Read Koonzime 1 Kórɨnt 2 Bible Online

1 Kórɨnt 2 - Koonzime bible

1 Kórɨnt 2

¹Bɨ́ɔɔ́ bâm! Okɛ́l bâm! Ɨ́ jɔʼ mé á nze kwá nyɨ́n lɨ́ enzě pâʼla bɨ́n lwǐb ódîm mé Nzyɛ̌m yɨ́, me á bé alwib e mekǎn mé á be ɨ́ buú kɔbla má, nkʉ̂ e lwǐb ócwóó.

²Ebě, me á tíʼe ɨ́ lémé wâm ó, me ójaá lɛ́ɛ bɨ́n ó, njɨ sá dí edumo e Yésʉs-Krîst yɨ́, Yésʉs waá á dwe ɨ́ kolôs nyá.

³Nó yaá ó mé á pyâl kwá nyɨ́n mpʉ̌ tyɛʼbol, lwɨ́ŋlá e bʉ́á le mesâʼ yɨ́.

⁴Lɛ́ʼlá wâm ndu e lwibá mílɔ̌b mé Nzyɛ̌m wâm, byé á bé abe bílwǐb bi dí ɨ́ tɨ́ŋ le ocwóó ó sí yɨ̂ʼ bí. Sá yé á tíne bɨ̌n ó, bɨ̌n bûʼlaa lɛ́ʼlá waá yɨ́, yé á be ó, bisyɛ́ɛlǎ Sísǐm mé Nzyɛ̌m wé á sâ e nkul nyé bí.

⁵Nó ó bɨ́n bé á nʉa pîm búʼó ɨ́ nkul dí eduho kwá mé Nzyɛ̌m nyɨ́, abe nyaá dí eduho lɨ́ ocwóó ó bʉ̂r nyɨ́ yɨ́.

⁶Ɨ́ jɔʼ bɨ́h dí elɛ̂ʼle bʉ̂r o mû sí tɔ́ma bá yɨ́, bɨ̌h bé lɨ́ edwe bé lɛ́ʼlá ócwóó. Mě damá lɛ́ɛ nó, lɛ́ʼlá waá, wé abe yɨ́ɛ waá dí lwɨ́ŋlá le ocwóó ó sí yɨ̂ʼ wɨ́. Wé abě lɛ́ʼlá bínkáatir bí sí yɨ̂ʼ dí edwe bʉ̂r wɨ́. Tó kœb ó, binkáatir byaá, byé mû ó kúno egbahɔɔ.

⁷Bɨ̌h lɛ́ʼlé ó, ocwóó mé Nzyɛ̌m dí solá wɨ́. Wé ó sá Nzyɛ̌m á sol bʉr yɨ́. Nye dína apǎ kuho kʉ́ e sí, nye á boo tíʼe ɨ́ lémé wé ó, nyě dwé mɨ́ná gá ó ocwóó waá, ti e kûm tɨ̂.

⁸Abe e yʉ́ʉ́ nkáatǐr sí yɨ̂ʼ, yé á gʉ́a ocwóó waá. Yé bé binkáatir byaá, byé á bě sí gʉ́a wé nó, lɛ́ɛ́, byé á bé abomlo Tî Yésʉs e binzâŋ, le ebɨ̂n nyé ɨ́ kolôs kʉ́. Nyɨɛ ó dí Tî dí e kûm nyá.

⁹Tó kœb ó, yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Sá mʉ̂r ngwár dína apǎ jóʼo, nkʉ̂ bee yɨ́, sá mʉ̂r dí apǎ jwɨʼ ɨ́ lémé wé lʉ́ʉ́ dʉ́o yɨ́, Nzyɛ̌m á komlo yé ó, lɨ́ esú é bʉ̂r o dí ekpɛl nyé bá.

¹⁰Mɨná gá ó dí baá Nzyɛ̌m á gwîh sá yɨ́yɛ̂h e nzɨ̌ Sísǐm wé bá. Sísǐm wé, wé ó dí egʉ́ǎ sá yɨ́yɛ̂h, damá jóʼo bíjwɨʼ mé Nzyɛ̌m bi dí nye ɨ́ lémé wé tʉ́ŋlʉ̌ bí.

¹¹Ɨ́ nkǒ páʼ mʉ̂r, sá dí egʉ́a mípahlá mi mʉ̂r yɨ́, yé ó njɨ sísǐm wé dí ɨ́ nyʉ̂l nyé wɨ́. Nó ntémé, yé ó njɨ Sísǐm mé Nzyɛ̌m wé omér ó dí egʉ́a mípahlá mé Nzyɛ̌m.

¹²Mɨná gá bɨɛ, bé á bé abéɔɔ gá eleme e dí ejwɨ́ɨ̌ sí yɨ̂ʼ lɨ́. Mɨná bé á bi gá ó, Sísǐm dí eduho kwá mé Nzyɛ̌m wɨ́. Sá tɨ̂ʼ ó mɨ́ná ógʉ́a gá metʉ́m mɨ́mɛ̂h Nzyɛ̌m á lómlo mɨná gá má.

¹³Bɨ̌h dwé bɨ́n ó, milɛ́ʼlá myaá. Bɨ̌h bé alwib e mekǎn mé ócwóó ó sí yɨ̂, njɨ e mekǎn Sísǐm mé Nzyɛ̌m dí edwe bɨ́h má. Nó yaá ó bɨ́h dí ekala bɨ́n milɛ́ʼlá Sísǐm mé Nzyɛ̌m dí enyɛɛ́ dwe bɨ́h mí yɨ́. Sísǐm waá ntémé ó dí edwe bɨ́h mekǎn bɨ́h jálá le elwib má.

¹⁴Mʉr dí tʉ̂toʼó, abe e Sísǐm mé Nzyɛ̌m nyá, nyé abe e nkul ebi ótyeetye dí eduho e Sísǐm waá wɨ́. Wê nye ó ogʉ̌. Nyé abe e nkul egʉ́a wê, ebě, mʉ̌r jaá gʉ́a wé ó, njɨ ɨ́ lɔ̌b nkûl Sísǐm mé Nzyɛ̌m dí e nye nyɨ́.

¹⁵Mʉr dí e Sísǐm mé Nzyɛ̌m nyá, óbɛ̌m tíʼě lɔ̌b sá yɨ́yɛ̂h. Sâ gwár, mʉr swîh abe e nkul etíʼě lɔ̌b wé.

¹⁶Ebě, yê cɛmá ó: Nzé dí egʉ́a mípahlá mé Dâ? Nzé dí e nkul edwe nyé metwɨ́ɨ́? Tó kœb ó, mɨná gá bɨɛ ó dí e mipahlá mé Krîst ɨ́ miléme!