Read Koonzime 1 Kórɨnt 5 Bible Online

1 Kórɨnt 5 - Koonzime bible

1 Kórɨnt 5

¹Bʉr bé lɨ́ ejóʼo bé lɨ́ elɛ́ɛ ɨ́ gúmó yɨ́yɛ̂h ó, yé e bimolá ɨ́ sɔ́má yɨ́n, bimolá sâ bínwérédé, byaá óhááden dí abe lɨ́ esâ bí. Nyʉ́ʉ́ mʉ̂r ɨ́ sɔ́má yɨ́n, nye lɨ́ ebánǎ tiʼe e myaá sɔ́ŋ.

²Bɨ̌n ntémé bé ɨ́ buo élɛ́ɛ e nyʉ̂l! Yé á gwa mbɨa ɨ́ páʼ wɨ́n ó, mpa milémé mín, myé á si lóno lɨ́ ebúʼ. Waá á sâ syɛ́ɛla yaá nyá, soʼ gá nye ɨ́ sɔ́má yɨ́n.

³Ɨ́ wâm pâʼ, mě damá di e ncɛrá e bɨ̌n ɨ́ nkǒ páʼ nyʉ̂l, me yɨ́ɛ ó, gúmo gwár e bɨ̌n ɨ́ nkǒ páʼ sísǐm. Nó ó, mɨ́ boó tíʼě lɔ̌b mʉ̂r waá ɨ́ díé mé Tî gá wɨ́ná Yésʉs. Yé ó mpʉ̌ sá lɛ́ɛ́, me ó ɨ́ sɔ́má yɨ́n. Ɨ́ jɔʼ bɨ́n ngá báʼǎ syɛŋa, mɛm ntémé tɨ̂ʼ ɨ́ nkǒ páʼ sísǐm, nkul me Tî gá wɨ́ná Yésʉs tɨ̂ʼ ɨ́ mɨná gá yɨ́,

⁵bɨ̌n e tyén mʉ̂r waá kwá mé Sátan, ó Sátan ndámaa nye ɨ́ páʼ njwɨr myâ gá wɨ́ná. Ɨ́ páʼ sísǐm wé, nyé otiʼe ɨ́ móhó Tî gá wɨ́ná óbáʼǎ nze wɨ́.

⁶Yé ambɨa ɨ́ jɔʼ bɨ́n dí enkʉ́na ɨ́ lɔ̌b wɨ́n, bɨ̌n bʉr o tɨ̂ʼ yɨ́, ebě, kɨkɛna lɛ́ɛ́ ó: «Levwîr damá twâʼwo, yé óbánǎ sâ ó, blêr yɨ́yɛ̂h, yé nkáŋlaa.»

⁷Pɛʼɛɛ gá njʉ̌m levure waá, ó bɨ̌n líʼɨɨ miléme ɨ́ púpúpú. Nó ó bɨ́n ngá be e blêr dí edwán, abe e levure yɨ́. Me lɨ́ egʉ́a ó, bɨ̌n mû ó boó be nó, ebě, Krîst á be ó sí tíʼɔɔ tâŋ mâ nteme, le esâ ó, mɨná bwálaa gá nzɔɔ mâ nteme nyé.

⁸Mɨná bé ayɨ́ bwal gá nzɔɔ gá nyɨ́ná nyaá lɨ́ edě blêr dí e njʉ̌m levure yɨ́. Blêr yaá, yé mveʼle ó, ebébe é léme le jélé. Mɨná bwálaa gá nzɔɔ gá nyɨ́ná lɨ́ edě blêr dí abe e levure yɨ́. Yɨ́haá blêr, yé ó lwǐb ótyeetye dí apûhla e mikóo yɨ́.

⁹Ɨ́ mekaná mé á cɛma bɨ̌n má, me á lɛ́ɛ e bɨ̌n ó, bɨ̌n ayɨ́ be e ndwáala le osyɛ̂l o bímolá.

¹⁰Me á bé alɛ́ɛ ó, «osyɛ̂l o bímolá bɨ́bɛ̂h», nkʉ̂ «bʉr o bígwɨ́má bɨ́bɛ̂h», nkʉ̂ «bʉr bɨ́bɛ̂h o dí edɛn bímɔnɨ́ byé onkán bá», nkʉ̂ «baá dí edwe bíkpɛʼkpɛ̂ʼ bí ónzyɛ̌m kûm bá bɨ́bɛ̂h». Lɨ́ esyɛ̂hle bé bɨ́bɛ̂h, yé á gwa jɨ ó, mɨná pʉ́ʼaa gá ɨ́ sí yɨ̂!

¹¹Me bé ó, me tílaa bɨ̌n ó, bɨ̌n ayɨ́ be e ndwáala e mʉr dí elɛ́ɛ ó, nye ó mbûʼla, nyɨɛ yɨ́ɛ lɨ́ esâ bímolá, nkʉ̂ waá dí e mpuo bigwɨ́má nyá, nkʉ̂ mʉr dí edwe bíkpɛʼkpɛ̂ʼ bí ónzyɛ̌m kûm nyá. Bɨ̌n bé ayɨ́ be e ndwáala e mʉr melwɨ́ɨ, nkʉ̂ nyʉnyóʼ, nkʉ̂ ndíblʉ̌. Bɨ̌n bé ayɨ́ pûhla mébô lɨ́ ede e mimbi mi bʉ̂r myaá.

¹²Yé adwɛ̂ʼ mɛ̂m ó, me tíʼaa ohááden milɔ̌b. Bɨ̌n bé ɨ́ jala le etíʼe mílɔ̌b ó, myaá mi bʉ̂r ó Mbɛ̌r-Nzyɛ̌m. Nzê yé abe nó ɛ̌?

¹³Nzyɛ̌m ó ngá tíʼe mílɔ̌b mí óhááden. Yê cɛmá ɨ́ Mekaná mé Nzyɛ̌m ó: «Soʼ gá bébebébe mʉr ɨ́ sɔ́má yɨ́n tʉ́ŋlʉ̌.»