Read Koonzime Rôm 10 Bible Online

Rôm 10 - Koonzime bible

Rôm 10

¹Bɨ́ɔɔ́ bâm! Okɛ́l bâm! Lémé wâm, wé lɨ́ ekʉ́ gwɨ̂m; me ntémé, me lɨ́ ejɨʼla e Nzyɛ̌m lɨ́ esú ó, oYúden ntáa bǐ twǐʼ njʉ̌m dǐ.

²Mě lɛ́ɛ́ bɨ́n ɨ́ páʼ wɔ́ɔ́ ó, mpǎŋ gwɨ́má yɔ́ɔ́, yé ó, bé nkʉ̂ buú dû Nzyɛ̌m. Bé agʉ́a yɨ́ɛ mpaŋ nzɨ́ bé jálá le edû nyɨ́.

³Bé á si jéʼe nzɨ̌ Nzyɛ̌m á tíʼe ɨ́ lémé wé ó, nyě kǎr ó bé nyǎ, ó bé ócɨɨ tɨ̂, bé obi nkâm tɨ̂ʼ nyɨ́. Bé á jaa sáa njɨ ó, bé káraa nyɔ́ɔ́ nzɨ́. Nó ó bé á gbɔba e Nzyɛ̌m, lɨ́ esú ó, bé bíʼee nkam lɨ́ ecɨɨ ɨ́ nzɨ̌ bɨ́ɛ bé bʉr o tɨ̂ʼ, bé á kar nyɨ́.

⁴Mě lwib nó ó, ebě, Krîst á si gbâ nkǎ-ti ɨ́ nzɨ̌ metié, lɨ́ ekamle bʉ̂r lɨ́ ebáʼǎ cɨɨ tɨ̂. Nye á sâ nó ó, lɨ́ esú é bʉ̂r o ngá bi nkâm ɨ́ míh mé Nzyɛ̌m bá, bé díʼee baá bɨ́bɛ̂h dí edyɛ̂ʼwo e né bá.

⁵Moyɨ̂z á si cɛma, dumo e nzɨ̌ ebi nkâm ɨ́ mbaʼlá métié ó: «Waá nyɨnyɛ̂h dí ebaʼle métié nyá, óbǐ twiʼ ó, ɨ́ metié maá.»

⁶Tó kœb ó, yé e nzɨ̌ swîh ebi nkâm ɨ́ míh mé Nzyɛ̌m. Bʉr o dí ebúʼla nyé bá, bé ó dí ecɨɨ tɨ̂, ntɔ̂ʼ bi nkâm nyaá mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Sá alɛ́ɛ ɨ́ lémé gô tʉ́ŋlʉ̌ ó: Nzé óbére ɨ́ jʉ́o kʉ́? (Nó yé lɛ́ɛ́ ó: mʉ̌r sá apahle ó, yé e nyʉ́ʉ́ mʉ̂r óbére ɨ́ jʉ́o kʉ́, lɨ́ etó jébě Krîst, ó nye súlaa sí nyá.)

⁷Bé á cɛma ntémé ó: «Sá akǎ lɛ́ɛ ntémé ɨ́ lémé gô tʉ́ŋlʉ̌ ó: “Nzé ósulo wâʼ ɨ́ sí yɨ̂, tó pyâl ɨ́ kwár odwe ě?” (Nó yé lɛ́ɛ́ ó, mʉ̌r sá apahle ó, yé e nyʉ́ʉ́ mʉ̂r ótó kœ̌b Krîst ɨ́ gúmó ódwe dí yɨ́, ntɔ̂ʼ búla e né gʉ̂ʼ nyá.)

⁸Mekaná mé Nzyɛ̌m mɨ́ɛ lɛ́ɛ́ ó: Lɔ́ɔ́ mé Nzyɛ̌m, wé ó bǎʼ e go. Wé ó, ɨ́ num gô tʉ́ŋlʉ̌. Wé ó dí ɨ́ lémé gô tʉ́ŋlʉ̌ wɨ́. Lɔ́ɔ́ ngwár e ngwár waá, wé ó waá bɨ́h dí etúno ó, bʉr bûʼlaa wé wɨ̂.

⁹Mekaná mé Nzyɛ̌m, mé lɛ́ɛ́ ó: gó ólɛ́ɛ ɨ́ num gô go mʉr tɨ̂ʼ ó, «Yésʉs ó dí Njwɨ́ɨ!» le ebúʼla tʉ́ŋlʉ̌ lémé gô ó, Nzyɛ̌m á si pɛh nye lɨ́ odwe nó, nye ódwe gó twǐʼ njʉ̌m dǐ.

¹⁰Mʉ̂r dyɛ́ʼwó e Yésʉs ɨ́ lémé wé nó, nye óbi nkâm ɨ́ míh mé Nzyɛ̌m. Mʉ̂r lɛ́ɛ́ ɨ́ num wé ó: «Yésʉs ó dí Njwɨ́ɨ!» nó, Nzyɛ̌m ódwe nyé twǐʼ njʉ̌m dǐ.

¹¹Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Mʉr nyɨnyɛ̂h ngá dyɛ̂ʼwo e né nyá, nye ásɔ́ma.

¹²Ebě, mbɔ́ʼ, wé abe páʼ oYúden, bé e bʉr o dí abe óYúden bá. Bɨ́bɛ̂h, bé e Njwɨ́ɨ ngwár. Baá dí ekɛn díé lé bá, nye lɨ́ elɛ̂ʼle bé bɨ́bɛ̂h mpam nyé.

¹³Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Mʉr nyɨnyɛ̂h ókɛn díé mé Dâ Nzyɛ̌m nyá, óbǐ twǐʼ njʉ̌m dǐ.

¹⁴Sâ gwár, bé ókɛn mʉ̂r bé á be adyêʼ koo e né nyá e nyáa nzɨ́? Nó ó, bé ódyɛ̂ʼwo e waá bé á be ajóʼo díé lé nyá e nyáa nzɨ́? Bé ójóʼo díe laá, abe e mʉr túnó bé lǎ, e nyáa nzɨ́?

¹⁵Bʉ̂r bé óbe, antɨhɔɔ nó, mʉr á gwa tô ɨ́ túnó waá nyá, á gwa tô le etúno wé náǎ e nyáa nkûl? Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Á mbɨa lɨ́ ebee bʉ̂r o dí enze le etúnǒ Mbɨambɨa Lɔ́ɔ bá ɛ̌!

¹⁶Ɨ́ jɔʼ óYúden, bé á jóʼo Mbɨambɨa Lɔ́ɔ, le esâ Nzyɛ̌m mejóʼo yɨ́, ntʉ bɨ́bɛ̂h bé á sâ nó. Ngwíha milɔ̌b Ésayie mʉr tɨ̂ʼ á lɛ́ɛ ó: Dâ ɛ̌, nzé á bûʼla lɔ́ɔ bɨ́h á lɛ́ɛ bé wɨ́?

¹⁷Nó ó, gʉ́ŋáá gá ó, jɔʼ mʉ̂r dyɛ́ʼwá e Krîst yɨ́, yé duho ó, ɨ́ sá nyé á jóʼo yɨ́. Njóʼá wé waá, wé duho ó, lɨ́ ekǎn bé dí elɛ́ɛ nyé, dumo e Krîst lɨ́.

¹⁸Nó ó, mě dí ó nɛ́ɛ: «Nzê oYúden bɨ́ɛ, bé á bé ajóʼǒ lɔ́ɔ waá ɛ́?» Eee, bé á si gwa kʉ jóʼo wê. Yé ó mpʉ bé á cɛma ɨ́ Mekaná mé Nzyɛ̌m yɨ́. Yê cɛmá ó: Bʉr, bé á be ɨ́ tô le etúnǒ gúmó yɨ́yɛ̂h, mecwíí mɔ́ɔ́ jwɨ̂ʼ ɨ́ sí yɨ́yɛ̂h, tó pyâl ɨ́ medumo mé sí mɨ́mɛ̂h.

¹⁹Nó ó, me lɨ́ ebáʼǎ dî ó: «Nzê oYúden, bé á bé agwá gʉ́a ɛ̌?» Eee, bé á be yɨ́ɛ ó, sí kʉ́ jóʼo. Moyɨ̂z á boo lɛ́ɛ ó: Nzyɛ̌m lɛ́ɛ́ ó: Me ósâ bɨ́n mbi dí ó, bɨ̌n sâʼ egú e bʉr o bíkúl bíswîh. Me ókóblo bɨ́n ebúʼ e nzɨ̌ bʉr o dí ɨ́ sí bígʉʼlʉgʉ́, dí elúʼo pɨ̂ʼ bá.

²⁰Píe tɨ̂, ngwíha milɔ̌b Ésayie á bana kʉ lɛ́ɛ, ajóʼo bʉ́á ó: «Nzyɛ̌m lɛ́ɛ́ ó: Bʉr o b'á be asáa me bá, bɨ́ɛ ó b'á bee me. Me á si lɛ̂ʼle me mʉr tɨ̂ʼ ɨ́ ponó kwá bʉr o b'á be agwɨ̂m yʉ́ʉ́ sɔ̂ʼ e me bá.

²¹Ɨ́ nkǒ páʼ bʉ̂r o b'Ɨ́zraɛ̂l bɨ́ɛ, Nzyɛ̌m lwib, dumo e bé ó: Mɨ́ syɛ̂m mébó mâm móhó ntinɨ̂, lɨ́ ejébe bʉ̂r bâm. Bɨ́ɛ njɨ lɨ́ esâ mé ebɨ̌h. Sá yɨ́yɛ̂h mé lɛ́ɛ́ bé yɨ́, bɨ́ɛ kʉ́ jaá pɨpɨ̌r pɨrɨ́ɨ.