Read Koonzime Rôm 9 Bible Online

Rôm 9 - Koonzime bible

Rôm 9

¹Mě lɛ́ɛ́ ó, otyeetye, abe bíbɛr. Mě lɛ́ɛ́ ó, ɨ́ mpúhlá nyɨ́h e Yésʉs-Krîst. Mipahlá mí lémé wâm, myé lɨ́ ekʉ́ boʼlǒ lɔ́ɔ waá e nzɨ̌ Sísǐm mé Nzyɛ̌m.

²Léme, wê me ó, lɨ́ ekpaa ébúʼ. Wé ó nó ɨ́ jɔʼ yɨ́yɛ̂h.

³Wé kpaa mé nó ó, ebe bɨ́ɔɔ́ bâm, bʉr o bɨ́h le onɔ́ɔ́ bé á byɛ̂l bá, dí e meswomlʉ. Yé bé Nzyɛ̌m á bě sí kam nó, lɛ́ɛ́, mɨ́ kam ó, nye dwíhɨɨ bé meswomlʉ mé, nye syɛ́mɨɨ me, damá jóʼo ó mpʉ bɨ́h e Krîst, bé óbɔ́ʼa mpɔ́ʼá mpá yɨ́.

⁴Bɨ́ɔɔ́ bâm baá, bé ó nyɛ̂r bwá ó b'Ɨ́zraɛ̂l. Bé ó Nzyɛ̌m á twâr lɨ́ esú lé édi nyé tâŋ bwân. Bé ó b'á nyɛɛ bee kûm nyé. Nye á nyɛɛ tyêl saá ó, páʼ bé e boo nɔ́ɔ́. Bé ó b'á jóʼo metié nyé á tyêl má. Bé ó b'á nyɛɛ lɛ̂ʼlɔɔ mpʉ bʉ̂r jálá le edwě Nzyɛ̌m kûm yɨ́. Bé ó b'á nyɛɛ bi menkɛ̌ʼ mé Nzyɛ̌m.

⁵Bé ó dí mpóʼo mé Abraham, le Isaac ti e Yóseb. Krîst mʉr tɨ̂ʼ á byɛ̂l mʉr ó, ɨ́ kúl bʉ̂r yɔ́ɔ́. Kûm díʼee e Nzyɛ̌m, njwɨ́ɨ sá yɨ́yɛ̂h, njʉ̌m dǐ e njʉ̌m dǐ. Amɛn.

⁶Yé bé bɨ́ɔɔ́ bâm, bé mû ó e meswomlʉ nó, yé alɛ́ɛ yɨ́ɛ ó, Nzyɛ̌m á bé adira nkɛ́ʼ nyé. Ntʉ óYúden bɨ́bɛ̂h dí mpǎŋ kúl bʉ̂r o b'Ɨ́zraɛ̂l.

⁷Abraham, nyé le onta ɨ́ buo buo. Ntʉ bɨ́bɛ̂h dí nye onta ompâ. Yé ó mpʉ̌ Nzyɛ̌m á lɛ́ɛ Abraham yɨ́. Nye á lɛ́ɛ ó: Mpǎŋ mpóʼo mé á kɛʼ go nyɨ́, óduho ó, ɨ́ mwân gǒ, Isaac.

⁸Tó kœb ó, ɨ́ bím bwân Abraham á byâ bá, bɨ́bɛ̂h, bé abe bwán mé Nzyɛ̌m. Nzyɛ̌m á lɛ́ɛ ó, bwán ómpâ bé, bé ó baá bé á byɛ̂l mpʉ̌ Nzyɛ̌m á kɛʼ Abraham yɨ́.

⁹Sá Nzyɛ̌m á kɛʼ nye yɨ́, yê cɛmá ó: Jɔ̌ʼ mbǐ jɔʼ yɨ̂, yé óbáʼǎ nze yɨ́, me óbáʼǎ nze ɨ́ jɔʼ yaá. Sara, nyé obyâ gó mâ mʉrʉ̂m.

¹⁰Yé abě njɨ nó, yé omér. Rebéka á be ó myaá mpám gá yɨ́ná Isaac. Nye á si nʉa ebum, byâ mégbâh.

¹¹Lʉ́ʉ́ égbâh, lé á bé apǎ byɛ̂l, nkʉ̂ sâ syɛ́ɛla gwár, nkʉ̂ yaá mpâ, nkʉ̂ yaá ébébe. Nzyɛ̌m á twâr nyʉ́ʉ́ tɨ̂ʼ ó, lɨ́ elɛ̂ʼle ó, nyě sá bísá byé ó mpʉ nyé kpɛ̂l yɨ́. Nyě twár mʉ̂r ó, ɨ́ mitíʼá mí lémé wé nye mʉr tɨ̂.

¹²Nyé ajébe mʉ̂r ɨ́ lɔ̌b bísyɛ́ɛla bimpâ mʉ̂r waá á nyɛɛ sâ nye bí. Yê cɛmá ɨ́ Mekaná mé Nzyɛ̌m ó: Ɨ́ megbâh ménɨ̌, waá ngá nyɛɛ́ jóʼǒ kpǎʼ e nyʉ́ʉ́ nyá, óbe ó túʼǎ me mɨ́ɔɔ́ wé.

¹³Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Páʼ mé Yákɔb le Esô, me á twâr ó, Yákɔb.

¹⁴Nó mpʉ yé dí nó yɨ́, mɨná bé ókǎ lɛ́ɛ gá nyá? Nzê Nzyɛ̌m, nye lɨ́ esâ bísyɛ́ɛla bi dí onzyɛ́h ónzyɛ́h bí ɛ́? Heʼé, yé abá be nó.

¹⁵Ebě, nye á lɛ́ɛ e Moyɨ̂z ó: Me ócwɨ́a ó e waá mé kpɛ́l écwɨ́a e né nyá. Me ójɨ̂ʼ nkóó ó e waá nyɨnyɛ̂h mé kpɛ́l éjɨ̂ʼ nkóó nyá.

¹⁶Nó ó, jɔ̌ʼ Nzyɛ̌m twár mʉ̂r yɨ́, nyě twár nyé ó, ebe nyé dí ejɨ̂ʼ nyé nkoó. Yé abe ɨ́ lɔ̌b sɨ́n mʉ̂r waá dí esâ lɨ́ ebaʼle métié wɨ́, nkʉ̂ ɨ́ lɔ̌b bísyɛ́ɛla byé.

¹⁷Yê cɛmá ɨ́ Mekaná mé Nzyɛ̌m, dumo e Faraɔ̂ŋ ó: Me á tyêl go ɨ́ dǐ njwɨ́ɨ, kǎ bîr ó, go sâʼ ebɨ̌h ó, me nkʉ̂ lɛ̂ʼle bʉ̂r bɨ́bɛ̂h nkul nyǎm e nzɨ̌ nyǒ, ndu e ntémé ó, bʉr tôʼ ɨ́ sí yɨ̂ʼ yɨ́yɛ̂h lɨ́ etúnǒ lɔ́ɔ dí edumo e díé lâm wɨ́.

¹⁸Nó ó, Nzyɛ̌m cwɨ́á ó e mʉr nyé twâr nyá. Mʉ̌r Nzyɛ̌m kpɛ́l élɨ̌l lémé wé nyá, nye lɨ́ elɨl nyé wǎ.

¹⁹Bé óbɛ̌m dî e me ó: «Yé bé nó wá, Nzyɛ̌m, nye lɨ́ eláa bʉ̂r bibaa bí ébébe ɨ́ yé ɛ́? Nzé dí e nkul ekamlě Nzyɛ̌m lɨ́ elóŋlǒ gwɨ́má yé?»

²⁰Gua mʉr dí edo e Nzyɛ̌m nyá, go nzé? Sá mʉ̂r á me e deʼé yɨ́, nzê yé óbɛ̂ʼ e mel ó: Go á me me mpʉʼ ɨ́ yé? Heʼé!

²¹Mel mempɨ̌, nyě e nkul esâ sá nyé kpɛ̂l yɨ́ e deʼé lé. Nye óbɛ̌m pɛ̂ʼ búʼ déʼé bipéh bíbá, nʉa wɨ̂ʼ pâʼ, sâ mpǎŋ daala e tɨ̂ʼ le ojɔɔ́; nʉa gúú pâʼ nɛ́ɛ: sâ yʉ́ʉ́ sá daala yé óbibiŋɔɔ dʉ́ó lɨ́lɛ̂h yɨ́.

²²Nzyɛ̌m á sâ syɛ́ɛla yaá ó, nye lɛ̂ʼlaa bʉr nkpaa nyé le nkul nyé. Sá tɨ̂ʼ ó bɨ́n dí ebee nyé lɨ́ ebuú sâ bíhwó ɨ́ nkǒ páʼ bʉ̂r o jálá le ejaʼra e nkpaa nyé bá yɨ́. Nye lɨ́ ekʉ́ dûhwo baá nyé bónó édímle bá. Nyé sí kpɛl ó, nyě ntɨ́ʼ ó bʉr, dû mpʉ nkpáa nyé dí yɨ́ nɛ́ɛ: gua, gó e wáǎ lɔ̌b tɨ̂?

²³Nzyɛ̌m á kpɛl ntémé ó, bʉr gʉ́ŋaa ó, nyě e kûm nɨ́nɨ́ɨ́. Nye ókab mɨ́ná gá kûm nyaá, mɨná gá, bʉr o nyé á kpɛl ecwɨ́a e bé bá, ebě, mɨná gá bé ó baá nyé á boo komlo ó, nye ókab bé kûm nyaá bá.

²⁴Nzyɛ̌m á jébe ó, mɨná gâ: le oYúden, le bʉr o dí abe óYúden bá.

²⁵Yé ó mpʉ nyé á lɛ́ɛ ɨ́ mekaná Ozéa á cɛma má yɨ́. Yê cɛmá ó: Bʉr o b'á be anyɛɛ́ bě kúl bʉ̂r yâm bá, me ókǎ gbân bé, le ejwɨr bé ó: kúl yâm. Sí mé á be anyɛɛ́ kpɛl yɨ́, me ókǎ jwɨr yé ó: sí kpɛ̌l yâm.»

²⁶Damá jóʼǒ mpʉ mé á lɛ́ɛ bé ó: Ntʉ bɨ́n dí bʉr bâm! yɨ́, tɨ̂ʼ ɨ́ gúmo gwár e gwár yaá, mɛm Nzyɛ̌m, me ókǎ gbân bé le ejwɨr bé ó: Bwán mé Nzyɛ̌m dí kublakúbla nyá.

²⁷Ésayɨ á si túno, dumo e bʉr o b'Ɨ́zraɛ̂l, ó: Bʉr o b'Ɨ́zraɛ̂l damá byéa le ejah, laǎ bím ósɨ́ǎ dí ɨ́ nkpâh mâŋ bá, njɨ mâ dœ́h é bʉ̂r ó ngá tiʼe.

²⁸Dâ Nzyɛ̌m, nye ádeʼ. Nye ónze, nzě dwe bʉ̂r ó sí yɨ̂ʼ bintɨ́ʼá nyé á boo lɛ́ɛ ó, nye ódwe bé bí.

²⁹Yé ó mpʉ̌ Ésayie á boo lɛ́ɛ yɨ́: Yé bé Dâ Nzyɛ̌m, dí Njwɨ́ɨ bisɔ́má bí mɔ̂m nyá, á bé alíʼe bʉ́ʉ́ bwân ó kúl gá yɨ́ná mikublakúbla nó, mpa mɨná bé á si dwe gá, mɨná gá óbɛ̂h, mpʉ bʉ̂r ó Sodôm e Gómɔr, bé á síe lɨ́ edwe mpʉ nywɨ́ɨ yɨ́.

³⁰Mpʉ yé dí nó yɨ́, mɨná bé ókǎ lɛ́ɛ gá nyá? Nzyɛ̌m lɛ́ɛ́ yé, dumo e bʉr o dí abe óYúden bá? Bʉr o b'á be asáa nzɨ̌ ebi nkâm ɨ́ míh mé Nzyɛ̌m bá, bé ó b'á ka bi nkam ɨ́ míh mé. Sâ gwár, bé á si dweŋɔɔ mbi nkâm dí edweŋɔɔ ɨ́ lɔ̌b búʼó nyɨ́.

³¹Bʉr o b'Ɨ́zraɛ̂l bɨ́ɛ, bé á sɨsâ ó, bé bíʼee nkam ɨ́ míh mé Nzyɛ̌m ɨ́ mbaʼlá métié wɔ́ɔ́. Tó kœb ó, bé á bé abaʼle métié maá, kumo lɨ́ odumo.

³²Bé á bé abi nkâm ɨ́ nzɨ̌ nyaá ɨ́ yé? Yé ó, ebě, bé á bé adyêʼ koo e Nzyɛ̌m. Bé á jaa dyɛ̂ʼwo ó, njɨ e bisyɛ́ɛla byɔ́ɔ́. Ɨ́ mpʉ bé á gwa bi nkam ɨ́ mbaʼlá métié wɔ́ɔ́ yɨ́, bê nzě twe téme-nzɨ̌. Bé á twe ó, lɨ́ ebɨm ébɔ̌ʼ lɨ́ ekóʼ.

³³Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Jwɛ́ʼɛ́ɛ́ gâ! Ɨ́ Síon, mɨ́ gbâ ébɔ̌ʼ ɨ́ nzɨ̌. Bʉr o ngá bɨm ébɔ̌ʼ laá bá, bé ócwe. Tó kœb ó, mʉr nyɨnyɛ̂h ngá dyêʼ koo le ekóʼ laá nyá, lé ákóʼó sâ ó, nye bíʼee esɔ́m tɨ̂.