Read Koonzime Milʉ́mlʉ́ 26 Bible Online

Milʉ́mlʉ́ 26 - Koonzime bible

Milʉ́mlʉ́ 26

¹Nó ó, Agrípa á lɛ́ɛ e Pɔ̂l ó: «Go mû ó e nkul ekǎ kar ɨ́ jɔ̌ʼ nɨ̌.» Nó ó, Pɔ̂l á syɛ̂m mbô, nzě nyɛl nkâr nyé, e mekǎn mbi wɨ̂:

²«Njwɨ́ɨ Agrípa, me lɨ́ ebee ó, mě e metyɛʼ me mpóm, ebě, me ókǎr lɔ̌b wâm ɨ́ mpǒm nyǒ ɨ́ móhó wɨ̂ʼ mûh, ɨ́ lɔ̌b sá yɨ́yɛ̂h óYúden dí epur mé e tɨ̂ʼ yɨ́.

³Mě kʉ́ soho ó, ebě, go lɨ́ egʉ́a métum mé óYúden mɨ́mɛ̂h. Go ntémé, go lɨ́ ekʉ́ gʉ́ǎ mpʉ bé dí epɨpére mékǎn ɨ́ myúú mílɔ̌b myɔ́ɔ́ yɨ́. Nó ó, me lɨ́ ejɨʼla e go ó, go jôʼlaa me e bíhwó ɨ́ buo buo.

⁴«OYúden bɨ́bɛ̂h, bé lɨ́ egʉ́ǎ mpʉ̌ twiʼ yâm, yé á bɨbe, táare lɨ́ osohó wâm, nzě kumo mûh yɨ́. Bé lɨ́ egʉ́a ntémé mpʉ mé á bwaʼ ɨ́ gúmó kúl bʉ̂r yâm, yé á be yɨ́, ti e Yerʉ́zalɛm.

⁵Bé lɨ́ eboó gʉ́a mé mbɨ̂mbɨá. Bé kpɛ̂l nɛ́ɛ: bé e nkul eboʼlo ó, me á si tiʼe mpʉ óFarizyɛ̂n dí etiʼe yɨ́. Nkɔ̌m nyaá ó dí edû búʼó gá yɨ́ná ɨ́ dwííí.

⁶Mě ɨ́ báánâʼ ó, lɨ́ etyɛ̂b ɨ́ nkar, ebě, lémé wâm, wɨ́ lóno ɨ́ mpûʼla ó, Nzyɛ̌m ólóŋlo nkɛ́ʼ nyé á kɛʼ bimpám gá bíná nyɨ́.

⁷Menzweh kám e mebá mé kúl gá yɨ́ná, mé lɨ́ egwɨ̂m ébeě mpʉ̌ Nzyɛ̌m ngá lóŋlo nkɛ́ʼ nyaá yɨ́. Bé séá Nzyɛ̌m syɛ́ɛ́ ó, móhó e pum. Njwɨ́ɨbʉr ɛ̌! OYúden, bé jaá pur mé ó, njɨ ɨ́ lɔ̌b mpûʼla dí me ɨ́ léme nyɨ́.

⁸Bɨ̌n pʉgʉ́ di, abûʼla ó, Nzyɛ̌m óbánǎ pɛh ódwe ɨ́ yé ɛ́?

⁹«Nó ó, me ntémé, me á kʉ bûʼla ó, yé á jala ó, me sâʼ sá yɨ́yɛ̂h lɨ́ esú ó, me lwímlaa e díé mé Yésʉs, mʉr Nazarɛ̂t.

¹⁰Yé ó sá mé á sâ ɨ́ Yerʉ́zalɛm yɨ́. Me á si nʉa nkul, duho lɨ́ ojwɨ́ɨ o mpáh Nzyɛ̌m, ó me gbâʼ obûʼla ɨ́ buo buo ɨ́ mbʉʼ. Jɔʼ bé á jʉjʉ̂ bé yɨ́, me á si gbâ ntûm tɨ̂.

¹¹Jɔʼ yɨ́yɛ̂h, me á si tíble bé ɨ́ mempáh mínjɨʼla mɨ́mɛ̂h. Me á tíne bé ó, bé sâʼ búʼó yɔ́ɔ́ nkěh. Ebúʼ mé á kpaa ɨ́ lɔ̌b wɔ́ɔ́ lɨ́, lé á sâ ó, me tíblaa bê, tó pyâl ɨ́ binkana mésí méswîh.»

¹²«Ɨ́ mbi wɨ̂ʼ ó mé á tô Damâs: me á be ó e nkul ɨ́ buo buo, le jwɨ́ɨ duho kwá ojwɨ́ɨ o mpáh Nzyɛ̌m.

¹³Nó ó, Dâ ɛ̌, ɨ́ mpʉ mé á to le etye nzɨ́ e nzɨ̌ yɨ́, á dwií, yé mû témé móhó nɛ́ɛ: mě kǎ bee ó mimbah, mimbah myaá lɨ́ eduho ɨ́ njʉl wé á be ɨ́ jʉ́o kʉ́ wɨ́. Myé á be ɨ́ buú pan, laa dʉ́o. Myé á kʉn myɛ́n ó, táare ɨ́ gúmó mé á be yɨ́, tó kumo ɨ́ gúmó bʉ̂r o bɨ́h le onɔ́ɔ́ bé á titye sɔ́má gwár bá, bé á be yɨ́.

¹⁴Bʉr bɨ́bɛ̂h, bê nzě duma sí. Nó ó mé á nze jóʼo twíí lɨ́ elwib e me ɨ́ lwǐb ébrœ̂ ó: “Saʉ̂l, Saʉ̂l, go bá pʉgʉ́ tíble mé mpʉ́nʉ̌ ɨ́ yé? Go lɨ́ esâ gó mʉr tɨ̂ʼ ebébe lɨ́ elelě lʉ̂, ɨ́ mpʉ̌ ntœœ dí ekáŋa e mʉr dí epála yé nyá yɨ́, yɨ́ɛ sí gʉ́a ó, yé ɨ́ tirwó ó, ɨ́ dʉ́ é ntɔ́ŋ é mʉ̂r waá.”

¹⁵Me ntɔ̂ʼ dî ó: “Dâ ɛ̌, gua, go nzé ɛ́?” Nó ó nyé á lɛ́ɛ e bɨ̌h ó: “Mɛm, me ó Yésʉs, mʉr gó dí etíble nyá.

¹⁶Nó ó, gbɔlwaa sí. Go e tyɛ́b tîtyěl. Me lɛ́ʼlé gó me mʉr tɨ̂ʼ ó, go díʼee syɛ̂l mesâ wǎm; go óbe ntémé ó, mboʼlo wǎm, lɨ́ elɛ́ɛ bʉ́ʉ́ bʉ̂r mpʉ gô bee mé múh yɨ́, le elɛ́ɛ bé sá mé ngá báʼǎ lɛ̂ʼle gó yɨ́.

¹⁷Me ókamle e go témé oYúden, le témé byúú bíkûl, gúmó yɨ́yɛ̂h mé ngá tyen gó yɨ́.

¹⁸Mě lómó gó ó, go tô bɛ́ɛ bʉ̂r mîh. Go dwíhɨɨ bé lɨ́ edúrʉ́ʉ́, tyen bé ɨ́ myɛ́n; dwih bé ɨ́ jwɨ́ɨ́ mé Sátan, tyen bé kwá mé Nzyɛ̌m. Bé ódyɛ̂ʼwo e me nó, me ópɛʼ bíbaa bí ébébe mé á niʼe bé bí, ntɔ̂ʼ dwe bé diá ɨ́ sɔ́má bʉ̂r bâm dí mipubá bá.”»

¹⁹«Nó ó, njwɨ́ɨ Agrípa, me á bé apyêh mbeá ésimá wé á duho ɨ́ jʉ́o kʉ́ wɨ́.

²⁰Me á jaa nyɛl ó, njɨ túnó Mbɨambɨa Lɔ́ɔ, táare e bʉr ó Damâs, kala e baá ó Yerʉ́zalɛm, ti e baá bɨ́bɛ̂h dí ɨ́ sí Yʉ́da bá, dumlo e bʉr o bíkúl bíswîh. Me á lɛ́ɛ e bé ó, bé túmaa mikoo e misyóm myɔ́ɔ́, le edwira míléme. Bé e dyɛ́ʼwó e Nzyɛ̌m, le esâ bísyɛ́ɛla bi dí elɛ̂ʼle ó, bé mû ó otîtyěl o bʉ̂r, le miléme mindwirá bí.

²¹Ɨ́ lɔ̌b waá ó óYúden bé á mɛ̂r me, mɛm ɨ́ mpáh Nzyɛ̌m tʉ́ŋlʉ̌, nzě sáa ó, bé jʉ́ ó me yɨ́.

²²Sâ gwár, Nzyɛ̌m á si kamle e me, nzě pyâl ɨ́ móhó wɨ̂ʼ mûh. Me dína ó wâ, lɨ́ eboʼlǒ lɔ̌b waá kwá bʉr bɨ́bɛ̂h, táare e bwá ó ntwǒm, kala le otɔ́má bʉ̂r. Mé alɛ́ɛ yʉ́ʉ́ sá swîh, njɨ yaá ógwíha o mílɔ̌b ndu e Moyɨ̂z bé á boo lɛ́ɛ ó, yé ópyâl yɨ́.

²³Nó ó, yé á be ó, Mʉ̌r Nzyɛ̌m á lœm múló mé jwɨ́ɨ nyá, ónyɛɛ́ sia e mitúú. Nye ó ngá be ndwê esôʼ ngá nyɛɛ́ pah nyá. Píe tɨ̂, nyé okǎ túno kwá kúl gá yɨ́ná, bé e bikúl bíswîh ó, bé tyêʼ ɨ́ myɛ́n.»

²⁴Nó mpʉ̌ Pɔ̂l á be, nye dína lɨ́ ekǎr lɔ̌b wé yɨ́, Fɛ́stos nzě lɛ́ɛ e né ó: «Pɔ̂l, go mû ó gʉ̌. Go á si bu jɨ̂ʼ mekaná. Sâ yaá ntɔ̂ʼ kǎ liŋ gó gʉ̌.»

²⁵Nó ó, Pɔ̂l á yala e né ó: «Dâ ɛ̌, mé abě gʉ̌. Mekǎn mé dí elɛ́ɛ má, mé ó tyeetye; mé ó tîtyěl.

²⁶Njwɨ́ɨ̌ Agrípa á si lɛ́ɔɔ bísá bî. Nó mě e nkul elwib ɨ́ hwɨ́m ɨ́ míh mé. Mě bûʼlá ó, nye lɨ́ egʉ́ǎ syɛ́ɛla yaá yɨ́yɛ̂h, ebě, bisyɛ́ɛla bi tɨ̂, byé á bé asyɛ́ɛ ɨ́ mesǒ.

²⁷Nó ó, njwɨ́ɨ̌ Agrípa, nzê go lɨ́ ebúʼlǎ sá ógwíha o mílɔ̌b dí elɛ́ɛ yɨ́ ɛ́? Mɨ́ gʉ́a ó, go lɨ́ ebúʼla nó.»

²⁸Agrípa ntɔ̂ʼ lɛ́ɛ e Pɔ̂l ó: «Yé ó kúnókúno ó, go dwírɨɨ me krǐsten.»

²⁹Pɔ̂l, nye ó: «Damá jóʼo ɨ́ báánâ, nkʉ̂ ɨ́ melû me dí enze má, mě jɨʼlá e Nzyɛ̌m ó, abe lɨ́ esú lô, go omér. Mě jɨʼla ntémé ó, lɨ́ esú lɨ́n, bʉr bɨ́bɛ̂h dí ejôʼlo mé múh bá ó, bɨ̌n díʼee mpʉ mé dí yɨ̂. Sâ gwár, abe yɨ́ɛ mikɛ́ʼá ménkara mpʉ mé dí e mé yɨ̂.»

³⁰Njwɨ́ɨ, ngóvina, Benîk, ndu e baá bɨ́bɛ̂h, bé le onɔ́ɔ́ bé á be tɨ̂ʼ bá, bê nzě mɔa sí,

³¹nzě gwɨ̂hla, tyɛ̂b ɨ́ bʉm. Bé bʉr o tɨ̂ʼ nzě lɛ́ɛla páʼ nyɔ́ɔ́ ó: «Mʉr nyâ, nye á bé asâ syɛ́ɛla ébébe gwár dí ɨ́ jala ó, nye dwêʼ tɨ̂ʼ yɨ́, nkʉ̂ yaá dí ó, nye tôʼ ɨ́ mbʉʼ tɨ̂ʼ yɨ́.»

³²Agrípa nzě lɛ́ɛ e Fɛ́stos ó: «Yé bé mʉr nyâʼ á bé atô e lɔ̌b wé kwá mé Kɛ́ɛza nó, mpa nye múo sí bírɔɔ.»