Read Koonzime Milʉ́mlʉ́ 21 Bible Online

Milʉ́mlʉ́ 21 - Koonzime bible

Milʉ́mlʉ́ 21

¹Jɔʼ bɨ́h á bɔ́ʼa e bé yɨ́, bɨ̌h bé á si tô ɨ́ sitíma, tó pyâl ɨ́ Kôs. Ɨ́ mɛ́n tɨ̂, bɨ̌h ntɔ̂ʼ pyâl Róde. Eduho bɨ́h á ka duho tɨ̂ʼ yɨ́, bɨ̌h nzě tó pyâl Pátara.

²Bɨ̌h nzě kœ̌b sitíma swîh yé á be lɨ́ edǐ tô Fénikia yɨ́. Bɨ̌h nzě kalwo tɨ̂, ntɔ̂ʼ tô e tyen dóló,

³tó pyâl bǎʼ e tíhé Swiprʉ̂s. Bɨ̌h ntɔ̂ʼ cɨɨ ɨ́ páʼ mbó émyɛ̌l ɨ́ tíhé waá, ntɔ̂ʼ ntaa, tô nko dí etô sí Sirî yɨ́. Bɨ̌h nzě tó kumo lɨ́ ebʉ́m é Tîr, ebě, yé á jɨ ó, sitíma súlɨɨ mimbeʼ tɨ̂.

⁴Bɨ̌h bé á si kœb ompʉ́n mé Tî Yésʉs tɨ̂. Nó ó bɨ́h le onɔ́ɔ́, bé á jâ tɨ̂ʼ sóno ntinɨ̂. Bʉr nzě lɛ́ɛ e Pɔ̂l ɨ́ nkul Sísǐm mé Nzyɛ̌m ó, nye ayɨ́ tô Yerʉ́zalɛm.

⁵Damá jóʼo nó, ɨ́ jɔʼ sóno ntinɨ̂ bɨ́h le onɔ́ɔ́, bé á di nyá, á be, nye mû sí laa yɨ́, bɨ̌h nzě laa, tô. Ompʉ́n bɨ́bɛ̂h nzě tó lîʼle bɨ́h, táare e bʉbá bɔ́ɔ́, kumo e bwán bɔ́ɔ́, tó pyâl ɨ́ jɔʼ bɨ́h á sil entaa nkana yɨ́. Bɨ̌h nzě bɨʼ mébóó sí lɨ́ ebʉ́m é mâŋ, lɨ́ ejɨʼla e Nzyɛ̌m.

⁶Bɨ̌h nzě jɨjána, bâʼ jána e bâ, bâʼ jána e bâ. Bɨ̌h nzě tó nî ɨ́ sitíma tʉ́ŋlʉ̌, bɨ́ɛ nzě swîʼ yɔ́ɔ́, tóŋɔɔ kwá nyɔ́ɔ́. Bɨ̌h ntɔ̂ʼ tô e tyen yɨ́h dóló mâŋ e mâŋ.

⁷Bɨ̌h nzě duhǒ Tîr, báʼǎ kalwo ɨ́ sitíma yaá, bɨ̌h nzě tó pyâl lɨ́ ebʉ́m é Tolemayɨ́da ɨ́ gúmó bɨ́h á sîl tyen mâŋ e mâŋ yɨ́. Bɨ̌h nzě sulo, lɨ́ ebára e bɨ́ɔɔ́ bɨ́ná dí tɨ̂ʼ bá. Bɨ̌h le onɔ́ɔ́ nzě lɛŋ élú égwár tɨ̂.

⁸Ádwií ɨ́ mɛ́n tɨ̂ʼ nɛ́ɛ: bɨ̌h nzě mɔa, pyâl Kesáre. Tɨ̂ʼ ó bɨ́h á sul ɨ́ mbɛ̌r mé Philippe yɨ́. Philippe á be ó mʉr ngwár ɨ́ sɔ́má bʉ̂r nzaangbá bé á pɛ́hɔɔ ɨ́ Yerʉ́zalɛm bá. Nye ntémé á be ó, lɛ́ɛ pô. Bɨ̌h bé á jâ ó, ɨ́ mbɛ̌r wé.

⁹Nye á be ó e bibíŋ méséhe binâ. Byé á bɨbe ó, lɨ́ egwîh mílɔ̌b mé Nzyɛ̌m.

¹⁰Bɨ̌h bé á si di tɨ̂ʼ melû ɨ́ buo buo. Nyʉ́ʉ́ ngwíha milɔ̌b ntɔ̂ʼ pyâl tɨ̂, duhǒ sí Yʉ́da. Díé lé, lé á be ó Agábus.

¹¹Nye ntɔ̂ʼ nzě gúmó bɨ́h á be yɨ́, nʉa káná mé Pɔ̂l, nzě kâʼ nyé mʉr tɨ̂ʼ mebô e mekʉ̌. Nye ó: «Paá bee gá mpʉ̌ Sísǐm dí elɛ́ɛ yɨ́: mʉr dí e kaná nyâʼ nyá, oYúden ó Yerʉ́zalɛm, bé ókâʼ nyé ó mpʉ. Bé ókâʼ nyé, ntɔ̂ʼ bɛ́mɔɔ nyé kwá bʉr o bíkûl.»

¹²Jɔʼ bɨ́h á sil ejôʼlo mekǎn maá yɨ́, bɨ̌h bʉr o tɨ̂, ndu e baá ó Kesáre ntɔ̂ʼ jɨʼla e Pɔ̂l ó, nye ayɨ́ kǎ tô Yerʉ́zalɛm.

¹³Nyɨɛ nzě yala ó: «Bɨ̌n jɨ, le esáa étyeʼ mé nkul ɨ́ yé? Ebě, ɨ́ wâm pâʼ, me mû ó kʉmsá. Abě njɨ, kɛ́ʼá ménkara wé omér. Me ɨ́ cǎr ntémé ó, me dwêʼ ɨ́ Yerʉ́zalɛm lɨ́ esú é díé mé Tî Yésʉs.»

¹⁴Mpʉ nyé á be abe e nkul ejóʼo bɨ́h yɨ́, bɨ̌h ntɔ̂ʼ di ɨ́ jolaaa. Bɨ̌h á jaa ka yala epíhe ó, njɨ: «Gwɨ́má mé Tî Yésʉs, yé syɛ́yɨɨ bé.»

¹⁵Bwá mélû, mé osí laa nɛ́ɛ: bɨ̌h nzě komlǒ tyen lɨ́ etô Yerʉ́zalɛm.

¹⁶Bʉr o mílʉ́mlʉ́ bé á duhǒ Kesáre bá, bê nzě tô e bɨ̌h ɨ́ nko nyʉ́ʉ́ mʉ̂r á jala le etira bɨ́h ntɔ́ɔ ɨ́ mbɛ̌r wé nyá, á be yɨ́. Díé é mʉ̂r waá, lé ó Násɔn, nyʉ́ʉ́ mʉ̂r Swiprʉ̂s, á be ɨ́ sɔ́má ómpʉ́n bé ésôʼ nyá.

¹⁷Jɔʼ bɨ́h á pyâl Yerʉ́zalɛm yɨ́, bɨ́ɔɔ́ bɨ́ná, bê nzě nʉa bɨ́h e bisʉhʉʉ.

¹⁸Ɨ́ mɛ́n tɨ̂, bɨ̌h e boo Pɔ̂l, bê nzě tô mbɛ̌r mé Jacques, kœbɔɔ ótyɛ̂b bé ésôʼ ó Mbɛ̌r-Nzyɛ̌m ntémé tɨ̂.

¹⁹Pɔ̂l nzě bára e bê. Nye nzě lɛ́ɛ̌ lɔ́ɔ, dumo e bisyɛ́ɛlǎ Nzyɛ̌m á sâ e nzɨ̌ syɛ́ɛ́ yé yɨ́. Bisyɛ́ɛla byaá, byé á be ó páʼ bʉr o dí abe óYúden bá. Nye á lɛ́ɛ byé ó gúgwár.

²⁰Jɔʼ bé á sil ejôʼlo sá nyé á lɛ́ɛ bé yɨ́, bé ntɔ̂ʼ gúmlǒ Nzyɛ̌m. Bê nzě lɛ́ɛ e Pɔ̂l ó: «Mɨ́ɔɔ́ wɨ́h ɛ́, go mʉr tɨ̂, gʉ́ beě bím ótɔ́ɔ́sin bé óYúden mû sí dyɛ̂ʼwo e Yésʉs-Krîst yɨ́. Bɨ́bɛ̂h ntémé, bé lɨ́ egbâ nkûl ɨ́ dwííí lɨ́ ebaʼle métié mé Moyɨ̂z.

²¹Sâ gwár, bé jóʼó ɨ́ páʼ gô ó, go lɨ́ elɛ̂ʼle óYúden bɨ́bɛ̂h mû mingbɛhá míngbɛhá ɨ́ bikúl bíswîh bá ó, bé bénaa metum maá. Bé jóʼó ntémé ó, gǒ lɛ́ɛ́ ó, bé ajala le ekǎ tíʼe bwán bɔ́ɔ́ mpʉ́n; ó bé ayɨ́ kǎ dû métum mé óYúden.

²²Nó ó, mɨná sâʼ gá nyá? Ebě, bé ójʉ̂ʼra yɨ́ɛ ó, go mû ó wâ.

²³Sáʼ mpʉ bɨ́h múo lɛ́ɛ gó yɨ̂: bɨ̌h bé e bʉrʉ̂m onâ bé á boo ntaa minkâl bá wâ.

²⁴Ntáʼ gâ. Bɨ̌n le onɔ́ɔ́ tô pubɔɔ. Gó ojána métɔ́ɔ́ mɨ́n le onɔ́ɔ́ lɨ́ esú ó, bé cɨ́aa milʉ́ myɔ́ɔ́. Nó ó bʉ̂r bɨ́bɛ̂h ngá gʉ́a ó, sá yɨ́yɛ̂h bé dí elɛ́ɛ, dumo e go yɨ́, yé abě tyeetye. Bé ogʉ́a ó, go ntémé, go lɨ́ ebaʼle métié gá mɨ́ná.

²⁵Bʉr o dí abe óYúden, baá mû sí bûʼla bá, bɨ̌h bé á si cɛma bé mekaná, lɨ́ elɛ́ɛ bé mitíʼá mî: ó bé syɛ̂hlaa tír nyɨnyɛ̂h á baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá. Bé sá ade ntémé metié, nkʉ̂ otír bé á dwe mitû bá. Bé ayɨ́ sâ bímolá.»

²⁶Nó ó Pɔ̂l á nʉa bʉrʉ̂m onâ baá. Ɨ́ mɛ́n tɨ̂, bé le onɔ́ɔ́ nzě tó nî e bé gúmó bé á pubɔɔ bigwǐh yɨ́. Bê nzě kǎ tó nî mpáh Nzyɛ̌m tʉ́ŋlʉ̌, le elɛ́ɛ ópara jɔʼ mélú mé épubɔɔ ngá síe yɨ́, le elɛ́ɛ bé ntémé ó, jɔʼ yaá ó nyé ókǎ dwě ndwéá lɨ́ esú é mʉ̂r nyɨnyɛ̂h ɨ́ sɔ́má yɔ́ɔ́ yɨ́.

²⁷Nó ɨ́ jɔʼ mímóhó nzaangbá myaá, myé á be, myé mû sí laa yɨ́, ɨ́ jɔʼ óYúden ó sí Azía, bé á bee Pɔ̂l ɨ́ mpáh Nzyɛ̌m tʉ́ŋlʉ̌ yɨ́, bê nzě tíne éntumo e bʉ̂r ó, bé mɛ́rɨɨ nye. Nye ntémé ntɔ̂ʼ mɛ́rɔɔ.

²⁸Bê nzě bʉ̂ bítím. Bé ó: «Ywííí! Bʉr o b'Ɨ́zraɛ̂l ɔɔ́! Kɛmɨɨ gá bɨ̌h ɔ̌! Paá nzě bee gá mʉr dí elɛ́ɛ̌ lɔ́ɔ ɨ́ gúmó yɨ́yɛ̂h ó, bé síaa kúl gá yɨ́ná, le ebene métié gá mɨ́ná ti e mpáh Nzyɛ̌m nyɨ̂ʼ nyá ɛ́! Ɨ́ báánâ, nyɨ́ bánǎ níŋle ntémé bʉr o dí abe óYúden bá ɨ́ mpáh Nzyɛ̌m tʉ́ŋlʉ̌! Nyɨ́ lœ̌ʼ gúmó dí ti yɨ́ ɔ̌!»

²⁹(Bé á lɨlɛ́ɛ nó ó, ebě, bé á si bee Trofímos mʉr Éfɛsɔs bé e Pɔ̂l ɨ́ nkana. Bé á jwɨʼ ó, Pɔ̂l á si níŋle nye ɨ́ mpáh Nzyɛ̌m tʉ́ŋlʉ̌.)

³⁰Nkana yɨ́yɛ̂h, yé á be ó, yé mû ɨ́ gbǎ gbǎ. Bʉr nzě dua ɨ́ bigúmó bíbyɛ̂h e mikám. Mɛ́rɔɔ̌ Pɔ̂l, tô le edulɔɔ nyé sí e sí, pɛʼɔɔ nyé ɨ́ mpáh Nzyɛ̌m tʉ́ŋlʉ̌, diblɔɔ ntɔ̂ʼ mebê me tɨ̂.

³¹Bé á be ó lɨ́ esáa éjʉ̂ Pɔ̂l. Nó ɨ́ jɔ̌ʼ lɔ́ɔ, wé á to pyâl ɨ́ megwǎl me njwɨ́ɨ bisója nɨ́nɨ́ɨ́ ó, Yerʉ́zalɛm yɨ́yɛ̂h, yé mû ó áleŋéleŋé yɨ́,

³²tyé e tyé yaá, nye ntɔ̂ʼ kpâhwǎ nʉa ókapitɛ̂n ti e byúú bísója, tóŋɔɔ míkám nko éntumo e bʉ̂r, lé á be yɨ́. Jɔʼ bʉ̂r baá, bé á bee bisója ndu e njwɨ́ɨ nɨ́nɨ́ɨ́ wɔ́ɔ́ yɨ́, bé ntɔ̂ʼ gwâʼ ébî Pɔ̂l.

³³Nó njwɨ́ɨ bisója á sîhlě bǎʼ e Pɔ̂l, nzě mɛ̂r nyê, nye ntɔ̂ʼ dwe nkûl ó, bé káʼaa nye e mikʉ̂kɔ̌b mimbá. Nó nyé á dî mbi mʉ̂r nyé á be wɨ́, ndu e sá nyé á pʉgʉ sâ yɨ́.

³⁴Bâʼ bʉ̂r ó sɔ́má yaá, lɛ́ɛ wɔ́ɔ́ mbi; bʉ́ʉ́ bʉ̂r, lɛ́ɛ wɔ́ɔ́. Mpʉ njwɨ́ɨ bisója waá á be abe e nkul ejóʼǒ mpǎŋ sɔ̂ʼ ɨ́ lɔ̌b óleŋéleŋé waá yɨ́, nó nyé á lɛ́ɛ ó, bé tôʼ e Pɔ̂l ɨ́ kóʼ bísója tʉ́ŋlʉ̌.

³⁵Jɔʼ bé e Pɔ̂l, bé á pyâl lɨ́ ebɨ́r é mbɛ̌r bísója kʉ́ yɨ́, ebúʼ, lé ntɔ̂ʼ bére éntumo e bʉ̂r ɨ́ miléme. Jɔʼ bísója, byé á bee mpʉ bʉ̂r baá, bé á kpɛl esâ Pɔ̂l jélé yɨ́, byé ntɔ̂ʼ kɛl nyé ɨ́ mebɛʼ mɔ́ɔ́.

³⁶Ebě, bʉr o b'á dudû nye píhe bá, bé á lɨ̂lɛɛ ó: “Jʉ́ʼóó gá nye.”

³⁷Mpʉ bé á gwa níŋle Pɔ̂l ɨ́ kóʼ bísója yɨ́, nó ó nyé á lɛ́ɛ e njwɨ́ɨ bisójǎ nɨ́nɨ́ɨ́ waá ó: «Nzê mě e nkul elɛ́ɛ gó yʉ́ʉ́ sɔ̂ʼ ɛ̌?» Nó ó njwɨ́ɨ bisója waá á dî e né ó: «Nzê gʉ́ gʉ́ǎ lwǐb grɛ̂k ɛ̌?»

³⁸Ntʉ gó dí mʉr Egɨ̂ptɛn á sâ ó, bʉr sâʼ bintʉ̌, tô e binzilngǎn otɔ́ɔ́sin onâ ɨ́ lʉá tʉ́ŋlʉ̌ nyá ɛ́?

³⁹Nó ó, Pɔ̂l á yala ó: «Mɛm, me ó Yúden. Me á byɛ̂l ó, Tarsôs ɨ́ sí Silisía. Nkana yâm mé á duho tɨ̂ʼ yɨ́, yé e kûm ɨ́ buo buo. Me lɨ́ ejɨʼla e go ó, go kámaa ó, me lwíbɨɨ e bʉr.»

⁴⁰Nó ó njwɨ́ɨ bisójǎ nɨ́nɨ́ɨ́ á kam. Pɔ̂l nzě tyɛ̂b lɨ́ ebɨ́r kʉ́, nzě peble bʉ̂r mbô. Jɔʼ bʉ̂r bɨ́bɛ̂h, bé á be, bé mû ɨ́ myǒŋ yɨ́, Pɔ̂l nzě lwib e bé ɨ́ lwǐb aramyɛ̂n.