Read Koonzime Rôm 12 Bible Online

Rôm 12 - Koonzime bible

Rôm 12

¹Nó, bɨ́ɔɔ́ bâm ɛ̌, me lɨ́ ejɨʼla e bɨ̌n ɨ́ nkoó Nzyɛ̌m á jɨ̂ʼ gá mɨná nyɨ́, ó bɨ̌n tímlaa nye menyʉ́l mɨ́n ntinɨ̂ e ntinɨ̂, ebě, menyʉ́l mɨ́n, mé ɨ́ jala le esûʼla ó, mikublakúbla míndwéá mi dí ti ɨ́ míh mé Nzyɛ̌m mí. Nye óbee bícwiʼ bín byaá mbɨ̂mbɨá. Yé ntémé ó dí mpǎŋ ndwéá kûm dí ejala e misísǐm mín wɨ́.

²Adû gá metum me bʉ̂r ó myǎ wɨ̂. Yé jala ó, Nzyɛ̌m dwêʼ bɨ̌n bijwɨʼ bidwân, ó nye dwírɨɨ bɨ̌n miléme. Nó ó bɨ́n ngá gʉ́ǎ sá Nzyɛ̌m dí ekpɛl yɨ́. Bɨ̌n bé ogʉ́ǎ sá dí ɨ́ mbɨa yɨ́, sá dí ejala e né yɨ́, ndu e yaá dí ɨ́ pémémé ɨ́ mipáʼ mímyɛ̂h yɨ́.

³Nzyɛ̌m á si lɛ̂ʼle me mpam nyé. Ɨ́ mpam nyaá ó mé dí elɛ́ɛ e mʉr nyɨnyɛ̂h dí ɨ́ sɔ́má yɨ́n nyá ó: mʉ̌r sá abuú láa nyé mʉr tɨ̂. Nye sêʼlaa nye mʉr tɨ̂ʼ, antaa sʉ́ŋa. Mʉr nyɨnyɛ̂h, nye pâhlaa nye mʉr tɨ̂, nye nkʉ̂ gʉ́ǎ mbi mʉ̂r nyé dí wɨ́, lɨ́ edû mbǐ búʼó Nzyɛ̌m á gbâ nye ɨ́ léme wɨ́.

⁴Mʉr, nye ó nyʉ̂l mpwár, nyʉ̂l nyɨɛ bitîl ɨ́ buo buo. Bitíl bíbyɛ̂h, byé abe e syɛ́ɛ́ éséa njɨ gwár. Bisyɛ́ɛ́ byɔ́ɔ́, byé ɨ́ buo.

⁵Jwɨʼ gwár yaá ntémé ó, mɨ́ná dí gá ɨ́ buo yɨ́. Sâ gwár, mɨná gá bé ó nyʉ̂l mpwár ɨ́ mpúhlá gá nyɨ́ná e Krîst. Mɨná gá óbɛ̂h, bé ó bitíl bí nyʉ̂l bi dí minɛrá ɨ́ nyʉ̂l mpwár bí.

⁶Nzyɛ̌m á dwe mɨná gá mindwéá ó, mimbi mimbi. Mpʉ nyé á kpɛl edwe mɨná gá mindwéá myaá yɨ́, nó ó, mʉ̂r nyɨnyɛ̂h jálá le eséǎ Nzyɛ̌m syɛ́ɛ́ yɨ́. Yé bé nye á si dwe go ndwéá égwîh mílɔ̌b myé nó, tóʼ le egwîh myé dóló ɨ́ nzɨ̌ búʼó.

⁷Yé bé Nzyɛ̌m á dwe go ó, ndwéá ékɛm bʉ̂r nó, séáá syɛ́ɛ́ yaá. Yé bé nye á dwe gua ó, ndwéá édwe bʉ̂r milɛ́ʼlá nó, lɛ́ʼláá bê.

⁸Yé bé nye á dwe gua ó, metwɨ́ɨ́ me dí egbâ bʉ̂r nkul ɨ́ miléme má nó, gbáʼ bé nkul nyaá. Yé bé nye á si dwe gua nkul ekab báántéʼenteʼe o bʉ̂r mebi nó, dwéʼ bé mǎ e lémé gô wɨ́wɛ̂h. Yé bé nye á tyêl gua ó, ɨ́ dǐ tyɛ̂b esôʼ nó, léme díʼee go ɨ́ báná báná ó, go séaa syɛ́ɛ́ yaá mbɨ̂mbɨá. Yé bé nye á dwe gua ó, ndwéá écwɨ́a e bʉ́ʉ́ bʉ̂r nó, lɛ́ʼláá bé mpam nyaá e bisʉhʉʉ.

⁹Kpɛ̌l, yé díʼee abe e mikóo. Nwimɨɨ gá sá yɨ́yɛ̂h dí ɨ́ bébe yɨ́. Kpɛlɨɨ gá sɔ̂ʼ njɨ yaá dí ɨ́ mbɨa yɨ́.

¹⁰Kpɛlaa gá páʼ nyɨ́n mpʉ bɨ́ɔɔ́ e bɨ́ɔɔ́ jálá le ekpɛla yɨ́. Diʼee gá le ánɨ̂nɨ̂n dúu páʼ nyɨ́n!

¹¹Séáá gá syɛ́ɛ́ e nkul, abe le epɨ̂h. Sísǐm mé Nzyɛ̌m, nye kúblaa ɨ́ milémé mín. Séáá gá Tî Yésʉs e milémé mín mímyɛ̂h.

¹²Diʼee gá e bisʉhʉʉ ɨ́ mpûʼlǎ Nzyɛ̌m á gbâ bɨ̌n ɨ́ miléme nyɨ́. Júhwáá gá mitúú bɨ́n dí esia e myé mí. Tirwaa gá syɛ́ɛ́ mínjɨʼla.

¹³Dwéʼ gá bʉr o mé Nzyɛ̌m bisâ bi dí esâ bé sɔ́ɔlʉ bí. Nʉnʉa gá ojwóo o dí epyâl kwá nyɨ́n bá mbɨ̂mbɨá.

¹⁴Syɛyɨɨ gá baá o dí etíble bɨ́n bá metyéelé. Líʼe ó, bɨ̌n syɛ́mɨɨ bê, syɛyɨɨ gá bé metyéelé.

¹⁵Sohaa gá, bɨ̌n e bʉr o dí esoho bá. Jɨʼee gá medwê, bɨ̌n e baá o dí ejɨ bá.

¹⁶Diʼee gá twíí páʼ nyɨ́n. Asâ gá enkɛ́ɛ́ é nyʉ̂l. Séáá gá mbǐ syɛ́ɛ́ yɨ́yɛ̂h, yé damá bě mbi syɛ́ɛ́ dí aláŋɔɔ ɨ́ nkɔb yɨ́. Ajwɨʼ gá ó, bɨ̌n ó dí ocwóó.

¹⁷Abɔla gá ebébe le ebébe. Sáŋáá gá nzɨ̌ esâ bʉ̂r bɨ́bɛ̂h bisyɛ́ɛla bi dí ɨ́ buú mbɨa ɨ́ míh mé bʉ̂r bɨ́bɛ̂h bí.

¹⁸Yé báná bɨ́n nó, sáʼ gá mbi wɨ́wɛ̂h ɨ́ páʼ wɨ́n ó, bɨ̌n e bʉr bɨ́bɛ̂h díʼee ɨ́ mepyɛbla!

¹⁹Bʉr ó kpɛ̌l bâm, ayɨ́ bɔla gá bɨ̌n bʉr o tɨ̂. Kamaa gá ó, Dâ Nzyɛ̌m nye omér, nye lɛ̂ʼlaa nkpaa dí bɨ̌n ɨ́ miléme nyɨ́, ebě, yê cɛmá ó: «Dâ Nzyɛ̌m lɛ́ɛ́ ó: Me ó dí e mpɔlá. Me ó ngá dwe myɛ́na.»

²⁰Yê cɛmá ntémé ó: «Ntɨ̂m e mbɨn gǒ bé lɨ́ ejóʼo nzâ nó, dwéʼ nyé sá éde. Nyé ká jóʼǒ dwéh médíbé nó, dwéʼ nyé mǎ. Gó ósâ nó wá, gǒ kaʼlé ó, nye má mé siʼe ɨ́ lʉ̂.»

²¹Mʉ̌r sá abîr ó, ebébe, lé ntáŋaa nye ɨ́ nkul. Nyɨɛ ntáŋaa lé ɨ́ nkul lɨ́ esâ bísyɛ́ɛla bi dí ɨ́ mbɨa bí.