Read Koonzime 1 Kórɨnt 4 Bible Online

1 Kórɨnt 4 - Koonzime bible

1 Kórɨnt 4

¹Bɨ̌n bé ɨ́ jala le eláa bɨ́h bɨɛ mpʉ ósyɛ̂l o mésâ mé Krîst, bʉr o dí egʉ́a ébaʼlě lwǐb ódîm mé Nzyɛ̌m bá.

²Tó kœb ó, sá bé dí edî e mʉr dí ebaʼlě mbɛ̌r nyá yɨ́, yé ó, nye díʼee mʉr ebúʼlɔɔ.

³Ɨ́ páʼ wâm, mé asyɛ̌l bá ó, bɨ̌n lwíbɨɨ lɔ̌b wâm, nkʉ̂ ó, nyʉ́ʉ́ mpáh milɔ̌b swîh lwíbɨɨ wê. Mɛm ntémé, mé atíʼě lɔ̌b wâm mɛm mʉr tɨ̂.

⁴Mipahlá mí lémé wâm, myé anwâhle mê. Nó yé alɛ̂ʼle ó, mé abe e mebě. Tî Yésʉs ó dí etíʼě lɔ̌b wâm.

⁵Ɨ́ tɨ̂ʼ ɨ́, alɨ̌ tíʼe gá lɔ̌b mé nyʉ́ʉ́ mʉ̂r ɨ́ jɔʼ yé dí apǎ pyâl jɔʼ élab yɨ́. Bónáá gá ó, Tî Yésʉs, nye ntâʼ. Nyé opyêl sá dí lɨ́ edúrʉ́ʉ́ yɨ́, tyen yé ɨ́ myɛ́n. Nyé ogwîh mípahlá mi dí misolá ɨ́ milémé mí bʉ̂r mí. Jɔʼ yaá ó Nzyɛ̌m ódwe mʉ̂r nyɨnyɛ̂h kûm jálá e né nyɨ́ yɨ́.

⁶Bɨ́ɔɔ́ bâm! Okɛ́l bâm! Mekaná mé dí ecɛma bɨ́n mâ, mé e nyɔm lɨ́ esú lɨ́n. Bɨ̌h le Ápolos, bé ó dí bimveʼle bi dí elɛ̂ʼle bɨ́n bí. Bɨ̌h lɛ́ʼlé bɨ́n tɨ̂ʼ ó, mʉr, nyé ajala le enkɛ́ɛ nyʉ̂l, nkʉ̂ sêʼle nyâʼ mʉ̂r, nkʉ̂ waá nyʉ́ʉ́. Mě dwé bɨ́n mveʼle yaá ó, bɨ̌n jɨ́ʼɨɨ sá kɨkɛna yɨ̂ʼ dí elɛ́ɛ ó: «Mʉr antaa gá sá dí cɛmá» yɨ́.

⁷Nzé nyɨɛ á bɨ̂r gua kʉ́, laa bʉ̂r bɨ́bɛ̂h ɛ̌? Yé gó dí e yé, gó á be abǐ biʼée yɨ́? Yé bé sá yɨ́yɛ̂h gó dí e yé yɨ́, go á bi yé ó, biʼée nó, gǒ nkʉ́ná mpʉ̌ sá lɛ́ɛ́, yé abě ndwéá ɨ́ yé?

⁸Bɨ̌n mû ó e sá yɨ́yɛ̂h bɨ́n á gwɨgwɨ̂m yɨ́. Bɨ̌n mû ó ɨ́ diá mépwaʼ. Bɨ̌n mû ó sí tyélɔɔ ɨ́ dǐ mínjwɨ́ɨbʉr, bɨ̌h bɨɛ l'apǎ be myê. Á dǐ bee ó, bɨ̌n mû ó sí dwira mínjwɨ́ɨbʉr mimpâ, mɨná gá óbɛ̂h nkʉ̂ di gá myé ɛ̌!

⁹Ebě, mbeá wâm, wé ó, Nzyɛ̌m á si tyêl bɨ̌h, bʉr o mílʉ́mlʉ́ bé, ɨ́ tyé bʉ̂r o jálá le ebuú pyaŋɔɔ, baá bé ókpɛl éjʉ̂ téme bʉr bá. Bɨ̌h mû ó, sí tyélɔɔ ɨ́ míh mé bʉ̂r mpʉ bʉ̂r o jálá le esiŋlɔɔ bá, táare e bʉr ó sí yɨ̂, kumo e beéngeles.

¹⁰Bɨ̌h mû ó bigʉ̌ lɨ́ esú mé Krîst; bɨ̌n bɨɛ, bé ó mipɨpɨ́ʼ ɨ́ nye. Bɨ̌h bé ó bityɛʼbol; bɨ̌n bɨɛ, minjɨ́h mí bʉ̂r. Bɨ̌h bé lɨ́ epyéhɔɔ; bɨ̌n bɨɛ, bé lɨ́ edweŋɔɔ̌ dúu.

¹¹Kumǒ kumáa ɨ́ jɔʼ yɨ̂, bɨ̌h bé lɨ́ edwe nzâ, ti e dwéh médíbé. Yé lɨ́ esáa bɨ́h mimbôr. Bé lɨ́ ebî bɨ́h. Bé lɨ́ edwih bɨ́h ɨ́ yɨ̂ʼ gúmo, tyen ɨ́ yʉ́ʉ́.

¹²Bɨ̌h bé lɨ́ eséǎ syɛ́ɛ́ dí ɨ́ lele lele yɨ́, lɨ́ esáǎ twiʼ yɨ́h, bɨ̌h bʉr o tɨ̂. Jɔʼ bé dí elwɨ́ɨ bɨ́h yɨ́, bɨ̌h bɨɛ̌ sʉ bé ó, metyɛʼ me mpóm. Jɔʼ bé dí etíble bɨ́h yɨ́, bɨ̌h bé lɨ́ edûhwo bê.

¹³Jɔʼ bé dí elwib e bɨ̌h ebébe yɨ́, bɨ̌h bɨɛ̌ yɨyalá e bé ó e léme ɨ́ piiia. Bé láá bɨ́h ó mpʉ ékunuu é sí yɨ̂, nkʉ̂ sá mébomo, nzě kumo ɨ́ báánâ.

¹⁴Mé acɛma bɨ́n mpʉ́nʉ̌ lɨ́ ejwɨʼ ó, mě gbá ó bɨ̌n sôn ɨ́ nyʉ̂l. Mě cɨ́l bɨ́n ó, cɨ́lɨ́ɨ, jwɨʼ gwár e gwár e mpʉ mé jálá le esâ bwán bâm mé dí ekpɛl bá yɨ́.

¹⁵Bɨ̌n damá be le otɨ́a otɔ́ɔ́sin kám ɨ́ twiʼ yɨ́n e Krîst, bɨ̌n bé ó njɨ e sɔ́ŋ ngwár. Mɛm, me ó dí sɔ́ŋ wɨ́n á byâ bɨ̌n nyá. Ɨ́ páʼ twiʼ yɨ́n e Yésʉs-Krîst, me ó b'á byâ bɨ̌n lɨ́ enze le elɛ́ɛ bɨ́n Mbɨambɨa Lɔ́ɔ.

¹⁶Nó ó, me lɨ́ ejɨʼla e bɨ̌n ó, bɨ̌n báŋaa me.

¹⁷Sɨ́ǎ yaá ó mé á lómlo bɨ̌n Timotɛ̂, mwâ kpɛ̌l wǎm yɨ́. Nye ntémé ó dí mʉr ebúʼlɔɔ ɨ́ Tî Yésʉs. Nye ó ngá jɨm bín bitɔŋlá ɨ́ kʉ̌ tyen mé dí edû ɨ́ mpúhlá nyɨ́h e Krîst wɨ́. Mě lɛ́ʼlé Mbɛ̌r-Nzyɛ̌m ɨ́ gúmó yɨ́yɛ̂h ó, bé dúʼoo kʉ̌ tyen ngwár waá.

¹⁸Bʉ́ʉ́ bʉ̂r ó sɔ́má yɨ́n, bé mû ó lɨ́ enkɛ́ɛ ményʉ̂l, bɨ́ɛ lɨ́ ejwɨʼ ó, me ákǎ nzě bee bɨ́n.

¹⁹Sâ gwár, Tî Yésʉs sí kpɛl nɛ́ɛ: me ónze kwá nyɨ́n kám e kám. Jɔʼ yaá ó mé ngá nzě gʉ́a, abě njɨ melab mɨ́n, bʉr o dí ebuú nkɛ́ɛ ményʉ̂l bá. Me ónzě gʉ́a ntémé bím nkûl bɨ́n dí e nye nyɨ́.

²⁰Ebě, bisyɛ́ɛla bí Mpóʼo mé Nzyɛ̌m, byé adwɛ̂ʼ mélab. Byé buú dwɛ̂ʼ ó, mbi nkûl mʉ̂r dí e nye nyɨ́.

²¹Bɨ̌n kpɛl yɨ́ɛ yé? Nzê me ntâʼ kwá nyɨ́n e ngáhá ɛ̌? Nzê e lémé kpɛ̌l ti e metala ɛ̌?