Read Koonzime 1 Kórɨnt 13 Bible Online

1 Kórɨnt 13 - Koonzime bible

1 Kórɨnt 13

¹Me óbɛ̌m lwib bílwǐb bi bʉ̂r, nkʉ̂ byaá bééngeles. Mé bé abe e kpɛ̌l nó, lɛ́ɛ́, me mû ó mpʉ̌ kpʉ́ŋlʉ́ tonô dí eduo yɨ́, nkʉ̂ mpʉ éntyɛ́ɛ́lé dí elwáŋla lɨ́.

²Me óbɛ̌m be e ndwéá égwîh bísyɛ́ɛla ngá syɛ́ɛ bí, le egʉ́a épâʼlǎ lwǐb ódîm yɨ́yɛ̂h, le egʉ́ǎ sá yɨ́yɛ̂h, sâ bínzololo. Me óbɛ̌m be e búʼó mbi dí ó, me pɛ́ʼɛɛ mecwɨ̂ʼ yɨ́. Sâ gwár, mé bé abe e kpɛ̌l nó, lɛ́ɛ́, mé abě sɔ̂ʼ.

³Me óbɛ̌m kab mébi mâm mɨ́mɛ̂h, nkʉ̂ bɛ́ma nyʉ̂l nyǎm ó, me díʼee e sá énkʉ́na ɨ́ lɔ̌b wé yɨ́. Mé bé abe e kpɛ̌l nó, me l'agúm dirǎ nyɔm e bisyɛ́ɛla bínɨ̌.

⁴Kpɛ̌l, yé lɛ́ʼlé mɨ́ná gá ó, mɨná sâʼ gá bíhwó le mpam. Kpɛ̌l, yé ásíé mʉ̂r. Yé áséʼlé yé mʉr tɨ̂. Yé ánkɛ́ɛ́ nyʉ̂l.

⁵Yé ásá sá sôn. Yé ásáá sɔ̂ʼ njɨ nyɔm wé. Yé ádíʼá léme. Mʉr dí e kpɛ̌l nyá, nyé abaʼra.

⁶Nye ásʉ́ná ɨ́ jɔʼ nyʉ́ʉ́ mʉ̂r sá ébébe yɨ́. Nyě jaá mɛɛla ó, njɨ ɨ́ bisyɛ́ɛla bi dí lɨ́ otîtyěl bí.

⁷Kpɛ̌l, yé lɨ́ ebúblǒ sá yɨ́yɛ̂h. Mʉr dí e kpɛ̌l lɨ́ esú é bʉ́ʉ́ bʉ̂r nyá, nyě e nkul ebúʼla bísá byɔ́ɔ́ bíbyɛ̂h. Lémé wé, wé lɨ́ elóno ɨ́ mpûʼla ɨ́ jɔʼ yɨ́yɛ̂h. Nye lɨ́ etô dóló le ekpɛl bʉ̂r ɨ́ jɔʼ yɨ́yɛ̂h.

⁸Kpɛ̌l, yé ásíe. Mingwíhá mílɔ̌b míɛ, myé ósíe. Bʉr o dí elwib báayogoyogo bá, bé ógwâʼ ésâ nó. Ngwɨ́á bʉ̂r, bé á nyɛɛ be e wé wɨ́, wé ósíe.

⁹Ebě, mɨná jaá gʉ́a gá ó, njɨ pêh. Mɨná gwíh gá milɔ̌b mé Nzyɛ̌m ó, njɨ pêh, asîl.

¹⁰Ɨ́ jɔ̌ʼ Nzyɛ̌m óbe, nye mû sí komlo bísá bíbyɛ̂h ɨ́ mipáʼ mímyɛ̂h yɨ́, nyé opɛʼ yaá yé á bɨbe pêh yɨ́.

¹¹Jɔʼ mé á be mâ ntwǒm yɨ́, táare e melab mâm, bijwɨʼ byâm, mipahlá myâm, byé á bɨbe ó, kwahaá mpʉ byaá bi bwá ó ntwǒm. Jɔʼ mé á pʉʼa lɨ́ ontwǒm, tô lɨ́ obwam yɨ́, me á nze ka bîr bisyɛ́ɛla bí óntwǒm byaá.

¹²Nó ó, ɨ́ báánâ, sá mɨ́ná dí ebee gá yɨ́, yê ɨ́ míh gá mɨ́ná ó, ɨ́ dímlɨ́ di dímlɨ́. Yé ó mpʉ̌ mveʼle dí enyɨ̂n ɨ́ nkóho dí engê yɨ́. Ɨ́ jɔ̌ʼ sá dí ntinɨ̂ mû sí pyâl yɨ́, mɨná bé óbeela gá mempǒm. Ɨ́ báánâ, ngwɨ́á wâm, wé dína ó, tîtil. Jɔʼ yaá ó mé ósûʼlǎ gʉ́ǎ sá yɨ́yɛ̂h ɨ́ pébébé yɨ́, dû mpʉ̌ Nzyɛ̌m dí eboó gʉ́a mé ɨ́ pébébé yɨ́.

¹³Nó ó, ɨ́ báánâ, búʼó, mpûʼla ti e kpɛ̌l, byé ó tɨ̂: bisá bílɛ̂l. Ɨ́ bisá bílɛ̂l byaá, yaá dí elaa byaá byúú yɨ́, yé ó kpɛ̌l.