Read Koonzime Rôm 8 Bible Online

Rôm 8 - Koonzime bible

Rôm 8

¹Nó ɨ́ báánâ, bʉr o mû sí pûhla e Yésʉs-Krîst bá, Nzyɛ̌m, nyé akǎ láa bé bibaa bí ébébe, nkʉ̂ dwe bé bintɨ́ʼá bí tɨ̂.

²Me á nyɛɛ be ó túʼǎ ɨ́ lɔ̌b tíná mé Syóm, bé le eswie. Me á be ó, ɨ́ mpila yɔ́ɔ́. Sísǐm mé Nzyɛ̌m nzě tíne mé ó, me bíʼee twiʼ ɨ́ mpúhlá nyɨ́h e Yésʉs-Krîst. Nye ó b'á dwih me ɨ́ mpila yaá, pɛʼ mé tɨ̂ʼ ɨ́ fá.

³Yé á bé abána ó, mɨná bíʼee gá twiʼ ɨ́ mbaʼlá métié, ebě njwɨr myâ wɨ́ná, wé á be ɨ́ tyɛʼ. Metyɛʼ mé njwɨr myâ waá, mé ntɔ̂ʼ teʼle métié maá. Sá métié mé Moyɨ̂z, mé á be akoʼo lɨ́ esâ yɨ́, Nzyɛ̌m nyɨɛ á si bana sâ yê. Nye á dwe mɨná gá twiʼ ó ɨ́ nzɨ̌ Mwân wé nyé á ntɨh ɨ́ sí yɨ̂ʼ nyá. Mwân waá nzě byɛ̂l mʉ̂r. Nyʉ̂l bipúno nyé, nye á kʉ nwɨɨla ó e nyaá gá nyɨ́ná, osyɛ̂l o mísyóm. Nye á nze ó ɨ́ lɔ̌b syóm gá wɨ́ná. Nye á nze pɛʼ ó wê. Nzyɛ̌m nzě dwě Yésʉs mebě, le entɨ̂ʼ nyʉ̂l bipúno nyé ɨ́ jɔʼ nyé á búra e misyóm myaá yɨ́.

⁴Nye á sia e bintɨ́ʼá ɨ́ nyʉ̂l nyé ó, nye nkʉ̂ lóŋlo ótîtyěl o bísyɛ́ɛla bíbyɛ̂h Nzyɛ̌m á boo lɛ́ɛ ó, bʉr sâʼ bí. Mɨná bi gá mepwaʼ bísyɛ́ɛla byé byaá ó, ebe mɨ́ná dí edû gá kʉ̌ tyěn Sísǐm mé Nzyɛ̌m dí etɨ́e wɨ́. Mɨná bé akǎ dû gá njwɨr myâ gá wɨ́ná.

⁵Baá dí edû njɨ njwɨr myâ gá wɨ́ná bá, sá dí epálwo bé ɨ́ miléme yɨ́, yê ɨ́ jɔʼ yɨ́yɛ̂h ó, njɨ sâ njwɨr wɔ́ɔ́ dí egwɨ̂m yɨ́. Baá dí edû métwɨ́ɨ́ mé Sísǐm mé Nzyɛ̌m bá, sá dí epálwo bé ɨ́ miléme yɨ́, yé ó sá Sísǐm waá dí ekpɛl yɨ́.

⁶Yé bé njwɨr myâ gá wɨ́ná, wé lɨ́ epalwo mʉ̂r ɨ́ léme nó, eswie ó ngá jala e mʉr waá. Ɨ́ jɔ̌ʼ Sísǐm mé Nzyɛ̌m dí edi mʉ̂r ɨ́ léme yɨ́, mʉr waá óbǐ mpǎŋ twiʼ. Lémé wé, wé ólóno ɨ́ mepyɛbla.

⁷Baá mílémé myɔ́ɔ́ dí edû njɨ njwɨr myâ bá, bé lɨ́ elwímla e Nzyɛ̌m, asâ métié mé mejóʼo. Milémé myɔ́ɔ́ abá be e nkul esâ métié maá mejóʼo.

⁸Baá dí edû njwɨr myâ gá wɨ́ná bá, Nzyɛ̌m, nye ákóʼó bee bé mbɨ̂mbɨá.

⁹Bɨ̌n bɨɛ, bé abe tʉ́ŋlʉ̌ bʉr o dí edû njwɨr myâ gá wɨ́ná bá. Bɨ̌n bɨɛ dú ó, Sísǐm mé Nzyɛ̌m, ebě, Sísǐm waá, wé ó, ɨ́ bɨ̌n. Mʉ̂r óbe, abe e Sísǐm mé Krîst waá ɨ́ nyʉ̂l nyé nó, go ó, mʉr waá, nyé abe mʉ̂r mé Krîst ó tɨ̂ʼ yɨ́.

¹⁰Krîst damá bě tyeetye ɨ́ bicwiʼ bín, menyʉ́l mɨ́n, mé dína ó mimúu ɨ́ lɔ̌b mé syóm. Sâ gwár, misísǐm mín, mí tiʼe, ebě, Nzyɛ̌m, nyɨ́ dwe bɨ́n nkam ɨ́ míh mé.

¹¹Nó ntémé, Sísǐm mé Nzyɛ̌m, mʉr á pɛh Yésʉs, dwih nyé lɨ́ odwe nyá, dí ɨ́ bɨ̌n nó, go ó, Nzyɛ̌m ópɛh ményʉ́l mɨ́n, maá me dí elaǎ mpʉ̌ ngúl mpáá má. Nye ódwe mé twiʼ ó e nzɨ̌ Sísǐm wé dí ɨ́ menyʉ́l mɨ́n maá wɨ́.

¹²Bɨ́ɔɔ́ bâm! Okɛ́l bâm! Yé bé nó wá, go ó, mɨná gá bé e mpʉ́lá nɨ́nɨ́ɨ́. Sâ gwár, nyé abe mpʉ́lá ɨ́ nkǒ páʼ njwɨr myâ gá wɨ́ná. Nó ó, yé ajɨ ó, mɨná dúʼoo gá njwɨr myâ waá.

¹³Bɨ́n dú njwɨr myâ gá wɨ́ná nó, go ó, eswie, lé ójala e bɨ̌n. Bɨ́n lélé nkûl e nzɨ̌ Sísǐm mé Nzyɛ̌m, ntɔ̂ʼ jʉ̂ bísyɛ́ɛla bi nyʉ̂l bipúno nó, lɛ́ɛ́, bɨ̌n bɨ́ tiʼe!

¹⁴Baá bɨ́bɛ̂h dí edû nzɨ́ Sísǐm mé Nzyɛ̌m dí etɨ́e nyɨ́ bá, bé ó dí bwán mé Nzyɛ̌m.

¹⁵Bɨ̌n e Sísǐm mé Nzyɛ̌m ó mû. Nyé abě mbǐ sísǐm dí e nkul edil bɨ́n ɨ́ dǐ ótúʼǎ, nkʉ̂ waá ngá sâ ó, bɨ̌n báʼa jóʼo bʉ́á wɨ́. Nye ótyêl bɨ́n ɨ́ tyé bwán mé Nzyɛ̌m. Nye ó dí edwe mɨ́ná gá nkul ó, mɨná jébaa gá Nzyɛ̌m kʉ́kʉ́ ó: «Abba, Dâ!»

¹⁶Sísǐm wé, wé mʉr tɨ̂, wé lɨ́ eboʼlo ɨ́ milémé gá míná tʉ́ŋlʉ̌ ó, mɨná gá kʉ́ bě tyeetye ó bwán mé Nzyɛ̌m.

¹⁷Yé bé mɨná gá mû ó bwân mé Nzyɛ̌m nó, go ó, mɨná gá ntémé bé ó bʉr o ngá bi ménkɔb kwá mé Nzyɛ̌m bá. Yé óbe ɨ́ páʼ gá wɨ́ná ó, jwɨʼ gwár e gwár e mpʉ̌ Krîst, mɨ́ɔɔ́ gá wɨ́ná, ngá bi mé ménkɔb yɨ́. Mɨ́ná gá le onɔ́ɔ́, bé ósia e mitúú mímpwár, lɨ́ esú ó, mɨná bíʼee gá kûm mpwár nó, mɨná bé ónʉa gá membɨa maá, jala e nkɔb líʼe gá nyɨ́ná.

¹⁸Mbeá wâm, wé ó wɨ̂: mitúú mɨ́ná dí esia gá e myé ɨ́ báánâʼ mí, myé ó sá dí dwêh yɨ́. Sá dí ɨ́ bwǎʼ lɔ̌b, laa mítúú myaá yɨ́, yé ó kûm Nzyɛ̌m ngá lɛ̂ʼle mɨ́ná gá nyɨ́.

¹⁹Ebě, bisá bíbyɛ̂h Nzyɛ̌m á komlo bí, byé lɨ́ egwɨ̂m ébee bwán Nzyɛ̌m ngá lɛ̂ʼle byé ɨ́ ponó bá.

²⁰Bisá bíbyɛ̂h byaá, byé mû ó ɨ́ tyé dí dwêh yɨ́. Ntʉ byé á gbáa edi nó. Nzyɛ̌m mʉr tɨ̂ʼ ó b'á lɛ́ɛ ó, myé díʼee ɨ́ tyé yaá, tó pyâl ɨ́ tíl mélû yaá.

²¹Bisá bíbyɛ̂h byaá, byé e mpûʼla nyɨ̂ʼ ɨ́ miléme: ó Nzyɛ̌m ópɛʼ byé ɨ́ bébebébe tyé yaá. Byé ópʉʼa ɨ́ mpila yaá ɨ́ fá, bé e bwán mé Nzyɛ̌m bɨ́bɛ̂h. Byé ábo. Byé óbáʼǎ dweŋɔɔ kûm ɨ́ jɔ̌ʼ Nzyɛ̌m ngá dwe bwán bé kûm yɨ́.

²²Jɔʼ yɨ́yɛ̂h Nzyɛ̌m dína apǎ lɛ̂ʼle bwán bé ɨ́ ponó yɨ́, mɨná bé lɨ́ egʉ́a gá ó, bisá bíbyɛ̂h nyé á komlo bí, byé ótô le eduʼ, le ejóʼo mékpaa mpʉ ábubúm dí ejaʼra e mǐn nyá.

²³Yé abě njɨ nó. Nzyɛ̌m mû ó sí ntɨh mɨ́ná gá Sísǐm wé. Mɨná bé á nyɛɛ bi gá ó, etʉ́m laá. Damá jóʼo nó, milémé gá míná dína ó lɨ́ etíme. Yé ó nó, tó kumo ó, dʉ́ó Nzyɛ̌m ósîl étyêl mɨ́ná gá ɨ́ tyé bwán bé yɨ́. Dʉ́o laá ó nyé ngá dwih ményʉ́l gá mɨ́ná ɨ́ mpila ébébe yɨ́.

²⁴Nzyɛ̌m á tiʼ mɨná gá ó, mɨná díʼee gá e mpûʼla ɨ́ miléme. Mʉ̂r sí bee bísá nyé á nyɛɛ bóno e mpûʼla bí nó, go ó, mpûʼla nyaá, nyé akǎ be, ebě, ɨ́ jɔʼ mʉ̂r mû sí bee yʉ́ʉ́ sɔ̂ʼ yɨ́, wáǎ mbi lémé wé dí e nkul ebáʼǎ lóno ɨ́ mpûʼla ó, nye óbee yé yɨ́?

²⁵Sá mɨ́ná dína apǎ bee gá yɨ́, mílémé gá míná, myé ólóno ɨ́ mpûʼla ó, mɨná bé óbee gá yé nó, go ó, mɨná bé ɨ́ jala le edûhwo gá mpʉ̂n nyaá e bíhwó.

²⁶Sísǐm mé Nzyɛ̌m, wɨ́ nzě kɛm mɨ́ná gá ɨ́ nkǒ páʼ étyɛʼ e nyʉ̂l gá lɨ́ná. Ɨ́ nkǒ páʼ mé Nzyɛ̌m, mɨná gá bé ɨ́ tyɛʼ, agʉ́ǎ mpʉ mɨ́ná jálá le ejɨʼla gá yɨ́. Sísǐm mé Nzyɛ̌m mʉr tɨ̂, nyě jɨjɨʼlá e Nzyɛ̌m ó, ɨ́ medilá gá mɨ́ná. Nye lɨ́ ejɨʼla e lémé wé wɨ́wɛ̂h, mpʉ̌ sá lɛ́ɛ́, nye lɨ́ ejóno. Abe le ekǎn egwár e dí e nkul epâʼlǎ sá nyé dí elɛ́ɛ yɨ́.

²⁷Nzyɛ̌m Sɔ́ŋ, nye lɨ́ egʉ́a sá Sísǐm mé Nzyɛ̌m dí egwɨ̂m yɨ́. Nye ó mʉr dí ebeě sá dí ɨ́ milémé gá míná yɨ́ nyá. Sísǐm mé Nzyɛ̌m jɨʼlá e né ó, ɨ́ medilá mé óbûʼla ɨ́ mimbi mi dí ejala e né mí.

²⁸Mɨná bé lɨ́ egʉ́a gá ó, Nzyɛ̌m, nye lɨ́ eboó komlo bísá bíbyɛ̂h ó, byé díʼee e nyɔm lɨ́ esú é bʉ̂r o dí ekpɛl nyé, baá nyé á jébe ɨ́ mitíʼá mí lémé wé bá.

²⁹Ebě, baá Nzyɛ̌m á boo gʉ́a bá, nye á twâr bé ó, bé díʼee mpʉ Mwân wé. Bé ódǐ mpʉ Mwân mé Nzyɛ̌m nó, Mwân waá, nye ósûʼla ó, medwéʼé mé Mwân, le ontwóm ɨ́ buo buo.

³⁰Bʉr o nyé á boo twâr bá, bé ó nyé á jébe bá. Baá nyé á jébe bá, bé ó nyé á dwe nkam ɨ́ míh mé bá. Bʉr o nyé á dwe nkam bá, bé ó nyé á dwe ntémé kûm bá.

³¹Nó mpʉ yé dí nó yɨ́, mɨná bé ókǎ báʼǎ lɛ́ɛ gá nyá? Nzyɛ̌m bé ɨ́ nkɔ̌m gá nyɨ́ná nó, nzé ókǎ báʼǎ tyɛ̂b mɨ́ná gá ɨ́ nkɔ̌m kɔ́m nkɛ́ɛ́ ɛ́?

³²Nzyɛ̌m nyɨɛ á bé akamle e Mwân wé. Nye á syɛ́ɛla twiʼ Mwân wé ó e bicwiʼ gá bíná, mɨná gá óbɛ̂h. Nzyɛ̌m pǎ nyɛɛ́ dwe mɨ́ná gá Mwân wé, á dwɛʼra e bisá bíswîh bíbyɛ̂h! Nye óbánǎ dwe mɨ́ná gá byǎ ntémé mpʉ nyé á pa dwe mɨná gá Mwân wé yɨ́.

³³Nzé dí e nkul epʉgʉ́ pur bʉ̂r ó Nzyɛ̌m á twâr bá? Nzyɛ̌m mʉr tɨ̂ʼ ó b'á boo sâ ó, mɨná bíʼee gá nkam ɨ́ míh mé.

³⁴Nzé óláa mɨ́ná gá bibaa bí ébébe, le edwe mɨ́ná gá bintɨ́ʼá? Abe e mʉr! Yésʉs-Krîst á si dwe, búra e mɨná gâ. Yé abě njɨ nó. Nye á si pah, duho lɨ́ odwe, tó di ɨ́ mecwɨ́ɨ́, ɨ́ mbó éjʉ́m mé Nzyɛ̌m Sɔ́ŋ. Nye ó mʉr nkɔ̌m, waá dí ekamle e mɨná gá nyá.

³⁵Nzé ókoʼo lɨ́ ebɛ̂ʼ páʼ gá nyɨ́ná e Yésʉs-Krîst, mʉr á bu kpɛl mɨná gá nyá? Nzê mitúú e mindɛ̌l? Nzê tíblá, nkʉ̂ nza? Nzê sɔ́ɔlʉ mímbôr, nkʉ̂ dɔm, nkʉ̂ pasoŋ? Kʉ́ kâr káráa!

³⁶Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Ɨ́ lɔ̌b mé Nzyɛ̌m ó bɨ́h bé lɨ́ ejʉ́ŋɔɔ ɨ́ dʉ́ó lɨ́lɛ̂h yɨ́. Ɨ́ míh mé bʉ̂r, bɨ̌h bé ó mpʉ bínteme múo tó tíʼɔɔ bí.»

³⁷Damá jóʼo mébébe maá mɨ́mɛ̂h me dí epyâl mɨ́ná gá ménɨ̌, mɨná gá bé ó binkɔ́ɔ́ ɨ́ nzɨ̌ mé Krîst, mʉr dí ekpɛl mɨ́ná gá nyá.

³⁸Yé ó nó. Mɨ́ kʉ́ gʉ́a ó, damá be éswie, damá bě twiʼ, damá be bééngeles, damá be mísísǐm mí édúrʉ́ʉ́ mi dí e jwɨ́ɨ mí, damá be ɨ́ báánâ, damá be ɨ́ bijɔʼ bi dí enze bí, damá be báányâ-nkul,

³⁹damá be bísâ bi dí ɨ́ jʉ́o kʉ́, nkʉ̂ byaá bi dí ɨ́ sí tʉ́ŋlʉ̌ bí, damá be wáǎ mbǐ sɔ̂ʼ Nzyɛ̌m á komlo yɨ́, tó tôʼ. Sâ gwár dí ɨ́ sɔ́má yaá yɨ́, yé ákóʼó bɛ̂ʼ páʼ gá nyɨ́ná e Nzyɛ̌m, mʉr dí elɛ̂ʼlě kpɛ̌l yé ɨ́ nzɨ̌ mé Yésʉs-Krîst, Tî gá wɨ́ná nyá.