Read Koonzime 1 Kórɨnt 1 Bible Online

1 Kórɨnt 1 - Koonzime bible

1 Kórɨnt 1

¹Yé ó mɛm Pɔ̂l, mʉ̌r Nzyɛ̌m á twâr ɨ́ lɔ̌b gwɨ́má yé ó, me díʼee mʉr milʉ́mlʉ́ mé Yésʉs-Krîst, bɨ̌h e mɨ́ɔɔ́ gá wɨ́ná Sostɛ̂n ó dí ecɛma bɨ́n mekaná mâ. Bɨ̌h cɛmá ó, bʉr ó Mbɛ̌r-Nzyɛ̌m dí Kórɨnt bá.

²Yésʉs-Krîst á si pubo bɨ̌n. Nzyɛ̌m á jébe bɨ̌n ó, bɨ̌n díʼee bʉr o dí egúmo e né bá, bɨ̌n e bʉr bɨ́bɛ̂h o dí ekɛn díé mé Tî gá wɨ́ná, Yésʉs-Krîst bigúmo bigúmo bá. Nye ó njwɨ́ɨ gá wɨ́ná le onɔ́ɔ́.

³Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

⁴Nzyɛ̌m á si sʉ bɨ̌n metyɛʼ me mpóm mé ɨ́ nzɨ̌ mé Yésʉs-Krîst. Sá tɨ̂ʼ ó mé dí edwe nyé nzyǒo ɨ́ lɔ̌b wɨ́n jɔʼ yɨ́yɛ̂h yɨ́.

⁵Ɨ́ mpúhlá nyɨ́n e nɔ́ɔ́, bɨ̌n bé á si tiʼe ɨ́ mepwaʼ, mimbi mímyɛ̂h. Medihre e medihre me tɨ̂ʼ, mé á be ó gúmó nyé á dwe bɨ̌n ngwɨ́á ɨ́ páʼ mélab ndu e ngwɨ́á bísɔ̂ʼ yɨ́.

⁶Ebě, bɨ̌n bé á si bûʼla sá bɨ́h á boʼlo, dumo e Yésʉs-Krîst yɨ́.

⁷Tó pyâl ó, sá yɨ́yɛ̂h Nzyɛ̌m dí edwe bʉ̂r bé yɨ́, nyɨ́ dwe bɨ́n ntémé yǎ. Jɔʼ yɨ́yɛ̂h bɨ́n dína lɨ́ ebónǒ nzéá Tî gá wɨ́ná, Yésʉs-Krîst ngá nze wɨ́ yɨ́, bɨ̌n mû ó le mindwéá mé Nzyɛ̌m myaá.

⁸Nye ntémé ó ngá gbâ bɨ́n pîm ɨ́ búʼó, tó pyâl ɨ́ mesíé, abe e sá ébébe nyé ónwâhle bɨ́n e tɨ̂ʼ ɨ́ jɔʼ Tî gá wɨ́ná, Yésʉs-Krîst ngá pyâl yɨ́.

⁹Nzyɛ̌m, nye ó mʉr jálá le ebúʼlɔɔ nyá. Nye ó b'á jébe bɨ̌n ó, bɨ̌n tôʼ, tó pûhla e Mwân wé, Yésʉs-Krîst, Tî gá wɨ́ná.

¹⁰Bɨ́ɔɔ́ bâm! Okɛ́l bâm! Me lɨ́ ejɨʼla e bɨ̌n ɨ́ díé mé Tî gá wɨ́ná, Yésʉs-Krîst: diʼee gá twíí. Mpɔ́ʼá menkɔ̌m, nye ayɨ́ be ɨ́ sɔ́má yɨ́n tʉ́ŋlʉ̌. Me lɨ́ ejɨʼla ó, bɨ̌n díʼee ɨ́ mpúhlá nyɨ́n mbɨ̂mbɨá, mipahlá mimpwár, gwɨ́má gwár.

¹¹Bɨ́ɔɔ́ bâm! Okɛ́l bâm! Bʉr ó mbɛ̌r bʉ̂r mé Klóes, bé lɛ́ɛ́ mé ó, bɨ̌n bé lɨ́ edǐ pɨra páʼ nyɨ́n.

¹²Mě jóʼó ó, mʉr nyɨnyɛ̂h ɨ́ sɔ́má yɨ́n, nye mû lwib ó, wé mbi. Nyâʼ, nye ó: «Me ó mpʉ́n mé Pɔ̂l.» Nyʉ́ʉ́, nye ó: «Me ó mpʉ́n mé Ápolos.» Nyʉ́ʉ́, nye ó: «Mɛm, me ó mpʉ́n mé Kefâs.» Nyʉ́ʉ́ ntémé, nye ó: «Me ó mpʉ́n mé Krîst.»

¹³Nzê Krîst mû ó menkɔb menkɔb ɛ̌? Nzê mɛm, Pɔ̂l ó b'á dwe ɨ́ kolôs lɨ́ esú lɨ́n ɛ̌? Nzê bɨ̌n bé á duŋɔɔ ó, ɨ́ díé lâm ɛ̌?

¹⁴Me lɨ́ edwě Nzyɛ̌m nzyǒo, ebě, me á bé adu nyʉ́ʉ́ mʉ̂r ɨ́ sɔ́má yɨ́n, pɛ̌ʼ njɨ Kríspʉs, bé e Gáywis.

¹⁵Nó, kâr tɔʼ e mʉr ngwár dí e nkul ebɨ̂n diné kʉ́ ó, nye á si duŋɔɔ ɨ́ díé lâm.

¹⁶(Yé ó nó! Me á be ó sí du ntémé mbɛ̌r bʉ̂r mé Stéfanas. Mé abûʼla ó, me á si du nyʉ́ʉ́ mʉ̂r píe bɨ́nɨ̌.)

¹⁷Krîst á bé alómo mé ó, me tôʼ le edu bʉ̂r. Nye á lómo me ó, me tôʼ le etúnǒ Mbɨambɨa Lɔ́ɔ. Me túnaa wé, abě túnó pɨ̂ʼ bʉr, lɨ́ esú ó, eswie nyé á dwe ɨ́ kolôs lɨ́, lé nkʉ̂ be, adímle ódimé wé.

¹⁸Pô eswie mé Yésʉs ɨ́ kolôs kʉ́, nye ɨ́ páʼ bʉ̂r o dí edîm bá ó, mpʉ̌ lɔ́ɔ́ ógʉ̌. Sâ gwár, ɨ́ páʼ gá wɨ́ná, bʉr o dí ebǐ twǐʼ njʉ̌m dǐ bá, nye ó ánɨ̂nɨ̂n nkǔl Nzyɛ̌m dí e nye nyɨ́.

¹⁹Wê ɨ́ páʼ wɔ́ɔ́ ogʉ̌ ó, ebě, yê cɛmá ó: «Me ógbah ócwóó ó bʉ̂r ocwóó wɔ́ɔ́.» «Me ópɛʼ mípɨpɨ́ʼ pɨʼ nyɔ́ɔ́.»

²⁰Nó ó, twóó nyɨɛ ókǎ lɛ́ɛ nyá? Cɛma mekaná nyɨɛ ókǎ lɛ́ɛ nyá? Mʉr edo ɨ́ mpóʼo sí yɨ̂ʼ ókǎ lɛ́ɛ nyá? Sá bʉ̂r ó sí yɨ̂ʼ jɨ́jébé ó, «ocwóó» yɨ́, Nzyɛ̌m jébé yɨ́ɛ ó, «ogʉ̌»!

²¹Nzyɛ̌m á tíʼe ɨ́ páʼ wé ó, bʉr ó sí yɨ̂ʼ gʉ́ŋaa nye ɨ́ nzɨ̌ ocwóó wé nye mʉr tɨ̂. Tó kœb ó, bé á si kâr egʉ́ǎ Nzyɛ̌m e nzɨ̌ nyaá. Bé á ka sáa egʉ́a nyé ó, ɨ́ nzɨ̌ wɔ́ɔ́ ócwóó, bé bʉr o tɨ̂. Sá tɨ̂ʼ ó Nzyɛ̌m á ka bee embɨa ɨ́ páʼ wé ó, nyě tǐʼ ó baá o dí ebúʼlǎ lɔ́ɔ́ wé bá yɨ́. Lɔ́ɔ waá, wé ó sá bʉ́ʉ́ bʉ̂r dí ebeě mpʉ ógʉ̌ yɨ́.

²²OYúden bɨ́ɛ, bé dí ó mesimá, ó bé kámaa lɔ́ɔ́ gá wɨ́ná. Bʉr o bíkúl biswîh bɨ́ɛ sáá ó ocwóó, ó bé kámaa wê.

²³Ɨ́ wɨ́h pâʼ, bɨ̌h túnó ó Mbɨambɨa Lɔ́ɔ́ mé Krîst, mʉr á jʉ́ŋɔɔ ɨ́ kolôs kʉ́ nyá. Lɔ́ɔ waá, wé ó ebɔ̌ʼ e dí ebɨma óYúden ɨ́ miléme lɨ́. Wé ó lɔ́ɔ́ ógʉ̌ ɨ́ páʼ bʉ̂r o bíkúl bíswîh.

²⁴Ɨ́ páʼ bʉ̂r Nzyɛ̌m á jébe bá, damá jóʼo óYúden, damá jóʼo bʉ̂r o dí abe óYúden bá, bé bee nkûl le ocwóó mé Nzyɛ̌m ó, ɨ́ Yésʉs-Krîst.

²⁵Ebě, syɛ́ɛla mé Nzyɛ̌m bʉ̂r dí ebee ó, yé ó ogʉ̌ yɨ́, ocwóó dí tɨ̂ʼ wɨ́, wé lɨ́ elaa ócwóó ó bʉ̂r. Syɛ́ɛla mé Nzyɛ̌m dí enyɨ̂n ó, yé ó yaá métyɛʼ me nyʉ̂l yɨ́, nkul dí tɨ̂ʼ nyɨ́, nyě laá ó nkul bʉr.

²⁶Nó ó, bɨ́ɔɔ́ bâm, okɛ́l bâm, toŋlaa gá mpʉ bɨ́n á be ɨ́ jɔ̌ʼ Nzyɛ̌m á be apǎ jébe bɨ́n yɨ́. Ɨ́ sɔ́má bʉ̂r yɨ́n tʉ́ŋlʉ̌, yé á bé abuo ócwóó ó bʉ̂r ó sí yɨ̂, abuo mínjwɨ́ʼ mí bʉ̂r, abe e bʉr o dí ebyɛ̂l ɨ́ bidǐ bimpâ bá.

²⁷Tó kœb ó, Nzyɛ̌m á si twâr sá bʉ̂r ó sí dí ebee ó, yé ó ogʉ̌ yɨ́, lɨ́ egbâ ócwóó ó bʉ̂r ó sí yɨ̂ʼ sôn ɨ́ nyʉ̂l. Nye á twâr bityɛʼbol ó, nye gbâʼ baánkunkúl sôn ɨ́ nyʉ̂l.

²⁸Nye á si twâr sá bʉ̂r dí ebeě dwêh le epyêh yɨ́, le yaá dí abe yɨ́, ó nye nkʉ̂ gbǎh sá bé dí ebee ó, yé ó tɨ̂ʼ yɨ́.

²⁹Nó, kâr tɔʼ e sâ gwár ɨ́ sí yɨ̂ʼ dí e nkul enkʉ́na ɨ́ míh mé Nzyɛ̌m.

³⁰Nzyɛ̌m ó b'á pûhla bɨ̌n e Yésʉs-Krîst. Nye ó b'á sâ ntémé ó, bɨ̌n bíʼee ocwóó mé Yésʉs. Mɨná gá mû ó otîtyěl o bʉ̂r ɨ́ míh mé ɨ́ nzɨ̌ mé Krîst. Krîst ntémé ó b'á pubo mɨná gâ. Nye ó b'á táa góo, le edwih mɨ́ná gá ɨ́ mpila ébébe, pɛʼ mɨ́ná ɨ́ fá.

³¹Nó yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Mʉ̂r sí kpɛl énkʉ́na nó, nye nkʉ́naa yɨ́ɛ ɨ́ bisyɛ́ɛla mé Dâ Nzyɛ̌m.