Read Koonzime Milʉ́mlʉ́ 2 Bible Online

Milʉ́mlʉ́ 2 - Koonzime bible

Milʉ́mlʉ́ 2

¹Ɨ́ móhó Paŋtekôt, obûʼla bɨ́bɛ̂h, bé á be ó nzyɛŋá, gúmo gwár.

²Tyé e tyé yaá, duú ɨ́ bwaʼ bwaʼ nzě duho ɨ́ jʉ́o kʉ́, nwɨɨla e duú nkúo-mbɛ́ʼ-mímbû. Yé á si dibe mbɛ̌r waá wɨ́wɛ̂h, gúmó bʉ̂r bɨ́bɛ̂h, bé á be mindîndǐl yɨ́.

³Bé ká dwɛ̂ʼ nɛ́ɛ: bé bee ó, byúú bísɔ̂ʼ, nwɨɨla e bwá mínjʉl mí siʼe. Bisɨ́ǎ byaá, byé ntɔ̂ʼ cɨcɛma, nzě didi bʉ̂r bɨ́bɛ̂h ɨ́ menyʉ̂l.

⁴Bɨ́bɛ̂h, bé á be ó, bé mû lwɨ́ŋlá e Sísǐm mé Nzyɛ̌m. Bé ntɔ̂ʼ táare élwib bílwǐb biswîh, byaá Sísǐm mé Nzyɛ̌m wé á dwe bé nkul ó, bé lwíbɨɨ bí.

⁵Tɨ̂ʼ Yerʉ́zalɛm, yé á be ó le oYúden bé á be otîtyěl o bʉ̂r bá. Bé á byɛ̂l ó, ɨ́ bikúl bíbyɛ̂h bi dí ɨ́ sí yɨ̂ʼ bí.

⁶Jɔʼ bé á jóʼo duú yaá yɨ́, bê nzě swâl gúmo gwár yaá, minum mimběʼ, ebě, mʉr nyɨnyɛ̂h ɨ́ sɔ́má yɔ́ɔ́, á si jóʼo milɔ̌b mé Nzyɛ̌m ɨ́ lwǐb yé. Milɔ̌b mé Nzyɛ̌m myaá, myé á cɨɨ ó e nzɨ̌ nyʉ́ʉ́ mbûʼla lwǐb swîh.

⁷Bé á si bu kâm, mepɨʼ dîm bé ɨ́ milʉ̂. Bé ó: «Bʉr bɨ́bɛ̂h o dí elwib bâ, bé abe bʉ̂r ó Galilê ɛ̌?

⁸Yé bé nó wá, á mʉr nyɨnyɛ̂h ɨ́ sɔ́má gá yɨ́ná báná jóʼo nyʉ́ʉ́ mʉ̂r lɨ́ elwib ɨ́ lwǐb nyɨ́ɛ á byɛ̂l tɨ̂ʼ yɨ́, ebe yé ɛ́?

⁹Ɨ́ sɔ́má gá yɨ́ná yɨ̂, yé ɨ́ buo báájaá-dwih. Bâʼ tó tɨ́lwa ɨ́ mesí mé Pártia, le Mêd, le Elam, le Mezopotamî, le Yʉ́da le Kapadosía. Bʉ́ʉ́ duhǒ sí Pɔ́ŋtos, le yaá Azía,

¹⁰le Frigía, le Pamfilía, le Egɨ̂ptɛn ndu e Libî, dí kúnókúno e Sirénia yɨ́, ti e bʉr o b'á duhǒ Rôm bá. Yé ntémé, yê le oYúden ti e bʉr o bíkûl dí ejɨ̂ʼ yébé gá wɨ́ná bá; bʉr ó Krɛ̂t le baá ó Arabî.

¹¹Sá ékâm, yé ó: mɨná gá óbɛ̂h, bé lɨ́ ejóʼo bé lɨ́ elwib ɨ́ bilwǐb gá bíná, dumo e bisyɛ́ɛla bínɨ́nɨ́ɨ́ mé Nzyɛ̌m.»

¹²Bɨ́bɛ̂h, bé á si kâm, akǎ be e mepɨʼ ɨ́ milʉ̂. Bé ntɔ̂ʼ díila páʼ nyɔ́ɔ́ ó: «Wáǎ mbǐ lɔ̌b wɨ̂?»

¹³Sâ gwár, bʉ́ʉ́, bé á be ó lɨ́ epya óbûʼla. Bé ó: «Bé mû ó lɨ́ epuro ményoʼ!»

¹⁴Nó ó Pétrus á nze tyɛ̂b tîtyěl, bé e bʉr o mílʉ́mlʉ́ kám e ngwár, nzě bɨ̂n twíí kʉ́. Nye le entumo e bʉ̂r laá ó: «Bɨ̌n oYúden, le bʉr bɨ́bɛ̂h o dí edi ɨ́ Yerʉ́zalɛm bá, gʉ́ŋáá gá lɔ̌b wɨ̂. Bɨ̌n a kʉ́ gwá jôʼlǒ sá múo nzě lɛ́ɔɔ bɨ́n yɨ̂.

¹⁵Ebě, bʉr o bɨ́n dí ebee bâ, bé apuro ményoʼ mpʉ bɨ́n dí ejwɨ̌ʼ nɨ̌. Dʉ́o, lé dína ó, mewala ebǔ mé mɛ́n.

¹⁶Ebě, lɔ́ɔ́ ngwíha milɔ̌b Joɛ̂l á boo cɛma wɨ́, wɨ́ dira mûh. Nye á cɛma ó, mbi wɨ̂:

¹⁷“Nzyɛ̌m á lɛ́ɛ ó: Ɨ́ melú mé ósûʼla má, me óntɨh bʉ̂r bɨ́bɛ̂h Sísǐm wâm. Bwá ó bʉbá, le bwá ó bʉrʉ̂m bɨ́n, bé ógwîh mílɔ̌b myâm. Biloʼo bín, byé óbee mísolá bísɔ̂ʼ. Minjʉ̌m mín, myé ójɨm bílíma bi dí edumo e bisá ngá syɛ́ɛ bí.

¹⁸Yé ó nó: ɨ́ melû maá, me óntɨh ósyɛ̂l o mésá bâm, bʉbá le bʉrʉ̂m, Sísǐm wâm. Bé ógwîh mílɔ̌b myâm.

¹⁹Me ósâ bísá bí ékâm, le mesimá ɨ́ jʉ́o kʉ́, le ɨ́ sí tʉ́ŋlʉ̌. Metié, le siʼe, le dwiné dúluu, byé ónyɨ̂n.

²⁰Njʉl dʉ́o, wé ódwira édúrʉ́ʉ́. Álomó óbe ó ɨ́ cʉʼ, mpʉ nyʉ̂l metié. Bisâ byaá, byé ósyɛ́ɛ ó, elú mé Dâ apǎ pyâl. Móhó waá, wé óbe ó móhó nɨ́nɨ́ɨ́ le waá kûm.

²¹Nó, mʉr nyɨnyɛ̂h ósâ mínjɨʼla lɨ́ etwóolo díé mé Dâ Nzyɛ̌m nyá, ótiʼe.”

²²«Bʉr o b'Ɨ́zraɛ̂l, jóʼlááá gá sá mé dí elɛ́ɛ bɨ́n yɨ̂: Yésʉs, mʉr Nazarɛ̂t, á si sâ mesimá me nkûl ti e bisá bí ékâm. Nzyɛ̌m á sâ bisyɛ́ɛla byaá ɨ́ mebó mé nó ó, nye nkʉ̂ lɛ̂ʼle bɨ́n mbi mʉ̂r Yésʉs á be wɨ́. Byé á sáŋɔɔ ó, bɨ̌n bɨɛ lɨ́ ebee, mpʉ bɨ́n bʉr o tɨ̂ʼ dí ekʉ́ gʉ́a yɨ́.

²³Mpʉ̌ Nzyɛ̌m á boo tíʼe ɨ́ lémé wé yɨ́, nye á kpɛl ó, nye dwêʼ bɨ̌n nkul emɛ̂r Yésʉs. Nó bɨ́n bɨɛ á tímle nye ɨ́ mebó mínjéʼe-Nzyɛ̌m, míɛ nzě bomlo nyé e binzâŋ, bɨ́nɔɔ nyé ɨ́ kolôs kʉ́, jʉ́ŋɔɔ nyê.

²⁴Nzyɛ̌m nzě pɛh nyê, pɛʼ nyé ɨ́ mekpaa mé éswie, ebě, eswie, lé á bé agwá mɛ̂r nyé kɔ́m kɔm.

²⁵Ebě, David nyɨɛ á lɛ́ɛ ɨ́ lɔ̌b wé ó: “Me á be lɨ́ ebeě Dâ Nzyɛ̌m bijɔʼ bíbyɛ̂h ɨ́ mpǒm nyǎm. Nye lɨ́ ekamle e me lɨ́ epéne, ebě nye lɨ́ esúʼo mé, lɨ́ emɛ̂r mbó éjʉ́m wâm.

²⁶Sɨ́ǎ yaá ó lémé wâm mû sí lóno ɨ́ bisʉhʉʉ yɨ́. Mekǎn mâm ntémé, maá me bísʉhʉʉ. Lémé wâm, wé ólóno ɨ́ mpûʼla, le esâ ó, nyʉ̂l nyǎm díʼee ɨ́ ntuuu.

²⁷Ebě, go ákóʼó bîr sísǐm wâm ó, wé líʼɨɨ kwár odwe. Nó ntémé, go ákam ó, Mʉr gǒ dí ti nyá bôʼ ɨ́ soo.

²⁸Gʉ́ lɛ̂ʼle mé nzɨ̌ twiʼ. Go ókǎ lóŋlǒ lémé wâm e bisʉhʉʉ ɨ́ jɔʼ mɨ́ná óbeela mémpǒm yɨ́.”

²⁹«Bɨ́ɔɔ́ bâm! Okɛ́l bâm! Me páa lɛ́ɛ bɨ́n ɨ́ hwɨ́m sá dí tyeetye ɨ́ lɔ̌b mpám gá yɨ́ná David yɨ́. Yé ó: nye á si dwe, debe. Nó soo nyé, nye dína ó tɨ̂, kumo mûh ɨ́ dʉ́ó lɨ̂.

³⁰Mpʉ̌ David á be ngwíha milɔ̌b yɨ́, nye á be ɨ́ boó gʉ́a ó, Nzyɛ̌m á si kɛʼ, ntaa mínkâl ó, nye ópɛ̂h nyʉ́ʉ́ mʉ̂r ɨ́ bʉr o mpóʼo nyé, dil nyé ɨ́ diá jwɨ́ɨ yé.

³¹David á si boo bee sá yé á be ó, yé ópyâl yɨ́. Nó nyé á nze lɛ́ɛ lɔ̌b épah e sóo mé Mʉ̂r Nzyɛ̌m á lœm múló mé jwɨ́ɨ nyá yɨ́. Yé á be ó, jɔʼ nyé á cɛma ó: “Nye á bé alíʼɔɔ kwár odwe. Nó ntémé ó nyé á be abo” yɨ́.

³²Yésʉs waá ó Nzyɛ̌m á pɛh, dwih lɨ́ odwe nyá. Lɔ̌b wé ó bɨ́h dí eboʼlo bɨ́n wɨ̂.

³³Nye á si bére, tó di sí ɨ́ mbó éjʉ́m mé Nzyɛ̌m. Nye ó b'á ntɨh bɨ̌h Sísǐm Nzyɛ̌m Sɔ́ŋ á kɛʼ bɨ̌h wɨ́. Sâ gwár e gwár yaá ó bɨ́n mû lɨ́ ebee le ejóʼo yɨ́.

³⁴Ntʉ̌ David mʉr tɨ̂ʼ á bére kʉ́. Nye á lɛ́ɛ ó: [1]: Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ,

³⁵tó pyâl ɨ́ jɔʼ mé ósâ óntɨ̂m le obɨn bô ó, bé díʼee tyélátyéla mékʉ̌ yô yɨ́.”

³⁶«Bʉr bɨ́bɛ̂h o dí wâʼ ɨ́ sí Ɨ́zraɛ̂l bá, bé lɨ́ ekʉ́ gʉ́ǎ lɔ̌b waá: Yésʉs waá, nye ó bɨ́n á jʉ̂ lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ nyá. Nye ó Nzyɛ̌m á tyêl Tî gá wɨ́ná, waá nyé á lœm múló mé jwɨ́ɨ nyá.»

³⁷Jɔʼ éntumo e bʉ̂r, lé á jóʼo mekǎn maá yɨ́, mé ntɔ̂ʼ mɛ̂r bé ɨ́ milémé myɔ́ɔ́. Nó ó bé á dî e Pétrus, bé e bʉ́ʉ́ bʉ̂r o mílʉ́mlʉ́ ó: «Bɨ́ɔɔ́ bɨ́h, bɨ̌h bé ɨ́ jala le ekǎ sâ nyá ɛ́?»

³⁸Nó ó Pétrus á yala e bé ó: «Túmáá gá mikoo e misyóm mín. Bɨ̌n a dwírá míléme. Mʉr nyɨnyɛ̂h ɨ́ sɔ́má yɨ́n, nye dúŋɔɔ ɨ́ díé mé Yésʉs-Krîst, Nzyɛ̌m pɛ́ʼɛɛ nye bibaa bí ébébe nyé á niʼe nye bí. Nó ó bɨ́n ngá kǎ nʉǎ sá Nzyɛ̌m á boo kɛʼ bɨ̌n yɨ́: Sísǐm wé.

³⁹Ebě, nkɛ̌ʼ mé Nzyɛ̌m, nye tɨ̂ʼ ó, lɨ́ esú lɨ́n, ndu e bwán bɨ́n, ndu e baá bɨ́bɛ̂h dí lɨ́ ejaa bá, le baá bɨ́bɛ̂h Dâ, dí Nzyɛ̌m gá wɨ́ná nyá, ngá jébe bá.»

⁴⁰Pétrus nzě báʼǎ boʼlo bé myúú mílɔ̌b ɨ́ buo buo, le etô le egbâ bé nkul ɨ́ miléme. Nye ó: «Biʼee gá twiʼ. Bɨ̌n a dí e ncɛrá le onzyɛ́h ó bʉ̂r ó myǎ bʉ̂r wɨ̂.»

⁴¹Buobuo bʉr ɨ́ sɔ́má yɔ́ɔ́, bé ntɔ̂ʼ kǎm sá Pétrus á lɛ́ɛ yɨ́, ntɔ̂ʼ duŋɔɔ. Ɨ́ móhó waá, kúnókúno e bʉr otɔ́ɔ́sin olɛ̂l, bé á si nî ɨ́ sɔ́má óbûʼla.

⁴²Bé á be lɨ́ ekʉ́ sâ sɨ́n jɔʼ yɨ́yɛ̂h lɨ́ etó jóʼo mílɛ́ʼlá bʉ̂r o mílʉ́mlʉ́ bé á dwidwe bé mí. Bé á didi ntémé ó, nzyɛŋá, bɨ́ɔɔ́ e bɨ́ɔɔ́ tʉ́ŋlʉ̌, le edɨde ntémé gúmo gwár, le ejɨjɨʼla e Nzyɛ̌m.

⁴³Bʉ́á kʉ́ nzě mɛ̂r bʉ̂r bɨ́bɛ̂h, tɨ̂ ɨ́ bisyɛ́ɛla bí ékâm ti e mesimá ɨ́ buo buo bʉ̂r o mílʉ́mlʉ́ mé Yésʉs, bé á sɨ̂sa bí.

⁴⁴Bʉr bɨ́bɛ̂h o b'á bûʼla bá, bé mû ó sâ gwár; bibi bísá byɔ́ɔ́ gúmo gwár, bɨbaʼlɔɔ mébi mɔ́ɔ́ mpúhlá.

⁴⁵Bé á be lɨ́ ebɛ́ma bípéh bísí byɔ́ɔ́ e mebi mɔ́ɔ́ mɨ́mɛ̂h, nzě kablɔɔ bímɔnɨ́ bi tɨ̂ʼ páʼ nyɔ́ɔ́, mʉr nyɨnyɛ̂h nʉnʉǎ mɔnɨ́ yaá, dû mpʉ bígwɨ́má byé, byé á be yɨ́, nzě de byê.

⁴⁶Bé á be lɨ́ esâ sɨ́n jɔʼ yɨ́yɛ̂h lɨ́ etô mpáh Nzyɛ̌m, bɨ́bɛ̂h e léme ngwár, le epɛ̂ʼlǎ blêr ɨ́ mimbɛ̌r myɔ́ɔ́, le edeŋɔɔ méde mɔ́ɔ́, milémé myɔ́ɔ́, myé osí lóno ɨ́ bisʉhʉʉ. Myé á bé abě mbáʼrá e mikóo.

⁴⁷Bé á bɨbe ó, lɨ́ edwě Nzyɛ̌m kûm. Sá tɨ̂ʼ ó bʉ̂r bɨ́bɛ̂h, bé á bu kpɛl bé yɨ́. Dʉ́ó lɨ́lɛ̂h, Tî Yésʉs á be lɨ́ edwe bʉ́ʉ́ bʉ̂r twiʼ, le ekɛl bé ɨ́ Mbɛ̌r-Nzyɛ̌m.