Read Koonzime 1 Kórɨnt 3 Bible Online

1 Kórɨnt 3 - Koonzime bible

1 Kórɨnt 3

¹Bɨ́ɔɔ́ bâm! Okɛ́l bâm! Lɨ́ otyeetye, me á bé alwib e bɨ̌n mpʉ mʉ̂r jálá le elwib e baá o dí e Sísǐm mé Nzyɛ̌m bá yɨ́. Me á nzoo lwilwib e bɨ̌n ó, mpʉ mé jálá le elwib e bʉr o dí tʉ̂toʼó, abe e Sísǐm mé Nzyɛ̌m bá yɨ́. Me á lwib e bɨ̌n ó, mpʉ̌ sá lɛ́ɛ́, bɨ̌n bé á be ó bwá ó ntwǒm bé alúno pûhla e Krîst bá.

²Me á si dwe bɨ̌n medíbé mé ébêl, abe méde mempâ, ebě, bɨ̌n bé á bé abe e nkul ekoʼo mé lɨ́ ede. Nzě kumo ɨ́ báánâ, bɨ̌n bé abe e nkul ekoʼo mê,

³ebě, bɨ̌n tiʼe ó mpʉ bʉ̂r ó sí yɨ̂. Bɨ̌n bé lɨ́ esâ nzwíí le egœ́a páʼ nyɨ́n. Nzê bɨ̌n bé abee náǎ ó, bɨ̌n dína ó, lɨ́ ekʉ́ tiʼě mpʉ bʉ̂r ó sí yɨ̂ʼ ɛ̌? Bɨ̌n bé lɨ́ ekʉ́ dû kʉ̌ tyen bʉ̂r ó sí yɨ̂!

⁴Jɔʼ nyâʼ mʉ̂r ɨ́ sɔ́má yɨ́n lɛ́ɛ́ ó: «Me ó mpʉ́n mé Pɔ̂l,» nyʉ́ʉ́, nye ó: «Mɛm, me ó mpʉ́n mé Ápolos» yɨ́, nzê bɨ̌n bé abee náǎ ó, bɨ̌n sá ó mpʉ bʉ̂r ó sí yɨ̂ʼ ɨ̌?

⁵Lɨ́ otyeetye, nzé dí Ápolos? Nzé dí Pɔ̂l? Bɨ̌h bé ó osúʼa bɨ́n, bʉr o b'á be bɨ̌n e nyɔm ó, bɨ̌n bûʼlaa bá. Mʉr nyɨnyɛ̂h, nye lɨ́ esâ syɛ́ɛla Tî Yésʉs á dwe nye ó, nye sâʼ yɨ́.

⁶Mɛm, me á si be mpeʼ; Ápolos nyɨɛ nzě sʉ médíbé. Sâ gwár, Nzyɛ̌m ó b'á sâ ó, yé páhaa.

⁷Nó ó dí elɛ̂ʼle ó, mʉr dí ebe ndu e waá dí esʉ médíbé nyá, bé abě sɔ̂ʼ. Mʉr ngwár dí ejala e dúu nyá ó dí Nzyɛ̌m, waá á sâ ó, mpeʼ yaá, yé páhaa nyá.

⁸Mʉr dí ebe nyá, bé e waá dí esʉ médíbé nyá, bé ó jwɨʼ gwár. Nzyɛ̌m ódwe mʉ̂r myɛ́na ó, dû mpʉ̌ syɛ́ɛ́ nyé mʉr tɨ̂ʼ á séa yɨ́, yé á be yɨ́.

⁹Ebě, bɨ̌h séá ó, ɨ́ mpúhlá nyɨ́h, ɨ́ syɛ́ɛ́ mé Nzyɛ̌m. Nó ó, bɨ̌n bɨɛ ó dí pemé mé Nzyɛ̌m. Bɨ̌n ntémé bé ó mpáh Nzyɛ̌m.

¹⁰Metyɛʼ me mpóm mé Nzyɛ̌m ó b'á sâ ó, me séaa mpʉ swîm mimbɛ̌r yɨ́. Me á si tyêl nkan. Nyʉ́ʉ́ mʉ̂r nyɨɛ nzě sumo tɨ̂. Yé jala ó, mʉr nyɨnyɛ̂h sâʼ ocwóó ɨ́ mbǐ sumá nyé dí esumo wɨ́.

¹¹Ebě, nkan mbɛ̌r mû ó sí tyɛ̂b. Nkan nyaá, nye ó dí Yésʉs-Krîst. Abe e mʉr dí e nkul ekǎ tyêl nyaá swîh.

¹²Bâʼ bʉ̂r, bé ósumo ɨ́ nkan nyaá ó e gʉ̂l, nkʉ̂ e nkóhó mɔnɨ́, nkʉ̂ e mekóʼ méntyɛnwa. Bʉ́ʉ́ bʉ̂r bɨ́ɛ, bé ósumo e bilɨ́, nkʉ̂ e mebʉ̌.

¹³Syɛ́ɛ́ mʉ̂r nyɨnyɛ̂h dí eséa yɨ́, yé ónyɨ̂n ɨ́ ponó ɨ́ dʉ́ó lé étíʼ é mílɔ̌b, ebě, nyɔ̌m sá yɨ́yɛ̂h, wé ónyɨ̂n ɨ́ sʉ́lʉ́lʉ́ ó, ɨ́ móhó waá. Nyɔm tɨ̂, wé nyɨ́nyɨ́n ó, ɨ́ siʼe ngá lɛ̂ʼlě nyɔ̌m syɛ́ɛla mʉ̂r yɨ́. Syɛ́ɛla yé sí dûhwo yɨ́ɛ siʼe yaá nó, lɛ́ɛ́, syɛ́ɛla yaá, yé á kʉ be ó e nyɔm lɨ́ esú mé Nzyɛ̌m.

¹⁴Yé bé mʉr á be ó sí sumo ɨ́ nkan e sá dí edûhwǒ siʼe mbɨ̂mbɨá yɨ́ nó, nye óbi myɛ́na mé tɨ̂.

¹⁵Yé sí kǎ be ó, syɛ́ɛla mʉ̂r, yɨ́ díʼe ɨ́ siʼe yaá nó, mʉr waá ódímle myɛ́na mé ɨ́ jɔʼ yaá. Nyɨ́haá ósyɛbɔɔ ɨ́ siʼe. Sâ gwár, nye óbe ó mpʉ mʉ̂r á kpɛ́ɛ, ntaǎ siʼe nyá.

¹⁶Nzê bɨ̌n bé agʉ́a ó, bɨ̌n kʉ́ bě tyeetye ó mpáh Nzyɛ̌m ɛ̌? Nzê bɨ̌n bé lɨ́ ejéʼe ó, Sísǐm mé Nzyɛ̌m, wɨ́ komlo ódiá wé ɨ́ bɨ̌n ɛ̌?

¹⁷Mʉ̂r gbɛ́ɛ́ mpáh Nzyɛ̌m nyaá nó, Nzyɛ̌m dímle nyê, ebě, mpáh Nzyɛ̌m, nye ó sá dí ti yɨ́. Bɨ̌n ó dí mpáh nyé nyaá.

¹⁸Mʉ̌r sá alêh. Mʉ̂r ɨ́ sɔ́má yɨ́n sí láa ó, nye ó twóó ɨ́ nkǒ páʼ bísá bí jɔʼ yɨ̂ʼ nó, nye nyɛ́ɛ dǐ gʉ̌. Nyé okǎ bi ócwóó ómpâ ɨ́ jɔʼ yaá.

¹⁹Ebě, ocwóó ó sí yɨ̂, wé ó ogʉ̌ ɨ́ míh mé Nzyɛ̌m. Nó yê cɛmá ó: Nzyɛ̌m mɨ́mɛ́r ócwóó ó bʉ̂r ó, ɨ́ mpila ócwóó yɔ́ɔ́.

²⁰Yê cɛmá ntémé ó: Dâ, nye lɨ́ egʉ́a ó, mipahlá mí ócwóó ó bʉ̂r, myé ó tʉ̂toʼó ɨ́ páʼ wé.

²¹Nó, mʉ̌r sá amɛɛla ɨ́ páʼ bʉ̂r, ebě, sá yɨ́yɛ̂h, yé ó yaá yɨ́n:

²²Damá bě Pɔ̂l, Ápolos, Kefâs, sí, twiʼ, eswie, jɔʼ yɨ̂, bijɔʼ bi dí enze bí, tótôʼ: sá yɨ́yɛ̂h, yé ó yaá yɨ́n.

²³Nó ó, bɨ̌n bɨɛ gúmó ó e Krîst. Krîst nyɨɛ gúmo e Nzyɛ̌m.