Read Koonzime Yʉánɛs 2 Bible Online

Yʉánɛs 2 - Koonzime bible

Yʉánɛs 2

¹Píe melú mébá, nzɔɔ ebâ nzě syɛ́ɛ ɨ́ kwár Kanâ ɨ́ sí Galilê. Nyɔ̌ŋ mé Yésʉs á be ó tɨ̂.

²Bé á si báŋle ntémé Yésʉs, bé le ompʉ́n bé ɨ́ nzɔɔ nyaá.

³Ɨ́ mpʉ ményoʼ mé á be ɨ́ gwíi yɨ́, nyɔ̌ŋ mé Yésʉs ntɔ̂ʼ lɛ́ɛ e mwân ó: «Bé mû náǎ ó, akǎ be e menyoʼ.»

⁴Nó ó Yésʉs á nze yala e né ó: «Mʉmá nyâ, gǒ jɨ̌ yé e me? Ewala lâm, lé dína ó, apǎ pyâl.»

⁵Nó ó nyɔ́ŋ á nze lɛ́ɛ le osyɛ̂l o mésâ ó: «Sáʼ gá sá yɨ́yɛ̂h nyé ólɛ́ɛ bɨ́n yɨ́.»

⁶Bé á be náǎ ó e mikáʼ mékóʼ mésaman. Mikâʼ myaá, myé ó b'á kʉkomo medíbé óYúden, bé á pupubo mebébe mɔ́ɔ́ e mé má. Kâʼ ngwár, wé á be ó, bɛ̌m nʉa ólíra nter.

⁷Yésʉs, nye le osyɛ̂l o mésâ ó: «Lóŋláá gá mikáʼ mínɨ̌ e medíbé.» Bê nzě lóŋlo myê.

⁸Yésʉs, nye e bé ó: «Ɨ́ jɔ̌ʼ nɨ̌, kaá táare édaale gá medíbé ménɨ̌. Bɨ̌n a tó dwe tyéla nzɔɔ, ó nye bóblaa.» Bê nzě sâ nó.

⁹Tyéla nzɔɔ ká bóblo nɛ́ɛ: nyě kǎ jóʼo ó, menyoʼ ɨ́ mbɨa mbɨa. Nyɨɛ á bé agʉ́a yɨ́ɛ nko ményoʼ maá, mé á duho yɨ́. Osyɛ̂l o mésá ó b'á daale medíbé maá bá, bé omér ó b'á jaa gʉ́a. Nó ó tyéla nzɔɔ á nze jébe mbɛ̂l mʉmá.

¹⁰Nye e né ó: «Mʉr nyɨnyɛ̂h, nyě nyɛɛ́ dwe ó, menyoʼ mempâ. Píe tɨ̂, maá me dí pâʼ e tɨ̂ʼ má, ɨ́ jɔʼ bʉ̂r o nzɔ́ɔ óbe, bé mû sí buú bɛble yɨ́. Sâ gwár, gua bé ɨ́ komo ményoʼ me dí ɨ́ mbɨa má, kumo ɨ́ báánâ.»

¹¹Lɨ́haá ó dí esimá lé ésôʼ Yésʉs á nyɛɛ sâ lɨ́, nye ɨ́ Kanâ, ɨ́ sí Galilê. Nye á lɛ̂ʼle nó ó, kûm nyé. Ompʉ́n bé ntɔ̂ʼ báʼǎ buú dyɛ̂ʼwo e né.

¹²Píe tɨ̂, nye nzě tô Kapernáʉm, bé e nyɔ̌ŋ, le bɨ́ɔɔ́ bé le okɛ́l bé, le ompʉ́n bé. Bê nzě tó di gʉ̂ʼ bwá mélû.

¹³Mpʉ nzɔ́ɔ Páska á be, nye mû kúno ebwalɔɔ yɨ́, Yésʉs nzě tô Yerʉ́zalɛm.

¹⁴Nyé ká nî mpáh Nzyɛ̌m nɛ́ɛ: nyě kœ̌b tɨ̂ʼ tʉ́ŋlʉ̌ ó, le bʉr o bɛ́má bíntœœ, le baá o bɛ́má bítab, le baá o bɛ́má mépɨbaa, le baá o ká syɛ́ɛla bímɔnɨ́ bá.

¹⁵Nó ó Yésʉs á nze nʉa mikǒl, nzě sâ ngáhá, ntɔ̂ʼ so bʉ̂r baá ɨ́ mpáh Nzyɛ̌m, bé e bitab ti e bintœœ byɔ́ɔ́, gɔ́na le enkɛŋ ótéble bɔ́ɔ́ sí.

¹⁶Nye e bʉr o b'á be lɨ́ ebɛ́ma mépɨbaa bá ó: «Pɛʼɛɛ gá mepɨbaa mɨ́mɛ̂h wâ. Mʉr aliŋ gá Mbɛ̌r mé Dâ mbɛ̌r ébôm.»

¹⁷Ompʉ́n bé, bê nzě símsǎ mpʉ yé á boo be cɛmá ɨ́ Mekaná mé Nzyɛ̌m ó: “Mě kpɛ̌l mbɛ̌r gô ó, kpɛ̌l ápurapúra” yɨ́.

¹⁸Jɔʼ yaá ó óYúden bé á nze dî e né ó: «Láa ésimá gó dí ɨ́ pǎ sâ, dí elɛ̂ʼle bɨ́h ó, go á bě sí dweŋɔɔ nkûl esâ mbi bísyɛ́ɛla bínɨ̌?»

¹⁹Nó ó Yésʉs á nze yala e bé ó: «Búʼáá gá mpáh Nzyɛ̌m nyɨ̂. Me óbáʼǎ sumo nyé njɨ ɨ́ melú mélɛ̂l.»

²⁰OYúden, bé e né ó: «Mpáh á sumɔɔ tâŋ mimbû mekám ménâ e mimbú mísaman nyɨ́, nó ó, gǒ lɛ́ɛ́ ó, gua, go óbáʼǎ sumo nyé melú mélɛ̂l nyá?»

²¹(Tó kœb ó, “mpáh Nzyɛ̌m” Yésʉs á lɨlɛ́ɛ nyɨ́, á be ó nyʉ̂l nyé!

²²Jɔ̌ʼ Yésʉs á pah ɨ́ soo, duho lɨ́ odwe yɨ́, ompʉ́n bé ntɔ̂ʼ sîsimsa mékǎn mé maá. Bé ntɔ̂ʼ bûʼla Mékaná mé Nzyɛ̌m ndu e metwɨ́ɨ́ mé Yésʉs.)

²³Jɔʼ yɨ́yɛ̂h nzɔ́ɔ Páska nyaá á bwalɔɔ yɨ́, Yésʉs á be ó Yerʉ́zalɛm. Bʉr ɨ́ buo buo, bê nzě dyɛ̂ʼwo e né ɨ́ lɔ̌b mésimá bé á bee nye lɨ́ esâ má.

²⁴Sâ gwár, Yésʉs nyɨɛ á bé adyêʼ wé koo e bê, ebě, nye á be ó sí gʉ́a bɨ́bɛ̂h.

²⁵Nye á bé agwɨ̂m ó, mʉr tɨ́aa nye sɔ̂ʼ dumo e mʉr, ebě, nye mʉr tɨ̂ʼ á be ɨ́ gʉ́ǎ sá dí ɨ́ lémé mʉ̂r yɨ́.