib e bɨ̌n óbɛ̂h yɨ́, yé aduho kwá nyǎm. Sɔ́ŋ wǎm, mʉr bɨ́h e nɔ́ɔ́ dí edi nyá, ó dí elóŋlo bísyɛ́ɛla byé.

¹¹Búʼláá gá me ɨ́ jɔʼ mé dí elɛ́ɛ ó, “Me ó ɨ́ mpúhlá e Sɔ́ŋ wǎm, Sɔ́ŋ wǎm ɨ́ mpúhlá e me” yɨ́. Yé bé bɨ̌n bé abûʼlǎ lɔ́ɔ waá nó, bûʼláá gá ɨ́ lɔ̌b bísyɛ́ɛla byâm.

¹²Mě lɛ́ɛ́ bɨ́n lɨ́ otyeetye ó, mʉr dí edyêʼ koo e me nyá, ósâ ntémé bisyɛ́ɛla mé dí esâ bí. Nye ntémé ósâ byaá bi dí ɨ́ buú bwaʼ bí, ebe mé óbúla, tô gúmó Sɔ́ŋ wǎm dí yɨ́.

¹³Me ósâ sá yɨ́yɛ̂h bɨ́n ngá kpɛl, lɨ́ ejɨʼla e Sɔ́ŋ wǎm, pɨr e díé lâm yɨ́. Nó ó bʉ̂r ngá gúmlǒ Nzyɛ̌m Sɔ́ŋ ɨ́ lɔ̌b Mwân wé yɨ́.

¹⁴Bɨ́n ójǎʼ sɔ̂ʼ, pɨr e díé lâm nɛ́ɛ: me ódwe bɨ́n yǎ.»

¹⁵«Bɨ́n ókpɛl mé nɛ́ɛ: bɨ̌n ntémé, bé óbaʼle métié mâm.

¹⁶Me ódî e Sɔ́ŋ wǎm ó, nye ntɨ́hɨɨ bɨ̌n nyʉ́ʉ́ kɔ́mlʉ mpʉ mê. Nye ónzě didi e bɨ̌n njʉ̌m dǐ e njʉ̌m dǐ.

¹⁷Nye ó dí Sísǐm Ótyeetye. Bʉr ó sí yɨ̂, bé abe e nkul enʉa nyê, ebě, bé abe e nkul ebee nyê, nkʉ̂ gʉ́a nyê. Sâ gwár, bɨ̌n bɨɛ bé lɨ́ egʉ́a nyê, ebě, bɨ̌n le onɔ́ɔ́ ó mû. Nye ntémé, nye ó dí ɨ́ sɔ́má yɨ́n.

¹⁸«Me ákóʼó líʼe bɨ́n ɨ́ ntɛ̂ʼ mpʉ bwá bé ónyʉ̌l. Me óbáʼǎ nze kwá nyɨ́n.

¹⁹Yɨ́ lîʼ bá tîtííǎ: sí yɨ̂, yé ákǎ bee mê. Sâ gwár, bɨ̌n bɨɛ óbee mê. Ɨ́ mpʉ mé dí kublakúbla yɨ́, nó yé lɛ́ʼlé ntémé ó, bɨ̌n bé ótiʼe ó tɨ̂ʼ yɨ́.

²⁰Ɨ́ móhó waá, bɨ̌n bé ógʉ́a ó, me ó ɨ́ mpúhlá e Sɔ́ŋ wǎm, ndu e ntémé ó, bɨ̌n bé ó ɨ́ mpúhlá e me. Mɛm ntémé ɨ́ mpúhlá e bɨ̌n.

²¹«Mʉr dí ejóʼo métié mâm le ebaʼle mé nyá ó dí ekpɛl mê. Sɔ́ŋ wǎm ntémé ókpɛl nyê. Me mʉr tɨ̂ʼ ntémé ókpɛl nyê. Me ópîpyal kwá nyé.»

²²Yʉ̂d (abě Yʉ́das Iskariôt nyá), nye e né ó: «Dâ ɛ̌, go ójaá pipyâl njɨ kwá nyɨ́h, apyâl kwá bʉr ó sí yɨ̂ʼ ɨ́ yé ɛ́?»

²³Yésʉs nzě yala e né ó: «Mʉr dí ekpɛl mé nyá, óbaʼle mílɛ́ʼlá mé á dwe bɨ̌n mí. Sɔ́ŋ wǎm ókpɛl nyê. Nó ó, bɨ̌h e Sɔ́ŋ wǎm, bé ónze kwá nyé le ekomlo ódiá wɨ́h tɨ̂.

²⁴Mʉr dí akpɛl mé nyá, nyé abe e nkul ebaʼle mékǎn mé dí elɛ́ɛ má. Sá bɨ́n dí ejóʼo, mé dí elɛ́ɛ yɨ̂, yé abě lɔ́ɔ́ wâm. Yé duho ó, kwá mé Sɔ́ŋ wǎm, mʉr á ntɨh me nyá.

²⁵«Mě lɛ́ɛ́ bɨ́n bisá bínɨ̌ ó, jɔʼ mɨ́ná gá dína yɨ́.

²⁶Kɔmlʉ wɨ́n, nye ó Sísǐm mé Nzyɛ̌m. Sɔ́ŋ wǎm ólómlo bɨ́n wǎ ó ɨ́ díé lâm. Nye ólɛ̂ʼle bɨ́n sá yɨ́yɛ̂h le ejɨjɨm bɨ́n bitɔŋlá ɨ́ sá yɨ́yɛ̂h mé á lɨ̂lɛɛ bɨ̌n yɨ́.

²⁷«Mepyɛbla ó mé líʼé bɨ́n e mǎ nɨ̌. Mepyɛbla mâm ó mé dwé bɨ́n nɨ̌. Mé adwe bɨ́n mǎ mpʉ bʉ̂r ó sí yɨ̂ʼ dí edwe bɨ́n bisɔ̂ʼ, kǎ sûʼlǎ dɛn byé yɨ́. Bisɨ́ǎ bî, byé ayɨ́ tɨ̂l bɨ́n mekʉ̌ sí. Ayɨ́ jóʼo gá bʉ́á.

²⁸Bɨ̌n bé á be ɨ́ jóʼǒ mpʉ mé á lɛ́ɛ e bɨ̌n ó: “Me múo nzě swîʼ. Me óbáʼǎ nze, pyâl nko bɨ́n dí yɨ́.” Yé bé bɨ̌n bé ɨ́ kpɛl mé nó, lɛ́ɛ́, bɨ̌n mû ó lɨ́ esoho le egʉ́a ó, mě swíʼ ó, tô kwá Sɔ́ŋ wǎm, ebě, Sɔ́ŋ wǎm ó láá mê.

²⁹Mě lɛ́ɛ́ bɨ́n bisá bínɨ̌, byé dína apǎ syɛ́ɛ ó, bɨ̌n gʉ́ŋaa. Byé ópyâl nó, bɨ̌n bé obûʼla ɨ́ jɔʼ yaá.

³⁰Me ákǎ báʼǎ buú lwib e bɨ̌n, ebě, njwɨ́ɨ sí yɨ̂, nye mû ó lɨ́ enze. Nyé abe e nkul ejwɨ́ɨ mɛ̂m yɨ́ɛ.

³¹Nó ó, yé jala ó, bʉr ó sí yɨ̂, bé gʉ́ŋaa ó, me lɨ́ ekpɛl Sɔ́ŋ wǎm, le ntémé ó, mě sá ó mpʉ nyé á tɨ́e me yɨ́. «Gbɔlwaa gá sí. Mɨná dúhaa gá wâ.»