Read Koonzime Milʉ́mlʉ́ 3 Bible Online

Milʉ́mlʉ́ 3 - Koonzime bible

Milʉ́mlʉ́ 3

¹Ɨ́ yʉ́ʉ́ bíí kʉ̌ʼ ɨ́ mewala melɛ̂l, Pétrus, bé e Yʉánɛs nzě tô mpáh Nzyɛ̌m, lɨ́ etó sâ mínjɨʼla.

²Mpáh Nzyɛ̌m, nye ó le ebê bé jɨ́jébé “Jaá Ébê” lɨ́. Ɨ́ nkpâh ebê laá, yé á be ó e nyʉ́ʉ́ nzwóó mebyɛ́l á be e mekʉ̌ miswámá nyá. Ɨ́ móhó wɨ́wɛ̂h, bé á be lɨ́ enkɨnkɛ́ɛ nyê, lɨ́ enzě didyêʼ nyé tɨ̂ʼ ɨ́ nkpâh ebê laá ó, nye bónaa bʉr o b'á tʉtô mpáh Nzyɛ̌m bá, lɨ́ esú lé éjɨjaʼ bé bisâ.

³Nó ó mbeá nyé á bee Pétrus, bé e Yʉánɛs lɨ́ edǐ nî tɨ̂ʼ yɨ́, nye nzě dî e bé ó, bé dwêʼ nye mɔnɨ́.

⁴Pétrus, bé e Yʉánɛs nzě bɨʼɔɔ nyé mejwôʼlʉ. Pétrus, nye e né ó: «Jwɛ́ʼɛ́ɛ́ bɨ́h!»

⁵Mʉ̌r nɨ̌ ntɔ̂ʼ dwɛ̂ʼ bé ɨ́ tooobó, lɨ́ ebónǒ nkʉ̂ bé óbɛ̌m dwe nyé yʉ́ʉ́ sɔ̂ʼ.

⁶Pétrus nzě lɛ́ɛ e né ó: «Mé abe yɨ́ɛ e minzaŋ mí nkóhó mɔnɨ́, nkʉ̂ myaá mí gʉ̂l. Nó sá mɛ̂m dí e yé yɨ́, yé ó mé dwé gô: ɨ́ díé mé Yésʉs-Krîst, mʉr Nazarɛ̂t, bʉŋláa!»

⁷Nye nzě mɛ̂r nyé ɨ́ mbó éjʉ̂m, gbɛl nyé sí. Tyé e tyé yaá, mekʉ̌ ndu e metuʼrʉ mé, mé ntɔ̂ʼ sâ mbɨ̂mbɨá.

⁸Mʉr waá ntɔ̂ʼ gbɔlwa sí ɨ́ nkwɨ́ɨlɨ́, tyɛ̂b tîtyěl, nzě táare étye. Bé e bʉr o mílʉ́mlʉ́, bê nzě nî mpáh Nzyɛ̌m. Nye á be ó lɨ́ etye, le elyâh, le egúmlǒ Nzyɛ̌m.

⁹Nó mpʉ bʉ̂r bɨ́bɛ̂h bé á bee nye lɨ́ etye le egúmlǒ Nzyɛ̌m yɨ́,

¹⁰bê nzě dweʼe nyê, gʉ́a ntémé ó, yé á kʉ be ó mʉr á didi ɨ́ Jaá Ébê é mpáh Nzyɛ̌m lɨ́ ejɨjaʼ bísâ nyá. Bʉ́á ntɔ̂ʼ mɛ̂r bɨ́bɛ̂h ɨ́ miléme. Bê nzě kâm sâ yaá.

¹¹Mpʉ mʉ̂r nɨ̌ á mɛ̂r Pétrus, bé e Yʉánɛs e mebô yɨ́, bʉr bɨ́bɛ̂h nzě tóŋɔɔ míkám nko bé á be yɨ́, jéhɔɔ̌ lɔ̌b waá minum mimběʼ. Bé á be ó, ɨ́ gwal mé Salomɔ̂ŋ dí dóló mpáh Nzyɛ̌m yɨ́.

¹²Pétrus nzě bee, nye ntɔ̂ʼ dî e bé ó: «Bʉr o b'Ɨ́zraɛ̂l, bɨ̌n pʉgʉ́ twɨrǎ mpʉ mʉ̂r nyâʼ ka tiʼɔɔ yɨ́, ɨ́ yé? Bɨ̌n dwídwɛ́ʼ bɨ́h mpʉ̌ sá lɛ́ɛ́, nyě tyé ó ɨ́ lɔ̌b nkûl nyɨ́h, nkʉ̂ ɨ́ lɔ̌b ótîtyěl wɨ́h ɨ́ yé?

¹³Nye tiʼe nó ó, ebě, Nzyɛ̌m mé Abraham, Isaac, ndu e Yákɔb, Nzyɛ̌m bimpám gá bíná, á kpɛl ó, nye dwêʼ syɛ̂l mesâ wé, Yésʉs kûm. Bɨ̌n bɨɛ bé á si bɛ́ma nye kwá mé Pilátos, ntɛŋɔɔ nyé ɨ́ mebó mé ó, nye jʉ́ʼoo nye. Bɨ̌n bé á sâ nye nó ó, Pilátos nyɨɛ, nyé osí tíʼe ɨ́ lémé wé ó, nyě bír ó nye.

¹⁴Bɨ̌n bé á bɛ́ma ó, mʉr á be ti, nye ntémé waá dí tîtyěl ɨ́ míh mé Nzyɛ̌m nyá. Bɨ̌n nzě dî e Pilátos ó, nye bírɨɨ bɨ̌n mʉr swîh, mʉr á be njʉ̂l bʉr nyá.

¹⁵Bɨ̌n bé á si bana jʉ̂ Etín é Twiʼ. Damá jóʼǒ mpʉ yé á syɛ́ɛlɨ nó yɨ́, Nzyɛ̌m nyɨɛ, nyɨ́ bánǎ pɛh nyê, dwih nyé lɨ́ odwe. Bɨ̌h ó dí oboʼlo ó lɔ̌b waá.

¹⁶Mʉr nyâ, waá bɨ́n dí ebee le eboó gʉ́a nyâ, nye bé ɨ́ dyɛ̂ʼwo e Yésʉs. Díé mé Yésʉs waá, bé e búʼó Yésʉs dí entɨh bʉ̂r yɨ́, byé ô sá ó, nye díʼee kwahaá mbɨ̂mbɨá mpʉ bɨ́n bɨ́bɛ̂h dí ebee nyé náǎ nɨ̌.

¹⁷«Bɨ́ɔɔ́ bâm! Okɛ́l bâm! Me lɨ́ egʉ́a ó, táare e bɨ̌n, kumo le ojwɨ́ɨ bɨ́n, bɨ̌n bé á gʉʼla ó, gʉʼláa ɨ́ lɔ̌b mé Yésʉs.

¹⁸Tó kœb ó, Nzyɛ̌m á lóŋlo ekǎn nyé á lɛ́ɛ ɨ́ minum mí ógwíha o mílɔ̌b bɨ́bɛ̂h lɨ́ ó, cɨɨ e nzɨ̌ syɛ́ɛla yɨ́n yaá. Nye á lɛ́ɛ ó, yé jɨ ó, mʉr nyé á lœm múló mé jwɨ́ɨ nyá nkɛ́yɨɨ mitúú mpʉ́nʉ̌.

¹⁹Nó túmáá gá mikoo e misyóm mín. Bɨ̌n a dwírá míléme, Nzyɛ̌m nkʉ̂ pɛʼ bíbaa bí ébébe nyé á niʼe bɨ̌n bí!

²⁰Jɔʼ yaá ó Dâ Nzyɛ̌m ngá kǎ dwe bɨ́n epʉ́la ó, bɨ̌n e né díʼee ɨ́ mepyɛbla yɨ́. Nyé ontɨh bɨ́n Krîst: Mʉr nyé á lœm múló mé jwɨ́ɨ, waá nyé á boo pɛ̂h ɨ́ lɔ̌b wɨ́n nyá. Nó yé ó Yésʉs.

²¹Báánâ, nye ɨ́ jala le edi ɨ́ jʉ́o kʉ́, ɨ́ di di di, tó pyâl ɨ́ jɔ̌ʼ Nzyɛ̌m óbáʼǎ tyêl bísá bíbyɛ̂h ɨ́ bityé byɔ́ɔ́ mpʉ nyé á boo kɛʼ, duho myâ yɨ́. Nye á kɛʼ nó ó, cɨɨ e nzɨ̌ ogwíha o mílɔ̌b bé, baá dí egúmo e né bá.

²²Moyɨ̂z á lɛ́ɛ ó: “Dâ, dí Nzyɛ̌m wɨ́n nyá, ólómlo bɨ́n ngwíha milɔ̌b mpʉ mé dí yɨ̂. Nye óbe ó mʉr kúl yɨ́n. Sá yɨ́yɛ̂h nyé ngá lɛ́ɛ bɨ́n yɨ́, bɨ̌n e sá yê!

²³Mʉr nyɨnyɛ̂h óbe, asâ ngwíha milɔ̌b waá mejóʼo nyá, ópɛʼɔɔ ɨ́ kúl gá yɨ́ná, jʉ́ŋɔɔ.”

²⁴«Táare ɨ́ jɔʼ mé Samuel, pyâl lɨ́ ogwíha o mílɔ̌b bɨ́bɛ̂h, bím bé á lwib yɨ́, bé á lwilwib ó, dumo e bisâ bi dí esyɛ́ɛ ɨ́ melú mâʼ bí.

²⁵Bɨ̌n le onɔ́ɔ́ ó dí e nkɔb ɨ́ saá Nzyɛ̌m á tyêl páʼ bé e bimpám bíná nyɨ́. Nye á lɛ́ɛ le Abraham ó: Bím mímbɛ̌r mi bʉ̂r mi dí ɨ́ sí yɨ̂ʼ mímyɛ̂h mí, me ósʉ myé metyɛʼ me mpóm ó, ɨ́ nzɨ̌ nta gǒ.

²⁶Nó ɨ́ jɔ̌ʼ Nzyɛ̌m á ka lómo syɛ̂l mesâ wé yɨ́, nye á nyɛɛ tyen nye ó, kwá nyɨ́n, ó nye sʉ́ʼoo bɨ̌n métyɛʼ me mpóm, le edwih mʉ̂r sɔ́má yɨ́n nyɨnyɛ̂h ɨ́ bɨ́blǎ syɛ́ɛla yɨ́yɛ̂h nyé dí esâ yɨ́.»