Read Koonzime Milʉ́mlʉ́ 22 Bible Online

Milʉ́mlʉ́ 22 - Koonzime bible

Milʉ́mlʉ́ 22

¹Pɔ̂l, nye ó: «Bɨ́ɔɔ́ bâm le osɔ́ŋ bâm, jóʼlááá gá nkar mé múo nzě kar ɨ́ báánâʼ ɨ́ lɔ̌b wâm ɨ́ míh mɨ́n nyɨ̂!»

²Mpʉ bé á jóʼo nye lɨ́ elwib e bé ɨ́ lwǐb aramyɛ̂n yɨ́, bé ntɔ̂ʼ di ɨ́ jolaaa. Nó ó, Pɔ̂l á nze lɛ́ɛ e bé ó:

³«Me ó Yúden. Me á byɛ̂l ó, Tarsôs ɨ́ sí Silisía. Me á ka bwaʼ yɨ́ɛ ó wâ. Lɛ̂ʼla wǎm á be ó Gamalyɛ̂l. Nye ó b'á lɛ̂ʼle me mpʉ mé dúʼoo metié bímpám gá bíná yɨ́. Me á si gbâ nyʉ̂l nyǎm lɨ́ edwě Nzyɛ̌m kûm jwɨʼ gwár mpʉ bɨ́n ntémé dí esâ ɨ́ báánâʼ yɨ́.

⁴Me á si tíble, jʉ̂ bʉ̂r o b'á dudû nzɨ̌ mé Krîst bá. Me á si bî bʉbá e bʉrʉ̂m, tyen bé ɨ́ mbɛ̌r mímbʉʼ.

⁵Njwɨ́ɨ mpáh Nzyɛ̌m, ndu e sɔ́má ótɔ́má bʉ̂r, bé e nkul eboʼlo ó, sá mé dí elɛ́ɛ yɨ́, yé ó tyeetye. Bé á si cɛma me mekaná, ntɔ̂ʼ tímle mé mǎ ó, me tô dwe bɨ́ɔɔ́ gá bɨ́ná, oYúden dí ɨ́ Damâs bá. Jwɨʼ yâm, yé á be ó, me tô mɛ̂r óbûʼla bé á be gʉ̂ʼ bá, búla e bé mikɛ́ʼá, tô e bé Yerʉ́zalɛm lɨ́ esú ó, bé dwéŋɔɔ bintɨ́ʼá.»

⁶«Yé á be ó, me dímé nzɨ́ e nzɨ̌, ɨ́ jɔʼ mé á be, me mû lɨ́ ekúnwo e Damâs yɨ́, yé mû témé móhó nɛ́ɛ: mimbah, myé ntɔ̂ʼ pan métwɨrâ, duho ɨ́ njʉl wé á be ɨ́ jʉ́o kʉ́ wɨ́. Myê nzě kʉn ɨ́ gúmó mé á be yɨ́.

⁷Nó ó mé á duma sí, nzě jóʼo twíí lɨ́ elɛ́ɛ e me ó: “Saʉ̂l, Saʉ̂l, go bá pʉgʉ́ tíble mé mpʉ́nʉ̌ ɨ́ yé?”

⁸Me ntɔ̂ʼ dî e né ó: “Dâ ɛ̌! Gua, go nzé?” Twíí nyaá ntɔ̂ʼ yala ó: “Mɛm, me ó Yésʉs, mʉr Nazarɛ̂t, gó dí etíble nyá.”

⁹Bʉr o bɨ́h le onɔ́ɔ́ bé á be bá, bé á si kʉ bee mimbah myaá. Sâ gwár, bé á bé ajóʼo yɨ́ɛ twíí mé mʉ̂r á lwib e me nyá.

¹⁰Nó mé á ka dî ó: “Dâ ɛ̌, me ɨ́ jala le esâ nyá?” Nó ó, Tî Yésʉs á lɛ́ɛ e me ó: “Gbɔlwaa sí. Tóʼ Damâs. Go ólɛ́ɔɔ̌ sá yɨ́yɛ̂h Nzyɛ̌m á tíʼe ɨ́ lémé wé ó, go sâʼ yɨ́ gʉ̂.”

¹¹Ɨ́ mpʉ mé á be, me mû ántím ɨ́ lɔ̌b njʉl wé á be ɨ́ buú pan wɨ́ yɨ́, nó ó bʉ̂r ó njoo yâm bé á mɛ̂r me ɨ́ mbô, tóŋɔɔ e me Damâs yɨ́.

¹²«Nyʉ́ʉ́ mʉ̂r á be ó gʉ̂, díé lé Ananías. Nye nzě bee mê. Nye á be lɨ́ edwáawǒ Nzyɛ̌m le egwá baʼle métié gá mɨ́ná. OYúden bé á bě Damâs bá, bé á be lɨ́ ebuú sêʼle nyê.

¹³Nye nzě pyâl kwá nyǎm, nzě tyɛ̂b bǎʼ e me. Nye e me ó: “Saʉ̂l, mɨ́ɔɔ́ wǎm, míh mô, mé bɔ́aa! Go e bée!” Ɨ́ tyé e tyé yaá, míh mâm nzě bɔ́a. Me ntɔ̂ʼ bee nyê.

¹⁴Nó nyé á lɛ́ɛ e me ó: “Nzyɛ̌m bimpám bíná á boo twâr go ó, go gʉ́ŋaa gwɨ́má yé, ó go béyɨɨ waá dí Tîtyěl Mʉr nyá, ó go jóʼaa nye lɨ́ elwib e num wé nye mʉr tɨ̂.

¹⁵Ebě, go óbʉboʼlǒ lɔ̌b wé, lɨ́ elɛ́ɛ ɨ́ míh mé bʉ̂r bɨ́bɛ̂h, sá gó á bee le ejóʼo yɨ́.

¹⁶Nó ó, gǒ kǎ bóno yé ɨ́ báánâ? Gbɔlwaa sí. Go e dúŋɔɔ, jwɨɔɔ ɨ́ páʼ bísyɛ́ɛla bí ébébe byô, lɨ́ ekɛn díé mé Yésʉs.”»

¹⁷«Jɔʼ mé á búlǎ Yerʉ́zalɛm yɨ́, nó ó, ɨ́ mpʉ mé á jɨjɨʼla ɨ́ mpáh Nzyɛ̌m tʉ́ŋlʉ̌ yɨ́, me nzě bee ésimá.

¹⁸Me á bee ó Tî Yésʉs. Nó nyé á lɛ́ɛ e me ó: “Sáʼ kám e kám, go kpâhwa pʉʼa ɨ́ Yerʉ́zalɛm, ebě, bʉr o tɨ̂, bé ákǎm sá gó ngá lɛ́ɛ bé, dumo e me yɨ́.”

¹⁹Nó ó mé á lɛ́ɛ e né ó: “Dâ ɛ̌, bé lɨ́ egʉ́a ó, me á si tô ɨ́ mempáh mínjɨʼla mé óYúden, ndu e ntémé ó, me á si gbâ bʉr bô ɨ́ mbʉʼ, le ebî baá bé á dyɛ̂ʼwo e go bá.

²⁰Jɔʼ bé á jʉ̂ Étiene, mboʼlo gǒ yɨ́, me á be ó tɨ̂. Bʉr o b'á jʉ̂ nye bá, me á si kʉ kam syɛ́ɛla yɔ́ɔ́ yaá. Me ntémé ó b'á baʼle mikán myɔ́ɔ́.”

²¹Nó ó Tî Yésʉs á ka lɛ́ɛ e me ó: “Tóʼ, ebě, me múo nzě tyen gó lɨ́ ejaa, ɨ́ nko bʉ̂r o dí abe óYúden bá di yɨ́.”»

²²Bʉr, bé á be lɨ́ ejôʼlǒ Pɔ̂l, tó pyâl ɨ́ jɔʼ nyé á lɛ́ɛ milɔ̌b myaá mímyɛ̂h yɨ́. Nó bé á taare ebɨ̂n mecwíí kʉ́. Bé ó: «Pɛʼɛɛ gá mbi mʉ̂r nɨ̌ ɨ́ sí yɨ̂. Nye ɨ́ jala le edwe. Nyé ajala le ekǎ tiʼe.»

²³Bê nzě bɨ̂n métwíí mɔ́ɔ́ nó, e nkul, le eguhɔɔ míkán myɔ́ɔ́ sí e sí, le enʉŋɔɔ pím, lɨ́ʼɔɔ nyé kʉ́ e kʉ́.

²⁴Nó ó njwɨ́ɨ bisója á lɛ́ɛ ó, bé níŋlaa Pɔ̂l ɨ́ kóʼ bísója tʉ́ŋlʉ̌, ŋmɛ́hɔɔ nyé mingáhá, lɨ́ esâ ó, nye nkʉ̂ gʉ́ǎ sá bʉ̂r bé á bɨbɨ̂n mecwíí kʉ́ ɨ́ lɔ̌b wé yɨ́.

²⁵Jɔʼ bé á sil ekâʼ nye e mikǒl ó, bé bí ó nye yɨ́, Pɔ̂l nzě lɛ́ɛ e kapitɛ̂n á be náǎ nyá ó: «Nzê gǒ e nkul eŋmɛ̂h mʉ̂r Rôm mingáhá, nye dína apǎ nʉa mébě ɛ̌?»

²⁶Ejóʼo nyé á jóʼo nó yɨ́, kapitɛ̂n waá ntɔ̂ʼ lɛ́ɛ e waá nɨ́nɨ́ɨ́ ó: «Go ósâ nyá? Mʉr nyâ, nye ó mʉr Rôm.»

²⁷Nó ó, njwɨ́ɨ bisójǎ nɨ́nɨ́ɨ́ á nze bǎʼ e Pɔ̂l, ntɔ̂ʼ dî e né ó: «Lɛ́yɨ́ɨ́ mê: go ó mʉr Rôm ɨ́?» Nó ó, Pɔ̂l nzě kam ó: «Eee!»

²⁸Nó njwɨ́ɨ̌ nɨ́nɨ́ɨ́ nyɨɛ á ka lɛ́ɛ ó: «Mɛm á bwâm lɨ́ edi mʉ̂r Rôm ó, bwámáa, e tâŋ mɔnɨ́ ɨ́ buo buo.» Nó ó, Pɔ̂l á yala e né ó: «Mɛm, me mʉr Rôm ó, ɨ́ mebyɛ́l mâm.»

²⁹Tyé e tyé yaá, bʉr o b'á gwa bî nye lɨ́ esú ó, nye lwíbɨɨ bá, bé ntɔ̂ʼ tuŋlo ményʉ̂l. Njwɨ́ɨ̌ nɨ́nɨ́ɨ́ mʉr tɨ̂, nye nzě jóʼo bʉ́á ɨ́ jɔʼ nyé á gʉ́a ó, Pɔ̂l á byɛ̂l ó, mʉr Rôm, bê bánǎ káʼɔɔ nyé e mikʉ̂kɔ̌b yɨ́.

³⁰Njwɨ́ɨ bisója waá á be ó sí tíʼe ɨ́ lémé wé ó, nyě kpɛ̌l ó, egʉ́ǎ sá óYúden bé á pʉgʉ nwâhle Pɔ̂l yɨ́. Sá tɨ̂ʼ ó bé á tii nye mikʉ̂kɔ̌b ɨ́ mɛ́n tɨ̂ʼ yɨ́. Bê nzě lɛ́ɛ le ojwɨ́ɨ ó mpáh Nzyɛ̌m ndu e bʉr ó bʉ̌m nɨ́nɨ́ɨ́ bɨ́bɛ̂h ó, bé gwɨ̂hlaa. Nye nzě tô e Pɔ̂l ɨ́ gúmó bé á be yɨ́, nzě tyêl nyé tɨ̂, ó nye káraa lɔ̌b wé.