Read Koonzime Milʉ́mlʉ́ 1 Bible Online

Milʉ́mlʉ́ 1 - Koonzime bible

Milʉ́mlʉ́ 1

¹Théophile, mɨ́ɔɔ́ wǎm! Ɨ́ mekaná mé ésôʼ mé á nyɛɛ cɛma go má, me á si lɛ́ɛ sá yɨ́yɛ̂h Yésʉs á sâ, le elɛ̂ʼle, duho ɨ́ menyɛ̌l,

²tó pyâl pyáláa ɨ́ móhó nyé á bɨ́nɔɔ ɨ́ jʉ́o kʉ́ wɨ́. Nye dína apǎ bɨ́nɔɔ ɨ́ jʉ́o kʉ́, nye á si líʼe bʉr o mílʉ́mlʉ́ bé, nyé á twâr bá, etié e nzɨ̌ Sísǐm mé Nzyɛ̌m.

³Jɔʼ nyé á sil esia e mitúú, ntɔ̂ʼ dwe yɨ́, nye nzě pah, duho lɨ́ odwe, nzě lɛ̂ʼle bʉ̂r o mílʉ́mlʉ́ bé nyʉ̂l nyé e nzɨ̌ bijwɨʼ ɨ́ buo buo, ó bé gʉ́ŋaa tyeetye ó, nye á kʉ be ó kublakúbla. Ɨ́ melû mekám ménâ maá, bé e boo nɔ́ɔ́ ó b'á bɨbe. Nye á lɨlɛ́ɛ bé ó, milɔ̌b mi Mpóʼo mé Nzyɛ̌m.

⁴Ɨ́ gúú móhó bé e boo nɔ́ɔ́, bé á be lɨ́ ede wɨ́, nye e bé ó: «Aduho gá Yerʉ́zalɛm, tô lɨ́ ejaa. Bɨ̌n a bónó sá Sɔ́ŋ wǎm á kɛʼ bɨ̌n yɨ́: yé ó sá mé á lɛ́ɛ bɨ̌n yɨ́.

⁵Ebě, Yʉánɛs nyɨɛ á dudu bʉr ó e medíbé. Yɨ́ kǎ lîʼ njɨ bwá mélû abuo, bɨ̌n bé ókǎ duŋɔɔ ó e Sísǐm mé Nzyɛ̌m.»

⁶Nó ɨ́ jɔʼ bé á be, bé mû bé omér yɨ́, bé ntɔ̂ʼ dî e Yésʉs ó: «Dâ ɛ̌, nzê ɨ́ jɔʼ yɨ̂ʼ ó gó ngá báʼǎ tyêl sí Ɨ́zraɛ̂l ɛ̌?»

⁷Yésʉs ntɔ̂ʼ yala e bé ó: «Bɨ̌n bé ajala le egʉ́a bíjɔʼ le mimbû Sɔ́ŋ wǎm ngá sâ bísyɛ́ɛla byé bí. Ebě, Sɔ́ŋ wǎm mʉr tɨ̂ʼ ó b'á tyêl bijɔʼ byaá e nkul jwɨ́ɨ́ yé nye mʉr tɨ̂.

⁸Bɨ̌n bé óbi nkûl ɨ́ jɔ̌ʼ Sísǐm mé Nzyɛ̌m ngá sulo bɨ́n ɨ́ menyʉ̂l yɨ́. Nó ó bɨ́n ngá boʼlo mílɔ̌b myâm, táare ɨ́ Yerʉ́zalɛm, le ɨ́ mekwár mé sí Yʉ́da mɨ́mɛ̂h, ndu e maá mé sí Samarî, tó pyâl ɨ́ medumo mé sí mɨ́mɛ̂h yɨ́.»

⁹Jɔ̌ʼ Yésʉs á sil elɛ́ɛ milɔ̌b myaá yɨ́, nye nzě bɨ́nɔɔ ɨ́ jʉ́o kʉ́ ɨ́ míh mɔ́ɔ́. Píe tɨ̂, dwiné nzě búblo nyê. Nye ntɔ̂ʼ dîm bé ɨ́ mîh.

¹⁰Bé dína mîh lɨ́ edwɛ̂ʼ kʉ́, lɨ́ ebeě mpʉ̌ Yésʉs á bɨ́nɔɔ kʉ́ yɨ́ nɛ́ɛ: bé kǎ twɨra ó, bʉr obá, bé ɨ́ mempah me nyʉ̂l e mikán ɨ́ pan pan.

¹¹Bʉr baá ntɔ̂ʼ lɛ́ɛ e bé ó: «Bʉr ó Galilê, bɨ̌n di náǎ lɨ́ edwɛ̂ʼ jʉ́o kʉ́ ɨ́ di di di ɨ́ yé? Yésʉs, mʉr pɛʼɔɔ ɨ́ sɔ́má yɨ́n nyá, óbáʼǎ nze ó, mbi ngwár e ngwár bɨ̂n bee nyé lɨ́ ebɨ́nɔɔ ɨ́ jʉ́o kʉ́ nɨ̌.»

¹²Bʉr o mílʉ́mlʉ́ bé, bé ntɔ̂ʼ nyɛl ékɔ́a écwɨ̂ʼ bé jɨ́jébé ó, “Ecwɨ́ʼ lé ólivier” lɨ́, nzě tóŋɔɔ̌ Yerʉ́zalɛm. Tyen yɔ́ɔ́ yaá, yé á be ó kúnókúno e kíloméra ngwár, bím tyen mʉ̂r dí e nkul etye ɨ́ dʉ́ó é sábat yɨ́.

¹³Jɔʼ bé á pyâl gʉ̂ʼ yɨ́, bê nzě bére ɨ́ ntɔ́ɔ tólóm mbɛ̌r bé á boo didi tɨ̂ʼ nyɨ́. Bé á be ó: Pétrus, Yʉánɛs, Jacques ti e André, Philippe ti e Thomas, Barthélemy ti e Matthieu, Jacques, mwân mé Alfê, Simon “Kɔmlʉ kwár” ti e Yʉ̂d, mwân mé Jacques.

¹⁴Bɨ́bɛ̂h, bé á sisyɛŋa léme ngwár ó, bé tirwo ó e syɛ́ɛ́ mínjɨʼla. Tɨ̂ʼ ntémé, yé á be ó le obûʼla o bʉ́bá, le nyɔ̌ŋ mé Yésʉs, Maria, ti e bɨ́ɔɔ́ le okɛ́l mé Yésʉs.

¹⁵Ɨ́ tíl mélû yaá mpʉ óbûʼla nter e mekám mébá, bé á syɛŋa yɨ́, Pétrus nzě mɔa sí, tyɛ̂b témé entumo e bʉ̂r énɨ̌ memɛ̌n. Nye ó:

¹⁶«Bɨ́ɔɔ́ bâm! Okɛ́l bâm! Yé á jala ó, sá Sísǐm mé Nzyɛ̌m wé á lɛ́ɛ ɨ́ nzɨ̌ mé David yɨ́, yé díraa. Yé á be cɛmá ó, ɨ́ lɔ̌b mé Yʉ́das, mʉr á to le etɨ́e bʉr nzɨ̌ etó mɛ̂r Yésʉs nyá.

¹⁷Nye ntémé á be ó mʉr ngwár ɨ́ sɔ́má gá yɨ́ná. Nye ntémé á si bi nkɔb ɨ́ syɛ́ɛ́ gá yɨ́ná yɨ̂.»

¹⁸(Náǎ yé ó, ɨ́ mɔnɨ́ Yʉ́das waá á bi tâŋ myɛ́na duho ɨ́ bɨ́blǎ syɛ́ɛla yé yɨ́, nye á be ó sí tó bwâm pemé. Ɨ́ pemé gwár yaá, nye nzě jéʼe éduma sí mbûmbǔr, mo wé ntɔ̂ʼ bʉ̂l, bisá bí mo bíbyɛ̂h kʉ̌l e kʉ̌l ɨ́ lwɨ́ʼlɨ́ lwɨ́ʼlɨ́ sí e sí.

¹⁹Bʉr ó Yerʉ́zalɛm bɨ́bɛ̂h, bé á si jóʼo lɔ́ɔ́ éswie laá. Nó ó bé á ka jwɨr pemé yaá ɨ́ lwǐb yɔ́ɔ́: “Akɛ́ldáma”. Díe laá, lé páʼlɔ́ɔ́ ó, “Pemé métié”.)

²⁰Pétrus nzě lɛ́ɛ ntémé ó: «Ebě, yê cɛmá lɨ́ oSâm mé David ó: “Mbɛ̌r wé, wé líʼɨɨ gumo. Mʉ̌r sá akǎ báʼǎ di tɨ̂.” Yé ntémé, yê cɛmá ó: “Nyʉ́ʉ́ mʉ̂r, nye nʉ́aa dǐ tyɛ̂b esôʼ yé.”

²¹Nó yé jala ó, nyʉ́ʉ́ mʉ̂r ɨ́ sɔ́má gá yɨ́ná bâʼraa e bɨ̌h, bʉr o mílʉ́mlʉ́ mé Yésʉs. Nye ntémé tôʼ le ebʉboʼlo ó, Tî Yésʉs, nyɨ́ pah, duho lɨ́ odwe. Mʉr waá, nye ɨ́ jala le ebe mʉ̂r sɔ́má yé á dudû Tî Yésʉs nyá. Nye díʼee mʉr á tiʼe e mɨná gâ, táare ɨ́ jɔ̌ʼ Yʉánɛs á du Yésʉs ɨ́ díbé Yɔrdên, tó kumo ɨ́ jɔʼ nyé á bɨ́nɔɔ ɨ́ sɔ́má gá yɨ́ná yɨ́ nyá.»

²³Bê nzě pɛ̂h bʉ̂r obá: nyâ, díé lé Yóseb, waá bé á jwɨr Barsabâs nyá. (Lʉ́ʉ́ díé lé, lé ó Yʉstʉ̂s.) Nyʉ́ʉ́, lé díe, Mathias.

²⁴Nó ó bʉ̂r ó gwɨ́hlá bɨ́bɛ̂h, bé á jɨʼla e Nzyɛ̌m, lɛ́ɔɔ ó: «Dâ ɛ̌, go ó dí egʉ́a mílémé mí bʉ̂r bɨ́bɛ̂h. Lɛ́ʼláá bɨ́h ɨ́ sɔ́má bʉ̂r obá bâ, waá gó á pɛ̂h nyá.

²⁵Ebě, nye ɨ́ jala le enʉǎ dǐ Yʉ́das á dímle lɨ́ etó kœ̌b dǐ yé á jʉ́ʼa e nyɨɛ yɨ́. Nyɨ́haá ó ngá tô e syɛ́ɛ́ lʉ́mlʉ́ dóló.»

²⁶Nó bé á nze do ebya, lɨ́ epɛ̂h nyʉ́ʉ́ mʉ̂r ɨ́ sɔ́má bʉ̂r obá baá. Ebya nzě twâr Mathias. Nó ó bé á ka nze láa nye mʉr jálá le ebâʼra e sɔ́má bʉ̂r o mílʉ́mlʉ́ kám e ngwár nyá yɨ́.