Read Koonzime Rôm 4 Bible Online

Rôm 4 - Koonzime bible

Rôm 4

¹Ɨ́ nkǒ páʼ mébyɛ́l gá mɨ́ná, mɨná gá bé e sɔ́ŋ mpám Abraham. Mpʉ yé dí nó yɨ́, mɨná bé ókǎ lɛ́ɛ gá nyá, dumo e né?

²Yé bé Abraham á si bi nkam ɨ́ lɔ̌b bísyɛ́ɛla bimpâ byé nó, lɛ́ɛ́, nye á be ó e sá énkʉ́na tɨ̂. Sâ gwár, nye á bé abe e sá énkʉ́na tɨ̂ʼ ɨ́ míh mé Nzyɛ̌m.

³Yê cɛmá ɨ́ Mekaná mé Nzyɛ̌m ó: Abraham á si dyêʼ koo e Nzyɛ̌m. Nzyɛ̌m nzě beě mpʉ̌ Abraham á dyɛ̂ʼwo e né yɨ́, nye ntɔ̂ʼ láa ó, nye ó tîtyěl mʉr ɨ́ lɔ̌b búʼó yé yaá.

⁴Mɨná bé lɨ́ egʉ́a gá ó, lóbila, yé óséǎ syɛ́ɛ́ nó, sá mása wé ódwe nyé píe syɛ́ɛ́ yaá yɨ́, yé abe dâh. Yê nye ó myɛ́na. Nyě jánɔ́ɔ́ ó mpʉ́lá.

⁵Tó kœb ó, mʉ̂r dí asɨ̂sa bísyɛ́ɛla bimpâ nyá, sí dyɛ̂ʼwo e Nzyɛ̌m, le ebúʼla ó, Nzyɛ̌m sá ó dwe mínjéʼe-Nzyɛ̌m nkam nó, Nzyɛ̌m óbeě mpʉ̌ nyé dí edyɛ̂ʼwo e né yɨ́, ntɔ̂ʼ kǎ láa ó, nye ó tîtyěl mʉr.

⁶Jwɨʼ gwár yaá ntémé ó David á lɛ́ɛ yɨ́. Nye lɨ́ esyɛɛ métyéelé ɨ́ mʉr á láŋɔɔ otîtyěl ɨ́ míh mé Nzyɛ̌m, waá á be asâ bisyɛ́ɛla bimpâ nyá.

⁷David á cɛma ó: Bʉr o b'á gbah metié, baá Nzyɛ̌m á pɛʼ bibaa mébébe mɔ́ɔ́ bá, bé e metyɛʼ me mpóm. Bé ó baá Nzyɛ̌m á táa góo ɨ́ lɔ̌b mísyóm myɔ́ɔ́ bá.

⁸Metyɛʼ me mpóm, mé díʼee e mʉ̌r Dâ Nzyɛ̌m óbe, aniʼe bíbaa ɨ́ lɔ̌b mísyóm myé nyá.

⁹Nzê metyɛʼ me mpóm maá, mé jaá be ó, njɨ lɨ́ esú é bʉ̂r o b'á nyɛɛ tíʼɔɔ mpʉ́n bá ɛ́? Heʼé, bʉr o dí abě tíʼá mpʉ́n bá, bɨ́ɛ ntémé ósʉŋɔɔ métyɛʼ me mpóm, ebě, bɨ̌h alúno lɛ́ɛ ó, Abraham á si dyêʼ koo e Nzyɛ̌m. Nzyɛ̌m nzě beě mpʉ̌ Abraham á dyɛ̂ʼwo e né yɨ́, nye ntɔ̂ʼ láa ó, Abraham, nye ó tîtyěl mʉr.

¹⁰Ɨ́ yáǎ jɔ̌ʼ Nzyɛ̌m á bee mpʉ̌ Abraham á dyɛ̂ʼwo e né yɨ́, ntɔ̂ʼ láa ó, nye ó tîtyěl mʉr yɨ́ ɛ́? Nzê yé á be ó, ɨ́ jɔʼ nyé á bě sí tíʼɔɔ mpʉ́n yɨ́ ɛ́? Nzê yé á be ó, ɨ́ jɔʼ nyé á be apǎ tíʼɔɔ mpʉ́n yɨ́ ɛ́? Nzyɛ̌m á bee mpʉ Abraham á dyɛ̂ʼwo e né yɨ́, ntɔ̂ʼ láa ó, nye ó tîtyěl mʉr ó, ɨ́ jɔʼ nyé á be, nye dína apǎ tíʼɔɔ mpʉ́n yɨ́.

¹¹Tíʼá mpʉ́n, wé á tyélɔɔ ɨ́ páʼ mé Abraham ó, mpʉ̌ mveʼle. Wé lɨ́lɛ́ʼlé mɨ́ná gá ó, nye á si dyɛ̂ʼwo e Nzyɛ̌m, ntɔ̂ʼ bi nkâm ɨ́ míh mé Nzyɛ̌m, nye dína apǎ tíʼɔɔ mpʉ́n. Abraham ntɔ̂ʼ kǎ sûʼla sɔ́ŋ bʉr bɨ́bɛ̂h dí edyɛ̂ʼwo e Nzyɛ̌m, baá dí abě tíʼá mpʉ́n bá. Nzyɛ̌m, nye lɨ́ ebeě mpʉ bé dí ebúʼla nyé yɨ́, ntɔ̂ʼ láa ó, bé ó otîtyěl o bʉ̂r.

¹²Nye ntémé, nye ó sɔ́ŋ mpám lɨ́ esú é baá o dí etíʼɔɔ mpʉ́n bá. Sâ gwár, ntʉ waá dí etíʼɔɔ̌ njɨ mpʉ́n nyá dí mâ nta mé Abraham. Yé ó, waá dí etíʼɔɔ mpʉ́n, le edû ntémé kʉ̌ tyen wé nyá. Nye lɨ́ edyɛ̂ʼwo e Nzyɛ̌m mpʉ̌ Abraham á dyɛ̂ʼwo e né, nye dína apǎ tíʼɔɔ mpʉ́n yɨ́.

¹³Nzyɛ̌m á kɛʼ Abraham, bé le onta bé ó, nye ódwe bé sí yɨ́yɛ̂h, jala e nkɔb líʼe nyɔ́ɔ́. Nzyɛ̌m á bé alɛ́ɛ nó ɨ́ lɔ̌b mbaʼlá Abraham á baʼle metié wɨ́. Nye á kɛʼ bé sí yaá ó, duho lɨ́ otîtyěl nyé á pa dwe Abraham wɨ́. Otîtyěl waá wɨ́ɛ, wé á kʉ be ó, ɨ́ búʼó yé.

¹⁴Yé bé bʉr o dí enʉǎ sí yaá, jala e nkɔb líʼe nyɔ́ɔ́ bá, bé á dweŋɔɔ yé ó, ɨ́ lɔ̌b mbaʼlá métié wɔ́ɔ́ nó, lɛ́ɛ́, búʼó gá yɨ́ná, yé mû ó dwêh. Le ntémé ó, nkɛ̌ʼ Nzyɛ̌m á dwe mɨná gá nyɨ́, nyé akǎ jala le egbáŋɔɔ ɨ́ nkɔb.

¹⁵Ebě, metié mé Moyɨ̂z, mé abe e nyɔm waá. Bʉ̂r sí gbah métié maá nó, tyélá Nzyɛ̌m á tyêl bʉr metié wɨ́, ndumló tɨ̂, wé ó njɨ etó kwɨ́ɨ nkpáa mé Nzyɛ̌m. Yé bé metié abe nó, bʉr, bé á gwa gbah mé e nyáa nzɨ́?

¹⁶Nzyɛ̌m á kɛʼ Abraham, bé le onta bé, sí yɨ̂ʼ ó, ɨ́ lɔ̌b búʼó Abraham á bûʼla nye yɨ́. Nkɛ̌ʼ nyaá, nye bé ó, ntinɨ̂ e ntinɨ̂ njʉ̌m dǐ e njʉ̌m dǐ. Yé á syɛ́ɛ nó ó, Nzyɛ̌m nkʉ̂ dwe bé nyǎ edwɛ́na. Nyě kɛ̌m ó, onta mé Abraham bɨ́bɛ̂h. Yé abe ó, nye á jaa dwe nkɛ̌ʼ nyaá ó, njɨ bʉr o dí ebaʼle métié bá. Nye á kɛʼ ntémé ó, bʉr o dí edyêʼ koo e né, baá o dí enwɨɨla le Abraham ɨ́ nkǒ páʼ búʼó bá. Ebě, Abraham, nye ó sɔ́ŋ gá wɨ́ná, mɨná gá óbɛ̂h. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó:

¹⁷«Me ótyêl gó ntémé sɔ́ŋ bikûl ɨ́ buo buo.» Nye ó sɔ́ŋ gá wɨ́ná, ebě, nye á bě sí dyêʼ koo e Nzyɛ̌m, waá dí epɛh ódwe nyá. Nzyɛ̌m waá ntémé ó dí esâ ó, sá yé á be abe yɨ́, yé díʼee.

¹⁸Sá Abraham á be ajala le ebóno ó, yé ópyâl nyé yɨ́, nye á bóno sâ gwár yaá ó e mpûʼla ɨ́ léme. Nye ntɔ̂ʼ sûʼla sɔ́ŋ bikûl ɨ́ buo buo. Nkɛ̌ʼ Nzyɛ̌m á dwe nye nyɨ́, nye ntɔ̂ʼ dira ó: Onta bô, bé óbe ó, ɨ́ buo buo.

¹⁹Jɔ̌ʼ Nzyɛ̌m á kɛʼ Abraham onta baá yɨ́, Abraham nzě bûʼla nkɛ́ʼ nyaá. Búʼó yaá, yé á bé agœ̂ʼ, damá be ó, nye á be ó, nye mû e mimbû nter. Nye á si pahle twiʼ yé, ntɔ̂ʼ bee ó, nye á be ó, nye mû kúno edwe. Nye ntémé á bee ó, Sara á be ó kǔn.

²⁰Damá jóʼǒ mpʉ yé á be nó yɨ́, nye á be ɨ́ kʉ́ gʉ́a yɨ́ɛ ó, nye óbánǎ bǐ sá Nzyɛ̌m á kɛʼ nye yɨ́. Nye á bé asóŋlo ɨ́ lémé wé tʉ́ŋlʉ̌. Búʼó yé, yé á be ó, lɨ́ elɨl nyê. Nye nzě dwě Nzyɛ̌m kûm ɨ́ lɔ̌b nkɛ́ʼ nyaá.

²¹Nye á kʉ gʉ́a ó, Nzyɛ̌m á be ó e nkul edwe nyé sá nyé á pa kɛʼ nye yɨ́.

²²Nó yé á cɛmɔɔ ó: Ɨ́ lɔ̌b búʼó yé yaá, Nzyɛ̌m ntɔ̂ʼ láa ó, nye ó tîtyěl mʉr yɨ́.

²³Mekǎn maá, mé á bé acɛmɔɔ̌ njɨ lɨ́ esú lé, nye omér. Mé á cɛmɔɔ ntémé ó, lɨ́ esú gá lɨ́ná. Mɨ́ná bé ódyêʼ gá koo e Nzyɛ̌m nó,

²⁴nye óláa mɨ́ná gá ntémé ó, mɨná gá bé ó otîtyěl o bʉ̂r, baá o dí edyɛ̂ʼwo e né bá, nye waá á pɛh Tî gá wɨ́ná Yésʉs, dwih nyé lɨ́ odwe nyá.

²⁵Yésʉs waá, bʉr, bé á si bɛ́ma nye. Nye nzě búra e misyóm gá míná. Píe tɨ̂, Nzyɛ̌m nzě pɛh nyé ó, nye dwêʼ mɨná gá nkam ɨ́ nzɨ̌ nyé.