Read Koonzime 1 Kórɨnt 11 Bible Online

1 Kórɨnt 11 - Koonzime bible

1 Kórɨnt 11

¹Baŋaa gá me mpʉ mé dí ebaŋǎ Krîst yɨ́.

²Me lɨ́ esêʼle bɨ́n ebe bɨ́n dí ebuú toŋlo mé ɨ́ bijɔʼ bíbyɛ̂h ndu e ntémé ó, bɨ̌n bé lɨ́ ebaʼle le edû mílɛ́ʼlá mé á kala bɨ̌n mí.

³Mě gwɨ́m ó, bɨ̌n gʉ́ŋaa ó, Krîst, nye ó njwɨ́ɨ mʉrʉ̂m nyɨnyɛ̂h. Njʉ̂m, nye ó njwɨ́ɨ me mʉ́má wé. Nzyɛ̌m Sɔ́ŋ, nye ó Njwɨ́ɨ mé Krîst.

⁴Mʉ́rʉ̂m dyɛ́l ntʉ̂m ɨ́ lʉ̂ ɨ́ jɔʼ nyé dí ejɨʼla, nkʉ̂ gwîh mílɔ̌b mé Nzyɛ̌m ɨ́ gwɨ́hlá óbûʼla yɨ́ nó, nyě sámlé ó njwɨ́ɨ wé, Krîst.

⁵Nó ó, mʉ́má nyɨɛ bé adyɛ̌l ntʉ̂m ɨ́ lʉ̂ ɨ́ jɔʼ nyé dí ejɨʼla, nkʉ̂ gwîh mílɔ̌b mé Nzyɛ̌m ɨ́ gwɨ́hlá yɨ́ nó, nyě sámlé ó njwɨ́ɨ wé. Sôn nyaá, nye ó mpʉ sôn mʉmá dí swɨ́ʼá lʉ̂ nyá.

⁶Mʉ́má bé abúblǒ lʉ̂ nɛ́ɛ: nye ntémé, nye ɨ́ jala le eswɨ́ʼɔɔ énkwɨ́h! Mpʉ yé dí ɨ́ sâ sôn, mʉmá lɨ́ eswɨ́ʼa mpúo, nkʉ̂ cɨǎ lʉ̂ yɨ́, yé jala ó, nye dyɛ́lɨɨ ntʉ̂m ɨ́ lʉ̂.

⁷Bʉrʉ̂m bɨ́ɛ, bé ajala le ebúblǒ lʉ̂, ebě, bé lɨ́ enwɨɨla e Nzyɛ̌m nye mʉr tɨ̂. Bʉr gʉ́á kûm mé Nzyɛ̌m ó, ɨ́ mʉrʉ̂m. Tó kœb ó, mʉrʉ̂m á bi kûm ó, ɨ́ lɔ̌b mʉ́má á komlɔɔ, duho ɨ́ nye nyá.

⁸Mʉrʉ̂m á bé akomlɔɔ, duho ɨ́ mʉmá. Mʉmá ó b'á komlɔɔ, duho ɨ́ mʉrʉ̂m.

⁹Mʉrʉ̂m á bé akomlɔɔ lɨ́ esú é mʉ́má. Mʉmá á komlɔɔ ó, lɨ́ esú é mʉ́rʉ̂m.

¹⁰Sá tɨ̂ʼ ó lʉ́ mʉ́má jálá le edidǐ ndyɛlá e ntʉ̂m yɨ́. Ntʉ̂m waá, wê nye ó, sá dí elɛ̂ʼle ó, nye ɨ́ jwɨ́ɨ́ njʉ̂m yɨ́. Nye ɨ́ jala le edyɛ̌l ntʉ̂m ntémé ó, ɨ́ lɔ̌b bééngeles dí ɨ́ gwɨ́hlá yaá bá.

¹¹Damá jóʼo nó, Dâ Nzyɛ̌m á si tyêl etié ó, bʉbá e bʉrʉ̂m, bé ɨ́ jala le enwɨnwɨɨlǎ twiʼ páʼ nyɔ́ɔ́; nyʉ́ʉ́ mʉ̂r tɨ̂ʼ adi e twiʼ ɨ́ nye mʉr tɨ̂.

¹²Ebě, Nzyɛ̌m á si nʉa dwehé gwár ɨ́ mʉrʉ̂m, nzě komlo mʉ́má e tɨ̂. Jwɨʼ gwár e gwár yaá ntémé ó bʉ́rʉ̂m dí ebi ményʉ́l mɔ́ɔ́ yɨ́. Bé bi mé ó, cɨɨ e bʉbá. Nó ó, sâ yaá yɨ́yɛ̂h, yé duho ó kwá mé Nzyɛ̌m.

¹³Bɨ̌n bʉr o tɨ̂, tíʼáá gâ. Ɨ́ jɔʼ bɨ́n mû lɨ́ etáare gwɨ́hlá óbûʼla, mʉmá lɨ́ esâ mínjɨʼla e Nzyɛ̌m yɨ́, nzê yé mbɨa ó, nye díʼee abe e ntʉ̂m ndyɛlá ɛ́?

¹⁴Njwɨr ébyɛ̂l, wé mʉr tɨ̂, wé lɛ́ʼlé ntémé ó, ɨ́ jɔʼ mʉ́rʉ̂m dí ebaʼle mpúo ɨ́ jaa jaa yɨ́, sâ yaá, yê nye ó e sôn.

¹⁵Tó kœb ó, ɨ́ jɔʼ mʉ́má dí e mpuo nó yɨ́, ɨ́ páʼ wé, mpuo nyé, nye nye ó, sá dúu, ebě, Nzyɛ̌m á dwe nye mpuo ó, jala e búró.

¹⁶Mʉ̂r sí gwɨ̂m étô dóló le edo e bɨ̌h ɨ́ lɔ̌b waá nó, nye gʉ́ŋaa ó, bɨ̌h e bʉr ó Mbɛ̌r-Nzyɛ̌m bɨ́bɛ̂h, bɨ̌h bé abe e tum swîh.

¹⁷Jɔʼ mé mû lɨ́ etyêl bɨ́n metié mâʼ yɨ̂, mé abe e nkul esêʼle bɨ́n, ebě, bigwɨ́hlá bɨ́n dí esâ Nzyɛ̌m bí, byé lɨ́ ebuú sâ bɨ́n bʉr o tɨ̂ʼ ebébe, laa émbɨa.

¹⁸Sá ésôʼ, yé ó, ɨ́ jɔʼ bɨ́n dí esâ bígwɨ́hlá bí Mbɛ̌r-Nzyɛ̌m bín yɨ́, bé lɛ́ɛ́ mé ó, bɨ̌n bé lɨ́ esâ mpɔ́ʼá menkɔ̌m. Nó ó, me lɨ́ ebúʼla gúú páʼ lɔ́ɔ waá.

¹⁹Ebě, mpɔ́ʼá menkɔ̌m, nye ɨ́ jala le enyɨ̂nyɨn páʼ nyɨ́n ó, bé gwâ dweʼe baá o dí tyeetye e búʼó bá.

²⁰Jɔʼ bɨ́n dí egwɨ̂hla yɨ́, edɨ́ɨ́ é méde bɨ́n dí ede lɨ́, lé adwɛ̂ʼ Tî Yésʉs.

²¹Jɔʼ bɨ́n mû lɨ́ edɨ́ɨ́ lɨ́n laá yɨ́, mʉr nyɨnyɛ̂h jaá susuo ó, njɨ nyɨɛ dêʼ. Tó kœb ó, nyâ, nyé abe e péh dœʼ; nyʉ́ʉ́ nyɨɛ ɨ́ mpur menyoʼ.

²²Nzê bɨ̌n bé abe e mimbɛ̌r, ó bɨ̌n dêʼ mede le menyoʼ mɨ́n tɨ̂ʼ ɛ́? Ntʉ̌ pyêh bɨ́n dí esâ Mbɛ̌r-Nzyɛ̌m nɨ̌ ɛ́? Nzê bɨ̌n bé lɨ́ ekpɛl égbâ bʉ̂r o dí abe e mede bá sôn ɨ́ nyʉ̂l ɛ̌? Yé bɨ́n dí ekpɛl ó, me lɛ́yɨɨ bɨ̌n? Nzê me ósêʼle bɨ́n tɨ̂ʼ ɛ̌? Kʉ́ kâr káráa! Me ábá sêʼle bɨ́n.

²³Lɛ́ʼlá Dâ á dwe me wɨ́, wé ó mé múo nzě kala bɨ́n wɨ̂. Wé ó: Tî Yésʉs, ɨ́ pum bé á bɛ́ma nye wɨ́, nye á si nʉa blêr,

²⁴dwě Nzyɛ̌m nzyǒo, ntɔ̂ʼ pɛ̂ʼ yê. Nye ó: «Blêr yɨ̂, yé ó nyʉ̂l nyǎm dí lɨ́ esú lɨ́n nyɨ́. Bɨ̌n bé ótô le esɨ̂sǎ syɛ́ɛla yɨ̂ʼ bijɔʼ bíbyɛ̂h, le esîsimsa mé e tɨ̂.»

²⁵Jwɨʼ gwár yaá, ɨ́ jɔʼ bé á sil ede yɨ́, nye ntɔ̂ʼ nʉǎ bélé ményoʼ. Nye ó: «Menyoʼ mâ, mê nze tyél ó, edwán é sáá, ɨ́ nzɨ̌ metié mâm dí lɨ́ esú lɨ́n má. Jɔʼ yɨ́yɛ̂h bɨ́n ódɨde ményoʼ mâʼ yɨ́, bɨ̌n e sísímsá mé tɨ̂.»

²⁶Ebě, ɨ́ jɔʼ bɨ́n dína lɨ́ edě blêr yɨ̂ʼ le menyoʼ mâʼ yɨ́, bɨ̌n bé lɨ́ etúno pô eswie mé Tî gá wɨ́ná. Bɨ̌n bé ósɨ̂sa nó ó, tó pyâl ɨ́ jɔʼ nyé óbáʼǎ nze yɨ́.

²⁷Sɨ́ǎ yaá ó dí ó, mʉ̂r sí dě blêr yaá, nkʉ̂ menyoʼ maá mbǐ ndéá dí ajala wɨ́ nó, nye ónʉa mébě, ebě, nyɨ́ sâ syóm ɨ́ nkǒ pâʼ nyʉ̂l le metié me Tî gá wɨ́ná.

²⁸Nó ó, mʉr páa pahlě twiʼ yé. Jɔʼ yaá ó nyé ká nzě dě blêr le menyoʼ mâʼ yɨ́.

²⁹Mʉ̂r sí dě blêr le menyoʼ maá, nye l'adweʼe nyʉ̂l mé Krîst dí tɨ̂ʼ nyɨ́ nɛ́ɛ: lɛ́ɛ́, Nzyɛ̌m ótíʼe nyé milɔ̌b, dumo e ndéá wé waá.

³⁰Sá tɨ̂ʼ ó bʉ̂r ɨ́ buo buo ɨ́ sɔ́má yɨ́n mû mimbêl: bâʼ, onzwoó; bʉ́ʉ́ ntémé, sí síe lɨ́ edwe yɨ́.

³¹Mɨ́ná sí pahle gá mɨná gá bʉr o tɨ̂ʼ nó, go ó, mɨná bé ósyɛ̂hle gá eduma ɨ́ tíʼá mílɔ̌b mé Nzyɛ̌m.

³²Sâ gwár, Tî Yésʉs, nyɨ́ nyɛl étíʼ é mílɔ̌b gá lɨ́ná. Nó yé ó, nye mû ó lɨ́ esɨ̂ʼ mɨ́ná gá milʉ̂. Nyě sá nó ó, mɨná nkʉ̂ syɛ̂hle gá lé ɨ́ jɔʼ nyé ótíʼe bʉ̂r oswîh milɔ̌b, le edwe bé mebě jɔʼ gwár yɨ́.

³³Nó ó, bɨ́ɔɔ́ bâm, jɔʼ bɨ́n dí egwɨ̂hla, pûhla mébô lɨ́ esú lé éde méde yɨ́, bɨ̌n e nyɛ́ɛ́ bóno ó, bʉ́ʉ́ bʉ̂r nyɛ́ɛ pɛ̂ʼlǎ sá éde!

³⁴Mʉ̂r bé lɨ́ ejóʼo nzâ nó, nye e bóó dě mbɛ̌r wé. Bɨ́n gwɨ́hlá ɨ́ mbi waá nó, go ó, bɨ̌n bé óbe ó mbɨ̂mbɨá, adulo mébě ɨ́ menyʉ́l mɨ́n. Ɨ́ nkǒ páʼ mʉ́ʉ́ métíá méswîh, me ókǎ nzě yala bɨ́n mǎ ó, ɨ́ jɔʼ mé ónze gʉ̂ʼ kwá nyɨ́n yɨ́.