Read Koonzime Yʉánɛs 7 Bible Online

Yʉánɛs 7 - Koonzime bible

Yʉánɛs 7

¹Píe tɨ̂, Yésʉs nzě tô le etye ɨ́ sí Galilê. Nye á bé akǎ kpɛl étye ɨ́ sí Yʉ́da, ebě, oYúden bɨ́ɛ, bé á be ó lɨ́ esáa éjʉ̂ nyé gʉ̂.

²Nzɔɔ oYúden á be ó, nye mû kúno ebwalɔɔ. Nzɔɔ nyaá á jébɔɔ ó, “Nzɔɔ Bisaʼ Míkán”.

³Bɨ́ɔɔ́ mé Yésʉs, bé e né ó: «Gbɔlwaa wâ. Go e tó sí Yʉ́da, mbi dí ó, ompʉ́n bô, bé béyɨɨ ntémé bisyɛ́ɛla gó dí esâ bí.

⁴Mʉ̂r sí kpɛl ébuú gʉ́ŋɔɔ nó, nye l'asǒl syɛ́ɛlǎ nɨ́nɨ́ɨ́ nyé dí esâ yɨ́. Nó ó, ebe gó dí esâ mbi bísyɛ́ɛla bínɨ̌, yé jala ntémé ó, go lɛ̂ʼlaa bʉr ó sí bɨ́bɛ̂h go mʉr tɨ̂.»

⁵(Bɨ́ɔɔ́ bé ntémé, bé á bé adyɛ̂ʼwo e né.)

⁶Yésʉs, nye e bé ó: «Jɔʼ yâm, yé apǎ pyâl. Bɨ̌n bɨɛ ó dí e jɔʼ ɨ́ melú mɨ́mɛ̂h.

⁷Bʉr ó sí yɨ̂, bé abe e nkul enwim bɨ́n. Bé nwím ó mɛm, ebe mé dí egwîh ó, bisyɛ́ɛla bé dí esâ bí, byé ɨ́ bébe.

⁸Bɨ̌n bɨɛ, kaá laa gâ. Tóʼ gá ntémé ɨ́ nzɔɔ. Mɛm, mé atô ɨ́ nyɨ́nɨ̌ nzɔ́ɔ, ebě, ewala lâm, lé dína ó, apǎ pyâl.»

⁹Jɔʼ nyé á bě sí lɛ́ɛ bé nó yɨ́, nye nzě lîʼ píhe ɨ́ sí Galilê.

¹⁰Jɔʼ bɨ́ɔɔ́ bɨ́ɛ, bé á bě sí tô ɨ́ nzɔɔ yɨ́, Yésʉs nzě dû bé mesǒ, alɛ̂ʼle bé nyʉ̂l.

¹¹OYúden, bé á be ó lɨ́ esáa nyé ɨ́ nzɔɔ, le edíila páʼ nyɔ́ɔ́ ó: «Nye wâʼ nkoó ɛ́?»

¹²Entumo e bʉ̂r nzě pahle páʼ nyɔ́ɔ́. Bâʼ, bé ó: “Nye ó mbɨambɨa mʉr.” Bʉ́ʉ́, bé ó: “Kâr! Nye lɨ́ edímle bʉ̂r ɨ́ buo buo.”

¹³Ɨ́ bím lɔ̌b nɨ̌, mʉr á bé alwib kʉ́kʉ́, ebě, bé á be lɨ́ ekpɛ́ɛ óYúden.

¹⁴Ádwií témé nzɔɔ nɛ́ɛ: Yésʉs nzě tô mpáh Nzyɛ̌m, nzě nyɛl édwe bʉ̂r milɛ́ʼlá.

¹⁵OYúden kʉ́ nzě kámɔɔ nyê. Bé ó: «Nyâʼ mʉ̂r bá buǒ ngwɨ́á Mékaná mé Nzyɛ̌m, nyɨɛ, abe ó, nye á be ɨ́ tô ɨ́ sʉkʉ́lʉ?»

¹⁶Yésʉs, nye e bé ó: «Milɛ́ʼlá mé dí edwe mî, myé abě njɨ milɛ́ʼlá myâm. Myé duho ó ɨ́ mʉr á ntɨh me nyá.

¹⁷Mʉr dí egwɨ̂m ésâ bígwɨ́má mé Nzyɛ̌m nyá, ógʉ́ǎ gúmó lɛ́ʼlá wâm, wé á duho yɨ́: nkʉ̂ wé á duho ó, kwá mé Nzyɛ̌m, nkʉ̂ mě lwǐb ó e nkul nyǎm, mɛm mʉr tɨ̂.

¹⁸Mʉr dí elwib e nkul nyé mʉr tɨ̂ʼ nyá, sáá ó kûm nyé. Nó ó, mʉr dí esáa ébeʼ kûm lɨ́ esú é mʉ̂r á ntɨh nye nyá, lɛ́ɛ́ ó otyeetye. Syɛ́ɛla dí ɨ́ bébe ɨ́ míh mé Nzyɛ̌m yɨ́, yé anyɨ̂n ɨ́ kʉ̌ tyen wé.

¹⁹Ntʉ̌ Moyɨ̂z á tyêl bɨ̌n metié ɛ́? Sâ gwár, abe e mʉr dí ebaʼle métié maá. Bɨ̌n bé lɨ́ esáa éjʉ̂ mé ɨ́ yé?»

²⁰Entumo e bʉ̂r, lé e né ó: «Gǒ le eleme. Nzé dí egwɨ̂m éjʉ̂ gô?»

²¹Yésʉs, nye e bé ó: «Me á be ó sí sâ syɛ́ɛla gwár, bɨ̌n óbɛ̂h nzě kâm.

²²Moyɨ̂z á bě sí dwe bɨ́n nkul etíʼe bítyéé bí bwân mpʉ́n, damá jóʼo ó, ntʉ̌ Moyɨ̂z á kûhlo etié laá. Yé á be ó bimpám bín. Bɨ̌n kam étíʼe mʉ̂r mpʉ́n ó ɨ́ móhó sábat.

²³Bɨ̌n pǎ nyɛɛ́ tíʼe mʉ̂r mpʉ́n ɨ́ móhó sábat, agbah étié mé Moyɨ̂z, á dwɛʼra e mɛm, mʉr á tiʼ mʉr ntinɨ̂ ɨ́ móhó waá nyá! Nzê mɛm ó b'á gbah lé ɛ̌? Bɨ̌n kpaa ébúʼ e me ɨ́ yé?

²⁴Gwáʼáá gá etíʼe mílɔ̌b ɨ́ sá bɨ́n dí ebeě kʉ̌l yɨ́. Tíʼáá gá milɔ̌b lɨ́ otîtyěl.»

²⁵Bʉ́ʉ́ bʉ̂r ó Yerʉ́zalɛm nzě dî ó: «Ntʉ mʉ̂r nyâʼ bé dí esáa éjʉ̂ nyá ɛ́?

²⁶Beyɨɨ gá, nye lɨ́ ebánǎ lwib témé bʉr ɨ́ kpɛŋlɛm! Bé abá lɛ́ɛ nyé sɔ̂ʼ. Nzê minjwɨ́ɨbʉr gá míná, mí gʉ́ǎ tyeetye ó, nye ó dí Mʉ̌r Nzyɛ̌m á lœm múló mé jwɨ́ɨ nyá ɛ́?

²⁷Sâ gwár, ɨ́ jɔʼ mʉ̂r waá ópyâl yɨ́, mʉr, nye ágʉ́ǎ páʼ nyé óduho wɨ́. Tó kœb ó, mɨná bé lɨ́ egʉ́a gá nko mʉ̂r nyâʼ á duho yɨ́.»

²⁸Yésʉs á be ó lɨ́ edwe bé milɛ́ʼlá ɨ́ mpáh Nzyɛ̌m. Nye nzě tyɛ̂b le etúno ó: «Bɨ̌n bé lɨ́ egʉ́a mê? Bɨ̌n ntémé, bɨ́ gʉ́ǎ páʼ mé á duho wɨ́? Me á bé anze e mɛm mʉr tɨ̂. Sâ gwár, mʉr á ntɨh me nyá, nye ó tyeetye. Bɨ̌n bé agʉ́a nyê.

²⁹Mɛm, me lɨ́ egʉ́a nyê, ebě, me á duho ó kwá nyé. Ebě, ntémé, nye ó b'á ntɨh me.»

³⁰Bé á sɨsáa ó, bé mɛ́r ó nye. Sâ gwár, abe e mʉr á gbâ nye mbô ɨ́ nyʉ̂l, ebě, jɔʼ éswie lé, yé á bé apǎ pyâl.

³¹Lɨ́ entumo e bʉ̂r énɨ̌, bʉ́ʉ́ bʉ̂r ɨ́ buo buo, bé á be ɨ́ dyɛ̂ʼwo e né. Bé ó: «Jɔʼ Mʉ̂r Nzyɛ̌m á lœm múló mé jwɨ́ɨ nyá, ónze yɨ́, nzê nye óbánǎ laa mʉ̂r nyâʼ lɨ́ esâ mésimá ɛ̌?»

³²OFarizyɛ̂n nzě jóʼǒ sá bʉ̂r, bé á lwilwib páʼ nyɔ́ɔ́, dumo e Yésʉs yɨ́. Ojwɨ́ɨ o mpáh Nzyɛ̌m, bé le oFarizyɛ̂n ntɔ̂ʼ lómɔɔ bísója lɨ́ etó mɛ́rɔɔ nyê.

³³Yésʉs, nye ó: «Mɨná dína gá ó e mâ diá wâ. Me óbúla, swîʼ tô nko mʉ̂r á ntɨh me nyá dí yɨ́.

³⁴Bɨ̌n bé ósáa mê, sâ gwár, abeɔɔ mê, ebě, bɨ̌n bé abe e nkul etô nko mé óbe yɨ́.»

³⁵OYúden nzě táare édíila páʼ nyɔ́ɔ́ ó: «Nye ókǎ tô wâʼ wó, mbi dí ó, mɨná bé ákǎ bee gá nye wɨ́? Nzê nye ótô le elɛ̂ʼle óYúden mû mingbɛhá míngbɛhá ɨ́ Grɛ̂s, le elɛ̂ʼle ntémé bʉr o Grɛ̂s ɛ̌?

³⁶Wáǎ mbi ékǎn nyê lɛ́ɛ́ ó: “Bɨ̌n bé ósáa mê. Sâ gwár, bɨ̌n bé ákóʼó kǎ bee mê, ebě, bɨ̌n bé abe e nkul etô nko mé óbe yɨ́?”»

³⁷Ɨ́ móhó ésíé é nzɔ́ɔ, móhó nzɔ́ɔ dí eleʼwo wɨ́, Yésʉs nzě tó tyɛ̂b témé bʉr, nzě túno ó: «Mʉr dí ejóʼǒ dwéh médíbé nyá, nye ntâʼ kwá nyǎm, nzě de!

³⁸Mʉr nyɨnyɛ̂h dí edyɛ̂ʼwo e mé nyá, “Misʉm médíbé mé twiʼ, myé ósɨ̂sah, duho nyé ɨ́ léme,” mpʉ Mékaná mé Nzyɛ̌m dí elɛ́ɛ yɨ́.»

³⁹(Yésʉs á lwib ó, ɨ́ lɔ̌b Sísǐm mé Nzyɛ̌m bʉ̂r o ngá dyɛ̂ʼwo e né bá, bé óbi wɨ́. Abe e mʉr á pa bi Sísǐm mé Nzyɛ̌m, ebě, Yésʉs á bé apǎ dweŋɔɔ kûm.)

⁴⁰Bâʼ bʉ̂r, ɨ́ jɔʼ bé á sil ejóʼo bilwǐb byé bínɨ̌ yɨ́, bé ó: «Mʉr nyâ, nye kʉ́ bě tyeetye ó ngwíha milɔ̌b Moyɨ̂z á lwib ɨ́ lɔ̌b wé nyá.»

⁴¹Bʉ́ʉ́, bé ó: «Nye ó Mʉ̌r Nzyɛ̌m á lœm múló mé jwɨ́ɨ nyá.» Bʉ́ʉ́ ntémé, bé ó: «Nzê mʉr waá, nyě e nkul eduhǒ sí Galilê ɛ̌?

⁴²Mekaná mé Nzyɛ̌m, mé lɨ́ elɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, óbe ó nta mé David. Nye óduho ó, Bétɛlɛhɛm, kwár mé David.»

⁴³Entumo e bʉ̂r nzě bɔ́ʼa métwíí ɨ́ lɔ̌b mé Yésʉs.

⁴⁴Bʉ́ʉ́ bʉ̂r ó sɔ́má yɔ́ɔ́, bé á be ó e gwɨ́má ó, bé mɛ́r ó nye. Sâ gwár, abe e mʉr ngwár á gbâ nye mbô ɨ́ nyʉ̂l.

⁴⁵Bisója nzě báʼǎ tóŋɔɔ̌ nko ójwɨ́ɨ o mpáh Nzyɛ̌m le oFarizyɛ̂n bé á be yɨ́. Bé e bisója ó: «Bɨ̌n bé amɛ̂r nyê, nze e né ɨ́ yé?»

⁴⁶Bisója, byé e bé ó: «Abe e mʉr ngwár dí ɨ́ pǎ lwǐb mpʉ mʉ̂r nɨ̌.»

⁴⁷OFarizyɛ̂n, bé e bisója ó: «Bɨ̌n sí bánǎ kʉ́ bîr ó, nye kʉ́ŋaa bɨ̌n ntémé?

⁴⁸Nzê gúú njwɨ́ʼ mʉ̂r, nkʉ̂ nyʉ́ʉ́ Farizyɛ̂n, nyɨ́ pǎ dyêʼ nyé koo?

⁴⁹Entumo e bʉ̂r lɨ́ɛ, lé agʉ́a métié mé Nzyɛ̌m. Lé e meswomlʉ.»

⁵⁰Nikodɛ́mos, waá á nyɛɛ to bee Yésʉs ɨ́ pum nyá, á be ó mʉr ngwár ɨ́ sɔ́má yɔ́ɔ́. Nye ó:

⁵¹«Nzê etié gá lɨ́ná, lé kam ó, bʉr tíʼaa lɔ̌b mʉ̂r, mʉr tɨ̂ʼ apǎ kar, otîʼ l'apǎ gʉ́ǎ sá nyê sá yɨ́ ɛ́?»

⁵²Bé e né ó: «Nzê go ntémé, go ó mʉr Galilê ɛ̌? Pahlaa Mékaná mé Nzyɛ̌m! Go óbee ó, abe e ngwíha milɔ̌b ngwár dí eduhǒ sí Galilê.»

⁵³[Bê nzě bɔ́ʼa, mʉr nyɨnyɛ̂h tô ɨ́ wé mbɛ̌r.]