Read Koonzime Milʉ́mlʉ́ 14 Bible Online

Milʉ́mlʉ́ 14 - Koonzime bible

Milʉ́mlʉ́ 14

¹Ɨ́ Ikóniʉm, Pɔ̂l, bé e Banabâs, bé á si nî ntémé ɨ́ mpáh minjɨʼla oYúden. Bê nzě lwǐb mbi wé á be ó, bʉr ɨ́ buo buo bûʼlaa milɔ̌b mé Nzyɛ̌m wɨ́. Bâʼ, bé á be ó oYúden; bʉ́ʉ́, bʉr o Grɛ̂s.

²Bʉ́ʉ́ óYúden, baá bé á be adyɛ̂ʼwo e Nzyɛ̌m bá, bê nzě sôʼlo bʉ̂r o bíkúl bíswîh, tíne bé ó, bé díʼee e bijwɨʼ bí ébébe ɨ́ páʼ bɨ́ɔɔ́ bɨ́ná.

³Pɔ̂l, bé e Banabâs, bé á si bu bea ɨ́ Ikóniʉm, lɨ́ ekʉ́ gwá lwib ɨ́ kpɛŋlɛm, abáawo mʉ̂r, e nkul mé Tî Yésʉs. Mpʉ bʉ̂r, bé á be lɨ́ ejóʼǒ lɔ́ɔ́ mé Yésʉs nyé á ntɨh ɨ́ mpam nyé yɨ́, nó ntémé ó bé á bee mesimá nyé á ntɨh má. Yésʉs á bʉboʼlo lɔ́ɔ́ wɔ́ɔ́ ó e nzɨ̌ mesimá maá, ti e bisá bí ékâm nyé á sâ e nzɨ̌ bʉr o mílʉ́mlʉ́ bé bí.

⁴Bʉr ó nkana nzě bɔ́ʼa ménkɔ̌m mebá. Nyɨ̂ʼ nkɔ́m, kɛm óYúden; nyʉ́ʉ́, kɛm bʉ̂r o mílʉ́mlʉ́.

⁵OYúden, le baá o dí abe óYúden bá le ojwɨ́ɨ́ bɔ́ɔ́ nzě sáa pɨ̂ʼ esâ Pɔ̂l, bé e Banabâs ebébe. Bé olúmo bé mekóʼ, jʉ̂ bê.

⁶Sâ gwár, Pɔ̂l, bé e Banabâs bɨ́ɛ, bé á be ó, bé mû sí boó gʉ́a pɨ̂ʼ nyɔ́ɔ́ nyaá, bé ntɔ̂ʼ boó kpɛ́ɛ yɔ́ɔ́, tóŋɔɔ ɨ́ binkana bí Lístra ti e Dɛ́rbe. (Byé ó ɨ́ sí Likaonía.) Bê nzě tô ntémé ɨ́ mekwár mé á be ɨ́ mempah má.

⁷Bé á be lɨ́ etô le etúnǒ Mbɨambɨa Lɔ́ɔ ntémé gʉ̂.

⁸Nyʉ́ʉ́ mʉ̂r á be ó Lístra, nzwoó. Nye á byɛ̂l ó e mekʉ̌ sí swâm. Gbaa nyé á byɛ̂l, nye á bé apǎ tíbe sí lʉ́ʉ́ dʉ́o.

⁹Jɔʼ nyé á be lɨ́ ejʉjôʼlǒ sá Pɔ̂l á lɨlɛ́ɛ yɨ́, Pɔ̂l nzě bɨʼ nyé mejwôʼlʉ, bee ó, nye á bě e búʼó ó, Nzyɛ̌m óbɛ̌m tiʼ nyê.

¹⁰Nó ó Pɔ̂l á lɛ́ɛ nye e twíí kʉ́kʉ́ ó: «Gbɔlwáa. Tyɛ́bɨ́ɨ́ tîtyěl e mekʉ̌ mô.» Nye ntɔ̂ʼ gbɔlwa ɨ́ bʉ̂b, táarě tyen.

¹¹Jɔʼ éntumo e bʉ̂r, lé á bee sá Pɔ̂l á sâ yɨ́, lé ntɔ̂ʼ bʉ̂ bítím kʉ́ kʉ́ ɨ́ lwǐb Likaonía. Bʉr baá, bé ó: «Ááʼ! Paá bee gá ɛ̌! Onzyɛ̌m mû ó sí liŋa bʉ̂r ɔ̌! Bɨ́ bánǎ sulo kwá gá nyɨ́ná!»

¹²Bê nzě jwɨr bé míe. Jwɨrɔɔ̌ Banabâs nyɨɛ, “Zœ̂s”; Pɔ̂l nyɨɛ, “Ermês”, ebě, nye ó b'á be lwiba.

¹³Mbɛ̌r bé á dwidwe Zœ̂s kûm tɨ̂ʼ wɨ́, wé á be ó, ɨ́ bá cɛra e nkana. Para á sɨséa e Zœ̂s ɨ́ mbɛ̌r waá nyá, nzě nʉa bíntœœ ndu e menzɔ̌m, tô e byé lɨ́ eníŋlɨ́ é nkana. Nye á kpɛl ó, bé le entumo e bʉ̂r jʉ́ʼoo bintœœ byaá, lɨ́ edwe ónzyɛ̌m bɔ́ɔ́ byǎ.

¹⁴Nó ó jɔʼ bʉ̂r o mílʉ́mlʉ́, bé á jóʼo lɔ̌b waá yɨ́, bê nzě nya míkán myɔ́ɔ́, ntɔ̂ʼ swimɔɔ míkám nko éntumo e bʉ̂r laá, le enyémlɔɔ métwíí.

¹⁵Bé ó: «Bʉr bâ, bɨ̌n sá mpʉ́nʉ̌ ɨ́ yé? Bɨ̌h ntémé, bé ó bʉr jwɨʼ gwár mpʉ bɨ́n dí yɨ́. Bɨ̌h nzé kwá nyɨ́n ó, lɨ́ enzě túnǒ Mbɨambɨa Lɔ́ɔ, le elɛ́ɛ bɨ́n ó, bɨ̌n túmaa koo e bisâ bi dí dwě-ntuʼ bî. Bɨ̌n a dwírá míléme, dyɛ̂ʼwo e Nzyɛ̌m, waá dí kublakúbla nyá. Nye ó b'á kuho kʉ́ le sí, ndu e l'ekomlo mâŋ ti e bisá bíbyɛ̂h bi dí tɨ̂ʼ bí.

¹⁶Ɨ́ mimbú mí píhe, nye á si bîr bikúl bí bʉ̂r, tâŋ mimyǎ mi bʉ̂r ɨ́ buo buo ó, bé dyɛ́lɨɨ ɨ́ mɔ́ɔ́ ménzɨ̌ bé bʉr o tɨ̂ʼ bé á boo twâr má.

¹⁷Damá jóʼo nó, nye á bé alíʼe bé ɨ́ menzɨ̌ maá tʉ̂toʼó. Nye á si boʼlo ɨ́ lɔ̌b wé, nye mʉr tɨ̂. Nye á si bu cwɨ́a e bʉr bɨ́bɛ̂h. Ɨ́ yɨ̂ʼ jɔʼ, nyě sɨ́sá ó, sul bɨ́n ompíé, duho ɨ́ jʉ́o kʉ́. Ɨ́ yʉ́ʉ́, nyě ntɨntɨ̌h bɨ́n ó mede, ɨ́ swɨɨ ékpɛm. Nyě sá ntémé ó, dwidwe bɨ́n mede, ó bɨ̌n dêʼ, díle. Nye lɨ́ elóŋlo bísʉhʉʉ ɨ́ milémé mín.»

¹⁸Damá jóʼǒ mpʉ bʉ̂r o mílʉ́mlʉ́, bé á lɛ́ɛ nó yɨ́, bé á si bi túú lɨ́ ekamle bʉ̂r lɨ́ esâ bé ndwéá waá.

¹⁹OYúden ntɔ̂ʼ pyâl tɨ̂: bâʼ duhǒ Antiôs, yaá Pisidía, bʉ́ʉ́ duhǒ Ikóniʉm. Bê nzě dulo bʉ̂r ɨ́ nkɔ̌m nyɔ́ɔ́ ó, bɨ́bɛ̂h, bé lúmaa Pɔ̂l mekóʼ, bé e jʉ́ nyê. Bê nzě nyɛl ésâ ntémé nó. Dâʼrɔɔ nyé sí e sí, pɛʼɔɔ nyé ɨ́ nkana, ebě, bé á jwɨʼ ó, nyɨ́ dwe.

²⁰Ɨ́ jɔʼ ómpʉ́n bé á bɔma nye ɨ́ nká, jɨʼla e Nzyɛ̌m ó, nye ayɨ́ dwe yɨ́, nye ntɔ̂ʼ gbɔlwa sí, swîʼ, báʼǎ tô nkana. Ɨ́ mɛ́n tɨ̂, bé e Banabâs, bê nzě mɔa, tóŋɔɔ̌ Dɛ́rbe.

²¹Pɔ̂l, bé e Banabâs, bê nzě túnǒ Mbɨambɨa Lɔ́ɔ ɨ́ nkanǎ Dɛ́rbe, le esâ bʉ̂r ɨ́ buo buo ompʉ́n mé Tî Yésʉs. Bê nzě swîʼ, tó tyɛ̂b ɨ́ Lístra, le Ikóniʉm, le Antiôs.

²²Bê nzě gbâ ómpʉ́n nkul ɨ́ miléme, le etɨ́e bé ó, bé tôʼ le edû búʼó gá yɨ́ná. Bé e bé ó: «Mɨ́ná bé ókpɛl gá enî ɨ́ Mpóʼo mé Nzyɛ̌m nó, mɨná bé ɨ́ jala le enyɛɛ́ sia gá e mitúú e mindɛ̌l ɨ́ buo buo.»

²³Ɨ́ sɔ́má bʉ̂r ó Mbɛ̌r-Nzyɛ̌m yɨ́yɛ̂h, bé á be lɨ́ etyêl ótyɛ̂b bé ésôʼ. Bé á tityêl bé ó, sí pǎ ti méde, le ejɨʼla e Nzyɛ̌m. Bé á titímle bé ó, ɨ́ mebó mé Tî Yésʉs, mʉr bé á dyɛ̂ʼwo e né nyá.

²⁴Nó ó bé á nze ka ntaa sí Pisidía, tó pyálɔɔ̌ sí Pamfilía.

²⁵Jɔʼ bé á sil elɛ́ɛ milɔ̌b mé Nzyɛ̌m ɨ́ Pɛ́rge yɨ́, bê nzě tô Ataléa.

²⁶Tɨ̂ʼ ó bé á kalwo ɨ́ sitíma, tô Antiôs yɨ́. Bʉr ó Antiôs ó b'á lómo bé ɨ́ syɛ́ɛ́ bé á be, alúno sîl yɨ́. Bé á lómo bé ó, píe minjɨʼla bé á jɨʼla e Nzyɛ̌m ó, nye cwɨ́aa e bé ɨ́ tyen yaá mí.

²⁷Jɔʼ bé á pyâl Antiôs yɨ́, bê nzě jébe bʉ̂r ó Mbɛ̌r-Nzyɛ̌m, lɛ́ɔɔ bé bisá bíbyɛ̂h Nzyɛ̌m á sâ e nkul nyé bí. Bé á lɛ́ɛ ntémé ó, Nzyɛ̌m á si cwɨ́a ntémé e bʉr o dí abe óYúden bá, lɨ́ edwe bé nkul edyɛ̂ʼwo e né.

²⁸Bé le ompʉ́n bé á be gʉ̂ʼ bá, bê nzě di tɨ̂ʼ melû ɨ́ buo buo.