Read Koonzime Yʉánɛs 18 Bible Online

Yʉánɛs 18 - Koonzime bible

Yʉánɛs 18

¹Jɔ̌ʼ Yésʉs á sil ejɨʼla nó yɨ́, bé le ompʉ́n bé, bê nzě laa, ntaŋɔɔ énó é Kédron, tóŋɔɔ kɔ́m nkɛ́ɛ́. Pemé bílɨ́ bí ólivier, yé á be ó gʉ̂. Bé le ompʉ́n bé, nzě tó diŋɔɔ tɨ̂.

²Yʉ́das, mʉr á bɛ́ma Yésʉs nyá, á be ó lɨ́ eboó gʉ́ǎ gúmo yaá, ebě, Yésʉs, bé le ompʉ́n bé, bé á be ó lɨ́ etʉ̂to gʉ̂.

³Yʉ́das nzě dû bé gʉ̂, bé e sɔ́má bísója bí Rôm ndu e byúú bísója ójwɨ́ɨ o mpáh Nzyɛ̌m le oFarizyɛ̂n, bé á lómo bí. Bé á be ó e bisá bí dɔ̂m ndu e metwǐm me mpâh. Bâʼ e meláma.

⁴Náǎ yé ó, mpʉ̌ Yésʉs á be lɨ́ egʉ́ǎ sá ngá pyâl nyé yɨ́, nye ntɔ̂ʼ tô nko bé á be yɨ́, nzě dî e bé ó: «Bɨ̌n sáá nzé?»

⁵Bé e né ó: «Yésʉs, mʉr Nazarɛ̂t.» Yésʉs, nye e bé ó: «Me ó nyâ.» (Yʉ́das, mʉr á bɛ́ma nye nyá, náǎ ɨ́ sɔ́má.)

⁶Jɔ̌ʼ Yésʉs á lɛ́ɛ e bé ó, “Me ó nyâ” yɨ́, bê nzě tulwa e mikoo, twe ɨ́ nkɨ́ŋlɨ́m.

⁷Yésʉs nzě báʼǎ dî e bé ó: «Bɨ̌n sáá nzé?» Bé ó: «Yésʉs, mʉr Nazarɛ̂t.»

⁸Yésʉs, nye e bé ó: «Me sí boó lɛ́ɛ bɨ́n ó, me ó nyâ. Yé bé me ó bɨ́n dí esáa nyá nó, bírɨ́ɨ́ gá baá bâ, bé tôʼ!»

⁹Yé á syɛ́ɛ nó ó, mekǎn nyé á lɛ́ɛ má, mé díraa. Nye á lɛ́ɛ ó: “Dâ ɛ̌, me á bé adímle mʉ̂r ngwár ɨ́ sɔ́má bʉ̂r o gó á dwe me bá.”

¹⁰Náǎ yé ó, Simon Pétrus á be ó e pɛl. Nye nzě gœ̂m yê, nzě syɛ̂h égwǎl lé éjʉ̂m e syɛ̂l mesâ me njwɨ́ɨ opara. (Díé é syɛ̂l mesâ waá, lé á be ó Málkus.)

¹¹Yésʉs, nye e Pétrus ó: «Swamaa pâsoŋ gǒ lɨ́ ebɔ́m. Nzê gǒ jwɨ̌ʼ ó, me ánkɛ́ɛ mítúú Sɔ́ŋ wǎm dwé mé mîʼ ɛ̌?»

¹²Sɔ́má bísója bí Rôm, bé e njwɨ́ɨ wɔ́ɔ́ ti e bisója bí óYúden, bê nzě mɛ̂r Yésʉs, káʼɔɔ nyê.

¹³Bê nzě nyɛɛ́ tô e né kwá mé Ánas, mʉr á be njwɨ́ɨ opara ɨ́ mbû waá nyá. (Náa yé ó, Ánas á be ó tǐ mé Kayɨáfa.)

¹⁴Kayɨáfa waá ó b'á dwe oYúden metwɨ́ɨ́ ó: “Yé mbɨa ó, mʉr ngwár dwêʼ lɨ́ esú é kúl bʉ̂r yɨ́yɛ̂h” nyá.

¹⁵Simon Pétrus, bé e nyʉ́ʉ́ mpʉ́n, bé á be ó lɨ́ edû Yésʉs. Njwɨ́ɨ opara nzě gʉ́a nyɨ́haá mpʉ́n. Sâ yaá ó bé á sâ ó, bé e Yésʉs níʼee jɔʼ gwár ɨ́ bíí mé njwɨ́ɨ opara yɨ́. Bé á tyɛ̂b ó, témé ebɛhɛɛ.

¹⁶Náǎ yé ó, Pétrus nyɨɛ á lîʼ ó kʉ̌l, bǎʼ le ebé lé ébɛhɛɛ. Nyʉ́ʉ́ mpʉ́n mé Yésʉs, waá njwɨ́ɨ opara á be lɨ́ egʉ́a nyá, nzě tô kʉ̌l, lwib e mʉmá á be lɨ́ edwéele ébê nyá. Mʉmá waá nzě níŋle ntémé Pétrus.

¹⁷Mʉmá á be lɨ́ edwéele ébê nyá, nye e Pétrus ó: «Nzê gua ntémé, go ó nyʉ́ʉ́ mpʉ́n mʉr nyâʼ ɛ̌?» Pétrus, nye ó: «Abe mɛ̂m da!»

¹⁸Mpʉ éjwóo lé á be lɨ́ ebuú sâ yɨ́, osyɛ̂l o mésâ ndu e bisója bí óYúden, bé á be ó si paʼra dúró, lɨ́ edwáblɔɔ̌ siʼe. Pétrus ntémé á be ó tɨ̂, lɨ́ edwáblě siʼe, bé e boo nɔ́ɔ́.

¹⁹Njwɨ́ɨ opara nzě táare édî Yésʉs metíá ɨ́ lɔ̌b ómpʉ́n bé ndu e milɛ́ʼlá nyé á dwidwe mí.

²⁰Yésʉs, nye e né ó: «Me á jaa lwilwib ó, njɨ ɨ́ hwɨ́m, bʉr bɨ́bɛ̂h lɨ́ ejóʼo. Me á lɨlɛ̂ʼle bʉr ó, ɨ́ mempáh mínjɨʼla mɔ́ɔ́ ndu e mpáh Nzyɛ̌m, bigúmó óYúden bɨ́bɛ̂h dí egwɨ̂hlǎ jɔʼ yɨ́yɛ̂h bí. Me á bé alɛ́ɛ yʉ́ʉ́ sɔ̂ʼ mesǒ.

²¹Gǒ báʼá dî mé metíá ɨ́ yé? Jíʼéé bʉ̂r o b'á jʉjóʼo lɔ́ɔ́ wâm bá. Bé ɨ́ gʉ́ǎ sá mé á lɨlɛ́ɛ yɨ́ mbɨ̂mbɨá.»

²²Jɔ̌ʼ Yésʉs á be lɨ́ elwib mpʉ́nʉ̌ yɨ́, nyʉ́ʉ́ mâ sója á bě bǎʼ e né nyá, kʉ́ nzě tʉ̂l nyé bɛ̂h lɨ́ emúʼ. Nye e né ó: «Nzê mpʉ́nʉ̌ ó gó dí eyala e njwɨ́ɨ opara yɨ́ ɛ́?»

²³Yésʉs, nye e né ó: «Ááʼ! Gǒ bá ŋmɛ̂h mé mpʉ́nʉ̌ ɨ́ yé? Yé bé me sí jéʼe élwib nó, lɛ́ʼláá sá ébébe mê lɛ́ɛ́ yɨ́. Yé bé me bé ɨ́ lwib mbɨ̂mbɨá nó, go bé ajala le eŋmɛ̂h mê.»

²⁴Ánas nzě báʼǎ tyen nyé nkará mebó mé nʉ̌n kwá mé Kayɨáfa, á be ntémé njwɨ́ɨ opara nyá.

²⁵Bím bé á didi náǎ yɨ́, Simon Pétrus nyɨɛ lɨ́ edwáblě siʼe. Bê nzě dî e né ó: «Nzê go ntémé, go ó mpʉ́n mʉr nyâʼ ɛ̌?» Pétrus nzě kɛ́la. Nye e né ó: «Abe mɛ̂m da! Mɛm mé abe nyê!»

²⁶Nyʉ́ʉ́ syɛ̂l njwɨ́ɨ opara á be mbyɛ́l mʉ̌r Pétrus á tíʼe egwǎl nyá, nye e né ó: «Nzê me bé así bee gó, bɨ̌n le onɔ́ɔ́ kâʼ ɨ́ pemé ɛ́?»

²⁷Pétrus nzě báʼǎ kɛ́la. Nye e né ó: «Yê bé abe mɛ̂m.» Tyé e tyé yaá, njʉ́m kúo ntɔ̂ʼ kwâʼ.

²⁸Bê nzě búla e Yésʉs kwá mé Kayɨáfa, nzě tóŋɔɔ e né mbɛ̌r me njwɨ́ɨ sí yaá. Yé á be ó, yé mû ɨ́ dwiné mɛ́n. OYúden, bé á bé anî mbɛ̌r me njwɨ́ɨ, lɨ́ ekpɛ́ɛ ó, bé ámû lœʼ ményʉ́l mɔ́ɔ́, bé ntɔ̂ʼ kǎ sû méde me nzɔ́ɔ Páska.

²⁹Sâ yaá ó Pilátos á tô kʉ̌l, tô nko bé á be yɨ́. Nye nzě dî e bé ó: «Bɨ̌n pur mʉ̂r nyâʼ ɨ́ yé ɛ́?»

³⁰Bé e né ó: «Yé bé nye bé abě bɨ́bla mʉ̂r nó, lɛ́ɛ́, bɨ̌h bé anze e né nko gó dí yɨ́.»

³¹Pilátos, nye e bé ó: «Bɨ̌n bʉr o tɨ̂, nʉaa gá nye. Tó tíʼe gá lɔ̌b wé mpʉ métié mɨ́n dí ekam yɨ́.» OYúden, bé e né ó: «Metié mɨ́n, mé adwe nkûl ó, bɨ̌h jʉ́ʼoo mʉr.»

³²(Yé á syɛ́ɛ nó ó, mekǎn nyé á lɛ́ɛ má, mé díraa. Nye á be ɨ́ boó lɛ̂ʼle bé mbi éswie nyé ngá dwe wɨ́.)

³³Pilátos nzě báʼǎ nî mbɛ̌r wé tʉ́ŋlʉ̌. Nye nzě jébě Yésʉs, dî e né ó: «Nzê go ó dí njwɨ́ɨ oYúden ɛ̌?»

³⁴Yésʉs nzě yala e né ó: «Nzê gǒ lɛ́ɛ́ nó ó, ebě, yé ó pahlá gô, go mʉr tɨ̂ʼ ɛ̌? Nzê yé ó ebě bʉ́ʉ́ bʉ̂r, bé á si lɛ́ɛ go lɔ̌b wâm ɛ̌?»

³⁵Pilátos, nye e né ó: «Nzê me ó Yúden ɛ̌? Bʉr ó sí yô le ojwɨ́ɨ o mpáh Nzyɛ̌m bô, bé ô ntɨ̌h gó wâ. Go á pʉgʉ sâ yé ɛ́?»

³⁶Yésʉs nzě yala ó: «Jwɨ́ɨ́ yâm, yé abe yaá sí yɨ̂. Yé bé me á be ó njwɨ́ɨbʉ̌r sí yɨ̂ʼ nó, lɛ́ɛ́, osyɛ̂l o mésâ bâm, bɨ́ lwímla dɔ̂m lɨ́ ekamle bʉ̂r lɨ́ ebɛ́ma mé kwá ojwɨ́ɨ́ bé óYúden. Sâ gwár, yé abe nó. Jwɨ́ɨ́ yâm, yé abe kâ.»

³⁷Pilátos, nye e né ó: «Nó ó, go ó njwɨ́ɨbʉr ɨ́?» Yésʉs nzě yala ó: «Yé ó mpʉ gô lɛ́ɛ́ nɨ̌. Me ó Njwɨ́ɨbʉr. Me á byɛ̂l, nze ɨ́ sí yɨ̂ʼ ó, lɨ́ enzě lɛ́ɛ bʉ̂r otyeetye. Mʉr nyɨnyɛ̂h dí egúmo e mʉr dí le otyeetye nyá, jóʼó ó, sá mé dí elɛ́ɛ yɨ́.»

³⁸Pilátos nzě dî e né ó: «Otyeetye wɨ́ɛ, wé pʉgʉ́ be yé?» Mpʉ̌ Pilátos á sil elwib nó yɨ́, nye nzě báʼǎ tô kʉ̌l, tô nko óYúden, bé á be yɨ́. Nye ó: «Ɨ́ wâm pâʼ, mé abee nyé e mebě ó, nye ɨ́ jala le edwe.

³⁹Sâ gwár, bɨ̌n bé e tum ó, me bírɨɨ mbʉʼ ngwár ɨ́ nzɔɔ Páska. Nzê bɨ̌n kpɛl ó, me bírɨɨ bɨ̌n njwɨ́ɨ wɨ́n ɛ̌?»

⁴⁰Bɨ́bɛ̂h nzě lwib kʉ́kʉ́. Bé ó: «Heʼé, abe nyɨ́nɨ̌! Bɨ̌h gwɨ́m ó, Barábas. Nó ó, Barábǎs nɨ̌ á be náǎ ó nzilngǎn.»