Read Koonzime Milʉ́mlʉ́ 12 Bible Online

Milʉ́mlʉ́ 12 - Koonzime bible

Milʉ́mlʉ́ 12

¹Ɨ́ jɔʼ yaá Njwɨ́ɨbʉr Erôd á nze gbâ bʉ́ʉ́ bʉ̂r ó Mbɛ̌r-Nzyɛ̌m ɨ́ mbʉʼ lɨ́ esú ó, nye nkʉ̂ tíble bê.

²Nye á si jʉ̂ Jacques, mɨ́ɔɔ́ mé Yʉánɛs, e pasoŋ.

³Jɔʼ nyé á bee ó, oYúden, bé á si bu kpɛl syɛ́ɛla yaá yɨ́, nye nzě báʼǎ tô dóló, mɛ̂r ntémé Pétrus. (Yé á be ó, ɨ́ jɔʼ nzɔ́ɔ biblêr bi dí abe e levure bí.)

⁴Jɔ̌ʼ Erôd á si mɛ̂r Pétrus yɨ́, nye nzě gbâ nyé ɨ́ mbʉʼ. Nye nzě pɛ̂h bísɔ́má bísója binâ, dwe byé syɛ́ɛ́ ó, byé dwéelaa nye. Sɔ́má gwár, yé á be ó, bisója binâ. Erôd á jwɨʼ ó, Páska, yé nyɛ́ɛ laa. Bé okǎ lwǐb lɔ̌b mé Pétrus ɨ́ bʉr ɨ́ ponó, oYúden ɨ́ buo buo lɨ́ ebee.

⁵Nó yaá ó Pétrus á baʼlɔɔ ɨ́ mbʉʼ yɨ́. Bʉr ó Mbɛ̌r-Nzyɛ̌m bɨ́ɛ, bé á be ó lɨ́ esâ sɨ́n lɨ́ ejɨʼla e Nzyɛ̌m lɨ́ esú lé.

⁶Ɨ́ gúú pum, Pétrus á be ó, ɨ́ jô páʼ bisója bibá. Nye á be ó kɛ́ʼá e mikʉ̂kɔ̌b mimbá. Bʉ́ʉ́ ódwéela bɨ́ɛ, bé á be ó lɨ́ empǒm lé ébé é mbɛ̌r mímbʉʼ. (Náǎ yé ó, Erôd á be lɨ́ edǐ pahlě Pétrus ɨ́ mɛ́n tɨ̂.)

⁷Pétrus dína ɨ́ jô, kǎ saʼ nɛ́ɛ: éngeles mé Nzyɛ̌m, nyɨ́ pyâl. Njʉl, wé ntɔ̂ʼ pǎn myɛ́n ɨ́ mbɛ̌r mímbʉʼ tʉ́ŋlʉ̌. Éngeles nzě ŋmɛ̂h Pétrus lɨ́ empah e nyʉ̂l, lɨ́ ejɨm nyé ɨ́ jô. Nye e né ó: «Kpáhwá gbɔlwa sí.» Mikʉ̂kɔ̌b, myé ntɔ̂ʼ pʉʼa nyé ɨ́ mebô, kur sí.

⁸Éngeles nzě lɛ́ɛ e né ó: «Tyeelaa káná gǒ. Go e bwár ósípah bô.» Pétrus ntɔ̂ʼ sâ nó. Éngeles nzě báʼǎ lɛ́ɛ ó: «Bwáráá kʉ̂r gǒ. Dúʼóó mê.»

⁹Pétrus ntɔ̂ʼ dû éngeles, nzě pʉʼa ɨ́ mbɛ̌r mímbʉʼ, tô kʉ̌l. Nye á bé agʉ́a ó, sá éngeles á sâ nye yɨ́, yé á be ó tyeetye. Nye á gʉgʉ́a ó, nye á bee ó, lʉ́ʉ́ ésimá.

¹⁰Jɔʼ bé á laa ndwéela esôʼ ndu e waá mbá yɨ́, bê nzě pyâl lɨ́ ebé é bínkóho dí etô nkǒ nkana lɨ́. Ebê laá, lé ntɔ̂ʼ diba lé omér. Pyálɔɔ̌ kʉ̌l. Bé osí laǎ nkpǎʼ ngwár nɛ́ɛ: ɨ́ tyé e tyé yaá, éngeles ntɔ̂ʼ dîm Pétrus ɨ́ mîh.

¹¹Jɔ̌ʼ Pétrus á ka gʉ́a sá yé á laa yɨ́, nye ó: «Ɨ́ báánâ, me lɨ́ ebeě mbɨ̂mbɨá ó, yé kʉ́ be ó tyeetye: Dâ Nzyɛ̌m, nyɨ́ lómo éngeles wé, lɨ́ énzě pɛʼ mé ɨ́ mebó mé Erôd. Nyɨ́ pɛʼ mé ɨ́ sá yɨ́yɛ̂h óYúden, bé á bʉbóno ó, bé ósâ mé yɨ́.»

¹²Jɔʼ nyé á gʉ́a nó yɨ́, nye nzě tô mbɛ̌r mé Maria, nyɔ̌ŋ mé Yʉánɛs, waá dí e lʉ́ʉ́ díe ó, “Marc” nyá. Ɨ́ tɨ̂ʼ ó bʉ̂r ɨ́ buo buo, bé á gwɨ̂hla, lɨ́ ejɨʼla e Nzyɛ̌m yɨ́.

¹³Pétrus ntɔ̂ʼ kwâʼle lé ébé é kôʼ. Nyʉ́ʉ́ syɛ̂l mesâ mʉmá, díé lé Róda, nzě pyâl lɨ́ ebê laá. Nye ntɔ̂ʼ dweʼe étyél lé.

¹⁴Jɔʼ nyé á dweʼe Pétrus etyêl yɨ́, nye ntɔ̂ʼ buú soho. Líʼe ó, nye díbɨɨ ebé é kôʼ, nyě kǎ búla yɨ́ɛ ó e kám, tô mbɛ̌r, tó lɛ́ɛ ó: «Pétrus, nye ó kâʼ kʉ̌l!»

¹⁵Bɨ́ɛ ntɔ̂ʼ lɛ́ɛ e né ó: «Go ó gʉ̌!» Nye nzě nyémle twíí ó: «Yé ó kʉ́ bě tyeetye!» Bé ntɔ̂ʼ lɛ́ɛ ó: «Jáŋá yé óbɛ̌m be éngeles wé o!»

¹⁶Pétrus nyɨɛ nzě sâ nzyéé lɨ́ ekwâʼle ébê. Jɔʼ bé á ka dib nye lǎ yɨ́, bé ntɔ̂ʼ bee nyê, le ekámɔɔ nyê.

¹⁷Nye nzě peble bé mbô. Jɔʼ bɨ́bɛ̂h bé á be, bé mû ɨ́ puuu yɨ́, nye ntɔ̂ʼ lɛ́ɛ̌ mpʉ Dâ Nzyɛ̌m á pɛʼ nye ɨ́ mbʉʼ yɨ́. Nye ó: «Tó lɛ́ɛ gá Jacques, bé e bɨ́ɔɔ́ gá bɨ́ná nó.» Nye nzě mɔa, tô ɨ́ yʉ́ʉ́ gúmo.

¹⁸Jɔ̌ʼ mɛ́n wé á lɔ́ma yɨ́, bisója, byé á be ó, ɨ́ sáʼ si sáʼ, agʉ́ǎ gúmó Pétrus á tô bé yɨ́.

¹⁹Jɔ̌ʼ Erôd á sáa nye, abee yɨ́, nye ntɔ̂ʼ pahle ódwéela baá, ntɔ̂ʼ dwe nkûl ó, bé tô jʉ̂ bê. Píe tɨ̂, nye nzě duhǒ sí Yʉ́da, tô Kesáre, ɨ́ nko nyé á to di bá yɨ́.

²⁰Erôd á si kpaa ebúʼ e bʉr ó Tîr ndu e baá ó Sidɔ̂n. Nó ó bé á nzě gúmó nyé á be yɨ́, bɨ́bɛ̂h léme ngwár. Bê nzě táare ékolǒ Blástos, njwɨ́ɨ mbɛ̌r mé Erôd. Bê nzě tô kwá mé Erôd, lɨ́ edî nyé ó, bé e boo nɔ́ɔ́ báʼa dǐ mbɨ̂mbɨá, ebě, bʉr ó sí yɔ́ɔ́, bé á jaa bubwâm mede ó, njɨ kwá njwɨ́ɨ waá.

²¹Jɔ̌ʼ móhó nyé á lɛ́ɛ ó, bé ókomlǒ lɔ̌b wɨ́, wé á ka pyâl yɨ́, Erôd nzě bwâr kán jwɨ́ɨ wé. Nye ntɔ̂ʼ di sí ɨ́ diá tîʼ milɔ̌b yé. Nye nzě gɔ́na le elwib le entumo e bʉ̂r bɨ́bɛ̂h.

²²Bʉr ntɔ̂ʼ bɨ́nɔɔ métwíí kʉ́. Bé ó: «Ááʼ! Ntʉ mʉ̂r dí elwib nyâ! Yɨ̂ʼ, yé ó gúú mbǐ nzyɛ̌m swîh!»

²³Jɔʼ gwár e gwár yaá, éngeles mé Dâ ntɔ̂ʼ ŋmɛ̂h nyê, ebě, nye á bé adwě Nzyɛ̌m kûm nyé. Nó mísóm myé á poʼlo nye, nye ntɔ̂ʼ dwe.

²⁴Lɔ́ɔ́ mé Nzyɛ̌m wɨ́ɛ kʉ́ nzě myaŋlǎ myaŋláa.

²⁵Jɔ̌ʼ Banabâs, bé e Saʉ̂l, bé á sil etô obûʼla ó Yerʉ́zalɛm e mingúlá yɨ́, bê nzě búla, bé e Yʉánɛs, waá dí e lʉ́ʉ́ díe ó, “Marc” nyá.