Read Koonzime Milʉ́mlʉ́ 11 Bible Online

Milʉ́mlʉ́ 11 - Koonzime bible

Milʉ́mlʉ́ 11

¹Bʉr o mílʉ́mlʉ́ ti e bɨ́ɔɔ́ bé á bě sí Yʉ́da bá, bê nzě jóʼǒ lɔ́ɔ ó, bʉr o dí abe óYúden bá, bé ntémé, bé á si bûʼla lɔ́ɔ́ mé Nzyɛ̌m.

²Jɔ̌ʼ Pétrus á búla, pyâl ɨ́ Yerʉ́zalɛm yɨ́, obûʼla bé á boo tíʼɔɔ mpʉ́n bá, bê nzě lwib e né ɨ́ bébe bébe.

³Bé e né ó: «Go bé ó sí kʉ́ bánǎ nî ɨ́ mbɛ̌r bʉ̂r o dí abě tíʼá mpʉ́n bá, go ntémé sí bánǎ pûhla mébô, de e bé gúmo gwár!»

⁴Pétrus nzě táare égwá lɛ́ɛ bé mbɨ̂mbɨá lɔ́ɔ́ tɨ̂, lɨ́ edû mpʉ yé á syɛ́ɛ yɨ́. Nye ó:

⁵«Me á be ó ɨ́ Yópe. Me á be ó lɨ́ ejɨʼla e Nzyɛ̌m. Jɔʼ yaá ó mé á bee esimá. Lé á be ó, yʉ́ʉ́ sɔ̂ʼ lɨ́ eduho ɨ́ jʉ́o kʉ́, sulo sí ɨ́ nteeen. Yé á be ó mpʉ sána ndɔ́má, tyeelá ɨ́ medumo menâ. Yé á duho ó, ɨ́ jʉ́o kʉ́, nzě sulo gúmó mé á be yɨ́.

⁶Me á si gwa siŋle yé tʉ́ŋlʉ̌, nzě bee ótír, baá o dí e metɔrʉ menâ bá bɨ́bɛ̂h, le otír ó ményan, le bisâ bi dí ejaŋla sí e sí bí, ndu e binʉ̌n.

⁷Me nzě jóʼo twíí. Nye e me ó: “Pétrus, gbɔlwaa sí. Jʉ́ʼóo. Go e dê.”

⁸Nó ó mé á yala e né ó: “Dâ ɛ̌, kʉ́ kâr káráa, ebě, sá dí tilá yɨ́, yé apǎ nî ɨ́ num wâm dʉ́o egwár.”

⁹Me nzě báʼǎ jóʼo twíí ɨ́ jɔʼ mbá, lɨ́ eduho ɨ́ jʉ́o kʉ́, lɨ́ elɛ́ɛ ó: “Sá Nzyɛ̌m mû sí pubo yɨ́, anyamlě lɛ́ɛ ó, yé ó tilá.”

¹⁰Sâ yaá, yé á pyâl me nó ó, nzɔʼ lɛ̂l. Píe tɨ̂, sɨ́ǎ yaá, yé ntɔ̂ʼ búla, bisâ byaá bíbyɛ̂h ntɔ̂ʼ dâʼrɔɔ ɨ́ jʉ́o kʉ́.

¹¹Jɔʼ gwár e gwár yaá, bʉrʉ̂m olɛ̂l, bê nzě pyâl ɨ́ mbɛ̌r mé á be wɨ́. Bé á duho ó, ɨ́ Kesáre, lɨ́ enzě sáa mê.

¹²Nó ó Sísǐm mé Nzyɛ̌m, wé á lɛ́ɛ e me ó, bɨ̌h le onɔ́ɔ́ tôʼ. Wé á lɛ́ɛ ó, me ayɨ́ líʼa lɨ́ etô. Bɨ́ɔɔ́ ósaman bâ, bé ntémé, bé á si tô ɨ́ sɔ́má tyen yâm ɨ́ Kesáre. Bɨ̌h le onɔ́ɔ́ ó b'á to nî mbɛ̌r mé nyʉ́ʉ́ mʉ̂r.

¹³Nye nzě lɛ́ɛ e bɨ̌h mpʉ nyé á bee éngeles ɨ́ mbɛ̌r wé yɨ́. Nyě kǎ twɨra ó, éngeles lɨ́ etyɛ̂b tîtyěl ɨ́ míh mé. Éngeles waá nzě lɛ́ɛ e né ó: “Lómáá bʉ̂r Yópe, bé tô jébě Simon, waá dí e lʉ́ʉ́ díe ó, Pétrus nyá.

¹⁴Nye ólɛ́ɛ gó milɔ̌b gó ótiʼe e tɨ̂ʼ mí. Abě njɨ go omér. Mbɛ̌r bʉ̂r gô wɨ́wɛ̂h, wé ótiʼe ntémé.”

¹⁵Le mé á nʉa lwǐb, lě Sísǐm mé Nzyɛ̌m ntɔ̂ʼ á sulo ɨ́ sɔ́má yɔ́ɔ́ yɨ́yɛ̂h. Yé á be ó jwɨʼ gwár mpʉ wé á nyɛɛ sulo bʉr ɨ́ metááré yɨ́.

¹⁶Nó ó, me nzě símsa mékǎn Tî Yésʉs á lɛ́ɛ mɨná gá má. Nye á lɛ́ɛ ó: “Yʉánɛs á dudu bʉr ó e medíbé. Bɨ̌n bɨɛ, bé ókǎ duŋɔɔ ó e Sísǐm mé Nzyɛ̌m.”

¹⁷Tó kœb ó, Nzyɛ̌m á si dwe bé ntémé sâ gwár nyé á nyɛɛ dwe mɨná gá ɨ́ jɔʼ mɨ́ná bé á dyɛ̂ʼwo gá e Tî Yésʉs-Krîst yɨ́. Nó mɛm, me á be wáǎ mbi mʉ̂r lɨ́ ebeně gwɨ́má mé Nzyɛ̌m?»

¹⁸Jɔʼ bé á sil ejóʼo milɔ̌b myaá yɨ́, miléme nzě sula bé sí. Bê nzě dwě Nzyɛ̌m kûm. Bé ó: «Yé ó nó: Nzyɛ̌m, nyɨ́ bánǎ toŋlo ntémé baá o dí abe óYúden bá. Nyɨ́ dib bé nzɨ̌ etúmo míkoo e misyóm myɔ́ɔ́, le edwira míléme, ó bé bíʼee ntémé twiʼ!»

¹⁹Jɔ̌ʼ Étiene á jʉ́ŋɔɔ yɨ́, bʉr nzě tíble óbûʼla ɨ́ dwíííá. Yé ó b'á sâ ó, obûʼla, bé gbɛ́haa. Bâʼ bʉ̂r ó sɔ́má yɔ́ɔ́, bé á si tô tyé sí Fénikia, le tíhé Swiprʉ̂s, ndu e Antiôs. Ɨ́ jɔʼ bé á bʉbɔma e bʉ́ʉ́ bʉ̂r yɨ́, bʉ̂r baá bé abe óYúden nó, bé l'adwe bé milɛ́ʼlá ɨ́ milɔ̌b mé Nzyɛ̌m.

²⁰Tó kœb ó, yé á be ó e bʉ́ʉ́ óbûʼla, bé á duho ɨ́ tíhé Swiprʉ̂s ndu e Sirénia bá. Bɨ́ɛ ntɔ̂ʼ tóŋɔɔ̌ Antiôs, bê nzě tó bɔma e bʉr o dí abe óYúden bá. Bê nzě túno bé ntémé lɔ́ɔ dí edumo e Tî Yésʉs wɨ́.

²¹Nkul mé Tî Yésʉs á be ó e bê. Bʉr, bé á si bu dwira miléme, dyɛ̂ʼwɔɔ e né.

²²Bʉr ó Mbɛ̌r-Nzyɛ̌m Yerʉ́zalɛm nzě jóʼǒ lɔ́ɔ waá, bé ntɔ̂ʼ lómǒ Banabâs Antiôs.

²³Jɔʼ nyé á pyâl gʉ̂ʼ yɨ́, nye nzě bee bíjwɨʼ byé á lɛ̂ʼle ó, Nzyɛ̌m á be ɨ́ buú cwɨ́a le obûʼla bí. Nye ntɔ̂ʼ soho, nzě tɨ́e bé ó, bé díʼee twíí mpâ ɨ́ mpúhlá nyɔ́ɔ́ e Yésʉs.

²⁴Banabâs á be ó mbɨambɨa mʉr, lwɨ́ŋlá e Sísǐm mé Nzyɛ̌m ndu e búʼó. Bʉr ɨ́ buo buo, bé á si dyɛ̂ʼwo e Tî Yésʉs.

²⁵Nó ó Banabâs á mɔa, tô Tarsôs, lɨ́ etó sáǎ Saʉ̂l.

²⁶Jɔʼ nyé á bee nye yɨ́, nye ntɔ̂ʼ búla e né, bé e nɔ́ɔ́ nzě tô Antiôs. Bê nzě séa nzyɛ́ŋá ɨ́ Mbɛ̌r-Nzyɛ̌m tɨ̂ mbû ntinɨ̂. Ɨ́ jɔʼ yaá yɨ́yɛ̂h, bé á bɨbe lɨ́ edwe bʉ̂r ɨ́ buo buo milɛ́ʼlá. Tɨ̂ʼ Antiôs ó bé á nyɛɛ jébe ompʉ́n mé Yésʉs “okrǐsten” yɨ́.

²⁷Jɔʼ yaá ó ógwíha o mílɔ̌b, bé á duhǒ Yerʉ́zalɛm, tô Antiôs yɨ́.

²⁸Nyʉ́ʉ́ mʉ̂r á be ó ɨ́ sɔ́má yɔ́ɔ́, díé lé, Agábus. Nye á si mɔa, nzě lɛ́ɛ bʉ̂r ɨ́ nkul Sísǐm mé Nzyɛ̌m ó, nza ɨ́ bwaʼ bwaʼ mû ó kúno enyaŋla ɨ́ melû maá ɨ́ sí yɨ́yɛ̂h. Nza nyaá á ka nyaŋla ó, ɨ́ jɔ̌ʼ Klodíʉs á be kɛ́ɛza yɨ́.

²⁹Ompʉ́n, bé bʉr o tɨ̂, bé á tíʼe ó, mʉr nyɨnyɛ̂h ɨ́ sɔ́má yɔ́ɔ́ ótyen óbûʼla bé á di ɨ́ sí Yʉ́da bá bisâ, ó mʉr nyɨnyɛ̂h súʼaa bé, dû mébi mé.

³⁰Nó ntémé ó bé á sâ yɨ́. Bê nzě nʉa míngúlá myaá, tímlɔɔ̌ Banabâs, bé e Saʉ̂l. Bɨ́ɛ ntɔ̂ʼ tóŋɔɔ e myê, tó dweŋɔɔ ótyɛ̂b bé ésôʼ ó Mbɛ̌r-Nzyɛ̌m.