Read Koonzime Rôm 13 Bible Online

Rôm 13 - Koonzime bible

Rôm 13

¹Mʉr nyɨnyɛ̂h, nye sâʼ ojwɨ́ɨ́ ó sí yé mejóʼo, ebě, nkul jwɨ́ɨ nyɨnyɛ̂h, nye ó nyaá Nzyɛ̌m á tyêl nyɨ́. Bʉr o dí e jwɨ́ɨ bá, Nzyɛ̌m ó b'á tyêl bê.

²Nó ó, mʉr dí egbɔba e njwɨ́ɨ nyá, nyě kʉ́ lwímla ó e sá Nzyɛ̌m á tyêl yɨ́. Baá dí esâ nó bá, bɨ́haá, bé dáʼré ó, bintɨ́ʼá ɨ́ menyʉ́l mɔ́ɔ́.

³Baá dí esâ émbɨa bá, bé abe e bʉ́á ɨ́ miléme lɨ́ etyɛ̂b ɨ́ mempǒm mé ójwɨ́ɨ. Tó kœb ó, bʉr o dí esâ ébébe bá, bé ó dí e bʉ́á nyaá ɨ́ milémé myɔ́ɔ́. Nzê gǒ gwɨ́m ó, mipahlá mí lémé myô, myé díʼee ɨ́ pyɛɛɛ jɔʼ yɨ́yɛ̂h ɨ́ míh mé ójwɨ́ɨ baá ɛ̌? Sáʼ émbɨa bé, bé nkʉ̂ sêʼle gô!

⁴Ebě, njwɨ́ɨ, nye ó syɛ̂l mesâ mé Nzyɛ̌m dí lɨ́ esú lé ésâ gó embɨa nyá. Bɨ́n sí sâ ébébe nó, kpɛ́yɨ́ɨ́ gá njwɨ́ɨ ɨ́ jɔʼ yaá, ebě, nkul jwɨ́ɨ nyé á bi nyɨ́, nye á bé abi nyé dwêh. Nye ó syɛ̂l mesâ mé Nzyɛ̌m, mʉr dí elɛ̂ʼle nkpáa mé Nzyɛ̌m nyá. Nye ó mʉr mpɔlá, le edwe bʉ̂r o dí esâ ébébe bá bintɨ́ʼá.

⁵Sɨ́ǎ yaá ó bɨ́n jálá le esâ ójwɨ́ɨ mejóʼo yɨ́. Abuú bě njɨ lɨ́ ekpɛ́ɛ nkpáa le bintɨ́ʼá mé Nzyɛ̌m. Bɨ̌n sá ntémé nye mejóʼo maá ó, ebe bɨ́n dí egwɨ̂m ó, mipahlá mí lémé mín díʼee myaá mi dí ɨ́ pyɛɛɛ mí.

⁶Sɨ́ǎ yaá ntémé ó bɨ́n dí ejánǎ tœ́a yɨ́, ebě, Nzyɛ̌m á si tyêl ojwɨ́ɨ ɨ́ bidǐ byɔ́ɔ́ lɨ́ esú ó, bé tírwaa e syɛ́ɛ́ yaá.

⁷Jɛ́náá gá bʉr bɨ́bɛ̂h mempʉ́lá bɨ́n dí bé e mé má. Bwámáá gá bitœ́a kwá bʉr o dí ebɛ́ma byé bá. Jwááwáá gá baá o dí ejala e dúu bá. Gúmláá gá baá o dí ejala e kûm bá.

⁸Adi gá nyʉ́ʉ́ mʉ̂r e mpʉ́lá. Damá jóʼo nó, bɨ̌n bé yɨ́ɛ ó e mpʉ́lá bɨ́n jálá le ejɨjána nyɨ́. Nye ó kpɛ̌l páʼ nyɨ́n. Mʉr dí ekpɛl mʉ̂r njoo yé nyá, nyɨ́ baʼle métié mé Nzyɛ̌m mɨ́mɛ̂h.

⁹Metié mé Nzyɛ̌m, mé dí elɛ́ɛ ó: Asâ médyɛ̂n. Ajʉ̂ mʉ̂r. Adíbe. Agwɨ̂m sá yé onkán má, ndu e mʉ́ʉ́ mɨ́mɛ̂h, mé tó syɛŋa ó, lɨ́ etié egwár lɨ̂ʼ tʉ́ŋlʉ̌: Kpɛlɨɨ mɨ́ɔɔ́ gǒ mʉr mpʉ gó kpɛ́l gó mʉr tɨ̂ʼ yɨ́.

¹⁰Mʉr dí ekpɛl mʉ̂r njoo yé nyá, nyé abe e nkul esâ nyé ebébe. Gó kpɛ́l bʉ̂r nó, lɛ́ɛ́, gʉ́ baʼle métié mɨ́mɛ̂h mbɨ̂mbɨá.

¹¹Sáʼ gá nó, ebě, bɨ̌n bé lɨ́ egʉ́ǎ jɔʼ mɨ́ná gá mû tɨ̂ʼ yɨ́. Ɨ́ báánâ, yé ó jɔʼ bɨ́n jálá le ejɨma ɨ́ bijô yɨ́. Jɔ̌ʼ Nzyɛ̌m á boo pɛ̂h ó, nyě tǐʼ ó mɨ́ná gá yɨ́, yé mû ó kúno epyâl. Yé akǎ cɛrǎ mpʉ yé á nyɛɛ be ɨ́ jɔʼ mɨ́ná bé á nyɛɛ bûʼla gá yɨ́.

¹²Pum mû ó téme elaa; móhó lɨ́ esîhle. Mɨná bírɨɨ gá bisyɛ́ɛla bi dí esáŋɔɔ lɨ́ edúrʉ́ʉ́ bí. Mɨná bwáraa gá mimbór mí dɔ̂m lɨ́ esú ó, mɨná lwímlaa gá e myé ɨ́ móhó.

¹³Mɨná, bʉr o dí etye ɨ́ móhó bá, mɨná tíʼaa gá mpʉ dí ejala yɨ́. Mɨná bé ayɨ́ lɔ̂ʼwa gá lɨ́ ede méde, nkʉ̂ puro ményoʼ, nkʉ̂ lœʼ ményʉ́l gá mɨ́ná ɨ́ nzɨ̌ bijoó, nkʉ̂ sâ bímolá nzam le ekomo. Mɨná bé ayɨ́ kǎ gœ́a páʼ gá nyɨ́ná, nkʉ̂ síila páʼ gá nyɨ́ná.

¹⁴Diʼee gá ɨ́ mpúhlá le Tî Yésʉs-Krîst. Bwáráá gá nye mpʉ̌ kán. Atoŋlo gá mpʉ bɨ́n dí e nkul elóŋlo bísyɛ́ɛla bí njwɨr myâ wɨ́ná yɨ́.