Read Koonzime Milʉ́mlʉ́ 18 Bible Online

Milʉ́mlʉ́ 18 - Koonzime bible

Milʉ́mlʉ́ 18

¹Píe tɨ̂, Pɔ̂l nzě duhǒ Atɛ̂n, tô Kórɨnt.

²Nye nzě bɔma e Yúden, díé lé Akílas. Nye á byɛ̂l ó, ɨ́ sí Pɔ́ŋtos. Nye alúno duhǒ sí Italî, bé e mʉmá wé, Prǐska, ebě, Kɛ́ɛza Klodíʉs á lɛ́ɛ ó, oYúden bɨ́bɛ̂h, bé pɔ́ʼaǎ Rôm. Nó ó, Pɔ̂l á nze to syɛŋa e bê.

³Bé á lɨlar ó, mimbɛ̌r míkán. Mpʉ Pɔ̂l, bé e boo nɔ́ɔ́, bé á be le esú é syɛ́ɛ́ egwár yɨ́, nye nzě di ɨ́ mbɛ̌r wɔ́ɔ́. Bé e boo nɔ́ɔ́, bé á séa ntémé ó, gúmo gwár.

⁴Nó ó, ɨ́ móhó sábat wɨ́wɛ̂h, Pɔ̂l á be ó lɨ́ elɛ̂ʼle bʉ̂r ɨ́ mpáh minjɨʼla tʉ́ŋlʉ̌, le esáa édulo óYúden le bʉr o Grɛ̂s.

⁵Jɔ̌ʼ Silâs bé e Timotɛ̂, bé á ka pyâl, duhǒ sí Masedónia yɨ́, Pɔ̂l ntɔ̂ʼ lɛ̌ŋ jɔʼ yɨ́yɛ̂h njɨ lɨ́ elɛ̂ʼle mílɔ̌b mé Nzyɛ̌m, lɨ́ eboʼlo kwá oYúden ó, Yésʉs ó dí kwahaá Mʉ̌r Nzyɛ̌m á lœm múló mé jwɨ́ɨ nyá.

⁶Bʉr oYúden bɨ́ɛ, bé á be lɨ́ epére mékǎn e né, le elwɨ́ɔɔ nyê. Nye nzě kuro pím mikán myé. Nye ó: «Bɨ́n ódîm nó, yé óbe ó lɔ̌b wɨ́n bʉr o tɨ̂. Mɛm, mé abe e lɔ̌b tɨ̂. Táare ɨ́ báánâ, me múo nzě tô kwá bʉr o bíkúl bíswîh.»

⁷Nó nyé á pɔʼǎ gúmo yaá, nzě tô mbɛ̌r mé nyʉ́ʉ́ mʉ̂r bé á jɨjébe “Títwios Yʉstʉ̂s” nyá. Nye á boo be ó lɨ́ egúmlǒ Nzyɛ̌m ɨ́ yébé óYúden. Mbɛ̌r wé, wé á be ó, bǎʼ e mpáh minjɨʼla oYúden.

⁸Nó ó, Kríspʉs, njwɨ́ɨ mpáh minjɨʼla oYúden á nze dyɛ̂ʼwo e Tî Yésʉs, bé e mbɛ̌r bʉ̂r wé wɨ́wɛ̂h. Bʉr ó Kórɨnt o b'á jʉjóʼo Pɔ̂l bá, bé á si bûʼla ntémé ɨ́ buo buo, le eduŋɔɔ.

⁹Ɨ́ gúú pum nɛ́ɛ: Pɔ̂l nzě jɨm bílíma, Tî Yésʉs lɨ́ elɛ́ɛ e né ó: «Ajóʼo bʉ́á. Tóʼ e lwǐb dóló. Adiblě num.

¹⁰Ebě, mɨná e go ó dí. Abe e mʉr dí e nkul emɛ̂r gó ó, nye sá ó go sá ébébe, ebě, mé e bʉr ɨ́ buo buo ɨ́ nkanǎ nɨ̌.»

¹¹Pɔ̂l ntɔ̂ʼ di ɨ́ Kórɨnt mbû ntinɨ̂ e pêh, lɨ́ elɨlɛ̂ʼle bʉ̂r lɔ́ɔ́ mé Nzyɛ̌m.

¹²Sâ gwár, jɔ̌ʼ Galíɔŋ á be ngóvina bʉ̂r ó Rôm ɨ́ sí Akayɨ̂ yɨ́, oYúden, bé á si syɛŋa lɨ́ elwímla e Pɔ̂l. Bé á si tô ntémé e né ɨ́ mpáh milɔ̌b.

¹³Bé ó: «Mʉr nyâ, nyě duló bʉ̂r ó, bé dwêʼ Nzyɛ̌m kûm, abe yɨ́ɛ mpʉ métié mé Moyɨ̂z dí elɛ́ɛ yɨ́.»

¹⁴Tó kœb ó, ɨ́ jɔ̌ʼ Pɔ̂l á be lɨ́ edǐ lwib yɨ́, Galíɔŋ, nye le oYúden ó: «OYúden ɛ̌, yé bé bɨ̂n nze pur nyé ó, ɨ́ lɔ̌b syɛ́ɛla yé á be onzyɛ́h ónzyɛ́h, nkʉ̂ yaá yé á gbah etié yɨ́ nó, mpa mɨ́ kam ó, me jôʼlaa bɨ̌n.

¹⁵Mpʉ yé mû lɔ̌b mégô, dumo e milɛ́ʼlá, ndu e míe, ndu e metié mɨ́n yɨ́, byé kǎ dwɛ̂ʼ náǎ ó, bɨ̌n bʉr o tɨ̂. Mé abe e nkul etíʼe mílɔ̌b mi dí nó mí.»

¹⁶Nó ó nyé á nze so bé ɨ́ mpáh milɔ̌b nyé.

¹⁷Bʉr o nkɔ́m nyé bɨ́bɛ̂h ntɔ̂ʼ mɛ̂r Sostɛ̂n, njwɨ́ɨ mpáh minjɨʼla oYúden, bíŋɔɔ nyé gúmó tîʼ milɔ̌b á be ndîndǐl yɨ́. Galíɔŋ nyɨɛ á bé anʉǎ syɛ́ɛla yaá, gbâ yé ɨ́ nkɔb.

¹⁸Pɔ̂l á si di tɨ̂ʼ ɨ́ Kórɨnt bá ɨ́ bea bea. Nye nzě jána e bɨ́ɔɔ́ bɨ́ná, ntɔ̂ʼ tô ɨ́ sitíma tʉ́ŋlʉ̌, tô sí Sirî, bé e boo Prǐska, le Akílas. Nye dína apǎ tô, nye á si cɨa lʉ̂ ɨ́ Kɛŋkrɛyâs, ebě, nye á si ntaa minkâl ɨ́ páʼ mé Nzyɛ̌m.

¹⁹Bê nzě pyâl Éfɛsɔs. Pɔ̂l nzě líʼě Prǐska, bé le Akílas tɨ̂, nyɨɛ nzě tô ɨ́ mpáh minjɨʼla oYúden tʉ́ŋlʉ̌, nye nzě nyɛl édwe bé milɛ́ʼlá.

²⁰Jɔʼ bé á dî e né ó, nye díʼee tɨ̂ʼ melû ɨ́ bea bea yɨ́, nye á bé akam.

²¹Nó nyé á mɔa ɨ́ sɔ́má yɔ́ɔ́. Nye ó: Nzyɛ̌m ókpɛl nó, me óbáʼǎ nze.» Nó nyé á tô ɨ́ sitíma tʉ́ŋlʉ̌, pɔʼǎ Éfɛsɔs.

²²Ɨ́ jɔʼ nyé á sulo ɨ́ sitíma Kesáre yɨ́, nye á si tô Yerʉ́zalɛm, lɨ́ etó bára e bʉr ó Mbɛ̌r-Nzyɛ̌m bé á be tɨ̂ʼ bá. Nó nyé á ka tô Antiôs.

²³Nye nzě jâ bwá mélú gʉ̂ʼ, ntɔ̂ʼ mɔa, tô ɨ́ sí Galásia, ndu e yaá Frigía, lɨ́ etô le elɨl ómpʉ́n mé Yésʉs bɨ́bɛ̂h búʼó.

²⁴Nyʉ́ʉ́ Yúden á be ó gʉ̂ʼ Éfɛsɔs, díé lé Ápolos. Nye á byɛ̂l ó, Alɛksandrî, nye ntɔ̂ʼ kǎ tó dǐ Éfɛsɔs. Nye á be ó mʉr á be le ocwóó ɨ́ lwǐb, le egʉ́a Mékaná mé Nzyɛ̌m nyá.

²⁵Nye á si bu lɛ́ɔɔ ɨ́ lɔ̌b mé Tî Yésʉs. Nye ntémé á si sâ sɨ́n lɨ́ edû mílɔ̌b mé Nzyɛ̌m. Nye á be lɨ́ elwib, le elɛ̂ʼlě lɔ́ɔ́ dí edumo e Yésʉs wɨ́, lɨ́ otîtyěl. Nzamedwah e mpʉ nyé á jaa duŋɔɔ ó, njɨ ndubó mé Yʉánɛs wé omér yɨ́.

²⁶Nye nzě táare élwib ɨ́ mpáh minjɨʼla oYúden tʉ́ŋlʉ̌ ɨ́ kpɛŋlɛm, abáawo mʉ̂r. Jɔ̌ʼ Prǐska, bé le Akílas, bé á jóʼo nye yɨ́, bê nzě nʉa nyê, ntɔ̂ʼ kʉ́ gwá tɨ́ɔɔ nyé nzɨ̌ mé Nzyɛ̌m.

²⁷Píe tɨ̂, Ápolos nzě tíʼe ɨ́ lémé wé ó, nyě laá ó, tô sí Akayɨ̂. Bɨ́ɔɔ́ bɨ́ná le okɛ́l bɨ́ná nzě gbâ nyé nkul ɨ́ léme, ntɔ̂ʼ cɛma ómpʉ́n ó sí yaá ó, bé nʉ́aa nye mbɨ̂mbɨá. Jɔʼ nyé á pyâl gʉ̂ʼ yɨ́, nye nzě gbâ bʉ̂r ó b'á dyêʼ koo e Nzyɛ̌m ɨ́ mpam nyé bá nkul ɨ́ miléme.

²⁸Ápolos, bé le oYúden, bé á si pére mekǎn ɨ́ hwɨ́m, nyɨɛ lɨ́ entaǎ lɔ̌b. Nye á si lɛ̂ʼle bʉr mpʉ yé dí cɛmá ɨ́ Mekaná mé Nzyɛ̌m yɨ́ ó, Yésʉs ó dí Mʉ̌r Nzyɛ̌m á lœm múló mé jwɨ́ɨ nyá.