Read Koonzime Rôm 15 Bible Online

Rôm 15 - Koonzime bible

Rôm 15

¹Mɨná gâ, bʉr o b'á nʉa pîm ɨ́ búʼó bá, bé ɨ́ jala le edûhwo bʉ̂r o dí e búʼó ɨ́ tyɛʼ tyɛʼ bá. Mɨná bé ajala le esáa gá minyɔm gá míná.

²Mʉr nyɨnyɛ̂h ɨ́ sɔ́má gá yɨ́ná, nye sâʼ syɛ́ɛla mɨ́ɔɔ́ wé mʉr ókpɛl yɨ́. Nye sâʼ yaá yé óbɛ̌m be e nyɔm ɨ́ páʼ mɨ́ɔɔ́ waá ó, nye gwɨ́aa ɨ́ búʼó yɨ́!

³Damá jóʼǒ Krîst mʉr tɨ̂, nye á bé asáǎ nyɔm wé. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Baányâ-melwɨ́ɨ dí elwɨlwɨ́ɨ gó bá, bé mû kǎ lwɨ́ɨ ó, me.»

⁴Yé á cɛmɔɔ nó ó, lɨ́ esú lé écɨ̂l mɨ́ná gâ, jwɨʼ gwár e gwár e mpʉ̌ sá yɨ́yɛ̂h, yé á cɛmɔɔ ɨ́ Mekaná mé Nzyɛ̌m yɨ́. Mekaná mé, mé lɨ́ ecɨ̂l mɨ́ná gâ, ó milémé gá míná nkʉ̂ lóno ɨ́ mpûʼla. Myé lʉ́lónó ɨ́ mpûʼla ó, ɨ́ lɔ̌b nkûl mékaná mé dí egbâ mɨ́ná gá ɨ́ miléme nyɨ́, le bíhwó mɨ́ná dí esâ gá nyɨ́.

⁵Nzyɛ̌m, mʉr dí egbâ mɨ́ná gá nkul ɨ́ miléme, waá dí esâ ó, mɨná sâʼ gá bíhwó nyá, nye tyɛ́bɨɨ bɨ̌n ɨ́ miléme, ó bɨ̌n díʼee e mbǐ pahlá ngwár, mpʉ̌ Yésʉs-Krîst ngá tɨ́e bɨ́n yɨ́,

⁶lɨ́ esú ó, bɨ̌n gúmlaa waá dí Nzyɛ̌m mé Tî gá wɨ́ná, Yésʉs-Krîst, waá dí Sɔ́ŋ wé nyá, twíí mpwár!

⁷Nwɨnwɨɨlaa gá páʼ nyɨ́n mpʉ̌ Yésʉs-Krîst á nʉa bɨ̌n yɨ́. Sáʼ gá nó lɨ́ esú lé édwě Nzyɛ̌m kûm.

⁸Me lɨ́ eboʼlo bɨ́n lɔ́ɔ́ wɨ̂: Krîst á si dwir nye mʉr tɨ̂ʼ syɛ̂l mesâ lɨ́ esú lɨ́h, Yúden. Nye á sâ nó ó, lɨ́ esú lé élɛ̂ʼle bɨ́h mpʉ̌ Nzyɛ̌m dí mʉr otyeetye yɨ́. Nó ó nyé á lɨl menkɛ̌ʼ Nzyɛ̌m á dwe bimpám bíh má yɨ́.

⁹Nye á nze séa ntémé ó, lɨ́ esú é bíkúl bíswîh, ó bé gʉ́ŋaa mpʉ̌ Nzyɛ̌m dí ejɨ̂ʼ bʉ̂r nkoó yɨ́, bé nkʉ̂ gúmlo nyé tɨ̂. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Sá tɨ̂ʼ ó mé ngá gúmlo gó témé bikûl bi dí abe óYúden bí yɨ́. Me ódyɛɛ gó mejéme ɨ́ dúú díé lô.

¹⁰Nzyɛ̌m lɛ́ɛ́ ntémé ó: Bɨ̌n bʉr o dí abe óYúden bá, sohaa gâ, bɨ̌n e bʉr o mé Nzyɛ̌m.

¹¹Yé ntémé, yê cɛmá ó: Gúmláá gá Dâ Nzyɛ̌m, bɨ̌n, bʉr o mésí mɨ́mɛ̂h. Séʼláá gá nye, bɨ̌n, bikúl bíbyɛ̂h.

¹²Ngwíha milɔ̌b Ésayie á lɛ́ɛ ntémé ó: Nyʉ́ʉ́ mʉ̂r óbyɛ̂l ɨ́ mpóʼo mé Yesê mpʉ̌ ntoʼdu pɨ́páh ɨ́ kǔm lɨ́ yé á twɛlɔɔ yɨ́. Nye ónzě di njwɨ́ɨ ɨ́ páʼ bʉ̂r o dí abe óYúden bá. Milémé myɔ́ɔ́, myé ólóno ɨ́ mpûʼla ó, ebě, bé lɨ́ ebóno nyê.

¹³Nó ó, Nzyɛ̌m dí egbâ bʉ̂r mpûʼla ɨ́ miléme nyá, nye tyɛ́bɨɨ bɨ̌n ɨ́ miléme, ó bɨ̌n sóhaa ɨ́ jɔʼ yɨ́yɛ̂h. Nye lóŋlaa bɨ̌n mepyɛbla ɨ́ miléme, ɨ́ nkul búʼó yɨ́n. Nó ó mílémé mín ngá lóno ɨ́ mpûʼla e nkul Sísǐm wé yɨ́.

¹⁴Bɨ́ɔɔ́ bâm! Okɛ́l bâm! Mɛm mʉr tɨ̂, me lɨ́ egʉ́a mbɨ̂mbɨá ó, bɨ̌n bé ó lwɨ́ŋlá e mpam. Bɨ̌n bé lɨ́ egʉ́a bísá bíbyɛ̂h. Le ntémé ó, bɨ̌n bé e nkul edwidweela métwɨ́ɨ́ páʼ nyɨ́n.

¹⁵Damá jóʼo nó, mě cɛmá bɨ́n mekaná mâʼ ó e gúú mbi ményan ɨ́ léme. Byúú bípéh bí tɨ̂, byê cɛmɔɔ ó, lɨ́ esú lé éjɨm bítɔŋlá bín. Mě cɛmá bɨ́n nó ó, ebě, Nzyɛ̌m, nye lɨ́ elɛ̂ʼle mé mpam.

¹⁶Nye á bě sí sʉ mé metyɛʼ me mpóm, ó me díʼee syɛ̂l mesâ mé Yésʉs-Krîst lɨ́ esú é bʉ̂r o dí abe óYúden bá. Me mû ó mpʉ pára dí eliŋ bʉ̂r baá ndwéá Nzyɛ̌m dí ekpɛl, waá Sísǐm wé, wé á pubo wɨ́ nyá. Syɛ́ɛ́ pára mé dí esâ yɨ́, yé ó syɛ́ɛ́ étúnǒ Mbɨambɨa Lɔ́ɔ dí eduho kwá mé Nzyɛ̌m wɨ́.

¹⁷Nó ó, ɨ́ mpúhlá nyɨ́h e Yésʉs-Krîst, mě e nkul enkʉ́na ɨ́ lɔ̌b bísyɛ́ɛ́ mé dí eséǎ Nzyɛ̌m bí.

¹⁸Me álwǐb sá swîh, njɨ̌ syɛ́ɛ́ Yésʉs-Krîst á séa e nzɨ̌ nyǎm, ó me dúlaa bʉr o dí abe óYúden bá, nze e bé ɨ́ míh mé Nzyɛ̌m yɨ́. Bé mû ó lɨ́ esâ nyé mejóʼo ɨ́ lɔ̌b bílwǐb mé á lwilwib bí byaá, ti e bisyɛ́ɛla mé á sɨ̂sa bí.

¹⁹Me á sɨséa ntémé ó e mesimá, le bisá bí ékâm, ti e bisyɛ́ɛla bi nkûl Sísǐm mé Nzyɛ̌m wé á sâ bí. Me á nze túno Mbɨambɨa Lɔ́ɔ dí edumo e Yésʉs-Krîst wɨ́ ó, bigúmó bíbyɛ̂h, táare ɨ́ Yerʉ́zalɛm, tó kumǒ Ilirikɔ̂m.

²⁰Léme, wé á be me ɨ́ báná báná ó, me túnaa Mbɨambɨa Lɔ́ɔ ɨ́ bigúmó bíbyɛ̂h bʉ̂r dína apǎ jóʼo bé lɨ́ etwóolo díé mé Yésʉs-Krîst tɨ̂ʼ bí. Me á bé akpɛl étúno wé kwá bʉr o b'á nyɛɛ dweŋɔɔ lɛ́ʼlá waá bá. Bʉr, bé ámû lɛ́ɛ, dumo e me ó, mɛm á jaa susumo mimbɛ̌r ó, njɨ ɨ́ mempɔɔnʉ mé onkán. Mě kpɛl ó, yé díʼee ɨ́ wâm pâʼ mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó:

²¹Bʉr o b'á be alɛ́ɔɔ lʉ́ʉ́ ékǎn dí edumo e Nzyɛ̌m lɨ́ bá, bé ó ngá bee ɨ́ sʉ́lʉ́lʉ́. Baá bé á be apǎ jóʼo yʉ́ʉ́ sɔ̂ʼ dí edumo e né yɨ́ bá, bɨ́ɛ ó ngá jóʼo.

²²Sá tɨ̂ʼ ó mé á be akoʼo lɨ́ enzě bee bɨ́n, mɛm yɨ́ɛ e gwɨ́má ésâ nó ɨ́ bijɔʼ ɨ́ buo buo yɨ́.

²³Táare ɨ́ mimbú mí píhe, me á si kʉ gwɨ̂m enze, lɨ́ enzě bee bɨ́n. Sâ gwár, yé á bé abána. Tó kœb ó, ɨ́ báánâ, syɛ́ɛ́ yâm, yɨ́ síe ɨ́ bipéh bí sí bî.

²⁴Me lɨ́ ebúʼla ó, me óbee bɨ́n ɨ́ jɔʼ mé ólaa lɨ́ etô Panyá yɨ́. Me ódi kwá nyɨ́n bá tîtííǎ lɨ́ esú lé émo e bɨ̌n. Píe tɨ̂, mé olaa. Nó ó, mě kpɛ̌l ó, bɨ̌n súʼaa me ɨ́ tyen yâm yaá.

²⁵Nó ó, ɨ́ báánâ, me páa nyɛɛ́ tô Yerʉ́zalɛm, lɨ́ etó súʼo óbûʼla o dí gʉ̂ʼ bá,

²⁶ebě, obûʼla ó sí Masedónia ndu e yaá Akayɨ̂, bé á tíʼe ɨ́ miléme ó, bé syɛŋ ó, mingúlá lɨ́ esú lé óbûʼla ó Yerʉ́zalɛm dí lɨ́ entéʼe bá.

²⁷Bé bʉr o tɨ̂, bé á si jóʼo bisʉhʉʉ lɨ́ esâ nó. Syɛ́ɛla yaá, yé óbe ntémé ó mpʉ mpʉ́lá bé á jala le ejána nyɨ́. OYúden baá ó b'á nyɛɛ kɛm bʉr o dí abe óYúden bá lɨ́ esú ó, bé bíʼee metyɛʼ me mpóm mé Nzyɛ̌m. Nó ó, ɨ́ báánâ, yé jala ó, bʉr o dí abe óYúden bá, bé súʼaa bɨ́ɛ, lɨ́ edwe bé bisâ bi dí esâ bé sɔ́ɔlʉ bí.

²⁸Nó ɨ́ jɔʼ mé óbe, me mû sí tô bé e mingúlá myaá, le egʉ́a ó, bɨ́ bi myé yɨ́, mé obúla, tô Panyá, cɨɨ gʉ̂ʼ kwá nyɨ́n yɨ́.

²⁹Me lɨ́ egʉ́a ó, pyálá mé ópyâl kwá nyɨ́n yɨ́, me óbe ó e metyɛʼ me mpóm mé Yésʉs-Krîst.

³⁰Nó ó, bɨ́ɔɔ́ bâm, sá mé dí edî bɨ́n ɨ́ díé mé Tî gá wɨ́ná, Yésʉs-Krîst, le ɨ́ kpɛ̌l Sísǐm mé Nzyɛ̌m dí egbâ ɨ́ milémé gá míná yɨ́, yé ó, mɨná lwímlaa gá ɨ́ nzɨ̌ minjɨʼla lɨ́ esú lâm.

³¹Jɨʼlaa gá ó, mě sá abil ɨ́ mebó mé bʉ̂r ó Yʉ́da dí adyɛ̂ʼwo e Nzyɛ̌m bá. Jɨʼlaa gá ntémé ó, obûʼla ó Yerʉ́zalɛm nʉ́aa mingúlá mé ótô bé e myé mí mbɨ̂mbɨá.

³²Nó ó mé ngá pyâl kwár nyɨ́n lwɨ́ŋlá e bisʉhʉʉ yɨ́, Nzyɛ̌m ókpɛl nó, me nkʉ̂ gʉ́a gbala mbɨ̂mbɨá páʼ nyɨ́n.

³³Nzyɛ̌m dí egbâ mɨ́ná gá mepyɛbla ɨ́ miléme nyá, nye díʼee e bɨ̌n óbɛ̂h. Amɛn.