Read Koonzime Milʉ́mlʉ́ 16 Bible Online

Milʉ́mlʉ́ 16 - Koonzime bible

Milʉ́mlʉ́ 16

¹Pɔ̂l nzě pyâl Dɛ́rbe, ndu e Lístra. Nyʉ́ʉ́ mpʉ́n mé Tî Yésʉs á be ó gʉ̂, díé lé Timotɛ̂. Nyɔ̌ŋ á be ó silě Yúden. Nye á be ntémé ó, nye mû krǐsten. Sɔ́ŋ wé nyɨɛ á be ó mʉr Grɛ̂s.

²Obûʼla bé á bě Lístra, ndu e Ikóniʉm bá, bé á be lɨ́ ebuú sêʼle nyê.

³Pɔ̂l á kpɛl ó, bé le onɔ́ɔ́, bé tôʼ. Nó nyé á nʉa nye, tíʼe nyé mpʉ́n, ebě, oYúden bé á be tɨ̂ʼ ɨ́ sí yaá bá, bɨ́bɛ̂h, bé á be lɨ́ ekʉ́ gʉ́a ó, sɔ́ŋ á be ó mʉr Grɛ̂s.

⁴Ɨ́ binkana bíbyɛ̂h bé á lɨlaa bí, bé á be lɨ́ etô le elɛ́ɛ óbûʼlǎ mpʉ bʉ̂r o mílʉ́mlʉ́ le otyɛ̂b bé ésôʼ ó Mbɛ̌r-Nzyɛ̌m Yerʉ́zalɛm, bé á nʉa mitíʼá yɨ́. Bé ntémé, bé á si kʉ gwa pihle bé egwǎl ó, bé bâʼlaa mitíʼá myaá.

⁵Nó ó bʉ̂r ó Mbɛ̌r-Nzyɛ̌m, bé á nʉa pîm ɨ́ búʼó yɨ́, ɨ́ bigúmo ɨ́ buo buo. Tâŋ obûʼla ntémé nzě bubuǒ dʉ́ó lɨ́lɛ̂h.

⁶Sísǐm mé Nzyɛ̌m, wé á si kamle bé lɨ́ elɛ́ɛ̌ lɔ́ɔ́ mé Yésʉs ɨ́ sí Azía. Nó ó bé á to laa sí Frigía, ndu e yaá Galásia.

⁷Jɔʼ bé á be, bé mû lɨ́ ekúnwo e sí Misía yɨ́, bê nzě sáa étô sí Bitinî. Sâ gwár, Sísǐm mé Yésʉs, wé á bé akam.

⁸Jɔʼ bé á laǎ sí Misía yɨ́, bê nzě tô Troâs, gúmó bísitíma dí epîpyal, le enkɛ́ɛ yɨ́.

⁹Ɨ́ pum nɛ́ɛ: Pɔ̂l nzě jɨ̌m líma, bee nyʉ́ʉ́ mʉ̂r Masedónia lɨ́ etyɛ̂b tîtyěl, le ejɨʼla e né ó: “Ntáʼ kâʼ Masedónia. Go e súʼó bɨ́h.”

¹⁰Nó ó, jɔ̌ʼ Pɔ̂l á sil ebee esimá laá yɨ́, bɨ̌h nzě sáa étô sí Masedónia, ebě, bɨ̌h bé á si bee ó, Nzyɛ̌m á jébe bɨ̌h ó, bɨ̌h tôʼ túnǒ Mbɨambɨa Lɔ́ɔ ɨ́ sí yaá.

¹¹Nó ó bɨ́h á duhǒ Troâs, kalwo ɨ́ sitíma, ntɔ̂ʼ tô ɨ́ nzɨ̌ dí etô ɨ́ tíhé Samótras nyɨ́. Bɨ̌h nzě jâ tɨ̂ʼ elû egwár. Ɨ́ mɛ́n tɨ̂ʼ ó bɨ́h á pyâl Néapɔlis.

¹²Jɔʼ bɨ́h á duho tɨ̂ʼ yɨ́, bɨ̌h ntɔ̂ʼ tó pyâl Fílipi, nkana ésôʼ ɨ́ sí Masedónia, sí Rôm á jwɨjwɨ́ɨ yɨ́. Bɨ̌h ntɔ̂ʼ di tɨ̂ʼ ɨ́ nkana yaá melû ɨ́ buo buo.

¹³Ɨ́ móhó sábat, bɨ̌h nzě pyâl ɨ́ nkana, nzě tô ɨ́ pɨ̌n díbé, gúmó bɨ́h á jwɨʼ ó, bɨ̌h bé e nkul ekœ̌b súm óYúden bé á gwɨ̂gwɨhla lɨ́ ejɨʼla e Nzyɛ̌m yɨ́. Bɨ̌h ntɔ̂ʼ di tɨ̂ʼ sí, nzě gɔ́na le elwib e bʉbá bé á syɛŋa tɨ̂ʼ bá.

¹⁴Ɨ́ tɨ̂ʼ ɨ́ sɔ́má bʉ́bá yaá, yé á be ó e mʉmá á be e díe ó, Lidía, waá á duhǒ Teatîr nyá. Nye á bɨbɛ́ma ó, mikán mí kaá e kaá. Nye á bɨbe ó, lɨ́ egúmlǒ Nzyɛ̌m. Nye nzě jóʼo bɨ́h, Dâ Nzyɛ̌m nzě tyɛ̂b nyé ɨ́ léme ó, nye gwâ jôʼlǒ sá Pɔ̂l á lwilwib yɨ́.

¹⁵Nye nzě duŋɔɔ, bé e mbɛ̌r bʉ̂r wé ntémé. Nó nyé á jébe bɨ̌h. Nye e bɨ̌h ó: «Yé bé bɨ̌n bɨ́ gwá kʉ́ bee ó, me mû ó lɨ́ ekʉ́ dyɛ̂ʼwo e Tî Yésʉs nó, ntaá di gá ɨ́ mbɛ̌r wâm.» Nó nyé á tíne bɨ̌h ó, bɨ̌h kámaa.

¹⁶Gúú móhó, bɨ̌h nzě tô gúmó bé á boo sɨsâ minjɨʼla yɨ́, mâ túʼǎ éséhe nzě bɔma e bɨ̌h tɨ̂. Nye á be ó e yamá: kúʼ mpwâm. Yamá yaá, yé ó b'á tɨ̂tɨe nye bisyɛ́ɛla ngá syɛ́ɛ ɨ́ melú ngá nze má bí. Nye á be lɨ́ ebuú nʉa bímɔnɨ́ e nzɨ̌ yamá nɨ̌, bimɔnɨ́ byaá jaá ntɨntaǎ njɨ ɨ́ mebó mé ójwɨ́ɨ́ bé.

¹⁷Nye nzě táare édû bɨ́h e Pɔ̂l píhe koo, le tím ɨ́ num. Nye á lɨlɛ́ɛ ó: «Bʉr bâ, bé ó osyɛ̂l o mésâ mé Nzyɛ̌m dí Lʉ́ bísá bíbyɛ̂h nyá. Bé ó dí etúno édib e nzɨ́ é twiʼ.»

¹⁸Mâ túʼǎ éséhe waá á be lɨ́ esâ nó mimóhó mímyɛ̂h. Ɨ́ móhó épíhe, Pɔ̂l nzě dwira, dwɛ̂ʼ píhe, nye nzě lɛ́ɛ le eleme lé laá ó: «Ɨ́ díé mé Yésʉs-Krîst, mě lɛ́ɛ́ gó ó, duhaa nyé ɨ́ nyʉ̂l! Eleme laá kʉ́ jaá duho mâ mʉmá waá ɨ́ nyʉ̂l, duháa.»

¹⁹Mpʉ ójwɨ́ɨ bé, bé á bee ó, píe syɛ́ɛlǎ nɨ̌, bé ákǎ báʼǎ bi bímɔnɨ́ biswîh, cɨɨ e nzɨ̌ mâ mʉmá nɨ̌ yɨ́, bé ntɔ̂ʼ mɛ̂r Pɔ̂l, bé e Silâs. Bê nzě tô le edulo bé sí e sí, tô e bé ɨ́ mpǒm minjwɨ́ɨbʉr myé á didi lɨ́ ebɨ̌m é pátele mí.

²⁰Bɨ́ɛ nzě tô e bé kwá minjwɨ́ɨbʉr mi bʉ̂r ó Rôm. Bé e myé ó: «Bʉr bâʼ, bé ó oYúden. Bé lɨ́ ebuú sâ bíntʉ̌ ɨ́ nkana gá yɨ́ná,

²¹le elɛ̂ʼle métum me dí ebenɔɔ ɨ́ sí gá yɨ́ná má, mɨná gá bʉr ó Rôm, ó mɨná kámaa gá mé, le esâ mê.»

²²Entumo e bʉ̂r ntɔ̂ʼ dwira e bʉr o mílʉ́mlʉ́. Mingóvina myaá, myê nzě pɛ̌ʼ Pɔ̂l bé e Silâs mikán ɨ́ menyʉ̂l, le edwe nkûl ó, bé ŋmɛ́hɛɛ bé mingáhá.

²³Jɔʼ bé á sîl eŋmɛ̂h bé mingáhá ɨ́ ŋmɛ̂h ŋmɛ̂h yɨ́, bê nzě gbâ bé ɨ́ mbʉʼ. Nó bé á lɛ́ɛ e ndwéela mimbʉʼ ó, nye gwâ baʼle bê.

²⁴Jɔʼ nyé á jóʼo lɔ́ɔ waá yɨ́, nye nzě tô e bé ɨ́ mâ ntɔ́ɔ á be témé mbɛ̌r mímbʉʼ waá tʉ́ŋlʉ̌ nyá, gbâ bé mimboʼó ɨ́ mekʉ̌.

²⁵Kúnókúno e témé pum nɛ́ɛ: Pɔ̂l, bé e Silâs nzě jɨʼla e Nzyɛ̌m, le edyɛɛ méjéme lɨ́ esú lé égúmlǒ Nzyɛ̌m. Myúú mímbʉʼ, myé á be ó lɨ́ ejôʼlo bê.

²⁶Tyé e tyé yaá, sí nzě kubla ɨ́ buo buo. Medwii mé mbɛ̌r mímbʉʼ nzě pɨ̂ʼla. Mebé mɨ́mɛ̂h ntɔ̂ʼ diba ɨ́ jɔʼ gwár yaá. Mikʉ̂kɔ̌b le mimboʼó mímbʉʼ mímyɛ̂h, myé ntɔ̂ʼ tua.

²⁷Jɔʼ ndwéela mimbʉʼ á jɨma ɨ́ jô yɨ́, nyě kǎ bee ó, mebê mé mbɛ̌r mímbʉʼ, mé mû mimběʼ. Nye nzě gœ̂m pâsoŋ wé ɨ́ pɔ̌b, nzě sáa ó, nyě jʉ́ ó nyʉ̂l nyé, ebě, nye á jwɨʼ ó, mimbʉʼ, myé á si kpɛ́ɛ.

²⁸Nó ó, Pɔ̂l á bɨ̂n twíí kʉ́ e nkul nyé nyɨnyɛ̂h. Nye e né ó: «Ayɨ́ jʉ̂ nyʉ̂l nyǒ. Bɨ̌h bɨ́bɛ̂h dína ó wâ.»

²⁹Nó ó ndwéela mimbʉʼ á tumo meláma, nzě kpâhwǎ tô kám ɨ́ mâ ntɔ́ɔ waá tʉ́ŋlʉ̌, le ejóʼo bʉ́á. Nye nzě bɨʼ mébóó sí ɨ́ míh mé Pɔ̂l, bé e Silâs.

³⁰Nye nzě pyêl bé kʉ̌l. Nye ó: «Odâ, me ɨ́ jala le esâ nyá, lɨ́ esú ó me bíʼee twiʼ?»

³¹Nó bé á yala e né ó: «Dyɛ́ʼwáá e Tî Yésʉs, go nkʉ̂ bǐ twiʼ, bɨ̌n e mbɛ̌r bʉ̂r gô wɨ́wɛ̂h!»

³²Pɔ̂l, bé e Silâs, nzě túnǒ lɔ́ɔ́ dí edumo e Tî Yésʉs wɨ́, kwá ndwéela mimbʉʼ, bé e bʉr bɨ́bɛ̂h bé á bě mbɛ̌r wé bá.

³³Nye nzě nʉa bé lɨ́ ewala laá ɨ́ pum. Nye nzě jwɨɨ bé mepɨ́ɨ́. Adeʼ, nye nzě duŋɔɔ, bé e mbɛ̌r bʉ̂r wé wɨ́wɛ̂h.

³⁴Nye nzě báʼǎ tô e Pɔ̂l, bé e Silâs, ɨ́ mbɛ̌r wé, nzě dwe bé mede. Lémé mʉ̂r waá, wé á si lóno ɨ́ bisʉhʉʉ, ebě, bé e mbɛ̌r bʉ̂r wé wɨ́wɛ̂h, bé á si dyêʼ koo e Nzyɛ̌m.

³⁵Jɔ̌ʼ mɛ́n wé á lɔ́ma yɨ́, minjwɨ́ɨbʉr mí Rôm nzě lómo bʉ̂r ó, bé tô lɛ́ɛ e ndwéela mimbʉʼ ó, nye bírɨɨ bʉr baá.

³⁶Nye nzě lɛ́ɛ̌ Pɔ̂l mpáŋla nyaá. Nye e né ó: «Mingóvina, mí ntɨh twíí ó, bɨ̌n bírɔɔ. Nó ó, bɨ̌n mû ó e nkul ekǎ pyâl kʉ̌l, tô ɨ́ mepyɛbla tʉ́ŋlʉ̌.»

³⁷Pɔ̂l ntɔ̂ʼ yala e bʉr baá ó: «Bé á si bî bɨ̌h témé bʉr, lɔ̌b wɨ́h apǎ tíʼɔɔ. Bɨ̌h bɨɛ yɨ́ɛ ntémé bʉr ó Rôm. Bê báná nzě gbâ bɨ́h ntémé ɨ́ mbʉʼ. Tó kœb ó, ɨ́ báánâ, bé kǎ dǐ kpɛl épɛʼ bɨ́h tɨ̂ʼ ó mesǒ. Yʉ́ʉ́ sɔ̂ʼ, yé abe nó. Bé bʉr o tɨ̂ʼ ntáa nzě pɛʼ bɨ́h wâʼ ɨ́ kpɛŋlɛm.»

³⁸Nó minjwɨ́ɨbʉr myé á tyeŋɔɔ ɨ́ lʉ́mlʉ́ waá mí, myê sí kǎ búla, tó lɛ́ɛ mínjwɨ́ɨbʉr mí Rôm yalá yɔ́ɔ́ yaá. Nó ó bé á twɨra, lɨ́ ejóʼo ó, Pɔ̂l, bé e Silâs, bé á be ó bʉr ó Rôm.

³⁹Nó bé á tô, tó jɨʼla e bê. Bé ntɔ̂ʼ kǎ pyêl bé ɨ́ mbɛ̌r mímbʉʼ, lîʼle bé nkana, le ejɨʼla e bé ó, bé pʉ́ʼaa ɨ́ nkana.

⁴⁰Jɔ̌ʼ Pɔ̂l, bé e Silâs, bé á pʉʼa ɨ́ mbʉʼ yɨ́, bê nzě tô mbɛ̌r mé Lidía. Jɔʼ bé á sil ebee bɨ́ɔɔ́ bɨ́ná, le egbâ bé pîm ɨ́ miléme yɨ́, bê nzě mɔa tɨ̂, tóŋɔɔ.