Read Koonzime Yʉánɛs 5 Bible Online

Yʉánɛs 5 - Koonzime bible

Yʉánɛs 5

¹Píe tɨ̂, nyʉ́ʉ́ nzɔ́ɔ oYúden nzě pyâl. Yésʉs nzě tô Yerʉ́zalɛm.

²Ɨ́ nkana yaá, yé e béh éjwɨa kúnókúno le Ebé é Bwá ó Bínteme. Béh yaá, yé jébɔ́ɔ́ ɨ́ lwǐb ébrœ̂ ó, “Betzéda”. Mempáh, mé á be ó tɨ̂, metɛ̂n, ɨ́ nkpâh béh yaá.

³Ɨ́ mempáh maá ó mímbêl ɨ́ buo buo, myé á jɨjâ yɨ́, táare e bʉr o b'á bíle bá, le baántím, le bʉr o dí etɨ́a bá, le bʉr o b'á be e bitíl bí nyʉ̂l ɨ́ swâm swâm bá.

⁴

⁵Nyʉ́ʉ́ mʉ̂r á be ó tɨ̂, nyé osí bíle tâŋ mimbû mekám mélɛ̂l e mwom.

⁶Jɔ̌ʼ Yésʉs á bee nye njáʼ sí, gʉ́a ntémé ó, nyɨ́ boó bíle ékpaa laá yɨ́, nó ó nyé á lɛ́ɛ e mʉ̌r nɨ̌ ó: «Nzê go lɨ́ egwɨ̂m étiʼe ɛ̌?»

⁷Mbêl waá, wé e né ó: «Dâ ɛ̌, mé abe e mʉr tó dubo mé ɨ́ béh ɨ́ jɔʼ médíbé dí epɨ̂ʼla yɨ́. Jɔʼ yɨ́yɛ̂h mé mû lɨ́ esáa ó, me tô duba yɨ́, nyʉ́ʉ́ mʉ̂r dí ɨ́ kpâhwa, laa mé nyá, nye lɨ́ etó duba lɨ́ esôʼ.»

⁸Yésʉs, nye e né ó: «Gbɔlwaa sí. Go e nkɛ́ɛ́ myɛɛla gô. Bʉŋláa.»

⁹Tyé e tyé yaá, mʉ̌r nɨ̌ nzě tiʼe, nzě nkɛ́ɛ̌ kala yé, ntɔ̂ʼ táare étye. Ɨ́ mpʉ yé á syɛ́ɛ ɨ́ móhó sábat yɨ́,

¹⁰oYúden ntɔ̂ʼ lɛ́ɛ e mʉr á tiʼɔɔ nyá ó: «Mûh, yé ó móhó sábat. Nó ó metié gá mɨ́ná, mé akam ó, go nkɛ́yɨɨ kala yô.»

¹¹Nye ó: «Mʉr tiʼ mé nyá, nye ô lɛ́ɛ́ mé ó: “Nkɛ́yɨ́ɨ́ kala yô. Bʉŋláa.”»

¹²Bé e né ó: «Nzê lɛ́ɛ́ gó ó: “Nkɛ́yɨ́ɨ́ kala yô. Bʉŋláa”?»

¹³Sâ gwár, mʉr á tiʼɔɔ nyá, á bé agʉ́a díé é mʉ̂r á tiʼ nye nyá, ebě, Yésʉs á si laa, ntɔ̂ʼ nî lɨ́ entumo e bʉ̂r o b'á bě gúmo yaá bá.

¹⁴Píe tɨ̂, Yésʉs nzě tó bɔma e mʉr waá ɨ́ mpáh Nzyɛ̌m. Nye e né ó: «Mě lɛ́ɛ́ gó, ɨ́ jɔʼ yɨ̂, go mû ó sí tiʼe. Akǎ báʼǎ sâ syóm. Sá dí ɨ́ buú bébe yɨ́, yé ámû jaá pyâl gô.»

¹⁵Mʉ̌r nɨ̌ nzě laa, tó lɛ́ɛ óYúden ó, nkúná mʉr á tiʼ nye nyá, á be ó Yésʉs.

¹⁶Nó óYúden bé á to le etíblě syɛ́ɛ́ mé Yésʉs yɨ́, ebě, nye á si sâ mbǐ syɛ́ɛla waá ɨ́ móhó sábat.

¹⁷Nó ó Yésʉs á nze lɛ́ɛ e bé ó: «Sɔ́ŋ wǎm séá ó bijɔʼ bíbyɛ̂h, nzě kumo ɨ́ báánâ. Mɛm ntémé, me lɨ́ eséa.»

¹⁸Ɨ́ lɔ́ɔ́ wé waá ó óYúden bé á to dóló le esáa ó, bé jʉ́ ó nye yɨ́. Bé á bé asáa éjʉ̂ nyé njɨ ɨ́ lɔ̌b mémpéné mé móhó sábat nyé á ntaa má. Bé á sáa ejʉ̂ nye ntémé ó, ebě, nye á lɛ́ɛ ó, Nzyɛ̌m, nye ó sɔ́ŋ wé, ánta nye. Bʉr baá, bé á bee ó, nye á be lɨ́ epɨra e Nzyɛ̌m.

¹⁹Yésʉs nzě báʼǎ nʉǎ lwǐb. Nye ó: «Mě lɛ́ɛ́ bɨ́n lɨ́ otyeetye ó, Mwân mé Nzyɛ̌m, nyé abe lɨ́ esâ yʉ́ʉ́ sɔ̂ʼ e nkul nyé mʉr tɨ̂. Nyě jaá sâ ó, njɨ syɛ́ɛla nyé dí ebee Sɔ́ŋ wé lɨ́ esâ yɨ́, ebě, syɛ́ɛla yɨ́yɛ̂h Sɔ́ŋ dí esâ yɨ́, yé ntémé ó Mwân wé dí esâ yɨ́.

²⁰Ebě, Sɔ́ŋ, nye lɨ́ ekpɛl Mwân wé. Nye lɨ́ elɛ̂ʼle nyé sá nyé mʉr tɨ̂ʼ dí esâ yɨ́. Nye ólɛ̂ʼle nyé bisyɛ́ɛla nyé ókǎ tô le esɨ̂sa bí. Byé ólaa byaá bî, bɨ̌n nkʉ̂ buú kâm.

²¹Ebě, jwɨʼ gwár mpʉ Sɔ́ŋ dí epɛh ódwe, báʼǎ dwe bé twiʼ yɨ́, nó ntémé ó Mwân ódwe baá nyé kpɛ̂l bá twiʼ.

²²Sɔ́ŋ, nyé abe lɨ́ etíʼe bʉ̂r milɔ̌b. Nye á be ɨ́ boó dwe Mwân wé nkul nyɨnyɛ̂h ó, nye tíʼaa milɔ̌b mímyɛ̂h,

²³ó bʉr bɨ́bɛ̂h, bé dwêʼ Mwân dúu jwɨʼ gwár e gwár e mpʉ bé dí edwe Sɔ́ŋ yǎ yɨ́. Mʉr dí adwe Mwân dúu nyá, nyé adwe ntémé Sɔ́ŋ, mʉr á pa ntɨh nye nyá dúu.

²⁴«Mě lɛ́ɛ́ bɨ́n lɨ́ otyeetye ó, mʉr ngá jôʼlǒ lwǐb yâm le edyɛ̂ʼwo e mʉr á ntɨh me nyá, nyɨ́ bǐ twǐʼ njʉ̌m dǐ. Nye ákǎ tíʼɔɔ mílɔ̌b. Nyɨ́ boó duho lɨ́ eswie, ntaa ɨ́ twǐʼ njʉ̌m dǐ.

²⁵Mě lɛ́ɛ́ bɨ́n lɨ́ otyeetye ó, jɔʼ, yé lɨ́ enze. Yé ntémé, yɨ́ pyâl: jɔʼ ódwe, bé ójóʼo twíí Mwân mé Nzyɛ̌m yɨ́. Baá bé ójóʼo nyé bá, bé ótiʼe.

²⁶Ebě, jwɨʼ gwár mpʉ̌ Nzyɛ̌m Sɔ́ŋ dí e twǐʼ njʉ̌m dǐ ɨ́ nye mʉr tɨ̂ʼ yɨ́, nó ntémé ó nyé á sâ ó, Mwân díʼee e twiʼ yaá.

²⁷Nye ntémé á si dwe Mwân nkul etíʼe mílɔ̌b, ebě, nye ó dí Mwân mé Mʉr.

²⁸Mʉr akâm gâ. Jɔʼ yé múo nzě pyâl, jɔʼ ódwe bɨ́bɛ̂h dí ɨ́ mesoo bá, bé ójóʼo twíí Mwân mé Mʉr yɨ́.

²⁹Bé opah ɨ́ mesoo. Baá bé á sâ embɨa bá, bé ópah, bǐ twǐʼ njʉ̌m dǐ. Baá bé á sâ ebébe bá, bɨ́ɛ ntémé ópah; bé otíʼɔɔ mílɔ̌b.»

³⁰«Mé abe e nkul esâ yʉ́ʉ́ sɔ̂ʼ e mɛm mʉr tɨ̂. Mě tíʼé mílɔ̌b ó, njɨ̌ mpʉ̌ Nzyɛ̌m dí elɛ́ɛ mé yɨ́. Etíʼ é mílɔ̌b lâm, lé ó tîtyěl, ebě, mé abe lɨ́ esâ mpʉ mé dí egwɨ̂m yɨ́, njɨ̌ mpʉ mʉ̂r á ntɨh me nyá dí egwɨ̂m yɨ́.

³¹Yé bé mě boʼló ó lɔ̌b wâm mɛm mʉr tɨ̂ʼ nó, lɛ́ɛ́, mboʼlá waá, wé abe le otyeetye.

³²Sâ gwár, yé e nyʉ́ʉ́ mʉ̂r dí eboʼlǒ lɔ̌b wâm nyá. Mɛm, me lɨ́ egʉ́a ó, mboʼlá nyé dí eboʼlo, dumo e me wɨ́, wé ó tyeetye.

³³Bɨ̌n bʉr o tɨ̂ʼ, bé á si lómo bʉr e mempáŋla kwá mé Yʉánɛs. Nye ntémé á si boʼlo lɨ́ otyeetye.

³⁴Ɨ́ wâm pâʼ, mé agwɨ̂m ó, mʉr bôʼlaa mekǎn mâm. Mě báʼá lɛ́ɛ bɨ́n mekǎn mâʼ ó, ebě, me lɨ́ egwɨ̂m ó, bɨ̌n tíʼaa.

³⁵Yʉánɛs á be ó mpʉ̌ twimá éláma dí ekʉn nzɨ́ lɨ́; bɨ̌n nzě kpɛl ó, bɨ̌n sóhaa tâŋ mâ jɔʼ ɨ́ njʉl éláma waá.

³⁶Sâ gwár, mɛm, mě e mboʼlá, laá mboʼlá mé Yʉánɛs, ebě, bisyɛ́ɛlǎ Nzyɛ̌m Sɔ́ŋ á dwe me ó, me sâʼ bí, byé ó mé dí esâ. Byé boʼlo ó, Nzyɛ̌m Sɔ́ŋ ó b'á ntɨh me.

³⁷Ntémé, Nzyɛ̌m Sɔ́ŋ, mʉr á ntɨh me nyá, nye mʉr tɨ̂ʼ á be ó sí boʼlo ɨ́ lɔ̌b wâm. Bɨ̌n bé apǎ jóʼo twíí nyé. Bɨ̌n ntémé apǎ bee mpóm nyé.

³⁸Mekǎn me Sɔ́ŋ wǎm, mé aséa bɨ́n ɨ́ miléme, ebě, bɨ̌n bé adyɛ̂ʼwo e mʉr nyé á ntɨh bɨ̌n nyá.

³⁹Bɨ̌n bé lɨ́ etoʼo Mékaná mé Nzyɛ̌m, lɨ́ ejwɨʼ ó, bɨ̌n bé óbǐ twǐʼ njʉ̌m dǐ tɨ̂. Tó kœb ó, Mekaná mé Nzyɛ̌m maá, mé ó dí eboʼlo bɨ́n lɔ̌b wâm!

⁴⁰Sâ gwár, bɨ̌n bé akpɛl énze kwá nyǎm, lɨ́ enzě bǐ twiʼ.

⁴¹«Mé abe lɨ́ esáa kûm dí eduho e bʉr nyɨ́.

⁴²Sâ gwár, me lɨ́ egʉ́a bɨ́n: me lɨ́ egʉ́a ó, bɨ̌n bé akpɛ̌l Nzyɛ̌m.

⁴³Mɛm á nze ó ɨ́ díé mé Sɔ́ŋ wǎm, bɨ̌n l'akpɛl énʉa mê. Sâ gwár, nyʉ́ʉ́ mʉ̂r ká nze ɨ́ lé díe nye mʉr tɨ̂ʼ nɛ́ɛ: bɨ̌n bé ónʉa nyê.

⁴⁴Bɨ̌n jaá kpɨkpɛl ébi kûm ó, njɨ páʼ nyɨ́n. Bɨ̌n bé akpɛl ébi kûm dí eduho kwá mé waá dí Nzyɛ̌m nye omér nyá. Yé bé nó wá, á bɨ̌n bé ódyɛ̂ʼwo e Nzyɛ̌m nyá?

⁴⁵Sâ gwár, ajwɨʼ gá ó, me ópur bɨ́n ɨ́ míh mé Dâ. Moyɨ̂z, mʉr bɨ́n á pa dyɛ̂ʼwo e né nyá ó ngá pur bɨ́n.

⁴⁶Yé bé tyeetye ó, bɨ̌n bé á si bûʼla lɔ́ɔ́ mé Moyɨ̂z nó, lɛ́ɛ́, bɨ̌n bɨ́ dyɛ̂ʼwo e me, ebě, nye á cɨcɛma ó, lɔ̌b wâm.

⁴⁷Bɨ́n óbe, abûʼlǎ sá nyé á cɛma yɨ́ nó, á bɨ̌n bé ógwá bûʼlǎ lɔ́ɔ́ wâm nyá?»