Read Koonzime Yʉánɛs 16 Bible Online

Yʉánɛs 16 - Koonzime bible

Yʉánɛs 16

¹«Mě lɛ́ɛ́ bɨ́n mekǎn mbi wɨ̂ʼ ó, bɨ̌n sá abɨm ébɔ̌ʼ ɨ́ miléme, nkʉ̂ sâ syóm.

²Bé óso bɨ́n ɨ́ mempáh mínjɨʼla mɔ́ɔ́. Yé ópyâl ntémé jɔʼ bʉ̂r, bé ójʉ̂ bɨ́n, lɨ́ ejwɨʼ ó, bé séá ó Nzyɛ̌m syɛ́ɛ́ yɨ́.

³Bé ósɨsâ nó ó, ebě, bé á bé agʉ́a, damá be Sɔ́ŋ wǎm, damá be mê.

⁴Mě boó lɛ́ɛ e bɨ̌n nó ó, ɨ́ jɔ̌ʼ jɔʼ yaá, yé ókǎ pyâl yɨ́, bɨ̌n nkʉ̂ tʉtoŋlo ó, yé ó sá mé á boo lɛ́ɛ bɨ̌n yɨ́.» «Me á bé aboó lɛ́ɛ bɨ́n lɔ̌b nɨ̌ ó, ebě, mɨná gá ó b'á be.

⁵Báánâ, me múo nzě bérě nko mʉ̂r á ntɨh me nyá dí yɨ́. Damá jóʼo nó, mʉr ɨ́ sɔ́má yɨ́n, nyé adî e me ó: “Gǒ tó wó?”

⁶Damá jóʼo nó, menyʉ̂l, mɨ́ tyɛʼ bɨ́n ebe mé mû sí lwib e bɨ̌n mpʉ́nʉ̌.

⁷Mě lɛ́ɛ́ bɨ́n lɨ́ otyeetye ó, embɨa, lé ɨ́ páʼ wɨ́n ó, me tôʼ. Mé bé atô nɛ́ɛ: lɛ́ɛ́, kɔmlʉ wɨ́n, nye ánze kwá nyɨ́n. Nó ó, mé sí tô nɛ́ɛ: me ntɨh bɨ́n nyǎ.

⁸Jɔʼ nyé ópyâl yɨ́, nye ónzě dwe bʉ̂r ó sí yɨ̂ʼ milɛ́ʼlá ó: ɨ́ sá dí “syóm” yɨ́; ɨ́ sá dí “otîtyěl” yɨ́; le ɨ́ lɔ̌b “tíʼá mílɔ̌b”.

⁹Nye ólɛ̂ʼle bʉ̂r syóm wɔ́ɔ́. Syɛ́ɛla yaá ó yɨ̂: bé adyɛ̂ʼwo e me.

¹⁰Nye ólɛ̂ʼle bé sá dí tîtyěl yɨ́, ebě, mě búlá ó, tô nko Sɔ́ŋ wǎm dí yɨ́. Bɨ̌n bé ákǎ bee mê.

¹¹Nye ólɛ̂ʼle bé tíʼá mílɔ̌b mé Nzyɛ̌m, ebě, Nzyɛ̌m, nyɨ́ boó tíʼě lɔ̌b me njwɨ́ɨ sí yɨ̂, le edwe nyé mebě.

¹²«Me dína ó, ɨ́ buo bísá bí élɛ́ɛ bɨ́n. Sâ gwár, bɨ̌n bé apǎ be e nkul edûhwo byé ɨ́ báánâ.

¹³Jɔ̌ʼ Sísǐm Ótyeetye ópyâl ɨ́ bɨ̌n yɨ́, nye ólɛ̂ʼle bɨ́n otyeetye wɨ́wɛ̂h. Nye álwib e nkul nyé nye omér. Nye ólɨlɛ́ɛ ó, sá nyé á pa jóʼo yɨ́. Nye ólɛ́ɛ bɨ́n sá yé ósyɛ́ɛ yɨ́.

¹⁴Nye ódwe mé kûm, ebě, nye ónʉa ótyeetye dí eduho e me wɨ́, ntɔ̂ʼ lɛ́ɛ bɨ́n wǎ.

¹⁵Sá yɨ́yɛ̂h Sɔ́ŋ wǎm dí e yé yɨ́, yé ó sá yâm. Sá tɨ̂ʼ ó mê lɛ́ɛ́ e bɨ̌n ó, Sísǐm mé Nzyɛ̌m ónʉa ótyeetye dí eduho e me wɨ́, ntɔ̂ʼ lɛ́ɛ bɨ́n wǎ yɨ́.»

¹⁶«Yɨ́ lîʼ njɨ bá mâ jɔʼ, bɨ̌n bé ákǎ bee mê. Yé óbáʼǎ lɛŋ mâ jɔʼ, bɨ̌n bé obáʼǎ bee mê.»

¹⁷Bʉ́ʉ́ ómpʉ́n nzě táare édíila métíá páʼ nyɔ́ɔ́. Bé ó: «Nó yɨ́ɛ̌ dǐ lɛ́ɛ yé ɛ́? Ó “Yɨ́ lîʼ njɨ bá mâ jɔʼ, bɨ̌n bé ákǎ bee mê. Yé óbáʼǎ lɛŋ mâ jɔʼ, bɨ̌n bé óbáʼǎ bee mê.” Nyě kpɛ̌l élɛ́ɛ yé ɨ́ jɔʼ nyé lɨ́lɛ́ɛ́ ó: “Yé ó ebe mé dí ebúla, tô nko Sɔ́ŋ wǎm dí yɨ́”?»

¹⁸Bê nzě lɛ́ɛla ntémé ó: «Ekǎn é “mâ jɔʼ” lɨ̂, lé lɨ́ elɛ̂ʼle yé? Mɨná bé akǎ jóʼo gá sá nyé dí elɛ́ɛ yɨ́.»

¹⁹Yésʉs ntɔ̂ʼ gʉ́a ó, bé á be ó lɨ́ egwɨ̂m édî nyé metíá. Nye ó: «Me sí gwîh bɨ́n ó: “Yɨ́ lîʼ bá mâ jɔʼ, bɨ̌n bé ákǎ bee mê. Yé óbáʼǎ lɛŋ nyʉ́ʉ́ mâ jɔʼ, bɨ̌n bé óbáʼǎ bee mê.” Nzê ɨ́ lɔ̌b waá ó bɨ́n dí edíila métíá páʼ nyɨ́n wɨ́ ɛ́?

²⁰Mě lɛ́ɛ́ bɨ́n lɨ́ otyeetye ó, bɨ̌n bé ójɨ médwê, bʉr ó sí bɨ́ɛ, bé óbe lɨ́ esoho. Menyʉ̂l, mé ótyɛʼ bɨ́n. Sâ gwár, ebúʼ lɨ́n laá, lé ókǎ liŋa ó bisʉhʉʉ.

²¹Jɔʼ mʉ́má mû lɨ́ enzě byâ mwân yɨ́, nyʉ̂l, nye lɨ́ etyɛʼ nyê, ebě, jɔʼ mín, yɨ́ pyâl nyê. Jɔʼ mwân óbe, nye mû sí byɛ̂l yɨ́, nyɔ̌ŋ, nye lɨ́ ejɨha mékpaa mé, ebě, nye lɨ́ esoho ó, mʉr, nyɨ́ byɛ̂l ɨ́ sí yɨ̂.

²²Jwɨʼ gwár, ɨ́ báánâ, menyʉ̂l, mɨ́ tyɛʼ bɨ́n. Nó ó, me óbáʼǎ bee bɨ́n, bɨ̌n bé ojóʼo bísʉhʉʉ. Abe e mʉr ókǎ pɛʼ bɨ́n byǎ ɨ́ miléme.

²³«Jɔ̌ʼ móhó waá, wé ópyâl yɨ́, bɨ̌n bé ákǎ dî mé tíá ɨ́ gúú lɔ̌b e gúú. Mě lɛ́ɛ́ bɨ́n lɨ́ otyeetye ó, Sɔ́ŋ wǎm ódwe bɨ́n sá yɨ́yɛ̂h bɨ́n ngá gwâm, lɨ́ ejɨʼla e né, le epɨr e díé lâm yɨ́.

²⁴Nzě kumo ɨ́ báánâ, bɨ̌n bé apǎ gwâm sɔ̂ʼ, lɨ́ ejɨʼla e Sɔ́ŋ wǎm, pɨr e díé lâm. Gwámáá gâ, bɨ̌n bé óbi. Bisʉhʉʉ bín, byé díʼee ntinɨ̂ e ntinɨ̂.

²⁵«Me á lɨlɛ́ɛ bɨ̌n milɔ́ɔ mínɨ̌ mímyɛ̂h ó, ɨ́ nzɨ̌ bikɨkɛna. Yé ópyâl jɔʼ mé óbe, akǎ lwib e bɨ̌n ɨ́ nzɨ̌ nyaá yɨ́. Me ókʉ́ lwilwib e bɨ̌n, dumo e Sɔ́ŋ wǎm ó, lɨ́ epâʼla mékǎn.

²⁶Jɔ̌ʼ móhó waá, wé ópyâl yɨ́, bɨ̌n bé ógûgwam bísá bín ó, lɨ́ ejɨʼla e Sɔ́ŋ wǎm, pɨr e díé lâm. Nó ó, mé alɛ́ɛ ó, me ódî nyé byǎ lɨ́ esú lɨ́n.

²⁷Ebě, Sɔ́ŋ wǎm mʉr tɨ̂, nye lɨ́ ekpɛl bɨ́n. Nyě kpɛ̌l bɨ́n ó, ebe bɨ́n ntémé dí ekpɛl mê. Bɨ̌n bɨ́ bûʼla ntémé ó, me á duho ó kwá nyé.

²⁸Me á duho ó kwá Sɔ́ŋ wǎm, me nzě pyâl ɨ́ sí yɨ̂. Me óbáʼǎ mɔa, líʼě sí yɨ̂, bérě nko Sɔ́ŋ wǎm dí yɨ́.»

²⁹Ompʉ́n bé, bé e né ó: «Ááʼ! Paá bee: gʉ́ lwib báánâ, pâʼla mékǎn, abe ɨ́ nzɨ̌ bikɨkɛna!

³⁰Ɨ́ báánâ, bɨ̌h bɨ́ gʉ́a ó, gʉ́ gʉ́ǎ sá yɨ́yɛ̂h, ndu e ntémé ó, yé ajɨ ó, mʉr díʼee go tíá. Nó yaá ó bɨ́h dí ebúʼla ó, go á duho ó kwá mé Nzyɛ̌m yɨ́.»

³¹Yésʉs nzě dî bé tíá ó: «Nzê bɨ̌n bɨ́ bûʼla ɨ́ jɔʼ yɨ̂ʼ ɛ̌?

³²Jwɛ́ʼɛ́ɛ́ gâ, jɔʼ, yé múo nzě pyâl. Yé ntémé, yɨ́ pyâl: jɔʼ bɨ́n ngá gbɛha, mʉr e mʉr asyɛŋa nzɨ́ yɨ́. Bɨ̌n bé ólíʼe mé me omér. Me ákóʼó be yɨ́ɛ me omér, ebě, bɨ̌h e Sɔ́ŋ wǎm ó dí.

³³Mě lɛ́ɛ́ bɨ́n milɔ̌b mîʼ ó, bɨ̌n nkʉ̂ di ɨ́ mpúhlá e me, milémé mín nkʉ̂ lóno ɨ́ mepyɛbla. Bɨ̌n bé ósia e mitúú lɨ́ edi ɨ́ sí yɨ̂. Damá jóʼo nó, biʼee gá menyan ɨ́ milémé mín. Mɛm, mɨ́ ntaǎ sí yɨ̂ʼ ɨ́ nkul.»