Read Koonzime Rôm 14 Bible Online

Rôm 14 - Koonzime bible

Rôm 14

¹Beŋlaa gá mɨ́ɔɔ́ dína apǎ nʉa pîm ɨ́ búʼó nyá. Búʼó yé le yaá yɨ́n, byé ósyɛ́ɛla nó, apére gá mekǎn e né ɨ́ lɔ̌b bwá mílɔ̌b mi dí epahlɔɔ mímbi mimbi tʉ́ŋlʉ̌ Mbɛ̌r-Nzyɛ̌m mí.

²Ɨ́ lɔ̌b méde, nyâʼ mʉ̂r, nyě beé ó, nye óbɛ̌m dě dœʼ yɨ́yɛ̂h, agbah métié mé Nzyɛ̌m. Nyʉ́ʉ́ mʉ̂r dí agwá be e búʼó nyá, jaá dɨdě njɨ micwíʼ.

³Mʉr waá dí ede mímbi méde mímyɛ̂h nyá, nyě sá apyêh búʼó mʉ̂r dí eti tír nyá. Mʉr dí eti tír nyá, nyě sá adwe baá o dí ede mímbi méde mɨ́mɛ̂h bá mebě, ebě, Nzyɛ̌m á si beŋle mɨ́ɔɔ́ wɨ́n waá.

⁴Gua, go nzé, gó dí edwe syɛ̂l mesâ nye onkán mebě nɨ̌? Nyé sí sâ ébébe nó, njwɨ́ɨ wé ó jálá le elɛ̂ʼle nyé lǎ. Nyé sí sâ émbɨa nó, njwɨ́ɨ wé ntémé ó jálá le elɛ̂ʼle nyé lǎ. Nye átwe yɨ́ɛ twêʼ, ebě, Tî Yésʉs, nyě e nkul esúʼo nyé lɨ́ esú ó, nye ayɨ́ twe.

⁵Bâʼ bʉ̂r, bé jwɨʼ ó, myúú mímóhó, myé lɨ́ elaa myúú ɨ́ dúu ɨ́ míh mé Nzyɛ̌m. Bʉ́ʉ́ bʉ̂r bɨ́ɛ jwɨjwɨʼ ó, mimóhó mímyɛ̂h, myé ó mbi ngwár ɨ́ mbeá wé. Bisyɛ́ɛla bi mʉ̂r nyɨnyɛ̂h, byé ɨ́ jala le eduduho ó, lɨ́ otîtyěl o mípahlá mí lémé wé.

⁶Mʉr dí ebee ó, gúú móhó, wê nye ó, sá dí ti yɨ́ nyá, nyě sá nó ó, nye gúmlaa Tî Yésʉs tɨ̂. Mʉr dí edě sá yɨ́yɛ̂h nyá, nye lɨ́ egúmlo Tî Yésʉs tɨ̂, ebě, nye lɨ́ edwě Nzyɛ̌m nzyǒo ɨ́ sá nyé dí ede yɨ́. Waá dí eti yʉ́ʉ́ dœʼ nyá, nyě sá nó ó, nye nkʉ̂ gúmlo Tî Yésʉs e nzɨ̌ biti nyaá. Nye ntémé, nye lɨ́ edwě Nzyɛ̌m nzyǒo ɨ́ dœʼ nyɨ́ɛ dí ekam éde yɨ́.

⁷Abe e mʉr ngwár ɨ́ sɔ́má gá yɨ́ná dí etiʼe, nkʉ̂ dwe, lɨ́ esú lé, nye mʉr tɨ̂.

⁸Tíl mélú mɨ́ná gá dína ɨ́ twiʼ yɨ́, yé e nyɔm lɨ́ esú ó, mɨná gúmlaa Tî Yésʉs e tɨ̂. Jɔʼ mɨ́ná dí edwe gá yɨ́, mɨná dwé gá ó, mɨná gúmlaa gá nye ntémé. Nó ó, mɨná damá tiʼe gá, nkʉ̂ ntémé dwe, mɨná óbɛ̂h gúmó gá ó e Tî Yésʉs.

⁹Ebě, Krîst á si dwe, nzě pah, ó nye díʼee Njwɨ́ɨ ɨ́ páʼ bʉ̂r o dí ɨ́ twiʼ bá, ndu e baá o mû sí dwe bá.

¹⁰Ɨ́ mpʉ yé dí nó yɨ́, gua, go nzé, gua mʉr dí edwe mɨ́ɔɔ́ gǒ mʉr mebě nɨ̌? Gua ntémé, go nzé, gua mʉr dí epyêh mɨ́ɔɔ́ gǒ mʉ̌r nɨ̌? Mɨná gá óbɛ̂h, bé ótó tyɛ̂b gá ɨ́ mpǒm diá tîʼ milɔ̌b gá wɨ́ná, Nzyɛ̌m.

¹¹Ebě, yê cɛmá ó: Dâ Nzyɛ̌m káálé ó: «Yé bé me dína ó, ɨ́ twiʼ nó, me ókʉ́ bánǎ sâ ó, mʉr nyɨnyɛ̂h bɨ́ʼɨɨ mebóó sí ɨ́ mpǒm nyǎm. Mʉr nyɨnyɛ̂h gúmlo mê, mɛm, mʉr dí Nzyɛ̌m nyá.»

¹²Nó yé lɛ́ʼlé ó, mʉr nyɨnyɛ̂h ɨ́ sɔ́má gá yɨ́ná ókar ɨ́ míh mé Nzyɛ̌m.

¹³Ɨ́ mpʉ yé dí nó yɨ́, mɨná gwáʼaa gá edweela mébě páʼ gá nyɨ́ná. Gbáʼ gá nkul. Ayɨ́ sâ gá sá dí e nkul esâ ó, mɨ́ɔɔ́ wɨ́n bɨ́mɨɨ ebɔ̌ʼ yɨ́.

¹⁴Ɨ́ mpúhlá nyɨ́h e Tî Yésʉs, me lɨ́ egʉ́a ntémé ó, ntʉ̌ dœʼ yé mʉr tɨ̂ʼ dí e nkul elœ̌ʼ lémé mʉ̂r. Sâ gwár, mʉr dí edě dœʼ yaá, nyɨɛ lɨ́ ejwɨʼ ó, yé ólœ̌ʼ lémé wé nyá, yé ó tyeetye: dœʼ yaá, yé ó lwǎʼ ɨ́ lémé mʉ̂r waá.

¹⁵Yé bé sá gó dí ede yɨ́, yé óbɛ̌m ntɨ̂ʼ mɨ́ʉ̌ ɨ́ nkǒ páʼ búʼó nó, go ó, gʉ́ bɔ́ʼa e mpaŋ nzɨ́ ɨ́ jɔʼ gó dí edě sâ yaá yɨ́ ó tɨ̂ʼ yɨ́. Gó alɛ̂ʼle nyé kpɛ̌l ɨ́ kʉ̌ tyen gô. Sá asâ ó, mʉ̌r Krîst á dwe, búra e né nyá, dímɨɨ ɨ́ nkɔb bʉr ɨ́ lɔ̌b mbi méde gó dí ede wɨ́.

¹⁶Syɛ́ɛla bɨ́n bɨɛ dí ebee ó, yé ɨ́ jala le esáŋɔɔ yɨ́, yé bé bʉr, bé óswêʼ míé mɨ́n e tɨ̂ʼ nó, anzoó sâ gá yê!

¹⁷Mpóʼo mé Nzyɛ̌m, nyé abe mpóʼo mede le menyoʼ. Nye ó mpóʼo otîtyěl, mepyɛbla, ndu e bisʉhʉʉ mɨ́ná dí ebi gá e nzɨ̌ Sísǐm mé Nzyɛ̌m bí.

¹⁸Ebě, mʉr dí eséǎ Yésʉs-Krîst syɛ́ɛ́ ɨ́ mbi waá nyá, Nzyɛ̌m, nye lɨ́ ebee nyé mbɨ̂mbɨá. Bʉr ntémé kam nyê.

¹⁹Mpʉ yé dí nó yɨ́, mɨná gbâʼ gá nkul lɨ́ esâ bísyɛ́ɛla bi dí esâ ó, sɔ́má gá yɨ́ná tíʼaa ɨ́ mepyɛbla bí, ti e byaá ngá sâ ó, bʉ́ʉ́ bʉ̂r, bé gwɨ́aa ɨ́ búʼó bí!

²⁰Syɛ́ɛ́ Nzyɛ̌m á séa yɨ́, mʉ̌r sá andáma nyé yǎ ɨ́ lɔ̌b méde! Yê tyeetye ó, yé abe e mede me dí lwǎʼ ɨ́ míh mé Nzyɛ̌m. Mé bɨ́bébé ó, ɨ́ jɔ̌ʼ ndéá méde waá, dí esâ ó, mʉr dúmaa lɨ́ ebébe yɨ́.

²¹Yê mbɨ̂mbɨá ɨ́ páʼ gô ó, gǒ sá ade tír, nkʉ̂ menyoʼ, nkʉ̂ sâ syɛ́ɛla yɨ́yɛ̂h dí e nkul edulo mɨ́ʉ̌ ó, nye dúmaa lɨ́ ebébe yɨ́.

²²Sá gó mû sí bûʼla yɨ́, baʼlaa yé ɨ́ lémé gô tʉ́ŋlʉ̌. Bɨ̌n e Nzyɛ̌m obá nkʉ̂ gʉ́a yê. Nzyɛ̌m ósʉ métyɛʼ me mpóm mé ó, ɨ́ mʉr dí edû kʉ̌ tyen mʉ̂r tɨ̂ʼ á pa kam wɨ́ nyá. Mʉr waá, nye ábeě sá nyé ójʉba e tɨ̂ʼ ɨ́ kʉ̌ tyen wé waá.

²³Tó kœb ó, mʉ̂r ódě dœʼ e mesónó ɨ́ léme nó, nye óbi mébě ɨ́ míh mé Nzyɛ̌m ɨ́ ndéá waá, ebě, wé aduho ɨ́ búʼó yé. Ebě, syɛ́ɛla yɨ́yɛ̂h dí aduho ɨ́ búʼó yô yɨ́, yê go ó syóm.