Read Koonzime Milʉ́mlʉ́ 25 Bible Online

Milʉ́mlʉ́ 25 - Koonzime bible

Milʉ́mlʉ́ 25

¹Píe melú mélɛ̂l, nyé osí pyâl ɨ́ sí yaá, Fɛ́stos nzě duhǒ Kesáre, tô Yerʉ́zalɛm.

²Ojwɨ́ɨ o mpáh Nzyɛ̌m le otyɛ̂b bé ésôʼ ó Yúden nzě tyɛ̂b ɨ́ míh mé, lɨ́ etó pǔr Pɔ̂l. Nó ó bé á dî e Fɛ́stos ó,

³nye pʉ́gʉ bánǎ tyěn Pɔ̂l Yerʉ́zalɛm, ebě, bé á si sáa pɨʼ ɨ́ lɔ̌b wé, bee ó, bé óla éboʼo téme-nzɨ̌, jʉ̂ nyê.

⁴Fɛ́stos á yala e bé ó, Pɔ̂l á be ɨ́ mbʉʼ ó Kesáre. Ntémé, Fɛ́stos mʉr tɨ̂ʼ á bě e jwɨʼ ó, nye ókpâhwǎ swîʼ, tô gʉ̂.

⁵Nye á lɛ́ɛ ntémé ó: «Ojwɨ́ɨ́ bɨ́n, bé tôʼ e me Kesáre. Yé bé Pɔ̂l á sâ ebébe nó, bé tôʼ pur nyé gʉ̂.»

⁶Fɛ́stos á jâ ɨ́ sɔ́má yɔ́ɔ́ ó, kúnókúno e melû mwom, nkʉ̂ kám. Nye ntɔ̂ʼ báʼǎ tô Kesáre. Ɨ́ mɛ́n, nye nzě nʉǎ diá ɨ́ mpáh milɔ̌b, nye ntɔ̂ʼ dwe nkûl ó, bé ntâʼ e Pɔ̂l.

⁷Jɔ̌ʼ Pɔ̂l á pyâl yɨ́, oYúden o b'á duhǒ Yerʉ́zalɛm bá, bé á si kɛb nye ɨ́ nká, nzě búʼɔɔ nyé milɔ̌b ɨ́ buo buo. Sâ gwár, bé á bé abe e nkul elɛ̂ʼle ótyeetye o tɨ̂ʼ e bijwɨʼ bimpâ.

⁸Pɔ̂l, nye ó: «Me á bé asâ syɛ́ɛla ébébe gwár ɨ́ páʼ métié mé óYúden, nkʉ̂ ntémé ɨ́ maá mé Nzyɛ̌m, nkʉ̂ maá mé Kɛ́ɛza.»

⁹Fɛ́stos nyɨɛ á be lɨ́ edǐ sâ ó, oYúden, bé béyɨɨ ó, nye ɨ́ mbɨa. Nó nyé á ka dî e Pɔ̂l ó: «Nzê gǒ kpɛ̌l ó, gǒ tó ó Yerʉ́zalɛm, ó me tô lwǐb lɔ̌b gô gʉ̂ʼ ɛ̌?»

¹⁰Pɔ̂l nzě yala e né ó: «Me ó wâʼ tîtyěl ɨ́ mpáh milɔ̌b mé Kɛ́ɛza. Ɨ́ tɨ̂ʼ ntémé ó lɔ̌b wɨ̂ʼ jálá le elwibɔɔ yɨ́. Me á bé asâ óYúden ébébe, ɨ́ mpʉ gó mʉr tɨ̂ʼ dí ekʉ́ gʉ́a yɨ́.

¹¹Yé bé mɨ́ byaʼ, nkʉ̂ ó, mɨ́ sâ yʉ́ʉ́ sá ébébe jálá le eswie yɨ́ nó, mé abene édwe, lɨ́ ebúra e sâ yaá. Yé bé bisá bé dí elaʼ mé tɨ̂ʼ bí, byé abě tyeetye nó, yé abe e mʉr dí e nkul edwe nkûl ó, bɨ́ɛ jʉ́ʼoo me. Mě tyěn lɔ̌b wâm ó kwá mé Kɛ́ɛza!»

¹²Nó ó, jɔ̌ʼ Fɛ́stos á sil elwib e bʉr ó bʉm yé yɨ́, nye nzě yala ó: «Mpʉ gô lɛ́ɛ́ ó, gǒ tyěn lɔ̌b gô ó, kwá mé Kɛ́ɛza yɨ́, go ókʉ́ jaá tô ó, njɨ kwá nyé.»

¹³Jɔʼ bwá mélû, bé á be, bé mû sí laa yɨ́, njwɨ́ɨ Agrípa bé e Benîk nzě pyâl ɨ́ Kesáre, lɨ́ enzě sohǒ Fɛ́stos.

¹⁴Mpʉ bé á di tɨ̂ʼ melú ɨ́ buo buo yɨ́, Fɛ́stos nzě lɛ́ɛ njwɨ́ɨ waá lɔ̌b Pɔ̂l á be e wé wɨ́. Nye e né ó: «Nyʉ́ʉ́ mʉ̂r Félix á líʼe wâʼ ɨ́ mbʉʼ nyá, nye dína ó tɨ̂ʼ ɨ́ mbɛ̌r mímbʉʼ.

¹⁵Jɔʼ mé á tô Yerʉ́zalɛm yɨ́, ojwɨ́ɨ o mpáh Nzyɛ̌m, le otɔ́má bʉ̂r bé óYúden, bé á si pur nye. Bé á lɛ́ɛ ntémé me ó, me gbâʼ nye ɨ́ mbʉʼ.

¹⁶Me nzě yala e bé ó, bʉr ó Rôm, bé abe e tum ó, bé tyénɨɨ mʉr ɨ́ mpáh milɔ̌b, bé e bʉr o dí enwâhle nyé bá apǎ kɛra. Bé ópur nyé ɨ́ lɔ̌b syɛ́ɛla yé e yʉ́ʉ́ nó, nye óbe e jɔʼ ntémé ó, nye lɛ̂ʼlaa nkʉ̂ nyɨɛ ó b'á be e nkam.

¹⁷Ɨ́ jɔʼ bé á syɛŋa yɨ́, adeʼ, me ntɔ̂ʼ nʉa diá ɨ́ mpáh milɔ̌b. Nó mé á dwe nkul ó, bé ntâʼ e mʉr waá.

¹⁸Bʉr o dɔ̂m bé, bé á si tyɛ̂b ntémé. Bé á bé alɛ́ɛ nyé yɨ́ɛ bisá bí ébébe mɛ̂m á jwɨjwɨʼ ó, bé óbɛ̌m boʼlo nyé bí.

¹⁹Bé á jaa pére mekǎn ó, njɨ ɨ́ lɔ̌b yébé wɔ́ɔ́, le ɨ́ lɔ̌b mé nyʉ́ʉ́ mʉ̂r á dwe, bé dí ejébe ó, “Yésʉs”, Pɔ̂l nyɨɛ dí eboʼlo ó, nye dína ó ɨ́ twiʼ nyá.

²⁰Me á be ó léme ɨ́ mo ɨ́ nzamá, agʉ́a étíʼ mé á be e nkul enʉa ɨ́ lɔ̌b waá lɨ́. Sá tɨ̂ʼ ó mé á dî e Pɔ̂l, nkʉ̂ nye óbɛ̌m kpɛl étô Yerʉ́zalɛm lɨ́ esú ó, lɔ̌b wé tô lwibɔɔ gʉ̂ʼ yɨ́.

²¹Nó ó Pɔ̂l á bene yé. Nye ó, nyɨɛ, nyě tyěn wé lɔ̌b ó dóló. Nye nzě dî ó, bé bâʼlaa nye ɨ́ mbɛ̌r mímbʉʼ, mbi dí ó, Kɛ́ɛza, nye nʉ́aa ngúmǎ tíʼá ntinɨ̂ ɨ́ lɔ̌b wé yɨ́. Me á si kʉ dwe nkul ó, bé bâʼlaa nye, tó pyâl ɨ́ jɔʼ yé á be ó, mě e nkul ebɛ̌m tyen nyé kwá mé Kɛ́ɛza yɨ́.»

²²Agrípa nzě lɛ́ɛ e Fɛ́stos ó: «Mɛm mʉr tɨ̂ʼ ntémé, me lɨ́ egwɨ̂m épʉgʉ́ jóʼǒ mpʉ mʉ̂r nɨ̌ dí elwib yɨ́.» Fɛ́stos ntɔ̂ʼ lɛ́ɛ e né ó: «Go ójóʼǒ mpʉ nyé dí elwib yɨ́ ómɛ́n.»

²³Ádwií ɨ́ mɛ́n nɛ́ɛ: Agrípa, bé e Benîk, ɨ́ jɔʼ bé á nze le ojwɨ́ɨ o bísója, ti e minjwɨ́ʼ mí bʉ̂r ó nkana yɨ́, bê nzě nî ɨ́ mpáh milɔ̌b. Jɔʼ yaá ó Fɛ́stos á dwe nkul ó, bé ntâʼ e Pɔ̂l yɨ́.

²⁴Nó ó, Fɛ́stos á lɛ́ɛ e Agrípa ó: «Njwɨ́ɨ Agrípa, ndu e bʉr o bɨ́h le onɔ́ɔ́ dí wâʼ bá, bɨ̌n bɨ́ bee: oYúden bɨ́bɛ̂h, bɨ́ nze lɨ́ enzě pur nyé kwá nyǎm. Táarě Yerʉ́zalɛm, nzě pyâl wâ, bé á be lɨ́ ebɨ̂n métyêl kʉ́kʉ́, lɨ́ elɛ́ɔɔ ó, nyé ajala le ekǎ tiʼe.

²⁵Mɛm á bee yɨ́ɛ ó, nye á bé abe e mebě ó, nye ɨ́ jala le edwe. Damá jóʼo nó, ɨ́ mpʉ nyé mʉr tɨ̂ʼ á pa boo lɛ́ɛ ó, nyě tó ó, tó kǎr lɔ̌b wé kwá mé Kɛ́ɛza yɨ́, nó ó mé á nzoo tíʼe ó, mě tyěn ó nye gʉ̂ʼ yɨ́.

²⁶Abe e mpǎŋ sɔ̂ʼ mé dí e nkul ecɛma njwɨ́ɨ gá wɨ́ná ɨ́ lɔ̌b wé. Sá tɨ̂ʼ ó mê nzé e né kâʼ ɨ́ mpǒm nyɨ́n yɨ́. Me kʉ bu nzé e né wâʼ ó, ɨ́ mpǒm nyǒ, gua njwɨ́ɨ Agrípa, ebě, ɨ́ jɔʼ mɨ́ná bé ósîl épahlě lɔ̌b wé yɨ́, me nkʉ̂ gʉ́ǎ sá écɛma.

²⁷Ebě, yé ajala ó, me lómlaa nye gúú mbʉʼ, apǎ lɛ̂ʼlě sá túʼ bé dí enwâhle wé e tɨ̂ʼ yɨ́.»