Read Koonzime 1 Kórɨnt 10 Bible Online

1 Kórɨnt 10 - Koonzime bible

1 Kórɨnt 10

¹Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa sá yé á syɛ́ɛ kwá bimpám bíh yɨ́ ɨ́ pébébé. Byé á titye e Moyɨ̂z ó, sí dwiné. Bɨ́bɛ̂h, bé á si ntaa mâŋ e mekʉ̌.

²Bɨ́bɛ̂h, bé á si pûhla e Moyɨ̂z ɨ́ jɔʼ bé á tye sí dwiné, le ɨ́ jɔʼ bé á ntaa mâŋ yɨ́. Tɨ̂ʼ ó bé á nze duŋɔɔ ɨ́ Moyɨ̂z.

³Mede mempwár Sísǐm mé Nzyɛ̌m wé á ntɨh bé má, bɨ́bɛ̂h, bé á bě sí de mê.

⁴Bɨ́bɛ̂h bɛble médíbé mémpwár Sísǐm mé Nzyɛ̌m wé á ntɨh bé má. Bé á bɨbɛble medíbé ó, maá mé á gʉgʉ̂ lɨ́ ekóʼ Nzyɛ̌m á ntɨh bé lɨ́ má. Ekóʼ laá, lé á titye ó e bê. Nó ó, ekóʼ laá, lé á be ó Krîst.

⁵Damá jóʼǒ mpʉ bé á duŋɔɔ ɨ́ Moyɨ̂z nó yɨ́, bʉr ɨ́ buo buo ó sɔ́má yɔ́ɔ́, bé á bé abě mbɨ̂mbɨá ɨ́ míh mé Nzyɛ̌m. Sâ yaá ó bɨ́haá, bé á síe lɨ́ edwe ɨ́ lʉá yɨ́. Mesoo mɔ́ɔ́ mɨ́ɛ lɨ́ epúŋɔɔ ɨ́ lʉá e lʉá wɛ̂h.

⁶Bisyɛ́ɛla byaá, byê mɨná gá ó, sá dí ecɨ̂l mɨ́ná gá yɨ́, ó mɨná ayɨ́ be gá e bibébebébe bígwɨ́má mpʉ bé á be e byé yɨ́.

⁷Yé ajala ó, bɨ̌n báʼa dwe bíkpɛʼkpɛ̂ʼ bí ónzyɛ̌m kûm mpʉ bʉ́ʉ́ bʉ̂r ó sɔ́má yɔ́ɔ́, bé á sɨsâ yɨ́. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Bʉr, bé á be ɨ́ di sí, nzě deŋɔɔ méde le menyoʼ; mɔwɔɔ sí, bwalɔɔ ménzɔɔ lɨ́ edwe bíkpɛʼkpɛ̂ʼ bí ónzyɛ̌m byɔ́ɔ́ kûm.

⁸Mɨná bé ayɨ́ sâ gá bimolá mpʉ bʉ́ʉ́ bʉ̂r ó sɔ́má yɔ́ɔ́, bé á sâ yɨ́. Bʉr otɔ́ɔ́sin mekám mébá le olɛ̂l, bé ntɔ̂ʼ dwe ɨ́ móhó ngwár, lɨ́ ebúra e syɛ́ɛla yaá.

⁹Mɨná bé ajala le ebóblo gá Krîst mpʉ bʉ́ʉ́ bʉ̂r ó sɔ́má yɔ́ɔ́, bé á sâ yɨ́. Onyʉ́a nzě lʉ̂ bê, bé ntɔ̂ʼ sîl édwe.

¹⁰Ayɨ́ lwib gá ɨ́ bébe bébe, dumo e Nzyɛ̌m mpʉ bʉ́ʉ́ bʉ̂r ó sɔ́má yɔ́ɔ́, bé á lwilwib yɨ́. Éngeles eswie ntɔ̂ʼ jʉ̂ bê.

¹¹Bé á bɔma e bisyɛ́ɛla byaá ó, lɨ́ ecɨ̂l bʉ̂r. Bʉ́ʉ́ bʉ̂r nzě cɛma byé ɨ́ Mekaná mé Nzyɛ̌m ó, mɨná líʼɨɨ gá le epahle byê. Yé ó lɨ́ esú ó, mɨná gʉ́ŋaa gá sá mɨ́ná jálá le esyɛ̂hle gá yɨ́, mɨná gá bɨɛ, bʉr o dí ebeě mpʉ sí yɨ̂ʼ mû lɨ́ ekumo lɨ́ eswéhlɨ́ yɨ́ bá.

¹²Nó, mʉr dí ebúʼla ó, nye ó tîtyěl ɨ́ lyahwó nyá, nye díʼee le ocwóó, lɨ́ ekpɛ́ɛ ó, nye ámû jaá twe!

¹³Mebʉ́blá bɨ́n á ntaa má, mé lɨ́ epyâl bɨ́n e bʉr bɨ́bɛ̂h. Tó kœb ó, Nzyɛ̌m, nye ó mʉr jálá le ebúʼlɔɔ nyá. Nye ábîr ó, bɨ̌n bóblɔɔ, tó pyâl ɨ́ jɔʼ bɨ́n ósâ syóm yɨ́. Jɔʼ mébʉ́blá, mé ópipyâl bɨ́n yɨ́, nye ókar bɨ́n nzɨ̌ swîh. Bɨ̌n bé odyɛ̂l tɨ̂, le esyɛ̂hle mísyóm bɨ́n á gwa sâ mí.

¹⁴Sá tɨ̂ʼ ó bɨ́n jálá le esyɛ̂hle bíkpɛʼkpɛ̂ʼ bí ónzyɛ̌m yɨ́, bʉr ó kpɛ̌l bâm! Adwe gá byé dúu.

¹⁵Mě lwǐb e bɨ̌n ó mpʉ mʉ̂r jálá le elwib e mipɨpɨ́ʼ mi bʉ̂r yɨ́. Bɨ̌n bʉr o tɨ̂, pahlaa gá sá mé dí elɛ́ɛ yɨ́!

¹⁶Bélé ményoʼ gá yɨ́ná, yê nyá? Yê mɨná gá ó nzɨ̌ Nzyɛ̌m dí esʉ mɨ́ná gá metyɛʼ me mpóm mé e tɨ̂ʼ nyɨ́. Mɨná bé lɨ́ edwe gá nye nzyǒo ɨ́ lɔ̌b béle yaá. Ɨ́ jɔʼ mɨ́ná dí ede gá menyoʼ me tɨ̂ʼ yɨ́, mɨná bé lɨ́ esyɛŋa gá lɨ́ enʉa nkɔ̂b ɨ́ metié mé Krîst. Blêr mɨ́ná dí epɛ̂ʼla gá ɨ́ jɔʼ mɨ́ná dí ede gá yɨ́, tɨ̂ʼ ó mɨ́ná dí esyɛŋa gá lɨ́ enʉa nkɔ̂b ɨ́ nyʉ̂l mé Krîst yɨ́.

¹⁷Blêr, yé ó njɨ gwár. Mɨná damá buo gâ, mɨná gá bé yɨ́ɛ ó nyʉ̂l mpwár, ebě, mɨná gá bé ó e nkɔb ɨ́ blêr gwár.

¹⁸Bʉr o b'Ɨ́zraɛ̂l, baá o dí ebyɛ̂l nó ɨ́ nkǒ páʼ bípúno bá, beyɨɨ gá mpʉ bé dí esâ yɨ́: bʉr o dí ede ótír mû sí tíʼɔɔ, dweŋɔɔ̌ Nzyɛ̌m bá, bé sisyɛŋǎ e Nzyɛ̌m ó, lɨ́ edɨ́ɨ́ laá.

¹⁹Me lɛ́yɨɨ yé? Nzê tír á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá, nye ó nó tyeetye ɛ̌? Nzê bikpɛʼkpɛ̂ʼ bí ónzyɛ̌m, byé ó tɨ̂ʼ tyeetye ɛ̌?

²⁰Heʼé, mě kʉ́ lɛ́ɛ ó, sá bʉ̂r dí edwe kûm, cɨɨ e mindwéá myaá yɨ́, yé ó njɨ meleme; ntʉ̌ Nzyɛ̌m bé dí edwe kûm. Mé akpɛl ó, bɨ̌n e meleme syɛ́ŋaa lɨ́ epûhla mébô gúmo gwár.

²¹Bɨ̌n bé abe e nkul edě bélé ményoʼ mé Tî Yésʉs, le ede ntémé yaá méleme. Bɨ̌n bé abe e nkul ede méde mé Tî Yésʉs ndu e maá méleme.

²²Nzê ó, mɨná bé lɨ́ edǐ sâ gá ó, Nzyɛ̌m táaraa ebaʼ gá mɨná ɛ̌? Nzê bɨ̌n bûʼlá ó, mɨná ó dí elaa gá nye ɨ́ nkul ɛ̌?

²³Bʉ́ʉ́ bʉ̂r, bé lɛ́ɛ́ ó: «Mɨná bé e nkul esâ gá sá yɨ́yɛ̂h.» Yé ó nó. Sâ gwár, ntʉ̌ sá yɨ́yɛ̂h dí e nyɔm. «Mɨná bé e nkul esâ gá sá yɨ́yɛ̂h.» Yé ó nó. Sâ gwár, ntʉ̌ sá yɨ́yɛ̂h dí e nkul etyen bʉ̂r lɨ́ esóʼ é nzɨ́ mbɨ̂mbɨá.

²⁴Mʉ̌r sá asáǎ nyɔm wé. Mʉr sáŋaa sá dí e nyɔm lɨ́ esú é bʉ́ʉ́ bʉ̂r yɨ́.

²⁵Déʼ gá sá yɨ́yɛ̂h bé dí ebɛ́ma ɨ́ pátele yɨ́, abe e tíá ɨ́ milémé mín!

²⁶Ebě, yê cɛmá ó: Sí ndu e sá yɨ́yɛ̂h dí tɨ̂ʼ yɨ́, yé gúmó ó e Dâ.

²⁷Hááden sí jébe gó ó, go tôʼ, tó dě dína ɨ́ mbɛ̌r wé nó, gó ókam étô nó, go e dé sá yɨ́yɛ̂h nyé ódwe gó yɨ́, anʉa nkɔ̂b ɨ́ mipahlá mí lémé gô.

²⁸Nyʉ́ʉ́ mʉ̂r ká gwîh gó ó: «Tír nyâʼ baŋɔɔ ó, ɨ́ nzaá bikpɛʼkpɛ̂ʼ bí ónzyɛ̌m» nó, akǎ báʼǎ de nyê. Go ɨ́ jala le ebîr tír waá, akǎ de nyé ó, lɨ́ esú lé écwɨ́a e mʉr á boʼlo lɔ̌b waá nyá. Go ɨ́ jala le edû mípahlá mí léme.

²⁹Mé alɛ́ɛ ó, go dúʼoo mipahlá mí lémé gô. Mě lɛ́ɛ́ ó, go dúʼoo myaá mí lémé wé, nye mʉr tɨ̂. Lɨ́ otyeetye, mé abě túʼǎ. Nzê yé ó sá dí tîtyěl yɨ́ ɨ́ jɔʼ mʉ̂r swîh dwé mé mebě me twíí céme ɨ́ bisyɛ́ɛla mé dí etwâr ó, mě sá ó byê, byaá nyé dí epahle, bee ó, byé ajala le esáŋɔɔ bí ɛ́? Heʼé!

³⁰Mé dwé Nzyɛ̌m nzyǒo ɨ́ sá mé dí ede yɨ́ nó, bʉr, bé abe e nkam lɨ́ eswêʼ díé lâm ɨ́ ndéá méde waá. Mɛm yɨ́ɛ sí kʉ́ dwě Nzyɛ̌m nzyǒo ɨ́ mê.

³¹Nó ó, bɨ̌n damá de méde nkʉ̂ de ményoʼ, nkʉ̂ bɨ̌n damá sâ yʉ́ʉ́ sɔ̂ʼ: sáʼ gá syɛ́ɛla yaá yɨ́yɛ̂h lɨ́ esú lé édwě Nzyɛ̌m kûm tɨ̂!

³²Tiʼaa gá, mbi dí ó, bɨ̌n bé ákǎ sâ syɛ́ɛla ngá be ébɔ̌ʼ lé óbɨma óYúden le bʉr o bíkûl biswîh, nkʉ̂ ntɔ̂ʼ bʉr ó Mbɛ̌r-Nzyɛ̌m lɨ́!

³³Sáʼ gá mpʉ mê. Mě gbá nkûl ó, bʉr bɨ́bɛ̂h, bé kpɛ́lɨɨ me ɨ́ sá yɨ́yɛ̂h mé dí esâ yɨ́. Mé asáǎ nyɔm wâm, njɨ waá bʉ̂r ɨ́ buo buo, ó bé bíʼee twǐʼ njʉ̌m dǐ.