Read Koonzime 1 Kórɨnt 15 Bible Online

1 Kórɨnt 15 - Koonzime bible

1 Kórɨnt 15

¹Bɨ́ɔɔ́ bâm! Okɛ́l bâm! Me múo nzě jɨm bín bitɔŋlá ɨ́ Mbɨambɨa Lɔ́ɔ́ mé á túno bɨ̌n, waá bɨ́n á jóʼo wɨ́. Wé ntémé, wé ó waá dí bɨ̌n simá ɨ́ miléme wɨ́.

²Bɨ́n óbaʼlě lɔ́ɔ waá mbɨ̂mbɨá mpʉ mé á túno bɨ̌n wǎ yɨ́ nó, wé ótiʼ bɨ́n. Yé bé abe nó wá, lɛ́ɛ́, búʼó yɨ́n, yé ó dwêh.

³Me á bě sí kala bɨ́n lɔ́ɔ́ mé á lɛ́ɔɔ wɨ́. Wé ɨ́ bwǎʼ nyɔm. Wé ó nɛ́ɛ: Krîst, nye á si búra e misyóm gá míná mpʉ yé á boo be cɛmá ɨ́ Mekaná mé Nzyɛ̌m yɨ́.

⁴Nye á be ó sí debe. Nye nzě pah, duho lɨ́ odwe ɨ́ móhó lɛ̂l mpʉ Mékaná mé Nzyɛ̌m á boo lɛ́ɛ yɨ́.

⁵Nye á be ó sí pyâl kwá mé Kefâs, nzě pyâl ntémé kwá bʉr o mílʉ́mlʉ́ kám le obá.

⁶Píe tɨ̂, nye nzě pyâl kwá bʉ́ʉ́ óbûʼla bé, laa mínter mitɛ̂n, bɨ́bɛ̂h bee nyé ɨ́ jɔʼ gwár. Bâʼ bʉ̂r o tɨ̂, bé dína ó, ɨ́ twiʼ, kumo ɨ́ báánâ; bʉ́ʉ́, bɨ́ dwe.

⁷Nye nzě báʼǎ pyâl kwá mé Jacques ti e bʉr o mílʉ́mlʉ́ bɨ́bɛ̂h.

⁸Epíhe le epíhe ó nyé á ka nze pyâl kwá nyǎm yɨ́, mɛm yɨ́ɛ mpʉ mʉ̂r á byɛ̂l sónó nyá.

⁹Ɨ́ sɔ́má bʉ̂r o mílʉ́mlʉ́ tʉ́ŋlʉ̌, mɛm ó dí mʉr epíhe. Lɨ́ otyeetye, mé ajala le ejébɔɔ «mʉ̂r milʉ́mlʉ́,» ebě, me á si tíble Mbɛ̌r-Nzyɛ̌m.

¹⁰Damá jóʼo nó, me mʉr milʉ́mlʉ́ ó, ɨ́ metyɛʼ me mpóm Nzyɛ̌m á sʉ me má. Nye á bé asʉ mé mǎ dwêh. Nye á sʉ me mǎ ó, me nkʉ̂ séa, laa bʉ́ʉ́ bʉ̂r o mílʉ́mlʉ́ bé bɨ́bɛ̂h. Lɨ́ otyeetye, ntʉ mé á séa. Metyɛʼ me mpóm me dí ɨ́ me má, mé ó dí esâ ó, me séaa.

¹¹Damá be ó, me ó dí ɨ́ buú séa, nkʉ̂ ntɔ̂ʼ bɨ́ɛ: bɨ̌h bé yɨ́ɛ ó lɨ́ etúnǒ lɔ́ɔ waá. Lɔ́ɔ ngwár waá ó bɨ́n á bûʼla wɨ́.

¹²Yé bé yê tyeetye ó, Krîst á si pah, duho lɨ́ odwe nó, á bʉ́ʉ́ bʉ̂r ɨ́ sɔ́má yɨ́n, bé báná kʉ́ lɛ́ɛ ó, odwe, bé ákóʼó pah ɨ́ soo nyá?

¹³Yé bé odwe, bé ápah ɨ́ soo nó, lɛ́ɛ́, Krîst á bé apah ntémé.

¹⁴Yé bé Krîst á bé apah nó, lɛ́ɛ́, túnó bɨ́h dí etúnǒ Mbɨambɨa Lɔ́ɔ wɨ́, wé ó dwêh. Mbûʼlá bɨ́n dí ebúʼla wé wɨ́, wé ntémé, wé ó dwêh.

¹⁵Yé bé yé ó nó wá, yé nyɨ́n ntémé ó, bɨ̌h bé lɨ́ elɛ́ɛ bíbɛr, dumo e Nzyɛ̌m, ebě, bɨ̌h bʉboʼló ɨ́ páʼ wé ó, nye ó b'á pɛh Krîst. Yé bé odwe, bé ákóʼó pɛhɔɔ nó, lɛ́ɛ́, Nzyɛ̌m á bé apɛh nyê.

¹⁶Yé bé odwe, bé ákóʼó pɛhɔɔ nó, lɛ́ɛ́, Krîst á bé apah ntémé.

¹⁷Yé bé Krîst á bé apah nó, lɛ́ɛ́, búʼó yɨ́n, yé ó dwêh; lɛ́ɛ́ ntémé, bɨ̌n dína ó, ɨ́ mpila ébébe yɨ́n tʉ́ŋlʉ̌,

¹⁸lɛ́ɛ́, baá bé á pûhla e Krîst, ntɔ̂ʼ dwe bá, bɨ́ tó dîm.

¹⁹Yé bé milémé gá míná jaá didyɛ̂ʼwo ɨ́ Krîst ó, njɨ ɨ́ twǐʼ sí yɨ̂ʼ nó, lɛ́ɛ́, mɨná gá bé e nkoó, laa bʉ̂r ó sí yɨ̂ʼ bɨ́bɛ̂h.

²⁰Sâ gwár, Krîst nyɨɛ á si kʉ pah, duho lɨ́ odwe. Nye ó mʉr esôʼ á nyɛɛ kʉ byɛ̂l ɨ́ káhlá, nzě dwe, ntɔ̂ʼ kǎ pah nyá.

²¹Jwɨʼ gwár e gwár e mpʉ nyʉ́ʉ́ mʉ̂r ngwár á sâ syóm, eswie ntɔ̂ʼ jala e bʉr bɨ́bɛ̂h yɨ́, nó ntémé ó mʉ̂r ngwár á jala le esâ ó, odwe pɛ́hɔɔ yɨ́.

²²Jwɨʼ gwár mpʉ bʉ̂r dí edwe ɨ́ mpúhlá nyɔ́ɔ́ le Ádam yɨ́, nó ntémé ó, Nzyɛ̌m ópɛh bɨ́bɛ̂h ɨ́ mpúhlá nyɔ́ɔ́ e Krîst.

²³Sâ gwár, mʉr nyɨnyɛ̂h, nye ópah ó, ɨ́ yé jɔʼ: Krîst esôʼ; bʉr bé, bé ónzě bɔma e né ɨ́ jɔʼ nyé ngá báʼǎ nze yɨ́.

²⁴Jɔʼ yaá ó ésúʼlá é sí yɨ̂, lé ókǎ pyâl yɨ́. Krîst ógbah mísísǐm mí édúrʉ́ʉ́ mímyɛ̂h: le myaá mi dí milʉ̂, le myaá mi nkûl jwɨ́ɨ, le myaá mi dí e menkul ménɨ́nɨ́ɨ́ mí. Nyé odwě Nzyɛ̌m Sɔ́ŋ jwɨ́ɨ́ yé yaá.

²⁵Ebě, yé á jala ó, Krîst díʼee njwɨ́ɨ, tó pyâl ɨ́ jɔʼ nyé óbe, nye mû sí ntaa óntɨ̂m le obɨn bé bɨ́bɛ̂h, gbâ bé sí mebo mé yɨ́.

²⁶Ntɨ̂m e mbɨn epíhe nyé ókǎ gbah nyá, óbe ó Eswie, lé mʉr tɨ̂.

²⁷Ebě, yê cɛmá ó: Nzyɛ̌m á si gbâ sá yɨ́yɛ̂h ɨ́ jwɨ́ɨ́ yé, sí mebo mé. Nó yé lɛ́ʼlé mbɨ̂mbɨá ó, Nzyɛ̌m nyɨɛ, mʉr dí egbâ sá yɨ́yɛ̂h ɨ́ jwɨ́ɨ́ mé Krîst yaá nyá, nyé abe tɨ̂ʼ ɨ́ jwɨ́ɨ yaá tʉ́ŋlʉ̌.

²⁸Jɔʼ nyé óbe, nye mû sí gbâ sá yɨ́yɛ̂h ɨ́ jwɨ́ɨ́ mé Krîst yɨ́, ɨ́ jɔʼ yaá ó Krîst nyɨɛ ngá kǎ nî ɨ́ jwɨ́ɨ́ mé Nzyɛ̌m yɨ́, nyɨɛ mʉr á pa gbâ sá yɨ́yɛ̂h ɨ́ jwɨ́ɨ́ mé Krîst nyá. Nzyɛ̌m Sɔ́ŋ ókǎ be ó njwɨ́ɨ sá yɨ́yɛ̂h ɨ́ jɔʼ yaá.

²⁹Yé bé abe nó wá, á baá o dí eduŋɔɔ lɨ́ esú lé ódwe bá, bé óbi yé? Ódwe bé apah nó, á bé duduŋɔɔ ɨ́ páʼ wɔ́ɔ́ ɨ́ yé?

³⁰Ódwe bé apah nó, á bɨ̌h bʉr o dí ekam édidi ɨ́ ka sóo bá, bé nzoó kam nó lɨ́ ewala lɨ́lɛ̂h ɨ́ yé?

³¹Bɨ́ɔɔ́ bâm! Okɛ́l bâm! Yê tyeetye ó, mě pǎm le eswie ó, dʉ́ó lɨ́lɛ̂h. Yê tyeetye ntémé ó, me lɨ́ enkʉ́na ɨ́ lɔ̌b wɨ́n ɨ́ mpǒm mé Tî gá wɨ́ná, Yésʉs-Krîst.

³²Yé bé me á si sia e mitúú Éfɛsɔs lɨ́ ejaá dû njɨ minyɔm mi bʉ̂r ó sí yɨ̂ʼ nó, lɛ́ɛ́, syɛ́ɛla yaá, yé á gwa be me e wáǎ nyɔm? Ódwe bé ápah nó, lɛ́ɛ́, yé á bé agwá be mé e nyɔm. Kɨkɛna, yé ó: «Mɨná dêʼ gá mede le menyoʼ, ebě, ómɛ́n, mɨná bé ódwe gâ.»

³³Mʉ̌r sá ajéʼě sɨ̂: «Bibɨ́bla mínjoo sá ó, ndáma mímpaŋ métum.»

³⁴Yé jala ó, bɨ̌n bírɨɨ lɔ̌b ógʉ̌ wɨ́n. Bɨ̌n a gwáʼ ésâ mísyóm. Bʉ́ʉ́ bʉ̂r ó sɔ́má yɨ́n, bé agʉ́ǎ Nzyɛ̌m. Mě lɛ́ɛ́ mpʉ́nʉ̌ ó, lɨ́ egbâ bɨ́n sôn ɨ́ nyʉ̂l.

³⁵Nó ó, nyʉ́ʉ́ mʉ̂r, nyě e nkul edî ó: «Odwe, bé pah nyá? Bé óbúla kwár odwe e wáǎ mbi ményʉ̂l?»

³⁶Gʉʼlʉgʉ́! Jɔʼ gó dí e mpeʼ yɨ́, gó bé aswah yé ɨ́ bibwǎh nó, yé abe e nkul epâh.

³⁷Ntʉ̌ sá gó dí ebe ɨ́ bibwǎh yɨ́, dí kuó lɨ́ ngá pâh yɨ́. Sá gó dí ebe yɨ́, yé ó mâ bumó. Yé óbɛ̌m bě bumó mpiha, nkʉ̂ yʉ́ʉ́ bumó swîh.

³⁸Nzyɛ̌m dwé bumó yaá nyʉ̂l ó mpʉ nyé kpɛ̂l yɨ́. Nye lɨ́ edwě bumó yɨ́yɛ̂h nyʉ̂l dí ɨ́ jʉ́ʼa e yɨ́haá bumó nyɨ́.

³⁹Menyʉ́l mɨ́mɛ̂h, mé abě jwɨʼ gwár. Bʉr, bé ó e wɔ́ɔ́ mbi nyʉ̂l; otír e wɔ́ɔ́; binʉ̌n e wɔ́ɔ́; osû ntémé e wɔ́ɔ́ mbi.

⁴⁰Yé ntémé, yé ó e menyʉ́l bísá bí jʉ́o kʉ́, ndu e maá bísá bí sí. Menyʉ́l bísá bí jʉ́o kʉ́, mé ó e wɔ́ɔ́ mbi ójɔɔ́. Menyʉ́l bísá bí sí e wɔ́ɔ́ mbi ójɔɔ́.

⁴¹Dʉ́o, lé ó e wé mbi ójɔɔ́; álomó e waá wé; ocwícwén e wɔ́ɔ́ mbi. Damá jóʼo nó, ojɔɔ́ wé ócwícwén, wé sá ó, syɛ́ɛla páʼ nyɔ́ɔ́.

⁴²Yé óbe ntémé ó nó, ɨ́ jɔʼ ódwe, bé ópah yɨ́. Ndwe nyɨɛ, nye lɨ́ edɨlɔɔ, nzě bo. Jɔʼ ndwê ópah yɨ́, nye ákǎ dwe, nkʉ̂ bo.

⁴³Jɔʼ ndwê dí edɨlɔɔ yɨ́, nye ɨ́ ntéʼe. Jɔʼ nyé ópah yɨ́, nye óbe ó e kûm. Jɔʼ nyé dí edɨlɔɔ yɨ́, nyě e nkoó le etyɛʼ. Jɔʼ nyé ópah yɨ́, nye óbe ó e nkul.

⁴⁴Jɔʼ ndwê dí edɨlɔɔ yɨ́, nyě e nyʉ̂l bipúno. Jɔʼ nyé ókǎ pah yɨ́, nye óbe ó e nyʉ̂l sísǐm. Yé ó e nyʉ̂l bipúno. Yé ntémé, yé ɨ́ jala le ebe ó e nyʉ̂l sísǐm.

⁴⁵Ebě, yê cɛmá: Mʉr esôʼ, Ádam, á be lɨ́ etiʼe. Ádam á suʼla ka nze nyá nyɨɛ, nye ó Sísǐm dí etiʼ bʉ̂r wɨ́.

⁴⁶Ntʉ nyʉ̂l sísǐm á nyɛɛ nze. Yé á be ó nyʉ̂l bipúno. Jɔʼ yaá ó nyʉ̂l sísǐm nyɨɛ á ka nze epíhe yɨ́.

⁴⁷Ádam esôʼ á meŋɔɔ ó e bibwǎh. Ádam mbá á duho ó, ɨ́ jʉ́o kʉ́.

⁴⁸Bʉr o dí egúmo e sí yɨ̂ʼ bá, bé nwɨɨla ó e mʉr á meŋɔɔ e bibwǎh nyá. Tó kœb ó, bʉr o dí egúmo e jʉ́o bá, bé nwɨɨla ó e waá á duho ɨ́ jʉ́o kʉ́ nyá.

⁴⁹Mpʉ mɨ́ná bé á nyɛɛ nwɨɨla gá e mʉr á sáŋɔɔ e bibwǎh nyá yɨ́, jwɨʼ gwár yaá ntémé ó, mɨ́ná ngá nwɨɨla gá e mʉr á duho ɨ́ jʉ́o kʉ́ nyá yɨ́.

⁵⁰Bɨ́ɔɔ́ bâm! Okɛ́l bâm! Mě kʉ́ lɛ́ɛ bɨ́n ó, ntʉ̌ sá dí bipúno e metié yɨ́, dí e nkul enʉǎ diá ɨ́ Mpóʼo mé Nzyɛ̌m, jala e nkɔb líʼe nyé. Sá dí edwe, bo yɨ́, yé abe e nkul elîʼ e sá dí edǐ njʉ̌m dǐ e njʉ̌m dǐ yɨ́.

⁵¹Me múo nzě pâʼla bɨ́n lwǐb ódîm: ntʉ bʉ̂r bɨ́bɛ̂h ngá dwe! Sâ gwár, mɨná gá óbɛ̂h, bé ódwira gá menyʉ̂l.

⁵²Menyʉ́l gá mɨ́ná, mé ódwira ó, jɔʼ gwár mpʉ dîh dí ebyɛ́bla yɨ́. Yé óbe ó, ɨ́ jɔʼ sébé epíhe ólwib yɨ́, ebě, ɨ́ jɔʼ nyé ólwib yɨ́, odwe, bé ópah. Bé ódidi nó ó, akǎ dwe. Menyʉ́l gá mɨ́ná, mé ócéne.

⁵³Nyʉ̂l dí ebo ɨ́ soo nyɨ́, nye ɨ́ jala le ecéne, liŋa nyaá dí abo nyɨ́. Sá dí e nkul edwe yɨ́, liŋa yaá dí abe e nkul edwe yɨ́.

⁵⁴Nyʉ̂l dí ebo nyɨ́, nyé óbe, nye mû sí céne, liŋa nyaá dí abo nyɨ́ nó, nyaá dí e nkul edwe nyɨ́, nyé óbe, nye mû sí liŋa nyaá dí abe e nkul edwe nyɨ́ nó, ɨ́ jɔʼ yaá ó sá dí cɛmá yɨ́, yé ólwɨ́ŋlɨ yɨ́: Eswie, lɨ́ gbahɔɔ. Nzyɛ̌m, nyɨ́ búla le onkɔ́ɔ́!

⁵⁵Eswie ɛ̌! Onkɔ́ɔ́ gô, wé mû nkoó? Eswie ɛ̌! Nkul ejʉ̂ bʉ̂r nyǒ, nye mû nkoó ɛ́?»

⁵⁶Eswiě nʉnʉa nkûl ejʉ̂ bʉ̂r ó e nzɨ̌ syóm. Syóm wɨ́ɛ, wé nʉnʉa nkûl ó, duho ɨ́ metié mé Nzyɛ̌m.

⁵⁷Nzyǒo e Nzyɛ̌m nyɨɛ, mʉr dí edwe mɨ́ná gá nkul entaa ɨ́ nzɨ̌ Tî gá wɨ́ná, Yésʉs-Krîst nyá!

⁵⁸Bɨ́ɔɔ́ le okɛ́l bâm mé dí ekpɛl bá, tyɛ́bɨ́ɨ́ gá mekʉ̌ sí ɨ́ sɨ́ŋ. Kʉ́ buú séa gá syɛ́ɛ́ mé Tî Yésʉs ɨ́ jɔʼ yɨ́yɛ̂h. Gʉ́ŋáá gá ó, syɛ́ɛ́ bɨ́n dí eséa Tî Yésʉs yɨ́, yé ákóʼó dwě ntuʼ.