Read Koonzime Milʉ́mlʉ́ 23 Bible Online

Milʉ́mlʉ́ 23 - Koonzime bible

Milʉ́mlʉ́ 23

¹Nó ó, Pɔ̂l á bɨʼ bʉr ó bʉm mejwôʼlʉ. Nye ó: «Bɨ́ɔɔ́ bâm, mě séá Nzyɛ̌m syɛ́ɛ́ ó e léme ɨ́ sɔ́ɔ́ɔ́, pyâl ɨ́ dʉ́ó lɨ̂ʼ mûh.»

²Nó ó, njwɨ́ɨ opara Ananías á lɛ́ɛ e bʉr o b'á bě bǎʼ e Pɔ̂l bá ó, bé ŋmɛ́hɛɛ nye ɨ́ num.

³Nó ó Pɔ̂l á lɛ́ɛ e né ó: «Nzyɛ̌m óbî gô, go sá pǎb dí le epɛ́m yɨ̂! Go ó náǎ ndîndǐl lɨ́ etíʼě lɔ̌b wâm, ɨ́ mpʉ métié dí elɛ́ɛ yɨ́. Sâ gwár, go lɨ́ elwímla e metié, ɨ́ jɔʼ gó dí elɛ́ɛ ó, bé ŋmɛ́hɛɛ me yɨ́.»

⁴Baá bé á bě bǎʼ e Pɔ̂l bá, bê nzě lɛ́ɛ e né ó: «Nzê gǒ lwɨ́ɨ́ ó, njwɨ́ɨ opara ɛ̌?

⁵Nó ó Pɔ̂l á yala e bé ó: «Bɨ́ɔɔ́ bâm, me bé agʉ́a ó, yé ó njwɨ́ɨ opara. Yé bé me bé ɨ́ gʉ́a nó, mpa me bé alwib nó, ebě, yê cɛmá ó: “Gǒ sá alwib e njwɨ́ɨ gǒ ɨ́ bébe bébe.”»

⁶Sâ gwár, ɨ́ jɔ̌ʼ Pɔ̂l á ka gʉ́a ó, bʉr ó bʉm, bé á be ó menkɔ̌m mebá: nyɨ̂ʼ nkɔ́m, oSadwisyɛ̂n; nyʉ́ʉ́, oFarizyɛ̂n yɨ́, nó ó nyé á bʉ̂ tím gúmó ótîʼ o mílɔ̌b bé á be yɨ́. Nye ó: «Bɨ́ɔɔ́ bâm, me ó Farizyɛ̂n. Odâ, bé á be ntémé ó oFarizyɛ̂n. Me lɨ́ ebúʼla ó, odwe, bé ópah. Sá tɨ̂ʼ ó mé mû lɨ́ esâ nkâr yɨ́.»

⁷Jɔʼ nyé á cɨ mekǎn maá yɨ́, oFarizyɛ̂n, bé le oSadwisyɛ̂n nzě nyɛl épére mékǎn páʼ nyɔ́ɔ́. Tɨ̂ʼ ó gwɨ́hlá yɔ́ɔ́, yé á bɔ́ʼa menkɔ̌m mebá yɨ́.

⁸(Ebě, oSadwisyɛ̂n bɨ́ɛ, bé lɛ́ɛ́ ó, odwe, bé ákóʼó pah. Bé lɛ́ɛ́ ntémé ó, beéngeles le misísǐm, byé abe. OFarizyɛ̂n bɨ́ɛ, bé lɨ́ ebúʼla bísâ byaá bíbyɛ̂h.)

⁹Bé á be ɨ́ buú bɨ̂n métwíí kʉ́ e nkul. Nó ó bʉ́ʉ́ ólɛ̂ʼla o métié ɨ́ sɔ́má bʉ̂r o nkɔ́m oFarizyɛ̂n, bé á tyɛ̂b tîtyěl, ntɔ̂ʼ lwib e nkul nyɨnyɛ̂h ó: «Bɨ̌h bé abeě sá ébébe ɨ́ mʉr nyâ. Yʉ́ʉ́ jɔʼ, yé á be ó sísǐm, nkʉ̂ ntɔ̂ʼ ó, éngeles ó b'á lwib e né.»

¹⁰Nó ɨ́ jɔʼ óleŋéleŋé, wé á be, wé mû lɨ́ ekǎ sahle yɨ́, njwɨ́ɨ bisója nzě jóʼo bʉ́á, ó bé ámû nyǎ Pɔ̂l bipêh bipêh. Sá tɨ̂ʼ ó nyé á dwe bisója nkul ó, byé súlaa sí, nko bʉ̂r, bé á be yɨ́. Bé tô dwǐh Pɔ̂l ɨ́ mebó mɔ́ɔ́. Bé obáʼǎ swîʼ e né ɨ́ kóʼ bísója tʉ́ŋlʉ̌.

¹¹Ɨ́ pum wé á ka bɔma wɨ́, Tî Yésʉs nzě pyâl nyê, ntɔ̂ʼ lɛ́ɛ e né ó: «Mɛ́rɨ́ɨ́ léme. Ɨ́ mpʉ gó á nyɛɛ túno lɔ́ɔ́ wâm ɨ́ Yerʉ́zalɛm yɨ́, yé jala ntémé ó, go tôʼ túno wé Rôm.»

¹²Jɔ̌ʼ mɛ́n wé á lɔ́ma yɨ́, oYúden nzě kǎʼ bʉm. Ntaŋɔɔ mínkâl ó, bé ókǎ bɔmǎ mbô e num ó, bé osí pǎ jʉ̂ Pɔ̂l.

¹³Baá bé á kaʼ bʉm bá, bé á si laa bʉr mekám ménâ.

¹⁴Nó ó bé á nze to bee ojwɨ́ɨ o mpáh Nzyɛ̌m le ompené. Bé e bé ó: «Bɨ̌h bʉr o tɨ̂ʼ mû ó sí nʉǎ tíʼá, le entaa mínkâl témé bʉr ó, bɨ̌h bé ákóʼó bóblǒ sá éde ɨ́ minum míh, tó pyâl ɨ́ jɔʼ bɨ́h óbě sí jʉ̂ Pɔ̂l yɨ́.

¹⁵Nó, bɨ̌n bʉr o tɨ̂, ndu e bʉr ó bʉ̌m nɨ́nɨ́ɨ́ bɨ́bɛ̂h, díʼéé gá njwɨ́ɨ bisója ɨ́ nzɨ̌ mikóo ó, nye dwêʼ bɨ̌n Pɔ̂l ɨ́ báánâ. Bɨ̌n a lɛ́ɛ́ njwɨ́ɨ waá ó, bɨ̌n bé ótó timlě lɔ̌b wé mbɨ̂mbɨá. Bɨ̌h bɨɛ, bé ó, ɨ́ cǎr ó, bɨ̌h jʉ́ʼoo nye, nye dína apǎ pyâl wâ.»

¹⁶Nkúná mâ kɛ́l mé Pɔ̂l á be ó sí cárǎ jóʼǒ bʉm yaá, le egʉ́a éboʼo bé á la nye lɨ́. Nó nyé á tô mbɛ̌r mímbʉʼ tʉ́ŋlʉ̌, ntɔ̂ʼ tó gwîh Pɔ̂l lɔ̌b waá.

¹⁷Pɔ̂l nyɨɛ nzě jébe nyʉ́ʉ́ kapitɛ̂n. Nye e né ó: «Tóʼ e mâ sohó nyâʼ nko njwɨ́ɨ bisójǎ nɨ́nɨ́ɨ́ dí yɨ́, ebě, nyě e yʉ́ʉ́ sá nyé dí egwɨ̂m élɛ́ɛ nyé yɨ́!»

¹⁸Nó nyé á nʉa nye, tô e né nko njwɨ́ɨ bisójǎ nɨ́nɨ́ɨ́ á be yɨ́. Nye e né ó: «Pɔ̂l dí mbʉʼ nyá, nye sí jébe mê, nzě lɛ́ɛ e me ó, me ntâʼ go e mâ sohó nyâ. Nyě e lʉ́ʉ́ ékǎn nyé dí egwɨ̂m elɛ́ɛ gó lɨ́.»

¹⁹Nó ó, njwɨ́ɨ bisója á mɛ̂r mâ sohó nɨ̌ ɨ́ mbô, bé e nɔ́ɔ́ tô lɨ́ empah. Nó nyé á dî e né ó: «Gǒ kpɛl élɛ́ɛ mé yé?»

²⁰Nó nyé á yala ó: «OYúden, bɨ́ di twíí ó, bé ódî e go ó, bé ntâʼ e Pɔ̂l ɨ́ mɛ́n ɨ́ míh mé bʉ̂r ó gwɨ́hlá nɨ́nɨ́ɨ́. Bé ósâ mpʉ̌ sá lɛ́ɛ́, bé óbáʼǎ timlě lɔ̌b wé.

²¹Sâ gwár, sá akǎm lɔ̌b waá, ebě, bʉr o ngá tó bóno nyé bá, bɨ́ laa bʉ̂r mekám ménâ. Bɨ́ boó kǎʼ bʉm, ntaa mínkâl ó, bé áde méde nkʉ̂ menyoʼ, tó pyâl ɨ́ jɔʼ bé óbe, bé mû sí jʉ̂ nyé yɨ́. Nó ó, ɨ́ báánâ, bɨ́ boó la éboʼo. Bé mû kǎ bóno ó njɨ yalá yô.»

²²Nó ó, njwɨ́ɨ bisójǎ nɨ́nɨ́ɨ́ waá á nze bîr mâ sohó nɨ̌. Nye nzě lɛ́ɛ e né ó: «Gǒ sá alɛ́ɛ nyʉ́ʉ́ mʉ̂r swîh ó, go bé ɨ́ nzě gwîh mé bʉ̌m nɨ̌!»

²³Píe tɨ̂, njwɨ́ɨ nzě jébe bʉ́ʉ́ ókapitɛ̂n obá. Nye e bé ó: «Syɛŋɨɨ gá bisója minter mimbá, ndu e bʉr mekám nzaangbá o dí ekalwo kʉ́ bikablá bá, ndu e bʉr minter mimbá o dí e mekʉá ɨ́ mebô bá. Diʼee gá ɨ́ cǎr ó, bɨ̌n tôʼ Kesáre ɨ́ mewala ebǔ mé pum!

²⁴Kʉmsaa gá ntémé bikablá bí énkɛ́ɛ̌ Pɔ̂l tɨ̂. Bɨ̌n a tó e né mbɨ̂mbɨá kwá mé ngóvina Félix.»

²⁵Nó nyé á cɛma ntémé mekaná ɨ́ mbi wɨ̂:

²⁶Yé ó mɛm, Klodíʉs Lisías. Mě cɛmá ó, tî ngóvina Félix. Me lɨ́ esoho gô!

²⁷OYúden, bé á si mɛ̂r mʉr nyâ, bé ntémé, bé á be ó, bé jʉ́ ó nye. Jɔʼ mé á jóʼo ó, nye ó mʉr Rôm yɨ́, me ntɔ̂ʼ tô e bisója gúmó bé á be yɨ́, pɛʼ nyê, ntɔ̂ʼ tiʼ nyê.

²⁸Nó mpʉ mé á tíʼe ɨ́ lémé wâm ó, mě gʉ́á sá óYúden, bé á pur nye yɨ́, me á si tô e né ɨ́ mpǒm bʉ̌m nɨ́nɨ́ɨ́.

²⁹Me á kʉ kœb ó, bé lɨ́ elaʼ nyé milɔ̌b mi dí edumo e metié mɔ́ɔ́ mí. Byé á be yɨ́ɛ ó, abě mpǎŋ bipurá, apʉgʉ́ bě mbi byaá bi mʉ̂r dí e nkul ejʉ́ŋɔɔ, nkʉ̂ gbáŋɔɔ nyé ɨ́ mbʉʼ bí.

³⁰Nó ɨ́ jɔʼ bê nze lɛ́ɛ́ mé ó, oYúden, bé á si kaʼ bʉm, le etíʼe ó, bé jʉ́ ó nye yɨ́, nó ó, mê ka kpahwa lómó nyé gʉ̂ʼ kwá nyǒ yɨ́. Me á lɛ́ɛ ntémé e bʉr o dí ebúʼo nyé lɔ̌b bá ó, bé ntáa lwǐb lɔ̌b wɔ́ɔ́ ɨ́ mpǒm nyǒ.

³¹Bisója ntɔ̂ʼ sâ sá nyé á lɛ́ɛ bé yɨ́. Byé ntɔ̂ʼ nʉǎ Pɔ̂l, tô e né ɨ́ pum waá, tó pyâl Antipatrîs.

³²Ádwií ɨ́ mɛ́n tɨ̂ʼ nɛ́ɛ: bisója byé á tye e mekʉ̌ bí, bíɛ ntɔ̂ʼ búla yɔ́ɔ́, tó nî ɨ́ kóʼ bísója tʉ́ŋlʉ̌. Bé á to lîʼle ó, byaá byé á titye ɨ́ bikablá kʉ́ bí, bíhaá bíɛ ó b'á tô e Pɔ̂l, tô tóʼ, tó kumǒ kumáa e né Kesáre.

³³Jɔʼ bé á pyâl Kesáre yɨ́, otyel o bíkablá nzě dwě ngóvina mekaná maá, le etyêl ntémé Pɔ̂l ɨ́ míh mé.

³⁴Jɔ̌ʼ ngóvina á sil eláa mekaná maá yɨ́, nó ó nyé á dî e Pɔ̂l ó, nye mʉr yáǎ péh sí. Jɔʼ nyé á be ɨ́ gʉ́a ó, nye ó mʉr Silisía yɨ́,

³⁵nye nzě lɛ́ɛ e né ó: «Me ódî gó metíá ó, ɨ́ jɔʼ bʉ̂r o b'á pa pur go bá, ngá pyâl yɨ́.» Nó nyé á dwe nkul ó, bé bâʼlaa Pɔ̂l ɨ́ bíi mé Erôd.