Read Koonzime Rôm 2 Bible Online

Rôm 2 - Koonzime bible

Rôm 2

¹Nó ó, gua, mʉr dí edwe bʉ̂r mebě nyá, gó abe e nkul ekar ɨ́ míh mé Nzyɛ̌m. Jɔʼ gó dwé bʉ̂r mebě yɨ́, num gô, wé lɨ́ edwe ntémé go mʉr tɨ̂ʼ mebě, ebě, gua yɨ́ɛ tîʼ milɔ̌b, gǒ jaá sâ ntémé ó, njɨ bisyɛ́ɛla bimpwár byaá.

²Mɨná bé lɨ́ ekʉ́ gʉ́a gá ɨ́ páʼ bʉ̂r o dí esâ mímbi bísyɛ́ɛla byaá bá ó, Nzyɛ̌m, nye lɨ́ edwe bé mebě tɨ̂. Nyě sá nó ó lɨ́ otyeetye.

³Gua mʉr dí edwe bʉ́ʉ́ bʉ̂r mebě ɨ́ bisyɛ́ɛla bé dí esâ bí nyá, go ntémé jaá sâ ó njɨ bisyɛ́ɛla bimpwár byaá. Gǒ bee nyá? Nzê go ókɨ̂ŋ tíʼá mílɔ̌b mé Nzyɛ̌m?

⁴Nzyɛ̌m nyɨɛ yɨ́ɛ sí lɛ̂ʼle gó mpam nyé ɨ́ ntʉʉʉ́. Nye ntémé á si bee misyóm myô, alwib. Nye á si bu dûhwo myê. Nzê go mû ó lɨ́ epyêh bísyɛ́ɛla byé byaá ɛ́? Nzê gó agʉ́ǎ bím émbɨa nyé á sâ go lɨ́ ɛ́? Embɨa lé, lé ɨ́ jala le edǐb lémé gô nzɨ̌ etúmǒ koo le mebébe mô, le edwirǎ léme.

⁵Jɔʼ yɨ́yɛ̂h gó dí esâ élele é léme, nkʉ̂ bene édwirǎ léme yɨ́, go náǎ ó, lɨ́ ebul bíbaa bí ébébě Nzyɛ̌m ngá niniʼe gó bí. Byé ókǎ láŋɔɔ ó, ɨ́ móhó Nzyɛ̌m ólɛ̂ʼle bʉ̂r ɨ́ buo buo nkpaa nyé wɨ́. Dʉ́o laá ntémé ó nyé ngá lɛ̂ʼle mʉ̂r nyɨnyɛ̂h mpʉ nyé dí etíʼe bʉ̂r milɔ̌b lɨ́ otîtyěl yɨ́.

⁶Nye ójána mʉ̂r nyɨnyɛ̂h ó, dû mpʉ bísyɛ́ɛla byé dí yɨ́.

⁷Bâʼ bʉ̂r, bé sáá ó kûm, le dúu le twiʼ dí asíesie yɨ́. Bé lɨ́ edûhwǒ sɔ́ɔlʉ waá e bíhwó, lɨ́ esâ mímpaŋ bísyɛ́ɛla. Bé ó baá Nzyɛ̌m ngá dwě twǐʼ njʉ̌m dǐ bá.

⁸Bʉ́ʉ́ bʉ̂r, bé lɨ́ epɨra páʼ nyɔ́ɔ́. Bé akam ótyeetye. Bé jaá dû ó, njɨ kʉ̌ tyen ónzyɛ́h ónzyɛ́h. Bɨ́haá, bé ó baá Nzyɛ̌m óbuú lɛ̂ʼle nkpáa nyé bá.

⁹Bʉr bɨ́bɛ̂h o dí esâ syóm bá, bé ósia e mitúú e mindɛ̌l, táare le oYúden, kala e baá o dí abe óYúden bá.

¹⁰Bʉr bɨ́bɛ̂h o dí esâ émbɨa bá bɨɛ, Nzyɛ̌m ódwe bé kûm le dúu. Nye ógbâ bé mepyɛbla ɨ́ miléme. Nye ódwe ó, táare le oYúden, tó kala e baá o dí abe óYúden bá.

¹¹Ebě, Nzyɛ̌m, nyé abe lɨ́ edwáawo bʉ̂r mempǒm.

¹²Osyɛ̂l o mísyóm o b'á be atyélɔɔ metié mé Moyɨ̂z bá, bé ódîm ɨ́ nkɔb bʉr. Sâ gwár, bé ádwe ɨ́ lɔ̌b métié Moyɨ̂z á tyêl lɨ́ esú lé óYúden má. OYúden bɨ́ɛ, bʉr o b'á bi metié mé Moyɨ̂z bá, bé ódweŋɔɔ mébě ó, dû mpʉ métié maá dí etɨ́e yɨ́.

¹³Mʉr ábi nkâm ɨ́ míh mé Nzyɛ̌m ɨ́ lɔ̌b njóʼá métié wé omér. Waá dí esâ mpʉ métié maá dí etɨ́e yɨ́ nyá, nyɨ́haá ó ngá bi nkâm ɨ́ míh mé Nzyɛ̌m.

¹⁴Ɨ́ nkǒ páʼ bʉ̂r o dí abe óYúden, baá o dí agʉ́a métié mé Moyɨ̂z bá, bɨ́ɛ bé ósâ mpʉ métié maá dí etɨ́e yɨ́ nó, yé óbe bé ó, mpʉ̌ sá lɛ́ɛ́, bé e metié maá micɛmá ɨ́ milémé myɔ́ɔ́ tʉ́ŋlʉ̌.

¹⁵Jɔʼ bé dí esâ nó yɨ́, bé lɛ́ʼlé ó, sá métié dí etɨ́e yɨ́, yé ó cɛmá ɨ́ milémé myɔ́ɔ́. Mipahlá mílémé myɔ́ɔ́, myé lɨ́ eboʼlo ntémé nó. Myé nwáhlé ɨ́ bîʼ bíjɔʼ ó, bé á si jéʼe esâ. Ɨ́ byúú bíjɔʼ, myé lɛ́ʼlé bé ó, bé á si gʉ́a esâ.

¹⁶Sá mé dí elwib wâʼ yɨ̂, yé ónyɨ̂n ɨ́ ponó, ɨ́ móhó Nzyɛ̌m ngá tíʼe bʉ̂r milɔ̌b wɨ́. Nye ósâ nó ó, ɨ́ nzɨ̌ mé Yésʉs-Krîst. Bisâ bi dí bʉr baá solá ɨ́ miléme bí, nye ólɛ̂ʼle byé ɨ́ kpɛŋlɛm. Mbɨambɨa Lɔ́ɔ mé dí etúno wɨ́, wé ó nó.

¹⁷Yê nyá, gua, mʉr dí ejébɔɔ Yúden nyá? Gǒ dídyɛ́ʼwó ó e metié. Gǒ jaá nkʉ́nǎ njɨ ó, go ó dí mʉr mé Nzyɛ̌m.

¹⁸Guá lɨ́lɛ́ɛ́ ó mpʉ métié maá, mé á bu tɨ́e go yɨ́, go mû ó lɨ́ ekʉ́ gʉ́ǎ sá Nzyɛ̌m dí egwɨ̂m ó, go sâʼ yɨ́. Yé lɨ́ edwe gó nzɨ̌ epɛ̂h sá yɨ́yɛ̂h dí ɨ́ mbɨa yɨ́.

¹⁹Go jwɨʼ ó, go ó jálá le elɛ̂ʼle báántím nzɨ̌. Nkʉ̂ ó, go ó jálá le ekʉn bʉ̂r o dí lɨ́ edúrʉ́ʉ́ bá nzɨ̌.

²⁰Gǒ lɛ́ɛ́ ntémé ó, go ó jálá le etwîn bígʉ́ʼ milʉ̂, le elɛ̂ʼle bwá ó ntwǒm. Gǒ lɨ́lɛ́ɛ́ ó, ngwɨ́á métié maá, wɨ́ dwe gó ocwóó le otyeetye wɨ́wɛ̂h.

²¹Gua yɨ́ɛ lɨ́ ekʉ́ dwe bʉ́ʉ́ bʉ̂r milɛ́ʼlá, á go ókǎ kâr élɛ̂ʼle gó mʉr tɨ̂ʼ sɔ̂ʼ ɨ́ yé ɛ́? Gǒ túnó ɨ́ bijɔʼ bíbyɛ̂h ó, bʉr gwáʼaa díbe. Á go mʉr tɨ̂ʼ díbé ɨ́ yé?

²²Gǒ lɨ́lɛ́ɛ́ ó: «Asâ gá medyɛ̂n.» Á guǎ sɨ́sá mé ɨ́ yé? Gua mʉr dí ebene bíkpɛʼkpɛ̂ʼ bí ónzyɛ̌m nyá, go lɨ́ eninî ɨ́ nzaá bikpɛʼkpɛ̂ʼ bí ónzyɛ̌m, le edíbe míndwéá bʉ̂r dí edwe byé mí ɨ́ yé ɛ́?

²³Gua mʉr dí ebuú nkʉ́na ɨ́ mpʉ gó á tyélɔɔ metié yɨ́ nyá, gǒ kǎ gbah métié maá ɨ́ yé? Gua yɨ́ɛ lɨ́ esâ Nzyɛ̌m bisá bí ésɔ́m!

²⁴Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Bʉr o dí abe ɨ́ kúl óYúden bá, bé sá Nzyɛ̌m nkěh ó ɨ́ lɔ̌b wɨ́n.»

²⁵Tíʼá mpʉ́n, wé e nyɔm ó, njɨ lɨ́ esú é mʉ̂r dí ebaʼle métié nyá. Mʉ̂r gbáh métié maá nó, tíʼá mpʉ́n wé, wé l'akǎ be e nyɔm. Nye mʉr tɨ̂, nyɨ́ dwirǎ mpʉ mʉ̂r á be apǎ tíʼɔɔ mpʉ́n nyá.

²⁶Mʉ̂r á be apǎ tíʼɔɔ mpʉ́n nyá, nyé báʼlé métié nó, Nzyɛ̌m óbee nyé ó, mpʉ̌ sá lɛ́ɛ́, nye ó tíʼá mpʉ́n.

²⁷Mʉr bikûl dí abě tíʼá mpʉ́n ɨ́ nkǒ páʼ nyʉ̂l nyá, nyé báʼlé yɨ́ɛ metié nó, nye ódwe gó mebě, gua Yúden. Go á si ntɨhɔɔ mekaná métié. Go ntémé tíʼɔɔ mpʉ́n. Píe tɨ̂, go nzě gbah métié maá.

²⁸Mpǎŋ Yúden, nyé abe waá dí enyɨ̂n njɨ̌ kʉ̌l nyá. Mpǎŋ tíʼá mpʉ́n, wé abe waá tíʼɔ́ɔ́ ɨ́ nyʉ̂l, dí ebeɔɔ̌ kʉ̌l wɨ́.

²⁹Mpǎŋ Yúden, nye ó waá dí ɨ́ léme tʉ́ŋlʉ̌ nyá. Mpǎŋ tíʼá mpʉ́n, wé ó waá Sísǐm mé Nzyɛ̌m dí etíʼe ɨ́ lémé mʉ̂r wɨ́. Wé atíʼɔɔ ɨ́ lɔ̌b métié mé Moyɨ̂z. Mʉr dí e tíʼá mpʉ́n waá nyá, ntʉ bʉ̂r ngá gúmlo nyê. Kûm nyé, nye óduho ó kwá mé Nzyɛ̌m.