Read Koonzime Milʉ́mlʉ́ 6 Bible Online

Milʉ́mlʉ́ 6 - Koonzime bible

Milʉ́mlʉ́ 6

¹Ɨ́ melû maá mpʉ ómpʉ́n mé Yésʉs, bé á be, bé mû sí buú buo yɨ́, oYúden bé á lwilwib grɛ̂k bá, bê nzě gɔ́na le esâ mésɨ́n e baá o b'á lwilwib ébrœ̂ bá. Bé á lɨlɛ́ɛ ó, bɨ́haá, bé á jaa tʉtoŋlo ó, njɨ mikúhó myɔ́ɔ́ ɨ́ nkɔb mede.

²Nó bʉ̂r o mílʉ́mlʉ́ kám le obá, bé á syɛŋ ompʉ́n bɨ́bɛ̂h, nzě lɛ́ɔɔ e bé ó: «Yé ajala ó, bɨ̌h díʼee alɛ́ɛ̌ lɔ́ɔ́ mé Nzyɛ̌m ɨ́ lɔ̌b syɛ́ɛ́ ékab méde.

³Nó, bɨ́ɔɔ́ ɛ́, pɛ́hɛ́ɛ́ gá bʉr nzaangbá ɨ́ sɔ́má yɨ́n, baá o mû sí gʉ́ŋɔɔ ó, bé ó lwɨ́ŋlá e Sísǐm mé Nzyɛ̌m, lwɨ́ŋlá ntémé le ocwóó bá. Bé ó bɨ́h ngá tímlě syɛ́ɛ́ yaá.

⁴Bɨ̌h bɨɛ ókǎ tirwo ó, njɨ e syɛ́ɛ́ mínjɨʼla, le yaá élɛ́ɛ mílɔ̌b mé Nzyɛ̌m.»

⁵Bʉr ó sɔ́má bɨ́bɛ̂h, bê nzě kǎm jwɨʼ yɔ́ɔ́ yaá. Bé ntɔ̂ʼ pɛ̂h Étiene, mʉr á be lwɨ́ŋlá e búʼó ti e Sísǐm mé Nzyɛ̌m nyá. Bê nzě báʼǎ pɛ̂h ntémé: Philippe, Prókɔros, Nikanôr, Tímon, Parmenâs ti e Nikolâ, mʉr Antiôs. Nye á be ɨ́ tó nî ɨ́ yébé óYúden, nye ntɔ̂ʼ kǎ bûʼlǎ Yésʉs.

⁶Sɔ́má óbûʼla ntɔ̂ʼ tyêl bé ɨ́ mpǒm bʉr o mílʉ́mlʉ́ mé Yésʉs. Bê nzě jɨʼla e Nzyɛ̌m, le ekɛl bé mebô ɨ́ milʉ̂.

⁷Lɔ́ɔ́ mé Nzyɛ̌m ntɔ̂ʼ kpâhwǎ myaŋla. Tâŋ ompʉ́n ntɔ̂ʼ kpâhwǎ buo ɨ́ Yerʉ́zalɛm. Bʉr ɨ́ sɔ́má ópara ɨ́ buo buo nzě dyéʼɔɔ̌ koo e Yésʉs, lɨ́ esáŋɔɔ̌ Nzyɛ̌m mejóʼo.

⁸Étiene á be ó mʉ̌r Nzyɛ̌m á sʉ metyɛʼ me mpóm, gbâ nyé ntémé nkul ɨ́ léme nyá. Nye á bɨbe ó lɨ́ esâ bísá bí ékâm ti e mesimá témé bʉr.

⁹Nó bʉ́ʉ́ bʉ̂r, bé á mɔa, tó sâ óntáʼdira e né. Bé á be ó bʉr o mpáh minjɨʼla dí e díe ó: “Mpáh onzyɛh o bʉ̂r”. Bâʼ bʉ̂r, bé á duho ó ɨ́ Sirénia. Bʉ́ʉ́, duhǒ Alɛksandrî, ndu e sí Silisía, le yaá Azía. Mpʉ bé á be lɨ́ esâ óntáʼdira le Étiene yɨ́,

¹⁰bê nzě bee ó, bé á bé abe e nkul ekoʼo nyê, ebě, nye á lwib ó, le ocwóó ti e nkul Sísǐm mé Nzyɛ̌m.

¹¹Nó ó, bê nzě bwâm bʉ̂r ɨ́ mesǒ. Bé e bé ó, bé lɛ́yɨɨ ó: “Bɨ̌h bé á si jóʼo nye lɨ́ esâ Nzyɛ̌m, bé e metié mé Moyɨ̂z nkěh.”

¹²Bê nzě bêhle bʉ̂r o b'Ɨ́zraɛ̂l, otɔ́má bʉ̂r le olɛ̂ʼla o métié, ó bé sâʼ ntʉ̌. Bé ntɔ̂ʼ nkɔŋa, tô nko Étiene á be yɨ́. Mɛ́rɔɔ nyê, tóŋɔɔ e né nko bʉ̂r ó bʉ̌m nɨ́nɨ́ɨ́ bé á be yɨ́.

¹³Bé ntɔ̂ʼ nze ntémé e bʉr o b'á pa búʼo nye milɔ̌b bá. Nó bʉ̂r baá bé á boʼlo ó: «Mʉr nyâ, nye lɨ́ etô dóló lɨ́ ecɨ mékǎn ɨ́ bébe bébe témé bʉr. Mekǎn mémpwár nyé lúmó mpáh Nzyɛ̌m má, mé ntémé mɛ́r ó, ti e metié mé Nzyɛ̌m!

¹⁴Bɨ̌h bé á si kʉ jóʼo nye lɨ́ ebánǎ lɛ́ɛ ó, Yésʉs, mʉr Nazarɛ̂t, nye ógbǎh gúmó yɨ̂. Nyé océne métǔm Moyɨ̂z á líʼe mɨná gá e mé má.»

¹⁵Bʉr o b'á be ɨ́ bʉ̌m nɨ́nɨ́ɨ́ yaá bá, ɨ́ jɔʼ bé á bɨʼ Étiene mejwôʼlʉ yɨ́, bɨ́bɛ̂h ká bee ó, mpǒm nyé, nye mû mpʉ mpóm éngeles.