Read Koonzime 1 Kórɨnt 14 Bible Online

1 Kórɨnt 14 - Koonzime bible

1 Kórɨnt 14

¹Sáŋáá gá nzɨ̌ ekpɛla. Gwɨ́mɨ́ɨ́ gá mindwéá Sísǐm mé Nzyɛ̌m dí entɨh mí, kʉ́ buú sahle ɨ́ ndwéá égwîh mílɔ̌b mé Nzyɛ̌m.

²Mʉr dí elwib báayogoyogo nyá, nyé alwib e bʉr o bé e boo nɔ́ɔ́ dí bá. Nyě lwǐb ó e Nzyɛ̌m, ebě, mʉr, nyé ajóʼǒ sá nyé dí elɛ́ɛ yɨ́. Nyě lɛ́ɛ́ ó, lwǐb ódîm, e nkul Sísǐm mé Nzyɛ̌m.

³Tó kœb ó, ngwíha milɔ̌b mé Nzyɛ̌m nyɨɛ, nye ó dí elwib e bʉr o bé e boo nɔ́ɔ́ dí bá. Nye lɨ́ egbâ bé pîm ɨ́ búʼó, le etɨ́e bé, le epóblo bê.

⁴Mʉr dí elwib báayogoyogo nyá, nye lɨ́ enʉa pîm ɨ́ búʼó yé nye mʉr tɨ̂. Tó kœb ó, mʉr dí egwîh mílɔ̌b mé Nzyɛ̌m nyá, nye lɨ́ egbâ pîm ɨ́ búʼó bʉ̂r ó Mbɛ̌r-Nzyɛ̌m.

⁵Mě kpɛl ó, bɨ̌n lwíbɨɨ baayogoyogo. Nó ó, me ɨ́ buú kpɛl ó, bɨ̌n gwíhɨɨ milɔ̌b mé Nzyɛ̌m. Mʉr dí egwîh mílɔ̌b mé Nzyɛ̌m nyá, nyě e nyɔm, laa waá dí elwib báayogoyogo nyá. Alaa ó, mʉr díʼee e nkul epâʼlǎ sá nyé dí elɛ́ɛ ɨ́ lwǐb ayogoyogo yaá yɨ́. Nó ó bʉ̂r ó Mbɛ̌r-Nzyɛ̌m bɨ́bɛ̂h, bé ónʉa pîm ɨ́ búʼó yɨ́.

⁶Bɨ́ɔɔ́ bâm! Okɛ́l bâm! Símsáá gá sɨ̂: jɔʼ mé ngá báʼǎ nze gʉ̂ʼ kwá nyɨ́n yɨ́, mé ójaá lwilwib e bɨ̌n njɨ baayogoyogo nó, wáǎ nyɔm bɨ́n ódira e me wɨ́ ɛ́? Me ábá be bɨ́n e nyɔm, alaa ó, mě gwíh bɨ́n ó, milɔ̌b mi dí eduho kwá mé Nzyɛ̌m mí. Myé ó mî: edwán é lɛ́ʼlá, nkʉ̂ ngwɨ́á ótyeetye, nkʉ̂ milɔ̌b mé Nzyɛ̌m, nkʉ̂ gúú lɛ́ʼlá swîh.

⁷Mɨná nʉ́aa gá mveʼle e bibomabomaa mpʉ̌ ndie nkʉ̂ mpêr. Byé bé agwá pyêl bílwǐb byɔ́ɔ́ nó, bʉr, bé ójóʼo twíí lwǐb yɔ́ɔ́ nyá?

⁸Mʉ̂r lʉ́ó sébé, nye l'agwá pyêl twíí sébé kʉ́ nó, onzé ókʉmsa dɔ̂m?

⁹Jwɨʼ gwár e gwár yaá, bʉr, bé e nkul ejóʼǒ lwǐb yɨ́n nyá? Sá yɨ́yɛ̂h bɨ́n ólwib ɨ́ jɔʼ bɨ́n dí elwib báayogoyogo yɨ́, yé bé yé abe ɨ́ kpâhla nó, lɛ́ɛ́, bé ákóʼó jóʼo bá sɔ̂ʼ. Bɨ̌n bé ójaá tʉtoʼwa ó toʼwáa.

¹⁰Bilwǐb, byê ɨ́ sí yɨ̂ʼ ó, mimbi mimbi. Abe e yʉ́ʉ́ dí tɨ̂, dí abe lɨ́ elɛ́ɛ̌ titii sɔ̂ʼ.

¹¹Mé bé ajóʼǒ lwǐb bé dí elwib e me yɨ́ nó, go ó, mʉr dí elwib e me ɨ́ lwǐb yaá nyá, nye me ó mpʉ mʉ̂r ayogoyogo. Mɛm ntémé nyɨɛ mpʉ mʉ̂r ayogoyogo.

¹²Nó mpʉ bɨ́n dí egbâ ményʉ́l mɨ́n, ó bɨ̌n bi ó mindwéá mé Sísǐm mé Nzyɛ̌m yɨ́, sáŋáá gá myé bé. Diʼee gá milwɨ́ŋlá. Buú sáa gá mindwéá mi dí egbâ Mbɛ̌r-Nzyɛ̌m pîm ɨ́ búʼó mí.

¹³Sɨ́ǎ yaá ó dí ó, mʉr dí elwib báayogoyogo nyá, jala ó, jɨʼla e Nzyɛ̌m ó, nye dwêʼ nye ntémé pɨʼ epâʼla bílwǐb byaá.

¹⁴Mé jɨ́ʼlá ɨ́ lwǐb ayogoyogo nó, lɛ́ɛ́, sísǐm wâm, wé ó ɨ́ minjɨʼla. Sâ gwár, pɨʼ nyǎm, nyé agúmo bá mpúmó, duho tɨ̂.

¹⁵Nó ó, me ósâ nyá? Me ójɨjɨʼla e Nzyɛ̌m e sísǐm wâm lɨ́ elwib báayogoyogo. Me ntémé, me ójɨʼla e né ó e pɨʼ nyǎm, ɨ́ lwǐb yâm. Me ódyɛɛ méjéme e sísǐm wâm. Me ódyɛɛ ntémé ó e pɨʼ nyǎm.

¹⁶Gó ódwě Nzyɛ̌m kûm ɨ́ lwǐb ayogoyogo nó, mʉr dína apǎ ntaǎ tyé mpʉ́n nyá, nye ákóʼó lɛ́ɛ «Amɛn», ebě, nzé ójóʼǒ sá gô lɛ́ɛ́ yɨ́?

¹⁷Gǒ damá dwě Nzyɛ̌m nzyǒo ɨ́ minjɨʼla myaá, abe e mʉr ónʉa pîm ɨ́ búʼó ɨ́ lɔ̌b mínjɨʼla myô myaá.

¹⁸Nzyǒo e Nzyɛ̌m, ebě, me lɨ́ ebuú lwib báayogoyogo, laa bɨ́n óbɛ̂h.

¹⁹Sâ gwár, ɨ́ jɔʼ bɨ́h e bʉr ó Mbɛ̌r-Nzyɛ̌m dí ɨ́ gwɨ́hlá yɨ́, mě kpɛ̌l ó, me lwíbɨɨ mekǎn metɛ̂n me dí eduho ɨ́ pɨʼ nyǎm, maá bʉ̂r dí e nkul ejóʼo má, laa ó, me lwíbɨɨ mekǎn otɔ́ɔ́sin kám ɨ́ lwǐb ayogoyogo. Ɨ́ mbi waá ó mé ngá dwe bʉ́ʉ́ bʉ̂r milɛ́ʼlá wɨ́.

²⁰Bɨ́ɔɔ́ bâm! Okɛ́l bâm! Ayɨ́ kǎ pahle gá mpʉ bwá ó ntwǒm. Bɨ̌n bé óbɛ̌m baŋa bwá ó ntwǒm ɨ́ mpʉ bé dí asâ ébébe é léme yɨ́. Sâ gwár, ɨ́ nkǒ páʼ mípahlá mín míɛ, diʼee gá mpʉ ótɔ́má bʉ̂r.

²¹Ebě, metié mé Moyɨ̂z, mé lɛ́ɛ́ ó: «Dâ Nzyɛ̌m lɛ́ɛ́ ó: “Me ólwib e bʉr bâʼ ó, ɨ́ lwǐb ayogoyogo. Me ólwib e bé ó, cɨcɨɨ e bilwǐb bi bʉ̂r oswîh.” Damá jóʼo nó, bé ákpɛl éjóʼo mê.»

²²Ɨ́ tɨ̂ʼ ɨ́, lwǐb ayogoyogo, yé ó mveʼle, sá dí elɛ̂ʼle ó, Nzyɛ̌m ó mû lɨ́ elwib le ohááden yɨ́. Nyé alwib e mbûʼla e nzɨ̌ lwǐb yaá. Ɨ́ jɔʼ nyé mû lɨ́ elwib le obûʼla yɨ́, nyě lwǐb e bé ó, cɨɨ e ngwíha milɔ̌b wé. Ndwéá égwîh mílɔ̌b myé, wé ó, lɨ́ esú lé óbûʼla. Wê ɨ́ páʼ wɔ́ɔ́ ó, dweʼle: sá dí elɛ̂ʼle ó, Nzyɛ̌m ó mû lɨ́ elwǐb nɨ̌ yɨ́.

²³Bʉ̂r ó Mbɛ̌r-Nzyɛ̌m bɨ́bɛ̂h gwɨ́hlá ɨ́ gúú mbɛ̌r, bê nzě nyɛl élwib bílwǐb báayogoyogo nó, yé ósûʼla nyá? Mʉ̂r dína lɨ́ ejéʼě búʼó gá yɨ́ná nyá, nkʉ̂ hááděn ní mbɛ̌r waá, kœb bɨ́n téme elwib bílwǐb byaá nó, mʉr waá ámû jaá pɨpahlě sɔ̂ʼ ó, njɨ bɨ̌n mû ó lɨ́ ekáa ógʉ̌.

²⁴Tó kœb ó, bɨ́n óbɛ̂h gwíh mílɔ̌b mé Nzyɛ̌m nó, hááden nkʉ̂ njéʼe-Nzyɛ̌m, ónî nó, milɛ́á mín mímyɛ̂h myaá, myé ólɛ̂ʼle mʉ̂r waá ɨ́ kpɛŋlɛm ó, nye ó syɛ̂l misyóm. Bɨ̌n bɨ́bɛ̂h, bé ódwe nyé mebě.

²⁵Bijwɨʼ bí lémé wé, byé ógwíhǎ kʉ̌l. Nyé okúrwo sí, píʼe mpóm ɨ́ bibwǎh ɨ́ míh mɨ́n, lɨ́ edwě Nzyɛ̌m kûm. Nye ólɛ́ɛ ó: «Nzyɛ̌m kʉ́ bě tyeetye ó ɨ́ sɔ́má yɨ́n.»

²⁶Bɨ́ɔɔ́ bâm! Okɛ́l bâm! Mɨná bé ókǎ lɛ́ɛ gá nyá? Jɔʼ bɨ́n dí egwɨ̂hla yɨ́, nyâʼ mʉ̂r, nye ó e jɨ́m nyé ódyɛɛ yɨ́. Nyʉ́ʉ́, e lɛ́ʼlá nyé ódwe wɨ́. Nyʉ́ʉ́, e gúú solá sɔ̂ʼ nyé ógwîh wɨ́. Nyʉ́ʉ́, nyě e lɔ́ɔ ɨ́ lwǐb ayogoyogo. Nyʉ́ʉ́, nyě e nkul epâʼlǎ sá lwǐb ayogoyogo yaá dí elɛ́ɛ yɨ́. Yé jala ó, syɛ́ɛla yaá yɨ́yɛ̂h gbâʼ Mbɛ̌r-Nzyɛ̌m pîm ɨ́ búʼó.

²⁷Bé lwíb báayogoyogo nó, bʉr o lwíb bílwǐb byaá bá, bé díʼee njɨ bʉr obá, nkʉ̂ bʉr olɛ̂l. Mʉr nyɨnyɛ̂h ólwǐb lwǐb ayogoyogo yé yaá ó, ɨ́ yé jɔʼ. Nyʉ́ʉ́ mʉ̂r ópâʼla bílwǐb báayogoyogo byaá.

²⁸Pɛ̂ʼla bilwǐb óbe, abe ɨ́ gwɨ́hlá Mbɛ̌r-Nzyɛ̌m yaá nó, mʉr sɔ́má yɨ́n dí elwilwib báayogoyogo nyá, nye díʼee ɨ́ puuu. Nye lwíbɨɨ njɨ ɨ́ lémé wé tʉ́ŋlʉ̌, Nzyɛ̌m nye omér lɨ́ ejóʼo.

²⁹Ogwíha o mílɔ̌b, bé lwíbɨɨ obá, nkʉ̂ olɛ̂l. Bʉ́ʉ́ bʉ̂r oswîh, bé okǎ pahle mílɛ́á myɔ́ɔ́ myaá, bé nkʉ̂ gʉ́ǎ nyɔm dí tɨ̂ʼ wɨ́.

³⁰Sâ gwár, Nzyɛ̌m ólɛ̂ʼle nyʉ́ʉ́ mʉ̂r sá nyé ɨ́ jala le egwîh ɨ́ Mbɛ̌r-Nzyɛ̌m yɨ́ nó, waâ bɨbé tîtyěl lɨ́ elwib nyá, nye díʼee sí ɨ́ puuu, jôʼlǒ sá mʉ̂r waá ólɛ́ɛ yɨ́.

³¹Sɨ́sáʼ gá nó, ebě, bɨ̌n bé e nkul egwîh mílɔ̌b mé Nzyɛ̌m mʉr ngúngwár, lɨ́ esú ó bʉr bɨ́bɛ̂h, bé jɨ́ʼɨɨ milɛ́ʼlá, bʉr bɨ́bɛ̂h lɨ́ ebi nkûl ɨ́ milémé myɔ́ɔ́ tɨ̂.

³²Ngwíha milɔ̌b nyɨnyɛ̂h, nyě e sísǐm dí esâ ó, nye gwíhɨɨ milɔ̌b mé Nzyɛ̌m wɨ́. Sísǐm waá wɨ́ɛ, wé lɨ́ esâ nyé mejóʼo.

³³Ebě, Nzyɛ̌m á bé ajébe mʉ̂r ó, nye tíʼaa tʉ́ŋlʉ̌ oleŋéleŋé. Nye á jébe nye ó, nye tíʼaa ɨ́ mepyɛbla.

³⁴Mbɛ̌r-Nzyɛ̌m ɨ́ gúmó yɨ́yɛ̂h, wê e mpéné ó, bʉbá sá alwib ɨ́ bigwɨ́hlá bí Mbɛ̌r-Nzyɛ̌m. Bé abe e nkul lwîb. Bé ɨ́ jala le edi ó, njɨ ɨ́ jwɨ́ɨ́ bʉ́ʉ́ bʉ̂r, dû mpʉ métié mé Nzyɛ̌m dí etɨ́e yɨ́.

³⁵Mʉ́má sí gwɨ̂m édweŋɔɔ gúú lɛ́ʼlá nɛ́ɛ: nye díʼee njʉ̂m wé ɨ́ mbɛ̌r wɔ́ɔ́. Yé ɨ́ buú sâ sôn lɨ́ ebee mʉ́má lɨ́ elwib ɨ́ gwɨ́hlá Mbɛ̌r-Nzyɛ̌m.

³⁶Nzê bɨ̌n ó b'á táare lɔ̌b étúno bʉ̂r lɔ́ɔ́ mé Nzyɛ̌m ɛ̌? Nzê lɔ́ɔ waá, wé á jaa túnɔɔ ó, njɨ bɨ̌n e bɨ̌n ɛ̌?

³⁷Mʉ̂r sí bee ó, nye ó ngwíha milɔ̌b mé Nzyɛ̌m nó, nkʉ̂ ntɔ̂ʼ ó, nyé óbe, nye mû lɨ́ ebee ó, nyě e ndwéá dí eduho e Sísǐm mé Nzyɛ̌m wɨ́ nó, nye e gʉ́á ntémé ɨ́ pébébé ó, sá mê cɛmá bɨ́n wâʼ kʉ́ yɨ́, yé ó etié Tî gá wɨ́ná Yésʉs mʉr tɨ̂ʼ á tyêl mɨná gá lɨ́.

³⁸Mʉ̂r óbe, akǎm lɛ́á wâm waá nó, agbâ gá nye ɨ́ nkɔb.

³⁹Bɨ́ɔɔ́ bâm! Okɛ́l bâm! Gwɨ́má yɨ́n, yé díʼee njɨ ó, bɨ̌n gwíhɨɨ milɔ̌b mé Nzyɛ̌m. Sá akamle gá bʉr lɨ́ elwib bílwǐb báayogoyogo.

⁴⁰Sá yɨ́yɛ̂h, yé syɛ́yɨɨ mpʉ dí ejala yɨ́, ɨ́ medile tʉ́ŋlʉ̌.