Read Koonzime Rôm 11 Bible Online

Rôm 11 - Koonzime bible

Rôm 11

¹Nó ó mé dí edî ó nɛ́ɛ: ɨ́ mpʉ yé dí nó yɨ́, nzê Nzyɛ̌m á si myah bʉr bé ɛ́? Heʼé, yé abá be nó. Mɛm mʉr tɨ̂, me ó mʉr Ɨ́zraɛ̂l. Me á byɛ̂l ó, lɨ́ onzweh mé Benjamin. Me ó, ɨ́ mpóʼo mé Abraham.

²Nzyɛ̌m á bé amyǎh kúl bʉ̂r nyé á boo lɛ́ɛ ó, yé ó bʉr bé yɨ́. Nzê bɨ̌n bé agʉ́ǎ mpʉ bé á cɛma ɨ́ Mekaná mé Nzyɛ̌m, dumo le Elie yɨ́? Elie á be ó sí pur bʉ̂r o b'Ɨ́zraɛ̂l ɨ́ míh mé Nzyɛ̌m. Nye á lɛ́ɛ ó:

³Dâ ɛ̌, bɨ́ sîl éjʉ̂ ógwíha o mílɔ̌b bô. Bé ntémé, bɨ́ sîl égbah báalatâr bé á didîʼ mindwéá myô tɨ̂ʼ bá. Yé jaá kǎ lîʼ ó, njɨ me omér lɨ́ edû gô. Bé kǎ sáa ntémé ó, bé jʉ́ ó me.

⁴Nzyɛ̌m nyɨɛ á ka yala e né nyá? Nye á lɛ́ɛ e né ó: Heʼé, gó abe gó omér. Mɨ́ baʼle bʉ̂r otɔ́ɔ́sin nzaangbá o dí edû mé bá. Abe e lʉ́ʉ́ dʉ́o bé á bɨʼ mebóó mɔ́ɔ́ sí, jɨʼla e Báal.

⁵Ɨ́ myǎ bʉ̂r gá wɨ́ná wɨ̂, yé ntémé, yé e mâ dœ́h é bʉ̂r lé á lîʼ ɨ́ kúl bʉ̂r o b'Ɨ́zraɛ̂l lɨ́, bʉ̌r Nzyɛ̌m á boo twâr ɨ́ mpam nyé lɨ́ esú lɔ́ɔ́ bá.

⁶Nye á twâr bé ó, ɨ́ mpam nyé. Nye á bé atwâr bé ɨ́ lɔ̌b bísyɛ́ɛla bimpâ byɔ́ɔ́. Yé bé nye á twâr bé ó, ɨ́ lɔ̌b bísyɛ́ɛla byaá nó, lɛ́ɛ́, mpam á bé akǎ be mpâm.

⁷Nó, yê yé? Bʉr o b'Ɨ́zraɛ̂l, bé á bé abǐ sá bé á sɨsáa yɨ́. Baá Nzyɛ̌m á twâr bá bɨɛ, bé ó b'á bi yê. Baá bʉ́ʉ́ bɨ́bɛ̂h, milémé myɔ́ɔ́, myé á be ɨ́ buú lele lɨ́ ebúʼla.

⁸Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Nzyɛ̌m á si sâ ó, milémé myɔ́ɔ́, myé díʼee ɨ́ lele lele. Nye á si dible míh mɔ́ɔ́, ó bé ayɨ́ kǎ bee. Nye ntémé á si dibe megwǎl mɔ́ɔ́, ó bé ayɨ́ jóʼo. Nzě kumo ɨ́ dʉ́ó lɨ̂ʼ mûh, bé ó njɨ nó.

⁹David ntémé á lɛ́ɛ ó: Edɨ́ɨ́ é méde lɔ́ɔ́, lé díʼee mpila dí ó, bé óbil tɨ̂ʼ yɨ́. Lé díʼee ebɔ̌ʼ lɨ́ esú lɔ́ɔ́. Bé dúmaa tyeetye. Nzyɛ̌m nkʉ̂ dwe bé bintɨ́ʼá,

¹⁰Nzyɛ̌m díblaa bé mîh, ó bé ayɨ́ kǎ bee. Nzyɛ̌m dwêʼ bé bintɨ́ʼá ɨ́ jɔʼ yɨ́yɛ̂h. Nye sâʼ ó, mikoo myɔ́ɔ́, myé nyɛ́mlɨɨ.

¹¹Nó ó, me lɨ́ edî tíá ó: nzê oYúden, bé á jaa twe ó, dumǎ tyeetye ɛ̌? Heʼé, yé abá be nó, ebě, Nzyɛ̌m á si tiʼ bʉr o byúú bíkûl biswîh ɨ́ lɔ̌b ébébe lɔ́ɔ́ bé á sâ lɨ́. Nye á dwe byé twǐʼ njʉ̌m dǐ ó, lɨ́ egbâ óYúden egú ɨ́ miléme.

¹²Jɔʼ bʉ̂r o b'Ɨ́zraɛ̂l, bé á gbah metié yɨ́, Nzyɛ̌m ntɔ̂ʼ nzě liŋ ébébe laá okúm le ogbaa lɨ́ esú é bʉ̂r ó sí bɨ́bɛ̂h. Nzyɛ̌m pǎ nyɛɛ́ kaale bʉ̂r o bíkúl bíbyɛ̂h okúm wé ɨ́ jɔʼ óYúden, bé á sâ nye ebɨ̌h yɨ́, á dwɛʼra e mpam nyé ólɛ̂ʼle mɨ́ná gá le onɔ́ɔ́ nyɨ́, ɨ́ jɔʼ óYúden baá bɨ́bɛ̂h ngá báʼǎ nze kwá nyé yɨ́! Nye ólɛ̂ʼle mɨ́ná gá le onɔ́ɔ́ mpam ɨ́ ntʉʉʉ́.

¹³Ɨ́ báánâ, me mû ó lɨ́ enzě lwib e bɨ̌n, bʉr o dí abe óYúden bá. Me ó mʉr milʉ́mlʉ́ Nzyɛ̌m á lómlo bʉr o dí abe óYúden bá nyá. Me lɨ́ ekʉ́ buú nkʉ́na ɨ́ lɔ̌b syɛ́ɛ́ mé dí eséa lɨ́ esú lɨ́n ó,

¹⁴me nkʉ̂ gbâ kúl bʉ̂r yâm, oYúden, egú ɨ́ miléme. Jáŋá bʉ́ʉ́ bʉ̂r ɨ́ sɔ́má yɔ́ɔ́, bé ónzě bǐ twǐʼ njʉ̌m dǐ e nzɨ̌ nyaá.

¹⁵Nzyɛ̌m pǎ nyɛɛ́ sâ sáá e bʉr ó sí yɨ̂ʼ ɨ́ jɔʼ nyé á bene oYúden yɨ́, á dwɛʼra le embɨa nyé ósâ bé le onɔ́ɔ́ ɨ́ jɔʼ nyé óbáʼǎ nʉa bé yɨ́! Yé ónwɨɨla ó e pahá sóo. Bé óbe ó mpʉ ódwe o dí epah bá.

¹⁶Péh dœʼ mû sí twámɔɔ, dweŋɔɔ̌ Nzyɛ̌m yɨ́, yé mû ó sá dí ti yɨ́. Mede mɨ́mɛ̂h me dí tɨ̂ʼ má, mé mû ntémé ó, sá dí ti yɨ́. Bé sí dwě Nzyɛ̌m mikaalé mí lɨ́ nó, go ó, milɔ́ɔ mi dí eduho ɨ́ kuó lɨ́ yaá mí, myé gúmó ntémé ó e Nzyɛ̌m.

¹⁷Kúl bʉ̂r o b'Ɨ́zraɛ̂l, yé ó mpʉ̌ lɨ́ ólivier, yé á be e milɔ́ɔ́ myé á be agúmo mpumó mí yɨ́. Bê nzě syɛ̂h mílɔ́ɔ myaá, ntɔ̂ʼ nʉa myúú mílɔ́ɔ́ mí lɨ́ ólivier yé á pâh ɨ́ dwǐʼ yɨ́, ntɔ̂ʼ nɛr myé tɨ̂ʼ ɨ́ kuó lɨ́ yaá. Jwɨʼ gwár e gwár yaá ó bɨ́n á nɛrɔɔ ɨ́ kúl óYúden yɨ́. Bɨ̌n ntɔ̂ʼ pûhla e bé lɨ́ edirǎ nyɔm ɨ́ bitûl bi dí eduho ɨ́ mikaalé bí. Bitûl byaá, byé ó dí edwe mépwaʼ ɨ́ milɔ́ɔ mi dí minɛrá ɨ́ kuó lɨ́ mí.

¹⁸Mpʉ yé dí nó yɨ́, apyêh gá milɔ́ɔ́ mí lɨ́ mû sí syɛ́hɔɔ mí. Bɨ́n ódoʼo nó, bɨ̌n agʉ́a gá ó, ntʉ bɨ́n, milɔ́ɔ, dí enkɛ́ɛ míkaalé. Mikaalé míɛ ó dí enkɛ́ɛ mílɔ́ɔ.

¹⁹Go óbɛ̌m yala ó: «Yé ó nó, Nzyɛ̌m á syɛ̂h myúú mílɔ́ɔ́ mínɨ̌ ó, me díʼee ɨ́ dǐ bé á pʉʼa yɨ́, nɛrá ɨ́ kuó.»

²⁰Gʉ́ kʉ́ gwá lɛ́ɛ. Bé á syɛ́hɔɔ ɨ́ lɨ́ yaá ó, ebě, bé á bé abe e búʼó. Bɨ̌n bɨɛ, bé ódi ɨ́ diá nɨ̌ ɨ́ bea bea ó, ɨ́ nzɨ̌ búʼó yɨ́n. Ayɨ́ nkɛ́ɛ gá nyʉ̂l. Sá bɨ́n jálá le esâ yɨ́, yé ó, bɨ̌n kpɛ́yɨɨ Nzyɛ̌m.

²¹Nzyɛ̌m pǎ nyɛɛ́ be, akamle le oYúden, bʉr o nyé á nyɛɛ komlo mpʉ mílɔ́ɔ́ mímpâ bá, á dwɛʼra e bɨ̌n! Nye ákamle e bɨ̌n.

²²Paá bee gá mpʉ̌ Nzyɛ̌m dí elɛ̂ʼle mpâm, le edi, adûhwo bʉ̂r o dí esâ nyé ebɨ̌h, baá bé á twe omyâtyɛ̌ŋ ɨ́ nkɨ́ŋlɨ́m bá. Nyě kʉ́ lɛ̂ʼle mpâm nyé ó, gua. Gúa óbene édi ɨ́ mpam mé Nzyɛ̌m nyaá nó, lɛ́ɛ́, nye ntémé ókʉ́ syɛ̂h gó mpʉ̌ lɔ́ɔ́ lɨ́ e ngɨ́r ɨ́ léme.

²³Tó kœb ó, óYúden bɨ́ɛ, bé bé atô le ebɨ̌h lɔ́ɔ́ dóló nó, lɛ́ɛ́, Nzyɛ̌m óbáʼǎ tyêl bé ɨ́ bidǐ byɔ́ɔ́ bé á nyɛɛ be tɨ̂ʼ bí, ebě, nyě e nkul ebáʼǎ nɛr bé ɨ́ bidǐ byɔ́ɔ́, bê di.

²⁴Bɨ̌n bʉr o dí abe óYúden bá, bɨ̌n bé ó mpʉ mílɔ́ɔ́ mí lɨ́ yé á pâh ɨ́ dwǐʼ yɨ́. Nzyɛ̌m nzě tó syɛ̂h gúú lɔ́ɔ́ tɨ̂, nzě tó nɛr wé ɨ́ mpǎŋ lɨ́. Nzyɛ̌m pǎ nyɛɛ́ nɛ̌r lɔ́ɔ́ lɨ́ dwǐʼ ɨ́ mpǎŋ lɨ́, á dwɛʼra e milɔ́ɔ́ myé á syɛ́hɔɔ ɨ́ lɨ́ yaá mí! Nye ókʉ́ bánǎ nɛr myé tɨ̂.

²⁵Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa lwǐb ódîm yɨ̂ʼ ɨ́ pébébé. Bɨ̌n ámû jwɨʼ ó, bɨ̌n bé ó ocwóó. Lwǐb ódîm yaá, yé ó: bʉ́ʉ́ bʉ̂r ɨ́ kúl bʉ̂r o b'Ɨ́zraɛ̂l, bé e miléme mi dí ɨ́ buú lele lɨ́ ejóʼo mi. Milémé myɔ́ɔ́, myé óbe ɨ́ lele lɨ́ ejóʼo ó, tó kumo ɨ́ jɔʼ tólɔ́ɔ obûʼla o dí abe óYúden bá, ókumǒ bím Nzyɛ̌m á boo tíʼe ɨ́ lémé wé ó, nyě dwé ó bé twǐʼ njʉ̌m dǐ yɨ́.

²⁶Mbi wɨ̂ʼ ó, kúl bʉ̂r o b'Ɨ́zraɛ̂l yɨ́yɛ̂h ngá tiʼe yɨ́. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Tiʼbʉr óduho ó, Síon. Nye ópɛʼ ébɨ̌h lé ónta mé Yákɔb.

²⁷Saá mé ngá tyêl páʼ nyɨ́h e nɔ́ɔ́ nyɨ́, óbe ó, mbi wɨ̂: Me ópɛʼ bíbaa bí ébébe lɔ́ɔ́ mé á niʼe ɨ́ lɔ̌b mísyóm myɔ́ɔ́ bí, bíbyɛ̂h.

²⁸Ɨ́ nkǒ páʼ mé Mbɨambɨa Lɔ́ɔ, oYúden, bé mû ó ontɨ̂m le obɨn. Syɛ́ɛla yaá, yé ó nyɔm ɨ́ páʼ wɨ́n, ó bɨ̌n bíʼee twǐʼ njʉ̌m dǐ. Ɨ́ nkǒ páʼ mé Nzyɛ̌m, bé ó mitwárá. Nyě tó dóló le ekpɛl bé ó, lɨ́ esú é bímpám byɔ́ɔ́.

²⁹Ebě, jɔ̌ʼ Nzyɛ̌m mû sí tíʼe ɨ́ lémé wé ó, nyě jébé ó mʉr swîh, nkʉ̂ mʉr kɛl, le edwe nyé mindwéá yɨ́, nye ácéne mítíʼá mí ésôʼ myaá píe tɨ̂.

³⁰Bɨ̌n, bʉr o dí abe óYúden bá, bɨ̌n bé á si sâ Nzyɛ̌m ajóʼo ɨ́ mimbú mí píhe. Ɨ́ báánâ mpʉ óYúden bɨ́ɛ dí ebene édyɛ̂ʼwo e né yɨ́, Nzyɛ̌m kǎ nzě jɨ̂ʼ bɨ́n nkoó.

³¹Mpʉ óYúden, bé á bene edyɛ̂ʼwo e né yɨ́, Nzyɛ̌m á bîr ó, bé sâʼ ebɨ̌h laá ó, nye nkʉ̂ jɨ̂ʼ bé ntémé nkoó, mbi nyé á nyɛɛ jɨ̂ʼ bɨ̌n nyɨɛ nkoó wɨ́.

³²Nó ó, Nzyɛ̌m á si sâ ó, bʉr bɨ́bɛ̂h díʼee mikómó mí ébɨ̌h lɔ́ɔ́. Nye á sâ nó ó, lɨ́ esú ó, nye jɨ́ʼɨɨ bɨ́bɛ̂h nkoó.

³³Sâ buo ókúm mé Nzyɛ̌m! Ocwóó wé le ngwɨ́á wé, byé abe le odumo. Nzé dí e nkul egʉ́a mítíʼá mí lémé wé? Nzé dí e nkul egʉ́a bísyɛ́ɛla nyé dí esâ bí?

³⁴Yê cɛmá ɨ́ Mekaná mé Nzyɛ̌m ó: Nzé dí egʉ́a mípahlá mé Dâ Nzyɛ̌m ɛ̌? Nzé dí e nkul edwe nyé metwɨ́ɨ́?

³⁵Nzé á pa nyɛɛ kʉl nye sɔ̂ʼ, lɨ́ esú ó, nye óbwóolo nyé yǎ ɛ?

³⁶Yé abe e mʉr, ebě, nye ó b'á komlo bisá bíbyɛ̂h. Byé á kwɨmlɨ ntémé ó, ɨ́ nzɨ̌ nyé. Sá yɨ́yɛ̂h, yê tɨ̂ʼ ó, lɨ́ esú lé. Mɨná gúmlaa gá nye njʉ̌m dǐ e njʉ̌m dǐ. Amɛn.