Read Koonzime Rôm 1 Bible Online

Rôm 1 - Koonzime bible

Rôm 1

¹Yé ó mɛm Pɔ̂l, syɛ̂l mesâ mé Yésʉs-Krîst ó dí ecɛma bɨ́n mekaná mâ. Nzyɛ̌m á twâr me ó, me díʼee mʉr milʉ́mlʉ́ wé. Nye á tyêl me lɨ́ empah ó, me tôʼ le etúnǒ Mbɨambɨa Lɔ́ɔ́ wé.

²Mbɨambɨa Lɔ́ɔ waá, Nzyɛ̌m á si boo kɛʼ ɨ́ nzɨ̌ ogwíha o mílɔ̌b ó, nye óntɨh mɨ́ná gá wǎ. Nkɛ̌ʼ nyaá, nye ó cɛmá ɨ́ Mekaná mé dí ti má.

³Mbɨambɨa Lɔ́ɔ waá dumo ó e Mwân wé. Ɨ́ nkǒ páʼ ébyɛ̂l e bípúno, nye á be ó mʉr mbɛ̌r bʉ̂r mé David.

⁴Ɨ́ nkǒ páʼ sísǐm wé dí ti wɨ́, nye njwɨrá ó, «Mwân mé Nzyɛ̌m», Yésʉs-Krîst, Tî gá wɨ́ná. Nzyɛ̌m á lɛ̂ʼle mɨná gá ó, nyě e njwɨrá waá ó e nkul ɨ́ buo buo ɨ́ lɔ̌b pahá sóo wé.

⁵Nzyɛ̌m á si cwɨ́a e bɨ̌h ɨ́ nzɨ̌ mé Yésʉs-Krîst, le etyêl bɨ́h bʉr o mílʉ́mlʉ́ bé, lɨ́ esú é bíkúl bíbyɛ̂h, ó byé dyéʼee koo e né, le esâ nyé mejóʼo. Nye á sâ bɨ̌h syɛ́ɛla yaá ó, lɨ́ esú lé édwe díé é Mwân wé kûm.

⁶Bɨ̌n ntémé, bé ɨ́ tólɔ́ɔ bʉr baá, ebě, Yésʉs-Krîst á jébe bɨ̌n ó, bɨ̌n dyɛ̂ʼwaa e né.

⁷Mě cɛmá ó, bʉr bɨ́bɛ̂h o dí Rôm, baá Nzyɛ̌m á kpɛl, le etwâr ó, bé díʼee mitwárá mí bʉ̂r myé bá. Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

⁸Sá ésôʼ, me lɨ́ edwě Nzyɛ̌m nzyǒo ɨ́ díé mé Yésʉs-Krîst ɨ́ lɔ̌b wɨ́n, ebě, ɨ́ sí yɨ́yɛ̂h, bʉr bé lɨ́ ejóʼo mílɔ́ɔ́ mín mpʉ bɨ́n dí ebúʼlǎ Yésʉs-Krîst yɨ́.

⁹Ɨ́ jɔʼ yɨ́yɛ̂h, me lɨ́ ejɨʼla e né ɨ́ lɔ̌b wɨ́n. Nzyɛ̌m mʉr tɨ̂ʼ boʼlo ó, mě lɛ́ɛ́ ó otyeetye. Nye ó mé dí eboó séǎ syɛ́ɛ́ yé e tiŋé ɨ́ lémé wâm nyá. Mě séá yé ó e nzɨ̌ etúnǒ Mbɨambɨa Lɔ́ɔ dí edumo e Mwân wé wɨ́.

¹⁰Mě jɨʼlá e né ɨ́ jɔʼ yɨ́yɛ̂h ó, nye sʉ́ʼoo me metyɛʼ me mpóm mé, ó me kœ́bɨɨ jɔʼ énzě bee bɨ́n, ɨ́ mitíʼá mí lémé wé tʉ́ŋlʉ̌.

¹¹Ebě, me lɨ́ ejóʼǒ dwéh ébee bɨ́n lɨ́ esú lé édwe bɨ́n nyʉ́ʉ́ nkûl Sísǐm mé Nzyɛ̌m, ó bɨ̌n nʉ́aa pîm ɨ́ búʼó.

¹²Sá mé dí elɛ́ɛ yɨ́, yé ó, mɨná sâʼ gá menkɔ̌m páʼ gá nyɨ́ná. Búʼó bɨ́n dí ebúʼlǎ Krîst yɨ́, le yaá yâm, byé ó ngá gbâ mɨ́ná gá nkul ɨ́ miléme.

¹³Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa ó, ɨ́ bijɔʼ ɨ́ buo buo, me á be ó le jwɨʼ ó, me ónzě bee bɨ́n. Me á jaa bʉbɔma sɔ̂ʼ ó, njɨ e mingamla. Sâ gwár, me ónze yɨ́ɛ lɨ́ esú lé énzě séǎ Nzyɛ̌m syɛ́ɛ́ ɨ́ sɔ́má yɨ́n. Me á gwɨ̂m ó, syɛ́ɛ́ yâm, yé gúmaa ntémé mpumó kwá nyɨ́n ɨ́ mpʉ yé á gúmo mpumó ɨ́ mʉ́ʉ́ mésí méswîh yɨ́.

¹⁴Me ó lɨ́ bi ó, me túnaa Mbɨambɨa Lɔ́ɔ kwá bʉr ó lwǐb grɛ̂k, le kwá bʉr o bílwǐb biswîh. Me túnaa wé kwá ogwɨ́a o mékaná, le kwá bigʉʼlʉgʉ́.

¹⁵Sá tɨ̂ʼ ó mé dí e tiŋé ɨ́ léme ó, me túnaa Mbɨambɨa Lɔ́ɔ kwá nyɨ́n ntémé, bɨ̌n bʉr ó Rôm yɨ́.

¹⁶Mé ajóʼo bá sôn ɨ́ Mbɨambɨa Lɔ́ɔ mé dí etúno wɨ́, ebě, wé ó nkul mé Nzyɛ̌m lɨ́ esú lé étiʼ mʉ̂r nyɨnyɛ̂h ngá bûʼla wé nyá, táare le oYúden, kala e baá o dí abe óYúden bá.

¹⁷Mbɨambɨa Lɔ́ɔ waá, wé lɛ́ʼlé ó, mpʉ̌ Nzyɛ̌m dí edwe bʉ̂r nkam ɨ́ míh mé yɨ́. Yé tááré ó, ɨ́ búʼó, tó swîʼ ɨ́ búʼó. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Tîtyěl mʉr ótiʼe ó, ɨ́ búʼó.»

¹⁸Nzyɛ̌m, nyɨ́ lɛ̂ʼle mɨ́ná gá ɨ́ sʉ́lʉ́lʉ́, duho ɨ́ jʉ́o kʉ́ mpʉ nyé dí elɛ̂ʼle nkpáa, duho ɨ́ bibɨ́bla bísyɛ́ɛla bíbyɛ̂h yɨ́. Nye lɨ́ elɛ̂ʼle nkpáa ɨ́ lɔ̌b bʉ̂r o dí elwímla le otyeetye, jaá dudû njɨ bisyɛ́ɛla bi dí onzyɛ́h ónzyɛ́h bí bá.

¹⁹Sá dí esâ ó, mʉr gʉ́ŋaa Nzyɛ̌m yɨ́, yé lɨ́ enyɨ̂n bʉ̂r bɨ́bɛ̂h ɨ́ ponó. Bʉr bɨ́bɛ̂h, bé lɨ́ ebeě sâ yaá, ebě, Nzyɛ̌m mʉr tɨ̂ʼ á si lɛ̂ʼle bé yǎ.

²⁰Táarě Nzyɛ̌m á kuho sí, njwɨr wé dí abeɔɔ wɨ́, (nó, yé ó nkul nyé dí njʉ̌m dǐ e njʉ̌m dǐ nyɨ́, ndu e tyé Nzyɛ̌m yé,) wé lɨ́ enyɨ̂n bʉ̂r ɨ́ mîh ɨ́ ponó, ɨ́ jɔʼ mɨ́ná dí egwá dwɛ̂ʼ gá le epahle bísyɛ́ɛla byé yɨ́. Nó ó, bʉr o dí elwímla e Nzyɛ̌m bá, bé akǎ be e nkar ɨ́ míh mé.

²¹Damá jóʼǒ mpʉ bé á kʉ gʉ́a ó, Nzyɛ̌m, nye ó tɨ̂ʼ yɨ́, bé á bé adwe nyé kûm jálá e né nyɨ́, nkʉ̂ pʉgʉ́ bá dwe nyé nzyǒo. Bé á jaa pɨpahle sɔ̂ʼ ó, njɨ bisâ bi dí abá be e nyɔm bí. Bé ó bigʉʼlʉgʉ́, lúʼo pɨ̂ʼ. Milémé myɔ́ɔ́, myé jaá di ó, njɨ lɨ́ edúrʉ́ʉ́.

²²Bé damá nkʉ́na ó, bé ó ocwóó, nkúná bé kǎ tó sûʼla ó bigʉʼlʉgʉ́.

²³Líʼe ó, bé dwêʼ Nzyɛ̌m, waá dí adwe nyá kûm, bé á ka dwe kûm ó bikpɛʼkpɛ̂ʼ. Bé á kpaʼ bikpɛʼkpɛ̂ʼ byaá ó, mveʼle bʉ̂r, binʉ̌n, otír, nkʉ̂ onyʉ́a, bisâ bi dí elaǎ mpʉ̌ ngúl mpáá bí.

²⁴Sá tɨ̂ʼ ó Nzyɛ̌m á bîr ó, bé sâʼ bisyɛ́ɛla bi mpîr bé á gwɨgwɨ̂m bí yɨ́. Nó ó bé dí esɛ́ɛla bísá bí ésɔ́m páʼ nyɔ́ɔ́, nyâʼ lɨ́ esâ nyʉ́ʉ́ yɨ́.

²⁵Bé á si syɛ́ɛla otyeetye mé Nzyɛ̌m e bibɛr. Gúmó bé á jala le egúmlo le eséǎ Kwihbʉr syɛ́ɛ́ yɨ́, bé á jaa ka dwe kûm ó, njɨ bisá nyɨ́ɛ á komlo bí. Kûm díʼee e Nzyɛ̌m waá, njʉ̌m dǐ e njʉ̌m dǐ. Amɛn.

²⁶Sá tɨ̂ʼ ó Nzyɛ̌m á bîr ó, bé sâʼ bisyɛ́ɛla bí ésɔ́m bé á kʉ bu gwɨ̂m bí yɨ́. Bʉbá bɨ́ɛ beně mbi bé á komlɔɔ ó, bé sɨ̂saʼ wɨ́. Líʼɔɔ̌ mpǎŋ syɛ́ɛla yaá, nzě lœʼ ményʉ́l mɔ́ɔ́ ó e bisyɛ́ɛla bi dí ajala e mbǐ kwɨmlá wɔ́ɔ́ bí.

²⁷Bʉrʉ̂m sâ ntémé njɨ jwɨʼ gwár yaá. Bé lɨ́ ebene ékǎ dû bʉ́bá mpʉ bé á komlɔɔ ó, bé dûduŋɔɔ yɨ́. Líʼɔɔ̌ syɛ́ɛla yaá, bé kǎ jóʼo yɨ́ɛ ó, dwéh ékœb bʉ́ʉ́ bʉ́rʉ̂m ɨ́ bijoó mpʉ bʉ́bá. Bʉrʉ̂m e bʉrʉ̂m, bé lɨ́ esɛ́ɛla bísá bí ésɔ́m páʼ nyɔ́ɔ́. Bé lɨ́ edâʼre bíntɨ́ʼá ɨ́ menyʉ́l mɔ́ɔ́. Bintɨ́ʼá byaá, byé ó dí myɛ́na bé dí ebi má, lɨ́ esú é syóm bé dí esâ wɨ́.

²⁸Bʉr baá, bé á bé abee ó, yé jala ɨ́ páʼ wɔ́ɔ́ ó, bé kámaa Nzyɛ̌m. Nó ó Nzyɛ̌m á nzoo ka bîr bé ó, bé díʼee e pɨʼ ontúl óntúl yɨ́. Nyě bír bé ó, bé sâʼ bisyɛ́ɛla bí ésɔ́m bi dí ajala e bé bí.

²⁹Bé lɨ́ eswâhle bísyɛ́ɛla bíbyɛ̂h bi dí egbah métié bí. Byé ó dí: jélé, gwɨ́má bísá byé onkán, ebébe é léme, nzwíí, ntaa sʉ́ŋa, ejwɨ́ɨ́ é bʉ̂r, gwɨ́má égœ́a e bʉr, mikóo, sɛ́á mépɨʼ mé ébébe, mesyɛ́ɛla.

³⁰Bé lɨ́ eswêʼ míé mé bʉ́ʉ́ bʉ̂r. Bé ó ontɨ̂m le obɨn mé Nzyɛ̌m. Bé lɨ́ edîʼ mpêl. Bé lɨ́ esâ énkɛ́ɛ e nyʉ̂l le jáálé. Bé jaá sɨsáa ó, njɨ mepɨʼ mé ékûhlo mʉ́ʉ́ mébébe meswîh. Bé ajóʼo ósɔ́ŋ le onyɔ̌ŋ bɔ́ɔ́.

³¹Bé ó bigʉʼlʉgʉ́. Bé adira ménkɛ̌ʼ mɔ́ɔ́. Bé e cére ɨ́ miléme. Bé abe e njɨ́ʼá nkóó.

³²Damá jóʼǒ mpʉ bʉ̂r baá, bé lɨ́ egʉ́a ó, Nzyɛ̌m á lɛ́ɛ ó, baá bɨ́bɛ̂h dí esâ mímbi mí ébébe myaá bá, bé dáʼré ó, eswie ɨ́ menyʉ́l mɔ́ɔ́ yɨ́, bɨ́ɛ, bé ó njɨ lɨ́ etô dóló le esɨsâ bísyɛ́ɛla byaá. Yé abě njɨ nó yé omér. Jɔʼ bé dí ebee bʉ́ʉ́ bʉ̂r lɨ́ esâ syóm yɨ́, bé e bisʉhʉʉ ɨ́ miléme. Bé e bé ó: «Sɨ́sáʼ gá njɨ mpʉ́nʉ̌.»