Read Koonzime Yʉánɛs 15 Bible Online

Yʉánɛs 15 - Koonzime bible

Yʉánɛs 15

¹«Me ó etín é raisin. Sɔ́ŋ wǎm ó dí mbel tɨ̂.

²Lɔ́ɔ́ tɨ̂ʼ wɨ́wɛ̂h dí agúmo mpúmó wɨ́, nye lɨ́ esyɛ̂h wê. Nó ó, milɔ́ɔ́ mímyɛ̂h mi dí e mpumó mí, nyě komló myé ó, myé gúmaa mpumó ɨ́ buo buo.

³Bɨ̌n mû ó mipubá ɨ́ lɔ̌b mílɛ́ʼlá mê dwé bɨ́n mí.

⁴Diʼee gá ɨ́ mpúhlá e me mpʉ mé ntémé dí ɨ́ mpúhlá e bɨ̌n yɨ́. Lɔ́ɔ́ raisin, wé abe e nkul egúmo mpúmó wé omér, anara le etín lé. Bɨ́n óbe, adi ɨ́ mpúhlá e me nɛ́ɛ: lɛ́ɛ́, bɨ̌n bé abe e nkul gúmó mpúmó.

⁵«Me ó dí etín é raisin. Bɨ̌n bɨɛ bé ó milɔ́ɔ́ mí tɨ̂. Mʉr dí ɨ́ mpúhlá e me nyá ó dí egúmo mpúmó menkû menkû, ebě, mé bé abe tɨ̂ʼ nó, bɨ̌n bé abe e nkul esâ yʉ́ʉ́ mpǎŋ sɔ̂ʼ.

⁶Mʉr dí apûhla e me nyá, ómyahɔɔ̌ kʉ̌l mpʉ̌ lɔ́ɔ́ raisin dí emyahɔɔ yɨ́. Wé lɨ́ eswâh. Bé ntɔ̂ʼ syɛŋ mílɔ́ɔ myaá, guhɔɔ myé lɨ́ ebéʼé é siʼe. Myé ntɔ̂ʼ síe lɨ́ edíʼe.

⁷Bɨ́n ódi ɨ́ mpúhlá e me, mekǎn mâm lóŋlo bɨ́n ɨ́ miléme nó, díʼéé gá sá yɨ́yɛ̂h bɨ́n ngá kpɛl yɨ́, yé osyɛ́ɛ kwá nyɨ́n.

⁸Sɔ́ŋ wǎm ónʉa kûm ó, ɨ́ jɔʼ bɨ́n ngá gúmo mpúmó menkû menkû, le edi ómpʉ́n bâm yɨ́.

⁹Me lɨ́ ekpɛl bɨ́n mpʉ Sɔ́ŋ wǎm dí ekpɛl mé yɨ́. Diʼee gá tʉ́ŋlʉ̌ kpɛ̌l yâm!

¹⁰Bɨ́n sí baʼle métié mâm nó, bɨ̌n bé ódi tʉ́ŋlʉ̌ kpɛ̌l yâm, ebě, mɨ́ baʼle métié me Sɔ́ŋ wǎm. Mě gʉ́á ntémé ó, nye lɨ́ ekpɛl mê.

¹¹«Mě lɛ́ɛ́ bɨ́n nó ó, bɨ̌n sóhaa mpʉ mé dí esoho yɨ́. Mě kpɛl ó, bisʉhʉʉ bín, byé díʼee ntinɨ̂ e ntinɨ̂.

¹²Me lɨ́ elíʼe bɨ́n etié ó, kpɛlaa gá páʼ nyɨ́n mpʉ mé á pa kpɛl bɨ̌n yɨ́!

¹³Kpɛ̌l dí ɨ́ buú bwaʼ yɨ́, yé ó yaá mʉ̂r dí edwě twiʼ yé lɨ́ esú lé ósó bé nyá.

¹⁴Bɨ́n ódû étié mê líʼé bɨ́n e lǎ lɨ̂ʼ nó, bɨ̌n bé óbe ó osó bâm.

¹⁵Me ákǎ jébe bɨ́n “osyɛ̂l o mésâ bâm”, ebě, syɛ̂l, nyé agʉ́ǎ sá njwɨ́ɨ wé dí esâ yɨ́. Me ókǎ jɨjébe bɨ́n ó, “osó bâm”, ebě, mɨ́ lɛ́ɛ bɨ́n sá yɨ́yɛ̂h mé á jóʼo kwá mé Sɔ́ŋ wǎm yɨ́, ó bɨ̌n nkʉ̂ gʉ́a yê.

¹⁶Ntʉ bɨ́n á pɛ̂h me. Mɛm ó b'á twâr bɨ̌n. Me ó b'á lómo bɨ̌n ó, bɨ̌n tôʼ, tó gúmo mpúmó. Mpumó nyaá ódǐ njʉ̌m dǐ e njʉ̌m dǐ. Nó ó Sɔ́ŋ wǎm ngá dwe bɨ́n sá yɨ́yɛ̂h bɨ́n ngá gwâm, lɨ́ ejɨʼla e né, pɨr e díé lâm yɨ́.

¹⁷Etié mé dí elíʼe bɨ́n e lé lɨ́, lé ó: bɨ̌n kpɛ́laa páʼ nyɨ́n.»

¹⁸«Bʉ̂r ó sí yɨ̂, bé ónwinwim bɨ́n nó, gʉ́ŋáá gá ó, bé á taare enwim ó me.

¹⁹Yé bé bɨ̌n bé á be ó bʉr ó sí yɨ̂ʼ nó, lɛ́ɛ́, bʉr ó sí, bé lɨ́ ekpɛl bɨ́n, ebě, bɨ̌n bé á gwa be ó mbi bʉ̂r wɔ́ɔ́. Sâ gwár, me á be ɨ́ twâr bɨ́n, pɛʼ bɨ́n ɨ́ sɔ́má bʉ̂r ó sí yɨ̂, ó bɨ̌n ayɨ́ kǎ gúmo e sí yɨ̂. Sɨ́ǎ yaá ó bʉ̂r ó sí yɨ̂ʼ mû sí bene bɨ́n yɨ́.

²⁰Símsáá gá sá mé á lɛ́ɛ bɨ̌n yɨ̂: “Yáma, yé áláá njwɨ́ɨ wé.” Yé bé bé á si tíble mɛm nó, lɛ́ɛ́, bé ótîtible bɨ́n ntémé. Yé bé bé á si jóʼo lɛ́ʼlá wâm nó, lɛ́ɛ́, bé ójóʼo ntémé wɨ́n.

²¹Sâ gwár, bé ótîtible bɨ́n nó ó ɨ́ lɔ̌b wâm, ebě, bé agʉ́a mʉ̂r á ntɨh me nyá.

²²Yé bé me á bé anzě lwib e bé nó, lɛ́ɛ́, bé á bé agwá be e misyóm. Nó ó, ɨ́ báánâ, bé akǎ be e nkar ɨ́ lɔ̌b mísyóm myɔ́ɔ́.

²³Mʉr dí enwim mé nyá, nyě nwǐm ntémé ó Sɔ́ŋ wǎm.

²⁴Yé bé me á bé asâ páʼ nyɔ́ɔ́ mbi bísyɛ́ɛla nyʉ́ʉ́ mʉ̂r á be apǎ sâ bí nó, lɛ́ɛ́, bé á bé agwá be e misyóm. Tó kœb ó, ɨ́ báánâ, bɨ́ bee bísyɛ́ɛla byâm. Bɨ́ɛ ntémé dína ó, lɨ́ ebene bɨ́h e Sɔ́ŋ wǎm.

²⁵Sâ gwár, bé sá nó ó, lɨ́ elóŋlǒ sá dí cɛmá ɨ́ mekaná métié mɔ́ɔ́ yɨ́. Yê cɛmá ó: Bé á nwim me ó, bɨ̌h le onɔ́ɔ́ abe e lɔ̌b.

²⁶«Kɔmlʉ wɨ́n, nye ónze. Nye ó dí Sísǐm Ótyeetye ngá duho kwá mé Sɔ́ŋ wǎm wɨ́. Me óntɨh bɨ́n nyǎ. Nyé onzě boʼlǒ lɔ̌b wâm.

²⁷Bɨ̌n bɨɛ ntémé, bé óboʼlǒ lɔ̌b wâm, ebě, mɨná gá ó b'á be, duho ɨ́ menyɛ̌l.