Read Koonzime 1 Kórɨnt 16 Bible Online

1 Kórɨnt 16 - Koonzime bible

1 Kórɨnt 16

¹Ɨ́ nkǒ páʼ ménzyɛ̌ŋ me dí lɨ́ esú é bʉ̂r o dí egúmo e Nzyɛ̌m bá, mě lɛ́ɛ́ bɨ́n ó: sáʼ gá jwɨʼ gwár mpʉ mé á boo lɛ́ɛ e bʉr ó Mbɛ̌r-Nzyɛ̌m dí ɨ́ sí Galásia bá ó, bé sâʼ yɨ́.

²Ɨ́ móhó sóno wɨ́wɛ̂h, mʉr, nye ɨ́ jala le ekomo lɨ́ empah é mbɛ̌r wé, mɔnɨ́ jwɨʼ e bím nyé á bi yɨ́. Nye óbaʼle yé, tó pyâl ɨ́ jɔʼ mé ókǎ nze yɨ́, lɨ́ esú ó, bɨ̌n ayɨ́ kǎ báʼǎ di ɨ́ menzyɛ̌ŋ lɨ́ epyâl lâm.

³Ɨ́ jɔʼ mé ópyâl yɨ́, bɨ̌n bé ólɛ̂ʼle mé bʉr o bɨ́n ngá pɛ̂h bá. Mé ocɛma mékaná ngá lɛ̂ʼle bʉ́ʉ́ bʉ̂r ó, bé ó dí edila mé lɨ́ etô ɨ́ milʉ́mlʉ́ myâm má. Mé otyen bé ó, bé tôʼ e ndwéá wɨ́n waá ɨ́ Yerʉ́zalɛm.

⁴Yé óbe, yé mû sí nyɨ̂n ntémé ó, mě jala le etô ntémé Yerʉ́zalɛm nó, bɨ̌h le onɔ́ɔ́, bé otô.

⁵Me ónze gʉ̂ʼ kwá nyɨ́n ó, sí pǎ cɨɨ̌ sí Masedónia.

⁶Me ódi bá mâ jɔʼ kwá nyɨ́n, bɛ̌m be ɨ́ jɔ̌ʼ kóló yɨ́yɛ̂h. Bɨ̌n bé osúʼo mé ɨ́ tyen yâm, tyen mé dóló nko mé ótô yɨ́.

⁷Me ánze kwá nyɨ́n súʼó ɨ́ báánâ, ebě, me ámû jaá tyɛ̂b kwá nyɨ́n, njɨ tîtyěl. Mě bûʼlá ó, Tî Yésʉs sí kam nó, me óbá di kwá nyɨ́n.

⁸Me lɨ́ egwɨ̂m édi wâʼ Éfɛsɔs, tó pyâl ɨ́ jɔʼ nzɔ́ɔ Paŋtekôt óbwalɔɔ yɨ́.

⁹Ebě, mpǎŋ jɔʼ, yɨ́ pyâl mé ó, me séaa syɛ́ɛ́ nɨ́nɨ́ɨ́ e nkul ɨ́ buo buo. Nó ó, ontɨ̂m le obɨn o dí elwímla e me bá, bé ntémé, bé ó tɨ̂ʼ ɨ́ buo buo.

¹⁰Timotɛ̂ sí pyâl kwá nyɨ́n gʉ̂ʼ nó, bɨ̌n e báʼlé nyé mbɨ̂mbɨá. Nye l'asyɛ̌l bá, ebě, nyě séá ó Tî Yésʉs syɛ́ɛ́ mpʉ mé ntémé dí eséa nyé yǎ yɨ́.

¹¹Mʉr apyêh gá nye. Súʼáá gá nye ɨ́ tyen yé, ó nye tôʼ dóló, lémé wé ɨ́ piiia. Nye pyálaa wâʼ nko mé dí yɨ́, ebě, bɨ̌h e bʉ́ʉ́ bɨ́ɔɔ́ gá bɨ́ná mû ó lɨ́ ebóno nyê.

¹²Ɨ́ páʼ mé mɨ́ɔɔ́ gá wɨ́ná Ápolos, me á tyen nye ó, nye tôʼ gʉ̂ʼ kwá nyɨ́n, bé e bʉ́ʉ́ bɨ́ɔɔ́ gá bɨ́ná. Tó kœb ó, nyé agwɨ̂m étô gʉ̂ʼ ɨ́ báánâ. Nye ótô yɨ́ɛ, ɨ́ jɔʼ nyé óbǐ jɔʼ yɨ́.

¹³Diʼee gá ɨ́ mpʉ̂n. Mʉ̌r sá apɨ́ŋla ɨ́ búʼó. Diʼee gá e lémé nkɔ́ɔ́. Diʼee gá e nkul.

¹⁴Sáʼ gá bisyɛ́ɛla bín bíbyɛ̂h e lémé kpɛ̌l.

¹⁵Bɨ̌n bé lɨ́ egʉ́ǎ Stéfanas, bé e mbɛ̌r bʉ̂r wé. Bɨ̌n bé lɨ́ egʉ́a ó, bé á be ó bʉr o bé ésôʼ bé á dyêʼ koo e Nzyɛ̌m ɨ́ sí Akayɨ̂ bá. Bé ó b'á nyɛɛ gbâ menkul mɔ́ɔ́ lɨ́ ekɛm bʉ̂r o mé Nzyɛ̌m. Nó ó, bɨ́ɔɔ́ bâm, mě lɛ́ɛ́ bɨ́n ó:

¹⁶bɨ̌n sâʼ mimbi mi bʉ̂r mínɨ̌ mejóʼo, bé e bʉr o bé e boo nɔ́ɔ́ dí eséa e nkul bá.

¹⁷Me lɨ́ ejóʼo émbɨa lɨ́ epyál mé Stéfanas, Fortunátwis, ndu e Akayɨ́kus. Bé á si dwe me bisá bí émbɨa bɨ́n á be adwe me bí.

¹⁸Bé ntémé, bé á si baʼa dwe lémé wâm egbalá mpʉ bé á nyɛɛ dwe myaá mín lǎ yɨ́. Gwá sêʼle gá mbi bʉ̂r baá.

¹⁹Bʉr ó Mbɛ̌r-Nzyɛ̌m dí ɨ́ sí Azía bá, bé lɨ́ esoho bɨ́n. Akílas, bé e Prǐska ti e bʉr ó Mbɛ̌r-Nzyɛ̌m dí egwɨ̂hla ɨ́ mbɛ̌r wɔ́ɔ́ bá, bé lɨ́ esoho bɨ́n ɨ́ díé mé Tî Yésʉs ntémé.

²⁰Bɨ́ɔɔ́ bɨ́n le okɛ́l bɨ́n bɨ́bɛ̂h dí kâʼ bá, bé lɨ́ esoho bɨ́n. Bɨ́báráá gá páʼ nyɨ́n, mebárá mé bɨ́ɔɔ́ e bɨ́ɔɔ́.

²¹Mě kʉ́ cɛma ékǎn lɨ̂ʼ ó e mbó wâm: Meswɨhlɨ mé Pɔ̂l.

²²Mʉ̂r bé akpɛl Tî Yésʉs nó, Nzyɛ̌m sʉ́ʼoo nye meswomlʉ. Maranáta: Dâ ɛ̌, ntáʼ!

²³Tî Yésʉs, nye sʉ́ʼoo bɨ̌n metyɛʼ me mpóm.

²⁴Me lɨ́ ekpɛl bɨ́n bɨ́bɛ̂h ɨ́ mpúhlá gá nyɨ́ná e Yésʉs-Krîst. Amɛn.