Read Koonzime Milʉ́mlʉ́ 4 Bible Online

Milʉ́mlʉ́ 4 - Koonzime bible

Milʉ́mlʉ́ 4

¹Pétrus, bé e Yʉánɛs dína lɨ́ elwib nó nɛ́ɛ: opara, le njwɨ́ɨ odwéela ó mpáh Nzyɛ̌m, le oSadwisyɛ̂n nzě pyálɔɔ ɨ́ sulûm.

²Bé á be ó, bé mû miléme ɨ́ díʼa díʼa, ebě, Pétrus, bé e Yʉánɛs, bé á be lɨ́ elɛ̂ʼle bʉ̂r le etúno ó, Nzyɛ̌m ópɛh ódwe ó, ɨ́ nzɨ̌ mé Yésʉs.

³Nó bé á nze mɛ̂r bê, gbáŋɔɔ bé ɨ́ mbʉʼ, bónɔɔ̌ mɛ́n, ebě, yé á be ó, yé mû medwíne mé pum.

⁴Sâ gwár, bʉr ɨ́ buo buo o b'á jóʼo milɔ̌b myaá bá, bé á be ó sí bûʼla. Tâŋ bʉrʉ̂m o b'á dwira miléme bá, nye á si pyâl kúnókúno e bʉr otɔ́ɔ́sin otɛ̂n.

⁵Ɨ́ mɛ́n tɨ̂, ojwɨ́ɨ, le otɔ́má bʉ̂r, le olɛ̂ʼla o métié nzě swâl Yerʉ́zalɛm.

⁶Yé á be ntémé ó, le Ánas, á be njwɨ́ɨ opara nyá. Tɨ̂ʼ ntémé, yé á be ó, le Kayɨáfa, le Yʉánɛs, le Alexandre ti e bʉ́ʉ́ bʉ́rʉ̂m bé á byɛ̂l ɨ́ mpóʼo mé Ánas bá.

⁷Nó bé á nze tyêl Pétrus ndu e Yʉánɛs ɨ́ mpǒm nyɔ́ɔ́, díŋɔɔ e bé ó: «Bɨ̌n bé á pʉgʉ tiʼ nye nó, e nkul me nzé ɛ́? Yé bé bɨ̌n bé á si twóolo díé é nyʉ́ʉ́ mʉ̂r nó, yé á be laá mé nzé?»

⁸Nó, Pétrus, lwɨ́ŋlá e Sísǐm mé Nzyɛ̌m, á lɛ́ɛ e bé ó: «Minjwɨ́ɨbʉr le otɔ́má bʉ̂r!

⁹Bɨ́n ódî bɨ́h múh ó: “Yé bɨ́n á sâ syɛ́ɛla mpâm kwá nzwoó nyâʼ?” nó, le ntémé ɨ́ lɔ̌b nzɨ́ bɨ́h á tiʼ nye e tɨ̂ʼ nyɨ́ nó,

¹⁰bɨ̌n óbɛ̂h le bʉr o b'Ɨ́zraɛ̂l bɨ́bɛ̂h, gʉ́ŋáá gá bé ó, mʉr bɨ́n mû lɨ́ ebee lɨ́ etyɛ̂b tîtyěl nyâ, nye mû mbɨ̂mbɨá ó ɨ́ lɔ̌b nkûl díé mé Yésʉs-Krîst, mʉr Nazarɛ̂t. Yésʉs waá ó bɨ́n á jʉ̂ lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ nyá. Tó kœb ó, Nzyɛ̌m á si pɛh nye lɨ́ odwe.

¹¹Yésʉs waá ó dí mʉr Mékaná mé Nzyɛ̌m dí elwib ɨ́ lɔ̌b wé nyá. Yê cɛmá ɨ́ Mekaná mé Nzyɛ̌m ó: “Ekóʼ bɨ́n, oswim, bé á pyêh lɨ́, lé ó mû ekóʼ e dí esúʼo médwii me sɔ́ŋ lɨ́.”

¹²Bʉr o dí ebǐ twiʼ bá, bé jaá bi yé ó kwá nyé. Ebě, yé abe e lʉ́ʉ́ díe eswîh Nzyɛ̌m á lɛ̂ʼle mɨná gá ó, lé e nkul ebáʼǎ dwe bʉ̂r twiʼ lɨ́.»

¹³Bʉr ó bʉm ntɔ̂ʼ kâm lɨ́ ebeě mpʉ̌ Pétrus, bé e Yʉánɛs, bé á lwib ɨ́ kpɛŋlɛm, abáawǒ sɔ̂ʼ yɨ́. Bé á be lɨ́ ekâm ntémé mpʉ bé á lwilwib lɨ́ otîtyěl, bɨ́ɛ yɨ́ɛ abe bʉ̂r o b'á sâ sʉkʉ́lʉ bá yɨ́. Bê nzě kǎ dweʼe ó, bé á kʉ be ó, bʉr ó sɔ́má mé Yésʉs.

¹⁴Bé á be lɨ́ ebee ntémé mʉr á pa tiʼɔɔ nyá náǎ tîtyěl, bǎʼ e bê. Bé ntɔ̂ʼ di ɨ́ jolaaa, abe e sá bé yálaa.

¹⁵Bé ntɔ̂ʼ pyêl bé kʉ̌l ɨ́ bʉ̌m nɨ́nɨ́ɨ́. Bé ntɔ̂ʼ sáa pɨ̂ʼ.

¹⁶Bé á lɛ́ɛla páʼ nyɔ́ɔ́ ó: «Mɨná sâʼ gá bʉr bâʼ nyá? Ebě, bʉr ó Yerʉ́zalɛm bɨ́bɛ̂h, bɨ́ gʉ́a ɨ́ pébébé ó, bɨ́ lɛ̂ʼle nkûl nyɔ́ɔ́ le ánɨ̂nɨ̂n esimá lɨ̂. Mɨná bé abe e nkul ekǎ sóŋlo gá lê.

¹⁷Yé damá bé nó, lɨ́ esú ó, lɔ́ɔ́ syɛ́ɛla yɨ̂, wé ayɨ́ myaŋla ɨ́ páʼ bʉ̂r bɨ́bɛ̂h, mɨná bɛ́ŋɨɨ gá bé ó, bé sá akǎ báʼǎ lwib e mʉr swîh ɨ́ díé mé Yésʉs.»

¹⁸Bê nzě báʼǎ jébe bê, nzě lɛ́ɔɔ e bé ó, bé gwáʼaa elwib le edwe bʉ̂r gúú lɛ́ʼlá swîh ɨ́ díé mé Yésʉs.

¹⁹Pétrus, bé e Yʉánɛs bɨ́ɛ nzě yala e bé ó: «Bɨ̌n bʉr o tɨ̂, tíʼáá gá lɔ̌b wɨ̂: nkʉ̂ yé ɨ́ mbɨa ɨ́ míh mé Nzyɛ̌m ó, bɨ̌h jáa jóʼo bɨ́n, asâ nyɨ́ɛ mejóʼo.

²⁰Yé abe e sá dí e nkul ebá sâ ó, bɨ̌h káraa elɛ́ɛ̌ sá bɨ́h á bee le ejóʼo yɨ́.»

²¹Bʉr ó bʉm ntɔ̂ʼ báʼǎ bɛ̂ŋ bê. Bé ntɔ̂ʼ bírɔɔ bê. Bé á bé abee nzɨ́ edwe bé bintɨ́ʼá, ebě, bʉr bɨ́bɛ̂h, bé á be ó lɨ́ egúmlǒ Nzyɛ̌m ɨ́ lɔ̌b syɛ́ɛla bé á pa sâ yɨ́.

²²Ebě, mʉr á tiʼe e nzɨ̌ esimá laá nyá, á be ó e mimbû mekám ménâ le mpubuʼó.

²³Jɔ̌ʼ Pétrus, bé e Yʉánɛs, bé á bírɔɔ yɨ́, bê nzě tô nkǒ bɨ́ɔɔ́ bɔ́ɔ́, bé á be yɨ́. Bé ntɔ̂ʼ lɛ́ɛ bé sá yɨ́yɛ̂h ójwɨ́ɨ ó mpáh Nzyɛ̌m, le otɔ́má bʉ̂r, bé á sâ bé yɨ́.

²⁴Jɔʼ bé á jóʼo lɔ́ɔ waá yɨ́, obûʼla ntɔ̂ʼ táare éjɨʼla e Nzyɛ̌m. Bé ó: «Dâ ɛ̌, go ó b'á kuho kʉ́ e sí, ndu e l'ekomlo mâŋ ti e bisá bíbyɛ̂h bi dí tɨ̂ʼ bí.

²⁵Go á lwib e nzɨ̌ Sísǐm gô, lwib ntémé e nzɨ̌ me sɔ́ŋ mpám wɨ́h David, syɛ̂l mesâ gǒ ó: “Bikûl, byé kpaa mébúʼ ɨ́ yé? Bikûl, byé kúhló mépɨʼ me dí abe e nyɔm má ɨ́ yé?

²⁶Ojwɨ́ɨ́ ó sí, bé á si tyɛ̂b ɨ́ tyé dɔ̂m. Minjwɨ́ɨbʉr, myé á sáa pɨʼ ó, bé lwímlaa e Dâ Nzyɛ̌m, bé e Mʉr nyé á lœm múló mé jwɨ́ɨ nyá.”

²⁷Mpʉ yaá ntémé ó yé á ka sûʼla yɨ́, ebě, yê tyeetye ó, Erôd bé e Pɔ́ŋtus Pilátos, bé á si syɛŋa ɨ́ nkana yɨ̂, bé e bʉr o bíkûl ti e baá ó bé Ɨ́zraɛ̂l. Bɨ́bɛ̂h, bé á si di bʉm, sáŋɔɔ pɨ̂ʼ ó, bé lwímlá ó e syɛ̂l mesâ gǒ, Yésʉs, mʉr dí ti, waá gó á lœm múló mé jwɨ́ɨ nyá.

²⁸Nkúná syɛ́ɛla bé á sâ yɨ́, yé ó b'á lóŋlo ekǎn gó á boo lɛ́ɛ ɨ́ nkul nyǒ le gwɨ́má yô lɨ́.

²⁹Nó ó, Dâ ɛ̌, ɨ́ báánâ, jóʼáá mpʉ bé mû kǎ bɛ̂ŋ bɨ́h yɨ́. Dibɨɨ ósyɛ̂l o mésá bô nzɨ̌ ó, bé lɛ́yɨɨ lɔ́ɔ́ gô ɨ́ kpɛŋlɛm, abáawǒ sɔ̂ʼ.

³⁰Syɛ́mɨ́ɨ́ mbó gô, go e lɛ́ʼlé nkûl nyǒ. Go e tíʼ mímbêl ɨ́ díé é syɛ̂l mesâ gǒ Yésʉs, mʉr dí ti nyá. Sɨ́sáʼ ntémé mesimá ti e bisá bí ékâm ɨ́ díé lé.»

³¹Le bé á sil ejɨʼla e Nzyɛ̌m, le ntɔ̂ʼ gúmó bé á syɛŋa yɨ́, yé á kubla. Sísǐm mé Nzyɛ̌m nzě lóno bɨ́bɛ̂h ɨ́ miléme, bé ntɔ̂ʼ táare élɛ́ɛ̌ lɔ́ɔ́ mé Nzyɛ̌m ɨ́ kpɛŋlɛm, abáawo bá yʉ́ʉ́ sɔ̂ʼ.

³²Ɨ́ sɔ́má óbûʼla bɨ́bɛ̂h, bé á be ó lémé ngwár ti e sísǐm ngwár. Abe e mʉr ngwár ɨ́ sɔ́má yɔ́ɔ́ á be e nkul elɛ́ɛ ó, byé bísâ, byé á jaa gúmo ó, njɨ e nye mʉr tɨ̂. Páʼ nyɔ́ɔ́, sá yɨ́yɛ̂h, yé á bɨbe ó sadága.

³³Bʉr o mílʉ́mlʉ́ mé Yésʉs, bé á bʉboʼlo pahá sóo mé Tî Yésʉs ó e nkul nyɨnyɛ̂h. Nó ntémé ó Nzyɛ̌m á sʉ bé metyɛʼ me mpóm ɨ́ ntʉʉʉ́ yɨ́.

³⁴Sɔ̂ʼ, yé á bé abe mʉ̂r ngwár ɨ́ sɔ́ɔlʉ, ebě, bʉr o b'á bɨbe e bipemé ndu e mimbɛ̌r bá, bé á sɨsâ ó, bɛ́mɔɔ byê, nzeŋɔɔ e mɔnɨ́ yé á duho tɨ̂ʼ yɨ́,

³⁵nzě tímlɔɔ bʉ̂r o mílʉ́mlʉ́ mé Yésʉs yǎ. Nó bé á nʉnʉa mɔnɨ́ yaá, bê nzě kab mʉ̂r nyɨnyɛ̂h dû, mpʉ̌ gwɨ́má mʉ̂r á be yɨ́.

³⁶Yé á be ó e nyʉ́ʉ́ mpʉ́n á be e díe ó, Yóseb nyá, mʉr onzweh mé Levî, waá á byɛ̂l ɨ́ tíhé Swiprʉ̂s nyá. Bʉr o mílʉ́mlʉ́, bé á ka jwɨr nye lʉ́ʉ́ díe ó, Banabâs. (Nó yé páʼlɔ́ɔ́ ó: “Póblobʉr”.)

³⁷Nye á si bɛ́ma pemé yé á gúmo e né yɨ́, ntɔ̂ʼ nze e mɔnɨ́ tɨ̂, nzě tímle bʉ̂r o mílʉ́mlʉ́ yǎ.