Read Koonzime Milʉ́mlʉ́ 10 Bible Online

Milʉ́mlʉ́ 10 - Koonzime bible

Milʉ́mlʉ́ 10

¹Ɨ́ Kesáre, yé á be ó e nyʉ́ʉ́ mʉ̂r, díé lé Corneille. Nye á be ó kapitɛ̂n mʉr Rôm. Nye ó b'á be njwɨ́ɨ ɨ́ sɔ́má dɔ̂m bé dí ejébe ó: “Sɔ́má Bʉ̂r ó Italî” yɨ́.

²Bé e mbɛ̌r bʉ̂r wé wɨ́wɛ̂h, bé á be ó otîtyěl o bʉ̂r. Bé ntémé bé á be lɨ́ edwáawǒ Nzyɛ̌m. Nye á be lɨ́ ebuú súʼo báántéʼenteʼe o bʉ̂r óYúden, le ejɨʼla e Nzyɛ̌m ɨ́ bijɔʼ ɨ́ buo buo.

³Píe témé móhó, yé mû kúnókúno e mewala melɛ̂l nɛ́ɛ: nye ntɔ̂ʼ bee ésimá. Nye á bee ó, éngeles mé Nzyɛ̌m lɨ́ enî ɨ́ mbɛ̌r wé. Éngeles waá nzě lɛ́ɛ e né ó: «Corneille!»

⁴Nye nzě dwɛ̂ʼ éngeles e bʉ́á. Nye e né ó: «Dâ ɛ̌, yê nyá?» Éngeles ntɔ̂ʼ yala e né ó: «Nzyɛ̌m, nyɨ́ yala gó mbɨ̂mbɨá. Nye mû ó sí toŋlo gó ɨ́ lɔ̌b mínjɨʼla myô le mingúlá gó dí edwidwe báántéʼenteʼe o bʉ̂r mí.

⁵Lómáá bʉ̂r Yópe ɨ́ báánâ. Bé tô jébě Simon, waá dí e lʉ́ʉ́ díe ó, “Pétrus” nyá.

⁶Nyě di ó, mbɛ̌r mé Simon, syɛ̂l bikʉ́r bí ótír. Mbɛ̌r wé, wé ó ɨ́ nkpâh mâŋ.»

⁷Jɔʼ éngeles á laa, tô yɨ́, Corneille ntɔ̂ʼ jébe ósyɛ̂l o mésá bé obá, ndu e yʉ́ʉ́ sója ɨ́ bisója byé á sɨséa e né bí. Sója yaá ntémé á be lɨ́ edwáawǒ Nzyɛ̌m.

⁸Nye ntɔ̂ʼ lɛ́ɛ bé sá yɨ́yɛ̂h yé á pyâl nye yɨ́. Píe tɨ̂, nye nzě lómo bé Yópe.

⁹Ɨ́ gúú mɛ́n, bé dína nzɨ́ e nzɨ̌, bé mû lɨ́ ekúnwo e Yópe nɛ́ɛ: Pétrus nzě bére kʉ́ mié, lɨ́ etó jɨʼla e Nzyɛ̌m gʉ̂. Yé á be ó, yé mû kúnókúno e témé móhó.

¹⁰Nye nzě jóʼo nzâ. Nye á be ó lɨ́ egwɨ̂m éde. Jɔʼ bʉ̂r ó mbɛ̌r, bé á be, bé dína lɨ́ ejâm nyé mede yɨ́, nye nzě bee ésimá.

¹¹Nye dína lɨ́ edwɛ̂ʼ kʉ́, nyé ká bee nɛ́ɛ: jʉ́o lɨ́ ebɔ́a, yʉ́ʉ́ sɔ̂ʼ mpʉ sána ndɔ́má ɨ́ bwaʼ bwaʼ lɨ́ eduho ɨ́ jʉ́o kʉ́, sulo sí, ɨ́ nteeen. Yé á be ó tyeelá ɨ́ medumo menâ. Yé á be ó lɨ́ edulwa, sulo sí.

¹²Ɨ́ sɨ́ǎ yaá tʉ́ŋlʉ̌, yé á be ó, le otír mimbi mímyɛ̂h: le baá dí e metɔrʉ menâ bá, le sá yɨ́yɛ̂h dí ejaŋla sí e sí yɨ́, ti e binʉ̌n.

¹³Nyʉ́ʉ́ twíí ntɔ̂ʼ lɛ́ɛ e né ó: «Pétrus, gbɔlwaa si. Jʉ́ʼóo. Go e dê!»

¹⁴Nó ó Pétrus á yala e né ó: «Dâ ɛ̌, kʉ́ kâr káráa, ebě, mimbi bísá bíbyɛ̂h bi dí mitilá bí, mé apǎ de byê.»

¹⁵Nye nzě báʼǎ jóʼo twíí ɨ́ jɔʼ mbá lɨ́ elɛ́ɛ e né ó: «Sá Nzyɛ̌m mû sí pubo yɨ́, anyamlě bee yé ó, yé ó tilá.»

¹⁶Sâ yaá, yé á pyâl nye nó ó, nzɔʼ lɛ̂l. Píe tɨ̂, ɨ́ tyé e tyé yaá, sɨ́ǎ yaá ntɔ̂ʼ búla, bɨ́nɔɔ ɨ́ jʉ́o kʉ́.

¹⁷Pétrus dína lɨ́ edî ɨ́ nye mʉr tɨ̂ʼ ó, “Lɨ̂ʼ ésimá, lé kpɛl élɛ́ɛ wâʼ yé ɛ́?” nɛ́ɛ: bʉr ó Corneille á lómo bá, bé ntɔ̂ʼ pyâl lɨ́ ebé é mbɛ̌r mé Simon, bé osí pǎ dî nkǒ páʼ mbɛ̌r waá, wé á be yɨ́.

¹⁸Bé ntɔ̂ʼ jébe, le edíŋɔɔ ó: «Nzê yé e nyʉ́ʉ́ mʉ̂r dí edi wâʼ ɨ́ mbɛ̌r wɨ̂, díé lé Simon, waá dí e lʉ́ʉ́ díe ó, “Pétrus” nyá ɛ́?»

¹⁹Pétrus, nye dína lɨ́ epahle ésimá nyé á bee lɨ́ nɛ́ɛ: Sísǐm mé Nzyɛ̌m ntɔ̂ʼ lɛ́ɛ e né ó: «Gó dí edǐ nɨ̌, bʉr olɛ̂l, bé ó wâʼ lɨ́ esáa gô.

²⁰Gbɔlwaa sí, go e súlo. Bɨ̌n le onɔ́ɔ́ e tô. Gǒ sá ó, alíʼa lɨ́ etô, ebě, mé o lómó bê.»

²¹Nó ó Pétrus á sulo sí, nzě lɛ́ɛ e bʉr baá ó: «Me ó dí mʉr bɨ́n dí esáa nyá. Bɨ̂n nze sáá mé ɨ́ yé ɛ́?»

²²Bé ntɔ̂ʼ yala ó: «Kapitɛ̂n Corneille ô lómó bɨ́h. Nye ó tîtyěl mʉr, dí ebuú dwáawǒ Nzyɛ̌m nyá. OYúden bɨ́bɛ̂h, bé lɨ́ esêʼle nyê. Nyʉ́ʉ́ éngeles dí ti nyá, á tɨ́e nye ó, nye báŋlaa go, go tô pyâl kwá nyé, nye jôʼlaa sá gó ngá lɛ́ɛ nyé yɨ́.»

²³Pétrus nzě níŋle bé mbɛ̌r, nzě tira bé ntɔ́ɔ ɨ́ mbɛ̌r mé Simon. Ɨ́ mɛ́n tɨ̂, bé e boo nɔ́ɔ́ nzě tô, bé e bʉ́ʉ́ óbûʼla ó Yópe.

²⁴Ɨ́ móhó wé á ka bɔma wɨ́, bê nzě pyâl Kesáre. Corneille á be ó lɨ́ ebóno bê, bé e mimbyɛ́l myé le osó bé nyé á báŋle bá.

²⁵Lě Pétrus á nî mbɛ̌r, le ntɔ̂ʼ Corneille á to bɔma e né, nzě bɨʼ mébóó sí, buú jɔr nyʉ̂l e né.

²⁶Pétrus nzě gbɛl nyé sí. Nye e né ó: «Gbɔlwáa, ebě, me ntémé, me ó mʉr mpʉ gô.»

²⁷Bé e Corneille nzě lwibla. Jɔʼ bé á to nî mbɛ̌r yɨ́, Pétrus á kœb ó, bʉr ɨ́ buo buo, bé osí swâl tɨ̂.

²⁸Nye e bé ó: «Bɨ̌n bé lɨ́ ekʉ́ gʉ́a ó, yé ajala ó, mʉr kúl óYúden tíʼaa ɨ́ mpúhlá e mʉr kúl swîh, nkʉ̂ sîhlě síhláǎ bǎʼ e né. Damá jóʼo nó, Nzyɛ̌m á tɨ́e me ó, mʉr, nyé abě sá mélwaʼwo, nkʉ̂ ntɔ̂ʼ sá mpîr, duho ɨ́ mebyɛ́l mé.

²⁹Sá tɨ̂ʼ ó mé á be alíʼa lɨ́ enze ɨ́ jɔʼ mé á jóʼo mpáŋla nyɨ́n yɨ́. Nó ntémé ó mé dí ekpɛl égʉ́ǎ sá bɨ̂n pʉgʉ báŋlé mé e tɨ̂ʼ yɨ́.»

³⁰Nó ó Corneille á yala e né ó: «Yé mû mûh ó melú ménâ, ɨ́ mbi éwala wɨ̂, me á be ó ɨ́ mbɛ̌r wɨ̂, lɨ́ esâ mínjɨʼla, myaá sɨ́sáŋɔ́ɔ́ ɨ́ mewala melɛ̂l mí. Nyʉ́ʉ́ mʉ̂r nzě nyɨ̂n mé metwɨrâ, e mikán ɨ́ nyʉ̂l ɨ́ nkaaá, nzě tyɛ̂b mé ɨ́ mpǒm.

³¹Nye e me ó: “Corneille! Nzyɛ̌m, nyɨ́ yala mínjɨʼla myô. Nye mû ó lɨ́ etoŋlo gó ɨ́ lɔ̌b míngúlá gó dí edwidwe báántéʼenteʼe o bʉ̂r mí.

³²Ɨ́ báánâ, lómáá bʉ̂r Yópe. Bé tô jébě Simon, waá dí e lʉ́ʉ́ díe ó, Pétrus nyá. Nyě dǐ ó, ɨ́ mbɛ̌r mé Simon, mʉr dí eséa bíkʉ́r bí ótír nyá. Mbɛ̌r wé, wé ó, ɨ́ nkpâh mâŋ.”

³³Nó ó mé á kpahwa lómo bʉr ɨ́ sɔ́ɔlʉ gô yɨ́. Go bé ɨ́ kʉ́ gwá sâ, lɨ́ esí bánǎ nze. Bɨ̌h bɨ́bɛ̂h mû ó sí swâl wâʼ báánâʼ ɨ́ míh mé Nzyɛ̌m lɨ́ enzě jóʼǒ sá yɨ́yɛ̂h Dâ Nzyɛ̌m lɛ́ɛ́, go ntáa nzě kala bɨ́h yɨ́.»

³⁴Nó ó Pétrus á nze nʉa lwǐb. Nye ó: «Mɨ́ kʉ́ gʉ́ǎ tyeetye ɨ́ báánâʼ ó, Nzyɛ̌m, nye ágbá mbɔ́ʼ páʼ bʉ̂r e bʉr.

³⁵Ɨ́ bikúl bíbyɛ̂h, Nzyɛ̌m beě mbɨ̂mbɨá ó, mʉr nyɨnyɛ̂h dí edwáawo nyê, le esâ sá dí tîtyěl yɨ́ nyá.

³⁶Bɨ̌n bé lɨ́ egʉ́ǎ lɔ́ɔ́ Nzyɛ̌m á lɛ́ɛ bʉr o b'Ɨ́zraɛ̂l wɨ́. Mbɨambɨa Lɔ́ɔ waá, wé ó waá mépyɛbla bʉ̂r dí ebi ɨ́ nzɨ̌ mé Yésʉs-Krîst, dí Njwɨ́ɨbʉr bɨ́bɛ̂h nyá wɨ́.

³⁷Bɨ̌n bʉr o tɨ̂, bɨ̌n bé lɨ́ egʉ́ǎ sá yé á syɛ́ɛ ɨ́ sí Yʉ́da yɨ́yɛ̂h yɨ́. Yé á táare ó, ɨ́ sí Galilê, píě ndubó Yʉánɛs á du bʉr wɨ́.

³⁸Bɨ̌n bé lɨ́ egʉ́a ntémé mpʉ̌ Nzyɛ̌m á lœm Yésʉs, mʉr Nazarɛ̂t, Sísǐm wé, le edwe nyé ánɨ̂nɨ̂n nkul yɨ́. Bɨ̌n bé lɨ́ egʉ́a ntémé mpʉ̌ Yésʉs á tye mésí e mésí, lɨ́ etô le esâ émbɨa, le etiʼ baá bɨ́bɛ̂h bé á jɨjaʼra e mpél mé sɔ́ŋ meleme bá yɨ́, ebě, bé e Nzyɛ̌m ó b'á be.

³⁹Bɨ̌h bɨɛ ó dí kwahaá oboʼlo o tɨ̂, bʉr o dí ekʉ́ gʉ́a bísyɛ́ɛla bíbyɛ̂h nyé á sâ ɨ́ sí bʉ̂r óYúden ndu e Yerʉ́zalɛm bí bá. Bé á si bomlo nye e binzâŋ, bɨ́nɔɔ nyé ɨ́ kolôs kʉ́, jʉ́ŋɔɔ nyê.

⁴⁰Sâ gwár, Nzyɛ̌m á si pɛh nye ɨ́ móhó lɛ̂l, nyé osí dwe. Nye nzě sâ ó, bʉr báʼa bee nyê.

⁴¹Abe yɨ́ɛ bʉr bɨ́bɛ̂h. Nye á jaa pyâl ó, njɨ kwá nyɨ́h, bʉ̌r Nzyɛ̌m á boo twâr bá. Bɨ̌h bɨɛ ó dí oboʼlo bé, ebě, bɨ̌h le onɔ́ɔ́ ó b'á pûhla mebô lɨ́ ede méde le menyoʼ píe jɔ̌ʼ Nzyɛ̌m á pɛh nye, dwih nyé lɨ́ odwe yɨ́.

⁴²Nye á si lɛ́ɛ e bɨ̌h ó, bɨ̌h tôʼ le etúnǒ Mbɨambɨa Lɔ́ɔ́ wé, ó: Yésʉs ó dí mʉ̌r Nzyɛ̌m á tyêl ɨ́ dǐ tîʼ milɔ̌b, waá ngá tíʼe míkublakúbla le odwe milɔ̌b nyá.

⁴³Ogwíha o mílɔ̌b bɨ́bɛ̂h, bé á si lwib, dumo e né. Bé á lɛ́ɛ ó, mʉr nyɨnyɛ̂h ódyêʼ koo e né nyá, Nzyɛ̌m ópɛʼ bíbaa nyé dí eniʼe ɨ́ lɔ̌b mísyóm myé bí. Nye ósâ nó ó, ɨ́ lɔ̌b mé Yésʉs.»

⁴⁴Pétrus dína apǎ sîl élwib nó nɛ́ɛ: Sísǐm mé Nzyɛ̌m ntɔ̂ʼ sulo ɨ́ mʉr nyɨnyɛ̂h á jóʼo lɔ́ɔ́ wé nyá.

⁴⁵Obûʼla bé e boo Pétrus bé á nze, baá bé á tíʼɔɔ mpʉ́n bá, bé á si bu kâm lɨ́ ebánǎ beě Sísǐm mé Nzyɛ̌m lɨ́ edweŋɔɔ ntémé bʉr o b'á be abyɛ̂l oYúden bá.

⁴⁶Ebě, bé jóʼó nɛ́ɛ: bɨ́ɛ ntémé mû lɨ́ egúmlo mpwâʼ kûm mé Nzyɛ̌m ɨ́ bilwǐb bí ayogoyogo. Nó ó Pétrus á ka dî ó:

⁴⁷«Nzê mʉr, nyě e nkul ekǎ kamle bʉ̂r bâʼ lɨ́ eduŋɔɔ ɨ́ medíbé ɛ́? Ebě, bé mû ó sí bǐ Sísǐm mé Nzyɛ̌m ntémé, jwɨʼ gwár e gwár e mɨná gâ.»

⁴⁸Nó nyé á dwe nkul ó, bé dúŋɔɔ ɨ́ díé mé Yésʉs-Krîst. Nó ó bé á nze jɨʼla e Pétrus ó, bé e boo nɔ́ɔ́ jâʼ mʉ́ʉ́ mélû tɨ̂.