Read Koonzime Yʉánɛs 6 Bible Online

Yʉánɛs 6 - Koonzime bible

Yʉánɛs 6

¹Jɔʼ bé á duho náǎ yɨ́, Yésʉs nzě ntaa máŋ mé Galilê, tô lɨ́ ebʉ̂m e kɔ́m nkɛ́ɛ́. (Bé á jɨjébe mâŋ maá ó, “Mâŋ mé Tiberiâs”.)

²Bʉr ɨ́ buo buo, bé á be ó lɨ́ edû nyê, ebě, bé á be ó lɨ́ ebee nyé lɨ́ etiʼ mímbêl ɨ́ nzɨ̌ mesimá.

³Yésʉs nzě tó bére lɨ́ ecwɨ̂ʼ, bé le ompʉ́n bé, bê nzě di sí.

⁴Páska, nzɔɔ oYúden, á be ó, nye mû kúno ebwalɔɔ.

⁵Yésʉs ká dwɛ̂ʼ nɛ́ɛ: nyě beé ó, sɔ́má bʉ̂r lɨ́ enze kwá nyé. Nó nyé á nze dî e Philippe ó: «Mɨná bé óbwâm gá mede mé édwe bʉ̂r bâʼ bɨ́bɛ̂h wó?»

⁶(Nye á dî nó ó, lɨ́ ebóblǒ Philippe, ebě, nye á be ɨ́ boó gʉ́ǎ sá nyé ngá sâ yɨ́.)

⁷Philippe, nye e né ó: «Mɨná damá jána gá minzaŋ mí mɔnɨ́ minter mimbá, mɨná bé á bé agwá be e nkul ebwâm gá mede, bím dí ó, mʉr nyɨnyɛ̂h bíʼee pêh dœʼ yɨ́.»

⁸Nyʉ́ʉ́ mpʉ́n wé, díe André, mɨ́ɔɔ́ mé Simon Pétrus, nye e né ó:

⁹«Nyʉ́ʉ́ mâ ntwǒm, nye ó wâ. Nyě e biblér bí orge bitɛ̂n le osú óbá. Bím bʉ̂r bâ, bé ódira wáǎ nyɔm ɨ́ bím méde yaá?»

¹⁰Yésʉs, nye e bé ó: «Dilɨɨ gá bʉr bɨ́bɛ̂h sí!» (Dáá, lé á be ɨ́ buo ɨ́ gúmo yaá.) Bɨ́bɛ̂h nzě di sí. Ɨ́ bʉr baá, bʉrʉ̂m, bé á be ó, bɛ̌m pyâl ótɔ́ɔ́sin otɛ̂n.

¹¹Yésʉs nzě nʉa bíblêr byaá, nzě dwě Nzyɛ̌m nzyǒo. Jɔʼ nyé á bě sí dwě Nzyɛ̌m nzyǒo yɨ́, nye nzě kab bʉ̂r bɨ́bɛ̂h bé á be tɨ̂ʼ mindîndǐl bá. Nye nzě dwe bé ntémé osû, mʉr nyɨnyɛ̂h lɨ́ enʉǎ bím yɨ́yɛ̂h nyé á kpɛl yɨ́.

¹²Jɔʼ bɨ́bɛ̂h, bé á bě sí de, díle yɨ́, Yésʉs, nye le ompʉ́n bé ó: «Syɛŋɨɨ gá bipéh méde mû sí buʼo bí, mbi dí ó, sɔ̂ʼ, yé ayɨ́ dwě ntuʼ yɨ́!»

¹³Bê nzě syɛŋ bípéh bí blêr byé á buʼo ɨ́ biblér bí orge bitɛ̂n bí. Bíbyɛ̂h nzě lóŋlo mékwám kám e mebá.

¹⁴Bʉr o b'á bee esimá Yésʉs á sâ lɨ́ bá, bê nzě lɛ́ɛ ó: «Mʉr nyâ, nye kʉ́ bě tyeetye ó ngwíha milɔ̌b á jala le enze ɨ́ sí yɨ̂ʼ nyá.»

¹⁵Yésʉs ntɔ̂ʼ gʉ́a ó, bé á be ó lɨ́ egwɨ̂m énzě mɛ̂r nyê, lɨ́ etó tyélɔɔ nyé njwɨ́ɨ wɔ́ɔ́. Nye nzě báʼǎ dulo nyʉ̂l nyé, tó di lɨ́ ecwɨ̂ʼ nye omér.

¹⁶Jɔʼ bíí kʉ̌ʼ, yé á pyâl yɨ́, ompʉ́n bé nzě tô ɨ́ nkpâh mâŋ.

¹⁷Bê nzě kalwo ɨ́ byɛ̂l. Bé mû lɨ́ entaa mâŋ, lɨ́ etóŋɔɔ̌ Kapernáʉm, lɨ́ ebʉ́m é mâŋ e kɔ́m nkɛ́ɛ́ nɛ́ɛ: pum nzě dwíne, Yésʉs dína apǎ kœb bê.

¹⁸Bé ká bee nɛ́ɛ: obóʼó ó mâŋ, wé mû ó lɨ́ ebére, ebě, nkúo á be ó lɨ́ ekʉ́ kwoolo e nkul.

¹⁹Bé á be ó, bé osí dúʼo, bɛ̌m be ókíloméra otɛ̂n, nkʉ̂ ósaman. Bé ká bee nɛ́ɛ: Yésʉs mû lɨ́ ekúnwo e byɛ̂l, nyɨɛ lɨ́ etye ɨ́ medíbé kʉ́. Bê kʉ́ nzě jóʼo bʉ́á.

²⁰Nye ó: «Ayɨ́ jóʼo gá bʉ́á. Yé ó me!»

²¹Bé mû lɨ́ edǐ kɛl nyé ɨ́ byɛ̂l nɛ́ɛ: bé kǎ twɨra ó, byɛ̂l, nyɨ́ syela ɨ́ pɨ̌n. Bé á be mû ó lɨ́ ebʉ́m bé á be lɨ́ etô lɨ́.

²²Ɨ́ mɛ́n tɨ̂, entumo e bʉ̂r lé á lîʼ lɨ́ ebʉ́m é mâŋ e kɔ́m nkɛ́ɛ́ lɨ́, lê nzě bee ó, yé á jaa bɨbe ó, njɨ byɛ̂l ngwár lɨ́ ebʉ̂m, waá ómpʉ́n mé Yésʉs, bé á tô tɨ̂ʼ nyá. Bé á be lɨ́ egʉ́a ntémé ó, Yésʉs á bé akalwo ɨ́ byɛ̂l waá. Ompʉ́n bé, bé á kalwo tɨ̂ʼ ó, bé omér.

²³Mʉ́ʉ́ mɛ̂l ntɔ̂ʼ pyâl, duhǒ Tiberiâs. Mɨ́ nzě pyâl kúnókúno e gúmó bé á de blêr píe jɔʼ Tî Yésʉs á dwe Nzyɛ̌m nzyǒo yɨ́.

²⁴Jɔʼ éntumo e bʉ̂r, lé á bee ó, táare e Yésʉs, kumo le ompʉ́n bɨ́bɛ̂h, bé akǎ be tɨ̂ʼ yɨ́, bê nzě kalwo ɨ́ mɛ̂l maá, nzě tóŋɔɔ ɨ́ Kapernáʉm, tô le esáŋɔɔ nyé gʉ̂.

²⁵Bê nzě tó kœ̌b Yésʉs lɨ́ ebʉ́m é mâŋ lé á be kɔ́m nkɛ́ɛ́ lɨ́. Bé e né ó: «Lɛ̂ʼla, go ka nzé kâʼ ɨ́ yáǎ jɔʼ?»

²⁶Nye nzě yala e bé ó: «Mě lɛ́ɛ́ bɨ́n lɨ́ otyeetye ó, bɨ̌n sáá mé ó, ebě, bɨ̌n bé á si de blêr, díle. Bɨ̌n bé asáa mé ɨ́ lɔ̌b mésimá bɨ́n á bee má.

²⁷Ayɨ́ séa gá lɨ́ esú é méde me dí e nkul ekaʼ, nkʉ̂ bo má, njɨ lɨ́ esú é maá me dí edi, tó pyâl ɨ́ twǐʼ njʉ̌m dǐ má. Mé ó dí maá Mwân mé Mʉr ódwe bɨ́n má, ebě, nye ó waá Nzyɛ̌m Sɔ́ŋ á gbâ jwɨʼ yé nyá.»

²⁸Bê nzě dî e né ó: «Bɨ̌h sâʼ nyá, ó bɨ̌h lóŋlaa bisyɛ́ɛlǎ Nzyɛ̌m dí edî bí?»

²⁹Yésʉs, nye e bé ó: «Syɛ́ɛlǎ Nzyɛ̌m dí edî bɨ́n yɨ́, yé ó, bɨ̌n dyɛ̂ʼwaa e mʉr nyé á ntɨh bɨ̌n nyá.»

³⁰Bé e né ó: «Láa ésimá gó dí ɨ́ pǎ lɛ̂ʼle bɨ́h, ó bɨ̌h béyɨɨ, bɨ̌h nkʉ̂ dyɛ̂ʼwo e go? Yé gó dí ɨ́ pǎ sâ yɨ́?

³¹Bimpám gá bíná, byé á si de mân ɨ́ lʉá. Yê cɛmá ɨ́ Mekaná mé Nzyɛ̌m ó: “Nye á si dwe bé mede, blêr, yé á duho ɨ́ jʉ́o kʉ́ yɨ́.”»

³²Yésʉs, nye e bé ó: «Mě lɛ́ɛ́ bɨ́n lɨ́ otyeetye ó, ntʉ̌ Moyɨ̂z á dwe bɨ̌n mede mempâ mé á duho ɨ́ jʉ́o kʉ́ má. Sɔ́ŋ wǎm ó dí entɨh méde mempâ me dí eduho ɨ́ jʉ́o kʉ́ má.

³³Ebě, medě Nzyɛ̌m dí edwe má, mé ó mʉr á duho ɨ́ jʉ́o kʉ́ nyá. Nye ó mʉr dí edwe bʉ̂r twiʼ nyá.»

³⁴Bé e né ó: «Yé bé nó wá, Dâ ɛ̌, dwídwéʼ bɨ́h mede maá melú mɨ́mɛ̂h.»

³⁵Yésʉs, nye e bé ó: «Me ó dí mede dí etiʼ bʉ̂r má. Mʉr nyɨnyɛ̂h dí enze kwá nyǎm nyá, nyé abe e nkul ekǎ jóʼo nzâ. Mʉr nyɨnyɛ̂h dí edyɛ̂ʼwo e me nyá, nyé abe e nkul ekǎ jóʼǒ dwéh médíbé.

³⁶Me á si lɛ́ɛ bɨ̌n ó, bɨ̌n bɨ́ bee mê, adyɛ̂ʼwo yɨ́ɛ e me.

³⁷Mʉr nyɨnyɛ̂h Nzyɛ̌m Sɔ́ŋ dí elómlo mé nyá, ónze kwá nyǎm. Mɛm ntémé áso waá nyɨnyɛ̂h dí enze kwá nyǎm nyá.

³⁸Ebě, me á bé aduho ɨ́ jʉ́o kʉ́, lɨ́ enzě sâ gwɨ́má yâm, njɨ gwɨ́má mʉ̂r á ntɨh me nyá.

³⁹Mʉr á ntɨh me nyá, nyě gwɨ́m ó, me ayɨ́ dímle mʉ̂r ngwár ɨ́ sɔ́má bʉ̂r o nyé á dwe me bá. Nyě gwɨ́m ó, me pɛ́ʼɛɛ bé lɨ́ eswie, pɛh bé ɨ́ móhó ésúʼlá é kʉ́ e sí.

⁴⁰Ebě, Sɔ́ŋ wǎm gwɨ́m ó, bʉr bɨ́bɛ̂h ngá bee Mwân wé, dyɛ̂ʼwo e né bá, bé níʼee ɨ́ twǐʼ njʉ̌m dǐ. Mɛm, me ópɛh bé ɨ́ móhó ésúʼlá é sí yɨ̂.»

⁴¹OYúden nzě táare élwib ɨ́ bébe bébe dumo e Yésʉs, ebě, nye á lɛ́ɛ ó: “Me ó dí mede, maá mé á duho ɨ́ jʉ́o kʉ́ má.”

⁴²Bé ntɔ̂ʼ díila ó: «Ntʉ̌ Yésʉs, mwân mé Yóseb nyâʼ ɛ̌? Mɨná bé lɨ́ ekʉ́ gʉ́a gá sɔ́ŋ wé, bé e nyɔ̌ŋ wé. Wáǎ mbi nyé dí elɛ́ɛ e mɨná gá báánâʼ ó, nye á duho ó kʉ́ yɨ́ ɛ́?»

⁴³Yésʉs nzě yala e bé ó: «Ayɨ́ nyimla gá páʼ nyɨ́n!

⁴⁴Sɔ́ŋ wǎm á ntɨh me nyá, óbe, adulo mʉ̂r nó, mʉr waá, nyé abe e nkul enze kwá nyǎm. Me ópɛh waá nyé ngá dulo nyá ɨ́ móhó ésúʼlá é sí yɨ̂.

⁴⁵Ogwíha o mílɔ̌b, bé á cɛma ɨ́ Mekaná mé Nzyɛ̌m ó: “Nzyɛ̌m ó ngá lɛ̂ʼle bɨ́bɛ̂h.” Me lɨ́ elɛ́ɛ ó, mʉr nyɨnyɛ̂h ójóʼǒ Nzyɛ̌m Sɔ́ŋ, le enʉa mílɛ́ʼlá nyé ódwe mí nyá, ónze kwá nyǎm.

⁴⁶Nó ó, yé alɛ̂ʼle ó, nyʉ́ʉ́ mʉ̂r á be ɨ́ beě Nzyɛ̌m Sɔ́ŋ. Waá á duho kwá mé Nzyɛ̌m nyá nyɨɛ, nye omér ó b'á bee nye.

⁴⁷Mě lɛ́ɛ́ bɨ́n lɨ́ otyeetye ó, mʉr dí edyɛ̂ʼwo e me nyá, nyɨ́ bǐ twǐʼ njʉ̌m dǐ.

⁴⁸Mɛm ó dí mede mé twiʼ.

⁴⁹Bimpám bín, bʉr o b'á de mân ɨ́ lʉá bá, bíbyɛ̂h, byé á si síe lɨ́ edwe ɨ́ lʉá waá tʉ́ŋlʉ̌.

⁵⁰Sâ gwár, mede, maá me dí eduho ɨ́ jʉ́o kʉ́ má mɨ́ɛ, mé ó mbi méde me dí: mʉ̂r sí de mé nó, nye ákóʼó kǎ dwe má.

⁵¹Me ó dí mede me dí etiʼ bʉ̂r, maá mé á duho ɨ́ jʉ́o kʉ́ má. Mʉ̂r sí de méde maá nɛ́ɛ: nye ótiʼě njʉ̌m dǐ e njʉ̌m dǐ. Mede mé ódwe nyé má, mé ó bipúnó byâm. Mě dwé bʉ̂r ó sí yɨ̂ʼ byǎ ó, lɨ́ esú ó, bé bíʼee twiʼ.»

⁵²Jɔʼ óYúden bé á jóʼo nó yɨ́, kʉ́ nzě táarɔɔ épére mékǎn páʼ nyɔ́ɔ́. Bé ó: «Mʉr nyâ, nyě e nkul edwe mɨ́ná gá bipúnó byé ó, mɨná dêʼ gá byé nyá?»

⁵³Yésʉs, nye e bé ó: «Mě lɛ́ɛ́ bɨ́n lɨ́ otyeetye ó, mʉ̂r bé ade bípúnó bí Mwân mé Mʉr le ede métié mé nó, lɛ́ɛ́, nyɨ́haá mʉ̂r abǐ twiʼ.

⁵⁴Mʉr nyɨnyɛ̂h dí ede bípúnó byâm ndu e metié mâm nyá, óbǐ twǐʼ njʉ̌m dǐ. Me ópɛh nyé lɨ́ eswie, pɛh nyé ɨ́ móhó ésúʼlá é sí yɨ̂.

⁵⁵Ebě, bipúnó byâm, byé ó mede mempâ. Metié mâm, mé ó mpǎŋ sá ébɛble.

⁵⁶Mʉr dí ede bípúnó byâm ndu e metié mâm nyá, nyě tiʼé ó, ɨ́ mpúhlá e me; mɛm ntémé ɨ́ mpúhlá e né.

⁵⁷Sɔ́ŋ wǎm, mʉr á ntɨh me nyá ó dí enó é twiʼ. Mě tiʼe ó ɨ́ nye. Jwɨʼ gwár e gwár yaá, mʉr óde mé nyá, ótiʼe ó ɨ́ me.

⁵⁸Mede mâ, mé ó mede mé á duho ɨ́ jʉ́o kʉ́ má. Mé anwɨɨla e maá bímpám bín, byé á de, bíbyɛ̂h síe lɨ́ edwe má. Mʉr nyɨnyɛ̂h ngá de méde mâʼ nyá, ótiʼě njʉ̌m dǐ e njʉ̌m dǐ.»

⁵⁹Yésʉs á dwe metwɨ́ɨ́ ménɨ̌ ó ɨ́ mpáh minjɨʼla ɨ́ Kapernáʉm.

⁶⁰Jɔʼ bʉ̂r ɨ́ buo buo ɨ́ sɔ́má ómpʉ́n bé, bé á jóʼo lɔ́ɔ́ Yésʉs á lɛ́ɛ wɨ́ yɨ́, bê nzě lɛ́ɛla páʼ nyɔ́ɔ́. Bé ó: «Lɛ́ʼlá wɨ̂, wé ɨ́ buú kɔbla. Nzé dí e nkul ejóʼo wê?»

⁶¹Yésʉs nzě gʉ́a ó, ompʉ́n bé, bé á be ó lɨ́ elwǐb lɔ̌b waá minyimla. Nye ó: «Nzê lɛ́ʼlá wâm nɨ̌, wé ó ebɔ̌ʼ e dí ebɨma bɨ́n ɨ́ miléme lɨ́ ɛ́?

⁶²Yé ókǎ sâ bɨ́n nyá, ɨ́ jɔʼ bɨ́n óbee Mwân mé Mʉr lɨ́ ebúla, bére, swîʼ, tô nko nyé á nyɛɛ bɨbe yɨ́?

⁶³Sísǐm mé Nzyɛ̌m ó dí edwě twiʼ. Mʉr ákóʼó bǐ twiʼ mpâ lɨ́ edû bígwɨ́má bí nkûl bipúno. Bilwǐb mé dí elwib e bɨ̌n bîʼ duho ó ɨ́ Sísǐm. Byé ntémé, byé ó dí etiʼ bɨ́n.

⁶⁴Sâ gwár, bʉ́ʉ́ bʉ̂r ó sɔ́má yɨ́n, bé adyɛ̂ʼwo e me.» (Yésʉs á si lɛ́ɛ nó, ebě, nye á be ó lɨ́ eboó gʉ́a, duho ɨ́ menyɛ̌l, baá bé á be adyɛ̂ʼwo e né bá, ndu e waá óbɛ́ma nyé nyá.)

⁶⁵Nye ntɔ̂ʼ báʼǎ lɛ́ɛ e bé ó: «Sá tɨ̂ʼ ó mê lɛ́ɛ́ e bɨ̌n ó, mʉr, nyé abe e nkul enze kwá nyǎm, nye l'apǎ nyɛɛ́ bi nkûl nyaá kwá mé Sɔ́ŋ wǎm yɨ́.»

⁶⁶Táare ɨ́ jɔʼ yaá ó bʉ́ʉ́ ómpʉ́n bé, bé á nze gɔ́na le ebúla ɨ́ twíaaa e metyɛʼ me nyʉ̂l, akǎ dúŋɔɔ nyé yɨ́.

⁶⁷Yésʉs, nye le ompʉ́n kám le obá bé ó: «Nzê bɨ̌n bɨɛ ntémé múo nzě búla píhe ɛ̌?»

⁶⁸Simon Pétrus, nye e né ó: «Dâ ɛ̌, bɨ́h sá nó wá, bɨ̌h bé ókǎ tô kwá mé nzé? Gua ó dí e milɛ́ʼlá me dí edwě twǐʼ njʉ̌m dǐ mí.

⁶⁹Ɨ́ báánâ, bɨ̌h bɨ́ bûʼla le egʉ́a ó, go ó dí kwahaá Mʉr mé Nzyɛ̌m dí ti nyá!»

⁷⁰Yésʉs, nye e bé ó: «Ntʉ mɛ̂m mʉr tɨ̂ʼ á twâr bɨ̌n kám le obá ɛ́? Damá jóʼo nó, nyʉ́ʉ́ mʉ̂r ɨ́ sɔ́má yɨ́n, nyě le eleme.»

⁷¹(Nye á lwib nó ó, dumo e Yʉ́das, mwân mé Simon Iskariôt, ebě, Yʉ́das, damá jóʼo ó mpʉ nyé á be mpʉ́n ɨ́ sɔ́má ómpʉ́n kám le obá yɨ́, nye á be e jwɨʼ ó, nye óbɛ́ma nyê.)